Tel: 7676775624 | Mail: info@yellowandred.in

Language: EN KAN

    Follow us :


ಜಿದ್ದಾಜಿದ್ದಿ ಇಲ್ಲದೆ ಮಂದಗತಿಯಲ್ಲಿ ಏರಿಕೆಯಾದ ಮತದಾನ

Posted date: 19 Apr, 2019

Powered by:     Yellow and Red

ಜಿದ್ದಾಜಿದ್ದಿ ಇಲ್ಲದೆ ಮಂದಗತಿಯಲ್ಲಿ ಏರಿಕೆಯಾದ ಮತದಾನ

ಕಾಂಗ್ರೆಸ್ ಮತ್ತು ಜೆಡಿಎಸ್ ಪಕ್ಷದ ಮೈತ್ರಿಯಿಂದಾಗಿ ಕಾಂಗ್ರೆಸ್ ಅಭ್ಯರ್ಥಿ ಡಿ ಕೆ ಸುರೇಶ್ ಹಾಗೂ ಬಿಜೆಪಿ ಪಕ್ಷದ ಅಭ್ಯರ್ಥಿ ಅಶ್ವಥ್ ನಾರಾಯಣ ರವರ ನೇರ ಸ್ಪರ್ಧೆಯ ಲೋಕಸಭಾ ಚುನಾವಣೆಯು ಇಂದು ಯಾವುದೇ ತಂಟೆ ತಕರಾರು ಇಲ್ಲದೆ ಬಿರುಬೇಸಿಗೆಯಲ್ಲೂ ತಣ್ಣಗೆ ನಡೆಯಿತು.


ಬೆಳಿಗ್ಗೆ ೦೭:೦೦ ಗಂಟೆಗೆ ಆರಂಭಗೊಂಡ  ಮತದಾನವು ೦೯:೦೦ ಗಂಟೆಗೆ ೦೭%, ೧೧:೦೦ ಗಂಟೆಗೆ ೨೨%, ಮಧ್ಯಾಹ್ನ ೦೨:೦೦ ಗಂಟೆಗೆ ೪೦% ಸಂಜೆ ೦೪:೦೦ ಗಂಟೆಗೆ ೬೨% ಹಾಗೂ ಹವಾಮಾನ ತಂಪಾಗುತ್ತಿದ್ದಂತೆ ಮುಕ್ತಾಯದ ಹಂತ ೦೬:೦೦ ಗಂಟೆಗೆ ೭೩:೧೬% ಕ್ಕೆ ಏರಿಕೆಯಾಯಿತು.


ನಗರದ ಷೇರು ಹೋಟೆಲ್ ನ ಉರ್ದು ಶಾಲೆಯ ಸಖಿ (ಪಿಂಕ್), ನಗರಸಭೆ ಆವರಣದ ಮಾದರಿ ಮತಗಟ್ಟೆ, ನೀಲಕಂಠನಹಳ್ಳಿ, ಗೋವಿಂದೇಗೌಡನದೊಡ್ಡಿ, ಹೊಡಿಕೆಹೊಸಹಳ್ಳಿ ಮತ್ತು ಹೊಂಗನೂರು ಗ್ರಾಮಗಳಲ್ಲಿ ಮತದಾರರು ಸರತಿ ಸಾಲಿನಲ್ಲಿ ನಿಂತು ಮತ ಚಲಾಯಿಸಿದರು, ಎಲ್ಲೆಡೆಯೂ ಬಿಗಿ ಭದ್ರತೆ ಜೊತೆಗೆ ಮತದಾರರಿಗೆ ಹಲವು ಸೌಲಭ್ಯಗಳನ್ನು ಚುನಾವಣಾ ಆಯೋಗ ಕಲ್ಪಿಸಿಕೊಟ್ಟಿತ್ತು.


ಮಾದರಿ ಮತದಾನ ಕೇಂದ್ರಗಳಲ್ಲಿ ಮತದಾರರನ್ನು ಗುಲಾಬಿ ಹೂ ನೀಡಿ ಸ್ವಾಗತಿಸಲಾಯಿತು, ಶುದ್ಧ ಕುಡಿಯುವ ನೀರು, ಮಜ್ಜಿಗೆ ವಿತರಿಸಿ ಮತ ಚಲಾವಣೆ ಮಾಡಿ ಬಂದ ಮತದಾರರಿಗೆ ಉಚಿತವಾಗಿ ಸಸಿಗಳನ್ನು ನೀಡಲಾಯಿತು.

ಸಖಿ (ಪಿಂಕ್) ಮತಗಟ್ಟೆಗಳಲ್ಲಿ ಹಸಿರು ತೋರಣ ಕಟ್ಟಿ, ಕೆಂಪು ಹಾಸು, ಉಸಿರುಬುಂಡೆಗಳಿಂದ ಅಲಂಕರಿಸಲಾಗಿತ್ತು, ಎಲ್ಲಾ ಸಿಬ್ಬಂದಿಗಳು ಮಹಿಳೆಯರೇ ಆಗಿದ್ದು ಮತದಾರರನ್ನು ಸೆಳೆಯುತ್ತಿತ್ತು.


ವಿಶೇಷ ಚೇತನರಿಗೆ ಹೋಗಿ ಬರುವುದಕ್ಕೆ ಆಟೋ ವ್ಯವಸ್ಥೆ ಮಾಡಲಾಗಿತ್ತು, ಎಲ್ಲಾ ಮತದಾನ ಕೇಂದ್ರಗಳಲ್ಲಿಯೂ ಗಾಲಿ ಕುರ್ಚಿ ವ್ಯವಸ್ಥೆ ಮಾಡಲಾಗಿತ್ತು, ಆಯಾಯ ಪಕ್ಷದ ಮುಖಂಡರು ಮತ್ತು 'ಬಾಲಕರು' ಸಹ ಮತದಾರರಿಗೆ ಗುರುತು ನೀಡಲು ಹಾಗೂ ಮನವೊಲಿಸಲು ಪೆಂಡಾಲ್ ಹಾಕಿ ಕುಳಿತಿದ್ದದ್ದು ಕಂಡು ಬಂತು.


ತಾಲ್ಲೂಕಿನ ತಿಟ್ಟಮಾರನಹಳ್ಳಿ, ನೀಲಸಂದ್ರ, ಮೊಗೇನಹಳ್ಳಿ, ಸೈಯದ್ ವಾಡಿ ಮತ್ತು ಪೆಟ್ಟಾ ಶಾಲೆಗಳಲ್ಲಿ ವಿದ್ಯುನ್ಮಾನ ಯಂತ್ರಗಳಲ್ಲಿ ದೋಷ ಕಂಡು ಬಂದಿತ್ತಾದರೂ ತಕ್ಷಣ ಎಚ್ಚೆತ್ತ ತಂತ್ರಜ್ಞರು ಸರಿಪಡಿಸಿ ಮತದಾನಕ್ಕೆ ಅನುವು ಮಾಡಿಕೊಟ್ಟರು.


ಲಂಬಾಣಿತಾಂಡ್ಯ, ಗೊಲ್ಲರದೊಡ್ಡಿ ಮತ್ತು ಚೋಳಮಾರನಹಳ್ಳಿ ಗ್ರಾಮಗಳಲ್ಲಿ ಮೂಲ ಸೌಕರ್ಯಗಳ ಸಮಸ್ಯೆಗಳನ್ನು ಮುಂದಿಟ್ಟುಕೊಂಡು ಮತದಾನ ಬಹಿಸ್ಕರಿಸಲಾಗಿತ್ತಾದರೂ ತಹಶಿಲ್ದಾರ್ ರವರು ಮಧ್ಯಸ್ತಿಕೆ ವಹಿಸಿ ಅವರ ಮನವೊಲಿಸಿ ಮತದಾನ ಮಾಡುವಂತೆ ಪ್ರೇರೇಪಿಸಿದರು.


ಗೋವಿಂದೇಗೌಡನದೊಡ್ಡಿ ನಿವೃತ್ತ ಶಿಕ್ಷಕ ವಯೋವೃದ್ದ ಭುಜಗಯ್ಯ ತಮ್ಮ ಅನಾರೋಗ್ಯವನ್ನು ಲೆಕ್ಕಿಸದೆ ಮತದಾನ ಮಾಡಿದರೇ ಹೊಂಗನೂರು ಮತ್ತು ನಗರದ ಪೆಟ್ಟಾ ಶಾಲೆಯಲ್ಲಿ ವೃದ್ದೆಯರು ಗಾಲಿ ಕುರ್ಚಿಯಲ್ಲಿ ಬಂದು ಮತದಾನ ಮಾಡಿದರು, ತಾಲ್ಲೂಕಿನ ಗಣ್ಯರಾದ ಸಿ ಪಿ ಯೋಗೇಶ್ವರ್, ಸಿ ಪಿ ರಾಜೇಶ್, ಸಾದತ್ ಅಲಿಖಾನ್, ರಘುನಂದನ್ ರಾಮಣ್ಣ, ಎಸ್ ಗಂಗಾಧರ, ವೀಣಾಕುಮಾರಿ, ಹರೂರು ರಾಜಣ್ಣ, ಜಯಮುತ್ತು, ಲಿಂಗೇಶಕುಮಾರ್ ಬೋರ್ ವೆಲ್ ರಂಗನಾಥ ಸೇರಿದಂತೆ ಅನೇಕರು ತಮ್ಮ ತಮ್ಮ ಊರಿನ ಮತಗಟ್ಟೆಗಳಲ್ಲಿ ಮತ ಚಲಾಯಿಸಿದರು.


ನಗರದ ಇತಿಹಾಸ ಪ್ರಸಿದ್ಧ ದೊಡ್ಡಮಳೂರಿನ ಶ್ರೀ ಅಪ್ರಮೇಯ ಸ್ವಾಮಿಯ ಜಾತ್ರೆಯೂ ಸಹ ಇಂದೇ ಇದ್ದಿದ್ದರಿಂದ ಮತದಾನಕ್ಕೆ ಯಾವುದೇ ರೀತಿಯ ಅಡಚಣೆಯಾಗಲಿಲ್ಲ, ಬಹುತೇಕ ಎಲ್ಲಾ ಮತದಾರರು ಜಾತ್ರೆಯ ಜೊತೆಗೆ ಮತದಾನದಲ್ಲಿಯೂ ಮುಂದಿದ್ದರು.

ಜಾತ್ರೆಯಲ್ಲಿ ಪಾನಕ, ಮಜ್ಜಿಗೆ ವಿತರಣೆ ಸಾಮಾನ್ಯವಾಗಿತ್ತು, ಬೆಂಗಳೂರಿನಿಂದ ಮೈಸೂರಿಗೆ ಹೋಗುತ್ತಿದ್ದ ವಾಹನಗಳು ಹೆಚ್ಚಾಗಿದ್ದುದರಿಂದ ಟ್ರಾಫಿಕ್ ಸಮಸ್ಯೆಯೂ ಸಹ ಹೆಚ್ಚಾಗಿತ್ತು.


ಕಾಂಗ್ರೆಸ್ ಮತ್ತು ಜೆಡಿಎಸ್ ಪಕ್ಷದ ಮೈತ್ರಿ ಅಭ್ಯರ್ಥಿ ಯಿಂದ ಹಣ ಹಂಚಿಕೆಯಾಗಿದೆ, ಬಿಜೆಪಿ ಪಕ್ಷದಿಂದ ಬೂತ್ ನ ಖರ್ಚಿನ ಹಣ ಬಿಟ್ಟರೇ ಮತದಾರರಿಗೆ ಹಣ ಕೊಟ್ಟಿಲ್ಲ, ಕೊಟ್ಟಿದ್ದರೆ ಬಹುತೇಕ ಬಿಜೆಪಿ ಗೆ ಸಾಂಪ್ರದಾಯಿಕ ಮತಗಳ ಜೊತೆಗೆ ಹೊರಗಿನ ಮತಗಳನ್ನು ಸೆಳೆಯಬಹುದಾಗಿತ್ತು ಎಂಬ ಗುಸುಗುಸು ಎಲ್ಲಾ ಹಳ್ಳಿಗಳಲ್ಲೂ ಮತ್ತು ಮತದಾರರಲ್ಲಿ ಕೇಳಿ ಬಂದಿತ್ತು.


ಗೋ ರಾ ಶ್ರೀನಿವಾಸ...

ಮೊ:9845856139.

ಪ್ರತಿಕ್ರಿಯೆಗಳು

  • ನಿಮ್ಮ ಅಭಿಪ್ರಾಯ ತಿಳಿಸುವಲ್ಲಿ ನೀವು ಮೊದಲಿಗರಾಗಿ.

ನಿಮ್ಮ ಅಭಿಪ್ರಾಯಗಳನ್ನು ಬರೆಯಿರಿ/ತಿಳಿಸಿ.

Top Stories »  


Top ↑