ಚನ್ನಪಟ್ಟಣ: ತಾಲ್ಲೂಕಿನ ತೋಟಗಾರಿಕೆ ಇಲಾಖೆಯಲ್ಲಿ ಅಂಗಾಂಶ ಬಾಳೆ ನಾಟಿಯಲ್ಲಿ ಕೋಟ್ಯಾಂತರ ರೂ ಹಗರಣ ನಡೆದಿದೆ ಎಂಬ ಹಿನ್ನೆಲೆಯಲ್ಲಿ ಮಾಹಿತಿ ಹಕ್ಕು ಅಧಿನಿಯಮದಡಿ ಮಾಹಿತಿ ನೀಡುವ ವಿಚಾರಕ್ಕೆ ಸಂಬಂಧಿಸಿದಂತೆ ರೈತ ಸಂಘದ ಕಾರ್ಯಕರ್ತರ ನಡೆವೆಯೇ ಗೊಂದಲ ಮೂಡಿಸಿದ್ದ ತೋಟಗಾರಿಕಾ ಇಲಾಖೆ ಅಧಿಕಾರಿಗಳಿಗೆ ರೈತಸಂಘದ ಮುಖಂಡರು ಮತ್ತು ಕಾರ್ಯಕರ್ತರು ಬೆವರಿಳಿಸಿದ ಘಟನೆ ಮಂಗಳವಾರ ಇಲ್ಲಿನ ತೋಟಗಾರಿಕಾ ಇಲಾಖೆಯ ಕಚೇರಿಯಲ್ಲಿ ನಡೆಯಿತು.

ತಾಲೂಕಿನಾದ್ಯಂತ ನರೇಗಾ ಯೋಜನೆಯಡಿ ಮಂಜೂರಾಗಿರುವ ಅಂಗಾಂಶ ಬಾಳೆ ಬೆಳೆಯ ಅನುದಾನದ ವಿವರವನ್ನು ಕೇಳಿ ವಿವಿಧ ಗ್ರಾಮದ ಒಂಭತ್ತು ಮಂದಿ ರೈತಸಂಘದ ಕಾರ್ಯಕರ್ತರು ಹಾಗೂ ಸಾಮಾಜಿಕ ಕಾರ್ಯಕರ್ತರು ಮಾಹಿತಿ ಹಕ್ಕು ಕಾಯಿದೆಯಡಿಯಲ್ಲಿ ತೋಟಗಾರಿಕಾ ಇಲಾಖೆಗೆ ಅರ್ಜಿಸಲ್ಲಿಸಿದ್ದರು. ಈ ಅರ್ಜಿಗೆ ಮಾಹಿತಿ ನೀಡದೆ ರಾಜಿಸಂಧಾನಕ್ಕೆ ಮುಂದಾಗಿದ್ದ ಅಧಿಕಾರಿಗಳು ರೈತಸಂಘದ ಮುಖಂಡರ ಬಗ್ಗೆ ಲಘುವಾಗಿ ಮಾತನಾಡಿದ್ದು ವಿವಾದಕ್ಕೆ ಕಾರಣವಾಗಿತ್ತು.

ಮಾಹಿತಿ ಹಕ್ಕುಕಾಯಿದೆಯಡಿಯಲ್ಲಿ ಅರ್ಜಿಹಾಕಿದ ಕೆಲ ಮಂದಿಗೆ ಮಾತನಾಡಿದ ಮುಖಂಡರೊಬ್ಬರ ಹೆಸರು ಹೇಳಿ ಅವರೊಂದಿಗೆ ಮಾತನಾಡಿದ್ದೇವೆ ನೀವು ಅರ್ಜಿ ಹಿಂದಕ್ಕೆ ಪಡೆಯಿರಿ ಎಂದು ಪುಸಲಾಯಿಸಲು ಆರಂಭಿಸಿದ ಅಧಿಕಾರಿಗಳು, ಅವರಿಗೆ ಸಾಕಷ್ಟು ಸೌಲಭ್ಯವನ್ನು ಇಲಾಖೆಯಿಂದ ನೀಡಿದ್ದೇವೆ. ಲೋಡ್‍ಗಟ್ಟಲೆ ಗೊಬ್ಬರ ನೀಡಿದ್ದೇವೆ ಎಂದು ಹೇಳಿದ್ದು ವಿವಾದಕ್ಕೆ ಎಡೆಮಾಡಿಕೊಟ್ಟಿತು.

*ಸತ್ಯಾಸತ್ಯತೆ ಬಯಲಿಗೆ ಪಟ್ಟು:*

ರೈತಮುಖಂಡರೊಬ್ಬರ ಹೆಸರಿನಲ್ಲಿ ಈ ರೀತಿ ತೋಟಗಾರಿಕಾ ಇಲಾಖೆ ಅಧಿಕಾರಿಗಳು ಸುಳ್ಳು ಸುಳ್ಳು ಮಾಹಿತಿ ಹರಿಯ ಬಿಟ್ಟು ರೈತಸಂಘದ ಕಾರ್ಯಕರ್ತರಲ್ಲಿ ಗೊಂದಲ ಮೂಡಿಸುತ್ತಿದ್ದಾರೆ ಎಂದು ಆರೋಪಿಸಿ ರೈತ ಸಂಘದ ಕಾರ್ಯಕರ್ತರು ಮುಖಂಡರು ಮತ್ತು ಸಾನಾಜಿಕ ಕಾರ್ಯಕರ್ತರು, ತೋಟಗಾರಿಕಾ ಇಲಾಖೆಯ ಉಪನಿರ್ದೇಶಕರ ಕಚೇರಿಯಲ್ಲಿ ಪಟ್ಟು ಹಿಡಿದು ಕುಳಿತರು.

ರೈತರ ಪಟ್ಟಿನ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಜಿಲ್ಲಾ ತೋಟಗಾರಿಕಾ ಇಲಾಖೆ ಉಪನಿರ್ದೇಶಕ ಮುನೇಗೌಡ ಖುದ್ದು ಭೇಟಿ ನೀಡಿ ರೈತರ ಮುಖಂಡರ ಜೊತೆ ಚರ್ಚಿಸಿದರು. ಅಧಿಕಾರಿಗಳು ಸಾಕಷ್ಟು ಅನುದಾನ ನೀಡಿದ್ದೇವೆ ಎಂದು ಹೇಳಿದ್ದ ಮುಖಂಡರು ನಮಗೆ ಇಲಾಖೆಯಿಂದ ನೀಡಿರುವ ವಿಶೇಷ ಸೌಲಭ್ಯ ಏನು ಎಂದು ಪ್ರಶ್ನಿಸಿದಾಗ  ಅಧಿಕಾರಿಗಳು ನಿರುತ್ತರರಾದರು.

ಬಳಿಕ ಇಲಾಖಾ ಅಧಿಕಾರಿಗಳಿಗೆ ಕ್ಲಾಸ್ ತೆಗೆದುಕೊಂಡ ಡಿಡಿ ಮುನೇಗೌಡ, ಇಲಾಖೆಯಿಂದ ನೀಡುವ ಸವಲತ್ತುಗಳನ್ನು ರೈತರಿಗೆ ತಲುಪಿಸುವುದು ನಮ್ಮ ಜವಾಬ್ದಾರಿ. ಅಧಿಕಾರಿಗಳು ಇದಕ್ಕೆ ಯಾವುದೇ ಭ್ರಮೆಗೆ ಒಳಗಾಗುವುದು ಬೇಕಿಲ್ಲ. ನಿಮ್ಮ ಕರ್ತವ್ಯವನ್ನು ವಿಶೇಷಾಧಿಕಾರ ಎಂದು ಕೊಳ್ಳಬೇಡಿ. ರೈತಪರ ಹೋರಾಟಗಾರರ ಬಗ್ಗೆ ಈರೀತಿ ಮಾತನಾಡುವುದು ಸರಿಯಲ್ಲ ಎಂದು ತಿಳಿಹೇಳಿದರು. ಇನ್ನು ಮಾಹಿತಿ ಹಕ್ಕನ್ನು ತ್ವರಿತವಾಗಿ ನೀಡುವಂತೆ ಸೂಚಿಸಿದ ಅವರು, ಇಲಾಖೆಯಲ್ಲಿ ದಲ್ಲಾಳಿಗಳ ಹಾವಳಿಯನ್ನು ತಪ್ಪಿಸಿ, ಮುಂದೆ ಇಂತಹ ಪ್ರಕರಣಗಳು ಮರುಕಳಿಸದಂತೆ ನೋಡಿಕೊಳ್ಳಿ ಎಂದು ತಾಕೀತು ಮಾಡಿದರು.

ಗೋ ರಾ ಶ್ರೀನಿವಾಸ...

ಮೊ:9845856139..