ಚನ್ನಪಟ್ಟಣ.ನ.೨೯: ನಗರದ ಪುರಭವನದ ಮುಂದೆ ಸಭೆ ಸೇರಿದ್ದ ನಾಗರಿಕ ಹೋರಾಟ ಸಮಿತಿಯ ಪ್ರಮುಖರು ಪುರಭವನ ಐತಿಹಾಸಿಕವಾದುದು. ಇದನ್ನು ಉಳಿಸಿ, ಕೆಡವಲು ಅವಕಾಶ ನೀಡಬಾರದು ಎಂದು ನಿರ್ಧರಿಸಿ, ನಗರಸಭೆಯ ಆಯುಕ್ತರಿಗೆ ಈ ಸಂಬಂಧ ಆಕ್ಷೇಪಣಾ ಪತ್ರ ಸಲ್ಲಿಸಲಾಯಿತು

ಭವನಕ್ಕೆ ನೂರಾರು ವರ್ಷಗಳ ಇತಿಹಾಸವಿದ್ದು, ಈ ಭವನವನ್ನು ಇಲ್ಲಿನ ಜನರಲ್ಲಿ ಮತೀಯ ಸಾಮರಸ್ಯ ಉಂಟು ಮಾಡಲು ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಬಳಸಿಕೊಳ್ಳುವ ಉದ್ದೇಶದಿಂದ ಮುಸ್ಲಿಂ ಸಮುದಾಯದ ಖುದ್ದುಸ್ ಸಾಹೇಬರು ದಾನವಾಗಿ ಕೊಟ್ಟಿದ್ದಾರೆ. ಅದನ್ನು ಸ್ವಾತಂತ್ರ್ಯ ಬರುವವರೆಗೂ ಸದುಪಯೋಗ ಪಡಿಸಿಕೊಳ್ಳಲಾಗಿದೆ. ಸ್ವಾತಂತ್ರ್ಯ ನಂತರ ಇಲ್ಲಿಗೆ ಬಂದ ಪುರಸಭೆಯ ಆಡಳಿತ ಸಮರ್ಪಕವಾಗಿ ಬಳಸಿ ಕೊಂಡು, ಈಗ ನಗರಸಭೆಯ ಕಛೇರಿಯನ್ನು ನಿರ್ಮಾಣ ಮಾಡಿಕೊಂಡ ನಂತರ ಅದನ್ನು ಕೆಡವಿ ನಗರಸಭೆ ಆಡಳಿತ ಕಛೇರಿ ಮಾಡಿ ಕೊಳ್ಳುವ ಹುನ್ನಾರ ಮಾಡಿರುವುದು ಸರಿಯಲ್ಲ ಎಂದು ಆಕ್ಷೇಪಿಸಿ, ಇದನ್ನು ನಾವು ಶತಾಯ ಗತಾಯ ತಡೆದೇ ತಡೆಯುತ್ತೇವೆ ಎಂದು ತಮ್ಮ ಆಕ್ಷೇಪಣಾ ಪತ್ರದಲ್ಲಿ ತಿಳಿಸಲಾಗಿದೆ.

ನೂರು ವರ್ಷದ ಕಟ್ಟಡವಾಗಿರುವ ಈ ಕಟ್ಟಡ ಇನ್ನೂ ಬಲಯುತವಾಗಿಯೇ ಇದೆ. ಈ ಜಾಗದಲ್ಲಿ ಭವನ ನಿರ್ಮಾಣಕ್ಕೆ ೨೭ ಜೂನ್ ೧೯೧೬ರಲ್ಲಿ ಆಗಿನ ಬೆಂಗಳೂರು ಜಿಲ್ಲೆಯ ಜಿಲ್ಲಾಧಿಕಾರಿಗಳಾದ ಕೆ. ಚಾಂಡಿ ಅವರು ಅಸ್ಥಿಭಾರ ಹಾಕಿದ್ದಾರೆ. ಅದಾದ ನಂತರ ಆಗಿನ ಮೈಸೂರು ರಾಜರ ಆಡಳಿತದಲ್ಲಿ ದಿವಾನರಾಗಿದ್ದ ಅಮೀನ್ ಉಲ್ ಮುಲ್ಕ್ ಸರ್ ಮಿರ್ಜಾ ಇಸ್ಮಾಯಿಲ್ ಅವರು ೭ ಏಪ್ರಿಲ್ ೧೯೩೦ ರಲ್ಲಿ ಅಧಿಕೃತವಾಗಿ ಈ ಭವನವನ್ನು ಉದ್ಘಾಟನೆ ಮಾಡಿದ್ದಾರೆ. ಕಾಲಾನಂತರ ಪುರಸಭೆಯವರು ಅದು ತಮ್ಮದೇ ಜಾಗ ಎಂಬ ರೀತಿಯಲ್ಲಿ ಯಾವುದೇ ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಕೊಡದೆ, ಕಟ್ಟಡ ಶಿಥಿಲಾವಸ್ಥೆಯಲ್ಲಿ ಇದೆ ಎಂಬ ಸಬೂಬು ಹೇಳಿಕೊಂಡು ಮುಂದುವರಿದುಕೊಂಡು ಬರುತ್ತಿದ್ದರು.

ಅದಾದ ನಂತರ ೧೯೮೪ರಲ್ಲಿ ಒಂದು ಬಾರಿ, ೨೦೦೮ರಲ್ಲಿ ಒಂದು ಬಾರಿ ಈ ಪುರಭವನ ಪುರೋಭಿವೃದ್ಧಿಗಾಗಿ ಹತ್ತಾರು ಲಕ್ಷ ಖರ್ಚು ಮಾಡಿದ್ದಾರೆ. ಆದರೆ, ಸುಸಜ್ಜಿತಗೊಳಿಸುವ ಕೆಲಸ ಮಾಡಿಲ್ಲ. ಅಲ್ಲಿಂದಾಚೆಗೆ ಈ ಪುರಭವನ ನಗರಸಭೆಯ ಹಳೆ ಸಾಮಾನುಗಳು, ವಾಹನಗಳ ಬಿಡಿ ಭಾಗಗಳು ಹಾಗೂ ಅವರ ಹಳೆಯ ಕಡತ ಗಳನ್ನು ಸಂಗ್ರಹಿಸಿ ಇಟ್ಟು ಕೊಳ್ಳಲು ಸೀಮಿತವಾಗಿದೆ.

ಯಾವುದೇ ಸ್ಥಳೀಯ ಸಂಸ್ಥೆಯಾಗಲಿ ನಾಗರೀಕರಿಗೆ ಸೌಲಭ್ಯ ಕಲ್ಪಿಸಿಕೊಡುವ, ಅವರ ಇಚ್ಛೆಗೆ ಅನುಗುಣವಾಗಿ ಕೆಲಸ ಮಾಡುವ ಉದ್ದಿಶ್ಯ ಹೊಂದಿರಬೇಕು. ಆದರೆ, ಪುರಸಭೆ, ನಗರಸಭೆ ಆದ ನಂತರ ಅದಾವುದರ ಕಡೆಯೂ ಗಮನ ಕೊಡದೆ ಅದನ್ನು ಪಾಳುಗೆಡವಿದೆ.

ಐತಿಹಾಸಿಕವಾದ ಈ ಕಟ್ಟಡ ಉಳಿದು, ಈ ಊರಿನ ಹಿರಿಮೆಯನ್ನು ಸಾರಬೇಕಾಗಿದೆ.  ಅದನ್ನು ಬಿಟ್ಟು ಒಡೆದು ಹಾಕುವ ಕೆಲಸ ಮಾಡ ಬಾರದು ಎಂದು ನಮ್ಮ ಆಕ್ಷೇಪಣೆ ಇದೆ. ಮುಂದು ವರಿದು ಹಠ ಹಿಡಿದರೆ ಆಗ ಬೇರೆಯದೇ ಮಾರ್ಗವನ್ನು ಹುಡುಕಬೇಕಾಗುತ್ತದೆ ಎಂದು ಈ ಮೂಲಕ ತಿಳಿಸ ಬಯಸುತ್ತೇವೆ. ಅಸಲಿಗೆ ಈ ಜಾಗ ನಗರಸಭೆಯ ಜಾಗವಲ್ಲ, ೧೯೬೪ರಲ್ಲಿ ಆಗಿನ ಪುರಸಭೆಗೆ ಸರ್ಕಾರ ಬೇರೆ ಜಾಗ ಮಂಜೂರು ಮಾಡಿದೆ ಎಂದಿದ್ದಾರೆ.

 ಆ ಜಾಗಕ್ಕೆ ಹೋಗಿ ತಮ್ಮ ನೆಲೆಯನ್ನು ಕಂಡುಕೊಳ್ಳಬೇಕು.  ಈ ಜಾಗವನ್ನು ಶಾಶ್ವತವಾಗಿ ನಗರದ ಜನರ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಮೀಸಲಿಡಲು ಈ ಮೂಲಕ ಸಾರ್ವಜನಿಕರ ಪರವಾಗಿ ವಿನಂತಿಸುತ್ತಿದ್ದೇವೆ ಎಂಬ ಆಕ್ಷೇಪಣಾ ಪತ್ರವನ್ನು ಆಯುಕ್ತರ ಗೈರು ಹಾಜರಿಯಲ್ಲಿ ಕಛೇರಿಯ ಮ್ಯಾನೇಜರ್ ನಾಗಣ್ಣ ಹಾಗೂ ಸಹಾಯಕ ಕಾರ್ಯಪಾಲಕ ಮಧುಸೂದನ್ ಅವರಿಗೆ ನೀಡಿ ಇದನ್ನು ತಕ್ಷಣ ಆಯುಕ್ತರ ಗಮನಕ್ಕೆ ತರಲು ವಿನಂತಿಸಲಾಯಿತು.

ಈ ಸಂದರ್ಭದಲ್ಲಿ ಮನವಿಯನ್ನು ಸಮಿತಿಯ ಪರವಾಗಿ ಸು.ತ ರಾಮೇಗೌಡ ಓದಿದರು. ಕಾಂಗ್ರೆಸ್ ಪ್ರಮುಖರಾದ ಶರತ್‌ಚಂದ್ರ, ಕನ್ನಡ ಪರ ಹೋರಾಟಗಾರ ಸಿಂ.ಲಿಂ ನಾಗರಾಜು, ಹೋರಾಟ ಸಮಿತಿಯ ಗೋ.ರಾ ಶ್ರೀನಿವಾಸ್, ಸರ್ಕಾರಿ ನಿವೃತ್ತ ನೌಕರರ ಸಂಘದ ಕಾರ್ಯದರ್ಶಿ ಬಿ.ಎನ್ ಕಾಡಯ್ಯ, ಅನಿಕೇತನ ಟ್ರಸ್ಟ್ನ ಯೋಗೇಶ್ ಚೆಕ್ಕರೆ, ಮುಸ್ಲಿಂ ಪ್ರಮುಖರಾದ ಸೈಯದ್ ನವಾಜ್ ಹಷ್ಮಿ ಪತ್ರಕರ್ತರು, ಸಾರ್ವಜನಿಕರು ಸೇರಿದಂತೆ ಹಲವರು ಪಾಲ್ಗೊಂಡಿದ್ದರು, ಈ ಭವನ ಉಳಿಯಬೇಕು ಎಂಬ ಆಶಯ ವ್ಯಕ್ತ ಪಡಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.