ಚನ್ನಪಟ್ಟಣ: ಪ್ರಜಾಪ್ರಭುತ್ವದ ಹಬ್ಬವಾದ ಸಾರ್ವತ್ರಿಕ ಚುನಾವಣೆಯ ಸಂದರ್ಭದಲ್ಲಿ ನಿರ್ಭಯವಾಗಿ ನಿರ್ಭೀತಿಯಿಂದ ತಮ್ಮ ಮತದಾನದ ಹಕ್ಕನ್ನು ಚಲಾಯಿಸಬೇಕೆಂದು, ವಿಧಾನಸಭಾ ಚುನಾವಣೆಯ ಅಸೆಂಬ್ಲಿ ಮಾಸ್ಟರ್ ಟ್ರೈನರ್ ಹರಿದಾಸ್ ತಿಳಿಸಿದರು.

   ಅವರು ನಗರದ ತಾಲ್ಲೂಕು ಕಚೇರಿಯ ಸಭಾಂಗಣದಲ್ಲಿ ಆಯೋಜನೆ ಮಾಡಲಾಗಿದ್ದ, 2023ರ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಮತದಾರರರು ಮತಯಂತ್ರಗಳ ಮುಖಾಂತರ ತಮ್ಮ ಮತವನ್ನು ಚಲಾವಣೆ ಮಾಡಿ ನಂತರ ತಮ್ಮ ಮತಗಳು ತಮ್ಮ ಅಭ್ಯರ್ಥಿಗಳಿಗೆ ಬಿದ್ದಿದಿಯೋ ಇಲ್ಲವೋ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಲು ಮತದಾನದ ಅಣಕು ಪ್ರದರ್ಶನ ಮಾಡಿ ಮಾತನಾಡಿದರು.

    ಮತಯಂತ್ರಗಳ ಕಾರ್ಯನಿರ್ವಹಣೆಯ ಸಂದರ್ಭದಲ್ಲಿ ವಿವಿ ಪಾಟ್‍ನ ಕಾರ್ಯನಿರ್ವಣೆ, ನೀವು ಹಾಕಿದ ಮತಗಳ ಸಂಗ್ರಹಣೆಯ ಯಂತ್ರ ಹಾಗೂ ನಿಮ್ಮ ಮತ ಯಾರಿಗೆ ಹೋಗಿರುವುದರ ಚಿಹ್ನೆಯ ಮುಖಾಂತರ ಕೇವಲ ಏಳು ಸೆಕೆಂಡ್‍ಗಳಲ್ಲಿ ಪ್ರದರ್ಶನ, ನೀವು ಮತಹಾಕಿದ ಸಮಯ, ಯಾರಿಗೆ ಮತ, ಮತಗಳ ಸಂಗ್ರಹಣೆಯನ್ನು ಆಯಾ ಮತದಾರರೇ ಖುದ್ದಾಗಿ ಮತದಾನದ ಸಂದರ್ಭದಲ್ಲಿ ತಿಳಿಯಬಹುದಾಗಿದೆ ಎಂದರು.

    ಮುಂಜಾನೆ 7 ರಿಂದ ಪ್ರಾರಂಭವಾಗುವ ಮತದಾನ ಸಂಜೆ  6ರವರೆಗೆ ನಡೆಯಲಿದ್ದು, ಸಂಜೆ 6ರ ಸಮಯದಲ್ಲಿ ಮತದಾರರ ಸಂಖ್ಯೆ ಹೆಚ್ಚಿನ ಪ್ರಮಾಣದಲ್ಲಿದ್ದರೆ ಮತದಾನದ ಕೇಂದ್ರದಲ್ಲಿನ ನೂರು ಮೀಟರ್ ಒಳಗೆ ಅವರು 6 ಗಂಟೆಯೊಳಗೆ ಪ್ರವೇಶ ಪಡೆದಿದ್ದರೆ, ಸಂಬಂಧಿಸಿದ ಚುನಾವಣೆ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಅಷ್ಟು ಮತದಾರರಿಗೆ ಮತ ಚಲಾಯಿಸಲು ಅನುಮತಿ ನೀಡಲಾಗುವುದು ಎಂದು ತಿಳಿಸಿದರು.

    ಈ ಭಾರಿ ಮತಯಂತ್ರದಲ್ಲಿ ಅಂಧ ಮತದಾರರಿಗೆ ಮತಚಲಾಯಿಸಲು ಅವರ ಲಿಪಿಗನುಗುಣವಾಗಿ ಯಂತ್ರದಲ್ಲಿ ಅಳವಡಿಸಲಾಗಿದೆ, ಅಲ್ಲದೆ ವಿಕಲಚೇತನರು, ವೃದ್ದರು, ಅನಾರೋಗ್ಯ ಪೀಡಿತರ ಒಪ್ಪಿಗೆಯ ಆಧಾರದ ಮೇಲೆ ಅವರ ಮನೆಯ ಬಳಿಗೆ ಸಂಬಂಧಿಸಿದ ಚುನಾವಣೆಯ ಅಧಿಕಾರಿಗಳೇ ಹೋಗಿ ಮತವನ್ನು ಹಾಕಿಸಿಕೊಳ್ಳುವ ವ್ಯವಸ್ಥೆಯನ್ನು ಸಹ ಕಲ್ಪಿಸಲಾಗಿದೆ ಎಂದರು.

    ನ್ಯಾಯಸಮ್ಮತವಾದ ಚುನಾವಣೆ ನಡೆಯಲು ಪ್ರತಿಯೊಬ್ಬ ಮತದಾರರು ಸಹಕರಿಸಬೇಕು,ನಿಮ್ಮ ಮತ ನಿಮ್ಮ ಹಕ್ಕು ಈ ನಿಟ್ಟಿನಲ್ಲಿ ನಡೆಯುವ ಚುನವಣೆಯಲ್ಲಿ ಪ್ರತಿಯೊಬ್ಬರು ಸಹಕಾರ ನೀಡಬೇಕು ಎಂದು ತಿಳಿಸಿದರು.

   ಈ ಸಂದರ್ಭದಲ್ಲಿ ಸಹಾಯಕ ಚುನಾವಣಾಧಿಕಾರಿ ಮಹೇಂದ್ರ, ಚುನಾವಣೆಯ ಸೆಕ್ಟರ್ ಅಧಿಕಾರಿ ನಿಜಗುಣ, ಶಿರಸ್ತೇದಾರ ಹರೀಶ್ ಹಾಗೂ ಹಲವಾರು ಮಂದಿ ಅಧಿಕಾರಿವರ್ಗ ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.