ಚನ್ನಪಟ್ಟಣದಲ್ಲಿ ಕಳೆದ ನಾಲ್ಕಾರು ದಿನಗಳಿಂದ ಕೋವಿಡ್ ಲಸಿಕೆ ಮಿತಿಯಾಗಿಯೇ ಬರುತ್ತಿರುವುದರಿಂದ ಆಕಾಂಕ್ಷಿಗಳಿಗೆ ಲಸಿಕೆ ದೊರೆಯುತ್ತಿಲ್ಲ. ಈ ಸಂಬಂಧ ಲಸಿಕೆ ನೀಡುತ್ತಿರುವ ಕುಶಲಕರ್ಮಿ ತರಬೇತಿ ಕೇಂದ್ರದಲ್ಲಿ ಸಾರ್ವಜನಿಕ ಆಸ್ಪತ್ರೆಯ ಆಡಳಿತಾಧಿಕಾರಿ ವಿಜಯನರಸಿಂಹ ಹಾಗು ಸಾರ್ವಜನಿಕರ ಮಧ್ಯೆ ವಾಗ್ವಾದ ನಡೆಯಿತು.

ಕುಶಲಕರ್ಮಿ ತರಬೇತಿ ಕೇಂದ್ರದಲ್ಲಿ ನೀಡುತ್ತಿರುವ ಲಸಿಕೆಗಾಗಿ ಇಂದು ಮುಂಜಾನೆಯಿಂದಲೇ ನೂರಕ್ಕೂ ಹೆಚ್ಚು ಮಂದಿ ಸಾರ್ವಜನಿಕರು ಕಾಯ್ದು ನಿಂತಿದ್ದರು. ನೆನ್ನೆ ಮತ್ತು ಮೊನ್ನೆ ಲಸಿಕೆ ಸಿಗದೆ ವಾಪಸ್ಸ್ ಹೋಗಿದ್ದವರಿಗೆ ಟೋಕನ್ ಸಹ ನೀಡಲಾಗಿತ್ತು. ಇಂದೂ ಸಹ ಅವರಿಗೆ ಲಸಿಕೆ ದೊರೆಯದ ಕಾರಣ, ವೈದ್ಯರು ಮತ್ತು  ಶುಶ್ರೂಷಕಿಯರ ಜೊತೆ ವಾಗ್ವಾದಕ್ಕೆ ಇಳಿದರು.

ಈ ಸಂದರ್ಭದಲ್ಲಿಯೂ ಸಹ ಪತ್ರಕರ್ತರ ಪ್ರಶ್ನೆಗೆ ಡಾ.ವಿಜಯನರಸಿಂಹ ಅವರು ಉತ್ತರಿಸದೆ, ಒಳ ಸೇರಿ ಕೊಂಡರು. ನಂತರ ಅವರ ಮೊಬೈಲ್‌ಗೆ ಕರೆ ಮಾಡಿದರೂ ಆ ವೇಳೆಗಾಗಲೆ ಸ್ವಿಚ್‌ಆಫ್  ಮಾಡಿಕೊಂಡಿದ್ದರು.

ಒಳಹೊಕ್ಕು ಮಾಹಿತಿ ಪಡೆದುಕೊಂಡಾಗ, ಚನ್ನಪಟ್ಟಣಕ್ಕೆ 2,000  ಕೋವಿಶೀಲ್ಡ್ ಮತ್ತು 500 ಕೋವ್ಯಾಕ್ಷಿನ್ ಬಂದಿರುವುದಾಗಿ ತಿಳಿದು ಬಂದಿದೆ. ಇದರಲ್ಲಿ ಸರ್ಕಾರವು 2 ನೆಯ ಹಂತದ ಲಸಿಕೆ ಪಡೆಯುವವರಿಗೆ ಮಾತ್ರ ಲಸಿಕೆ ನೀಡಿ, ಪ್ರಥಮವಾಗಿ ಹಾಕಿಸಿಕೊಳ್ಳುವವರಿಗೆ ಮುಂದಿನ ಹಂತದಲ್ಲಿ ನೀಡುವಂತೆ ಆದೇಶ ಹೊರಡಿಸಿರುವುದಾಗಿ ತಿಳಿದು ಬಂದಿತು.

*ಲಸಿಕೆ ಇದ್ದಾಗ ಒಂದು, ಇಲ್ಲದಾಗ ಒಂದು ನಿಯಮವೇ?*

ಈ ಮೊದಲು ಮೊದಲ ಡೋಸ್ ಪಡೆದವರಿಗೆ ಎರಡನೆಯ ಡೋಸ್ ಪಡೆಯಲು ನಾಲ್ಕು ವಾರಗಳಿಂದ ಆರು ವಾರಗಳ ಒಳಗೆ ಪಡೆಯಬೇಕು ಎಂದು ನಿಗದಿ ಪಡಿಸಲಾಗಿತ್ತು. ಆದರೆ ಲಸಿಕೆ ಸಿಗದಿರುವ ಕಾರಣದಿಂದ 6 ರಿಂದ 8 ವಾರದವರೆಗೂ ಎರಡನೆ ಹಂತದ ಲಸಿಕೆಯನ್ನು ಹಾಕಿಸಿಕೊಳ್ಳಬಹುದು ಎಂದು ತಜ್ಞರು ವರದಿ ನೀಡಿರುವುದಾಗಿ ತಾಲ್ಲೂಕು ವೈದ್ಯಾಧಿಕಾರಿ ಡಾ.ಕೆ.ಪಿ ರಾಜು ಅವರು ಮಾಹಿತಿ ನೀಡಿದ್ದಾರೆ.

ಸಾರ್ವಜನಿಕರಿಗೆ ಇದು ಗೊಂದಲವಾಗಿದ್ದು, ಇದು ತಜ್ಞರ ಆದೇಶವೋ ಅಥವಾ ಲಸಿಕೆ ಇಲ್ಲದ ಕಾರಣದಿಂದ ಅಧಿಕಾರಿಗಳು ನೀಡುತ್ತಿರುವ ಸಬೂಬು ಎಂದು ಕುಹಕವಾಡುತ್ತಿದ್ದಾರೆ.

ಆರುವಾರದೊಳಗೆ ಹಾಕಿಸಿಕೊಳ್ಳಬೇಕಾದ ಲಸಿಕೆ, ಇನ್ನು ಎರಡು ವಾರ ಮುಂದೆ ಹೋದರೆ, ಹಿಂದಿನ ಲಸಿಕೆ ಅಲ್ಲಿಯ ತನಕ ಕೆಲಸ ನಿರ್ವಹಿಸುವುದೇ ಎಂಬುದು ಸಾರ್ವ ಜನಿಕರಲ್ಲಿ ಯಕ್ಷ ಪ್ರಶೆಯಾಗಿದೆ. ಇದಕ್ಕೆ ಸಂಬಂಧಿಸಿದ ಅಧಿಕಾರಿಗಳು ಅಥವಾ ಸರ್ಕಾರ ಉತ್ತರಿಸಬೇಕಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.