ಚನ್ನಪಟ್ಟಣ:ಜೂ/೦೭/೨೦/ಭಾನುವಾರ ತಾಲ್ಲೂಕಿನ ಶಾನುಭೋಗನಹಳ್ಳಿ ಗ್ರಾಮದಲ್ಲಿ ಯುವಕನೋರ್ವನಿಗೆ ಕೊರೊನಾ (ಕೋವಿಡ್-೧೯) ಸೋಂಕು ತಗುಲಿದ ನಂತರ ಆತನ ಮನೆಯಿಂದ ೫೦ ಮೀಟರ್ ಅಂತರವನ್ನು ಕಂಟೋನ್ಮೆಂಟ್ ಝೋನ್ ಎಂದು ಸಂಪೂರ್ಣ ಗ್ರಾಮವನ್ನು ಬಫರ್ ಝೋನ್ ಎಂದು ಜಿಲ್ಲಾಡಳಿತವು ಸೀಲ್ಡೌನ್  ಮಾಡಿದ್ದು ಹೈನುಗಾರಿಕೆಯನ್ನೇ ನಂಬಿಕೊಂಡು ಜೀವನ ಸಾಗಿಸುತ್ತಿರುವ ಗ್ರಾಮದ ಬಹುತೇಕ ಮಂದಿಗೆ ಆಘಾತವಾಗಿದ್ದು, ಸಂಬಂಧಿಸಿದವರು ಶೀಘ್ರವಾಗಿ ತಿಳುವಳಿಕೆ ನೀಡುವ ಮೂಲಕ ಸ್ಪಂದಿಸಬೇಕಿದೆ.

ಶಾನುಭೋಗನಹಳ್ಳಿ ಗ್ರಾಮದಲ್ಲಿ ಸದ್ಯ ೧೧೦ ಮಂದಿ ಡೈರಿಗೆ ಹಾಲು ಹಾಕುತ್ತಿದ್ದು ಬೆಳಿಗ್ಗೆ ಸಮಯದಲ್ಲಿ ೧,೩೫೦ ಲೀಟರ್ ಹಾಗೂ ಸಂಜೆ ಸಮಯದಲ್ಲಿ ೧,೨೫೦ ಲೀಟರ್ ಹಾಲನ್ನು ಡೈರಿಗೆ ಸರಬರಾಜು ಮಾಡಲಾಗುತ್ತಿದ್ದು, ಈಗ ಯಾವುದೇ ವ್ಯಕ್ತಿಯಿಂದ ಸಂಘವು ಹಾಲನ್ನು ಖರೀದಿಸದಿರುವುದರಿಂದ ಭೂಮಿಗೆ ಸುರಿಯುತ್ತಿರುವುದು ಸಂಬಂಧಿಸಿದವರ ಅಜ್ಞಾನ ಎಂದರೆ‌ ತಪ್ಪಾಗಲಾರದು.

ಅಗತ್ಯ ವಸ್ತುಗಳ ಪೂರೈಕೆಯ (SOP) ಕೈಪಿಡಿಯಲ್ಲಿ ಬಫರ್ ಝೋನ್ ನಲ್ಲಿ ಕೃಷಿ ಚಟುವಟಿಕೆಗೆ ಆದ್ಯತೆ ನೀಡಿದ್ದು, ಹೈನುಗಾರಿಕೆಯೂ ಸಹ ಕೃಷಿಗೆ ಬರುವುದರಿಂದ ಕಂಟೋನ್ಮೆಂಟ್ ಝೋನ್ ಹೊರತುಪಡಿಸಿ ಬಫರ್ ಝೋನ್ ನಲ್ಲಿ ಮುನ್ನೆಚ್ಚರಿಕೆಯ ಕ್ರಮಗಳನ್ನು ಕೈಗೊಂಡು ಹಾಲು ಖರೀದಿಸಬಹುದಾಗಿದೆ. ಖರೀದಿಸಲಾಗುವುದಿಲ್ಲವಾದರೆ ಸಂಬಂಧಿಸಿದ ಅಧಿಕಾರಿಗಳು ಕಾಯಿಸಿ ತುಪ್ಪ ಮಾಡಲು ಅಥವಾ ವೈಜ್ಞಾನಿಕವಾಗಿ ಬೇರೆ ಏನು ಮಾಡಬಹುದು ಎಂಬುದನ್ನು ತಿಳಿ ಹೇಳಿದರೆ ಹೈನುಗಾರರ ಬದುಕನ್ನು ಹಸನು ಮಾಡಬಹುದಾಗಿದೆ.

ಕಂಟೋನ್ಮೆಂಟ್ ಝೋನ್ ಹೊರತುಪಡಿಸಿ ಬಫರ್ ಝೋನ್ ನಲ್ಲಿರುವ ಹೈನೋತ್ಪಾದಕರಿಂದ ಹಾಲು ಖರೀದಿಸಲು ಬಮೂಲ್ ಅಧಿಕಾರಿಗಳಿಗೆ ಸೂಚಿಸಲಾಗಿದೆ. ಅವರು ಹಲವಾರು ಕಾರಣ ನೀಡಿ ತಿರಸ್ಕರಿಸಿದ್ದು, ರೈತರಿಗೆ ನೆರವಾಗುವ ದೃಷ್ಟಿಯಿಂದ ಬೇರೆ ರೀತಿಯಲ್ಲಿ ಸಹಾಯ ಹಸ್ತ ನೀಡುತ್ತೇವೆ ಎಂದಿದ್ದಾರೆ. ಮುಂದಿನ ಪರಿಸ್ಥಿತಿ ನೋಡಿಕೊಂಡು ಹಾಗೂ ಹಿರಿಯ ಅಧಿಕಾರಿಗಳ ಜೊತೆ ಸಮಾಲೋಚಿಸಿ ಕ್ರಮ ಕೈಗೊಳ್ಳುತ್ತೇನೆ.
ಬಿ ಕೆ ಸುದರ್ಶನ್. ದಂಡಾಧಿಕಾರಿಗಳು. ಚನ್ನಪಟ್ಟಣ.

ತಾಲ್ಲೂಕಿನಲ್ಲಿ ಇದು ಪ್ರಥಮ ಪ್ರಕರಣವಾಗಿದ್ದು, ಸೋಂಕು ಮತ್ತೊಬ್ಬರಿಗೆ ತಗುಲದಿರಲಿ ಎಂದು ಹಾಲನ್ನು ಖರೀದಿಸುತ್ತಿಲ್ಲ. ರೈತರಿಗೆ ತೊಂದರೆಯಾಗದಿರಲಿ ಎಂಬ ಕಾರಣದಿಂದ ಬಮೂಲ್ ವತಿಯಿಂದ ಶೇ ೫೦ ಹಾಗೂ ಗ್ರಾಮದ ಹಾಲು ಉತ್ಪಾದಕರ ಸಂಘದಿಂದ ಶೇ ೨೫ ರಷ್ಟು ಹಣವನ್ನು ತುಂಬಿಕೊಡಲಾಗುವುದು.

ಜಯಮುತ್ತು ನಿರ್ದೇಶಕರು ಬಮೂಲ್

ಹಾಲನ್ನು ಕರೆಯದೆ ಬಿಟ್ಟರೆ ಕೆಚ್ಚಲು ಬಾವು ಬರುತ್ತದೆ. ಹಾಲು ಉಪಯೋಗವಿಲ್ಲವೆಂದು ಆಹಾರ ಕಡಿಮೆ ನೀಡಿದರೆ ಕೀಟೋಸಿಸ್ (ketosis) ರೋಗ ಬರುತ್ತದೆ. ಕಂಟೋನ್ಮೆಂಟ್ ಝೋನ್ ನವರು ತುಪ್ಪ ಮಾಡಿಕೊಂಡು ಉಪಯೋಗಿಸಬಹುದು. ಬಫರ್ ಝೋನ್ ನವರ ಹಾಲನ್ನು ಉತ್ಪಾದಕ ಸಂಘದವರು ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡು ತೆಗೆದುಕೊಳ್ಳಲು ಸಂಬಂಧಿಸಿದ ಅಧಿಕಾರಿಗಳು ಸೂಚಿಸಬೇಕು.
ಡಾ ಜಯರಾಮು. ಅಧ್ಯಕ್ಷರು. ಕರ್ನಾಟಕ ಪಶು ವೈದ್ಯಕೀಯ ಸಂಘ ರಾಮನಗರ

ಗೋ ರಾ ಶ್ರೀನಿವಾಸ...

ಮೊ:9845856139.