ದಿನಾಂಕ ೨೧.೦೨.೨೦೧೯ ರ ಗುರುವಾರ ಮಧ್ಯಾಹ್ನ ಊಟದ ಸಮಯದ ನಂತರ ಕೊಠಡಿಗೆ ತೆರಳುವ ಮುನ್ನ ನಮ್ಮ ಮಗು ಚಂದನ್ ಗೌಡ ಬಿದ್ದು ಎಡಗೈನ ಮೂಳೆ ಮುರಿದಿದ್ದು ಸಂಜೆ ನಾಲ್ಕು ಗಂಟೆ ಹತ್ತು ನಿಮಿಷಗಳ ವರೆಗೂ ಶಾಲಾ ಸಿಬ್ಬಂದಿಯಾಗಲಿ ಶಾಲಾ ಶಿಕ್ಷಕರಾಗಲಿ ಆಡಳಿತ ಮಂಡಳಿಯಾಗಲಿ   ನೋಡಿಕೊಳ್ಳದೆ ಪ್ರತಿ ದಿನ ಕಳುಹಿಸುವ ಬಸ್ ನಲ್ಲಿ ಕಳುಹಿಸದೆ ನಾಲ್ಕು ಗಂಟೆ ಹತ್ತು ನಿಮಿಷಗಳ ನಂತರ ನೋಡಿಕೊಂಡು ಪ್ರಥಮ ಚಿಕಿತ್ಸೆಯನ್ನು ಮಾಡದೇ ಏಕಾಏಕಿ ಹಾಗೆಯೇ  ಬೇರೊಂದು ಬಸ್ಸಿನಲ್ಲಿ ಮನೆಗೆ ಕಳುಹಿಸುತ್ತಾರೆ .

ನಾಲ್ಕು ಗಂಟೆ ಹತ್ತು ನಿಮಿಷಕ್ಕೆ ಫೋನ್ ಮಾಡಿದ ಶಾಲೆಯವರು ನಿಮ್ಮ ಮಗುವಿಗೆ ಕೈ ಏಟಾಗಿದೆ ನೋಡಿಕೊಳ್ಳಿ ಎಂದಷ್ಟೇ ಹೇಳಿರುತ್ತಾರೆ .

ಮಗು ನೋವಿನಿಂದ ಚೀರಾಟ ಮಾಡುತ್ತಿದ್ದುದನ್ನು ಗಮನಿಸಿದ ನಾವು ವಿಚಾರಿಸಿದಾಗ ಕೈ ತೋರಿಸಿ ಜೋರಾಗಿ ಅಳಲಾರಂಭಿಸಿತು,  ಕೈ ಬಾಳೆ ಕಂಬದಂತೆ ದಪ್ಪವಾಗಿ ಊದಿಕೊಂಡಿದ್ದು ನಂತರ ಸರ್ಕಾರಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಅಲ್ಲಿ ವೈದ್ಯರು ಲಭ್ಯವಿಲ್ಲದ ಕಾರಣ ಬಿ ಜೆ ಲಿಂಗೇಗೌಡ ಆಸ್ಪತ್ರೆಗೆ ತೆರಳಿ ಎಕ್ಸರೇ ಮಾಡಿಸಿದಾಗ ಎಡಗೈ ಮುಂಗೈ ಮೂಳೆ  ಮುರಿದಿರುವುದಾಗಿ ತಿಳಿದು ಬಂತು..

ಈ ಎಲ್ಲಾ ಪ್ರಕ್ರಿಯೆಗಳನ್ನು ಗಮನಿಸಿದ ನಾವು ತಾಲ್ಲೂಕಿನ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಗಮನಕ್ಕೆ ತಂದಿದ್ದು ಅದೇ ಸಮಯದಲ್ಲಿ ಶಾಲಾ ಮುಖ್ಯೋಪಾಧ್ಯಾಯರು ಮತ್ತು ಮ್ಯಾನೇಜರರನ್ನು ಕರೆಸಿ ಇನ್ನು ಮುಂದೆ ಹೀಗಾಗದಂತೆ ಎಚ್ಚರಿಕೆ ವಹಿಸಬೇಕೆಂದು ಜೊತೆಗೆ ಇಂದು ಆಗುವ ಖರ್ಚುಗಳನ್ನು ನೋಡಿಕೊಳ್ಳಬೇಕೆಂದು ಸೂಚಿಸಿದರು.

ನಮ್ಮ ಮಗುವಿಗೆ ಈ ಶಾಲೆಯಲ್ಲಿ ಆದ ಅವಘಡವು ಮತ್ತೊಂದು ಮಗುವಿಗೆ ಆಗಬಾರದೆಂಬ ದೃಷ್ಟಿಯಿಂದ ಹಾಗೂ ಬೇರೆ ಶಾಲೆಯಲ್ಲೂ ಸಹ ಆಗಬಾರದೆಂಬ ಉದ್ದೇಶದಿಂದ ನಾನು ತಾಲ್ಲೂಕಿನ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿಗೆ ರಾಮನಗರದ ಉಪ ನಿರ್ದೇಶಕರಿಗೆ ಹಾಗೂ ಚನ್ನಪಟ್ಟಣದ ಗ್ರಾಮಾಂತರ ಪೊಲೀಸ್ ಠಾಣೆಗೆ ಲಿಖಿತ ದೂರು ನೀಡಿದ್ದೇನೆ ಎಂದು ಪೋಷಕರಾದ ಸುಷ್ಮಾ ಮತ್ತು ನಾಗೇಂದ್ರ ತಿಳಿಸಿದರು.

ನನ್ನ ಮಗ ಓಟದ ಸ್ಪರ್ಧೆಯಲ್ಲಿ ಪ್ರಥಮ ಸ್ಥಾನ ಬಂದಿದ್ದು ಆರ್ ಟಿ ಇ ಮಗುವೆಂಬ ಕಾರಣಕ್ಕಾಗಿ ಅವನನ್ನು ಪರಿಗಣಿಸದೇ ಅವನ ಹಿಂದೆ ಬಂದ ಮಗುವಿಗೆ ಪ್ರಥಮ ಸ್ಥಾನವನ್ನು ನೀಡಿರುವುದನ್ನು ಖಂಡಿಸಿದ ಅವರು ಈ ಶಾಲೆಯಲ್ಲಿ ಆರ್ ಟಿ ಇ ಅಡಿಯಲ್ಲಿ ಬಂದ ಮಕ್ಕಳಿಗೆ ಒಂದು ಪಾಠ ಬೇರೆ ಮಕ್ಕಳಿಗೆ ಒಂದು ಪಾಠ ಹಾಗೂ ಸೌಲಭ್ಯಗಳಲ್ಲೂ ತಾರತಮ್ಯ ಮಾಡುತ್ತಿರುವುದು ಮಕ್ಕಳ ಮನಸ್ಸಿನ ಮೇಲೆ ದುಷ್ಪರಿಣಾಮ ಬೀರುತ್ತಿದೆ ಎಂದರು.

ಖಾಸಗಿ ಶಾಲೆಗಳಲ್ಲಿ ಆರ್ ಟಿ ಇ ಮತ್ತು ಬೇರೆ ಮಕ್ಕಳಿಗೆ ತಾರತಮ್ಯ ಮಾಡುತ್ತಿರುವುದರಿಂದ  ಸಂಬಂಧಿಸಿದ ಅಧಿಕಾರಿಗಳು ಸೂಕ್ತ ಕಾನೂನು ಕ್ರಮ ಕೈಗೊಂಡು ನಮಗೆ ನ್ಯಾಯ ಒದಗಿಸಬೇಕು ಹಾಗೂ ಸೂಕ್ತ ಪರಿಹಾರ ಕಲ್ಪಿಸಿಕೊಡಬೇಕೆಂದು ಪೋಷಕರು ಅಧಿಕಾರಿಗಳಿಗೆ ದೂರು ನೀಡುವ ಮೂಲಕ ಮನವಿ ಮಾಡಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ:9845856139.