ಇಂದು ವಿಶ್ವ ದಾದಿಯರ ದಿನ. ಮೊದಲಿಗೆ ಅವರಿಗೊಂದು ಸಲಾಮು ಹೇಳಿಬಿಡೋಣಾ. ಹೆಂಗಸರನ್ನು ಸಿಸ್ಟರ್ ಎಂದು ಗಂಡಸರನ್ನು ಬ್ರದರ್ ಎಂದು ಸಂಬೋಧಿಸುವ ಮೂಲಕ ಒಟ್ಟಾರೆ ದಾದಿಯರೆಂದು ಕರೆಯುತ್ತಾರೆ. ಈ ದಾದಿಯರನ್ನೂ ಸಹ ಇಂದಿನ ಕೊರೊನಾ ಎಡೆಬಿಡದೆ ಕಾಡುತ್ತಿದ್ದು, ಅವರೂ ಸಹ ಜೀವ ಕೈಲಿಡಿದು ಕೆಲಸ ನಿರ್ವಹಿಸುತ್ತಿದ್ದಾರೆ.

ಇಂದು ಕೊರೊನಾ ಗೆ ಸಂಬಂಧಿಸಿದಂತೆ ಅವರ ಕೆಲಸದ ಬಗ್ಗೆ ಮಾಹಿತಿ ಪಡೆಯಲೋಸುಗ ನಾಲ್ಕಾರು ದಾದಿಯರನ್ನು ಹುಡುಕಿಕೊಂಡು ಹೋದೆ. ಅವರೆಲ್ಲಾ ಸಿಕ್ಕಿದರಾದರೂ ಕ್ಷಣವೂ ಪುರುಷೊತ್ತಿಲ್ಲದೆ ಕೆಲಸ ನಿರ್ವಹಿಸುತ್ತಿಸುತ್ತಿದುದರಿಂದ ಅವರನ್ನು ಮಾತನಾಡಿಸಲು ನಾನು ಹಿಂಜರಿದೆ. ಇದಕ್ಕೆ ಕಾರಣ ಅವರ ಕರ್ತವ್ಯ ನಿಷ್ಠೆ.

ಇಂದು ಸಹಸ್ರಾರು ಮಂದಿ ವಿವಿಧ ಸರ್ಕಾರಿ ಆಸ್ಪತ್ರೆಗಳಲ್ಲಿ ಲಸಿಕೆ ಹಾಕಿಸಿಕೊಳ್ಳುತ್ತಿದ್ದಾರೆ. ಕನಿಷ್ಠ 50 ರಿಂದ 100 ಮಂದಿಗೆ ಇಬ್ಬರೋ, ಮೂವರೋ ದಾದಿಯರು ಲಸಿಕೆ ನೀಡುತ್ತಾರೆ. ಅವರಲ್ಲಿ ಎಷ್ಟು ಮಂದಿಗೆ ಆ ಕ್ಷಣದಲ್ಲಿ ಸೋಂಕು ಇರುತ್ತೋ ಎನ್ನುವುದು ಗೊತ್ತಿರುವುದಿಲ್ಲ. ಈ ಲಸಿಕೆ ಹಾಕಿಸಿಕೊಳ್ಳುವ ಮಂದಿಯೂ ಸಹ ತುಂಬಾ ತರಾತುರಿಯಲ್ಲಿದ್ದು, ಒಬ್ಬರ ಮೇಲೊಬ್ಬರು ಮುಗಿಬಿದ್ದು ಹಾಕಿಸಿಕೊಳ್ಳಲು ಪ್ರಯತ್ನಿಸುತ್ತಾರೆ.

ಲಸಿಕೆ ಅಷ್ಟೇ ಅಲ್ಲಾ, ಯಾವುದೇ ರೋಗಿ ನಾಮುಂದು ತಾಮುಂದು ಎಂದೇ ಚಿಕಿತ್ಸೆ ಪಡೆಯಲು ಮುಂದಾಗುತ್ತಾನೆ. ಅವನ ಅವಸರಕ್ಕೆ ಇವರು ಬಲಿಪಶುಗಳಾಗುತ್ತಾರೆ. ಅದರಲ್ಲೂ ಅಪಘಾತ, ಆತ್ಮಹತ್ಯೆ ಯತ್ನದಂತಹ ಕೇಸುಗಳಲ್ಲಿ ಪೋಷಕರ ಗಲಾಟೆ ಹೆಚ್ಚಾಗಿರುತ್ತದೆ. ವೈದ್ಯರು ಸೇರಿದಂತೆ ಎಲ್ಲಾ ನರ್ಸ್ ಗಳು ಇಲ್ಲಿ ಬಲಿಪಶುವೇ. ಇದಕ್ಕೆ ಕೆಲ ವೈದ್ಯರು ಸರಳೋಪಾಯ ಕಂಡುಕೊಂಡಿದ್ದು, ಪೋಷಕರ ದಂಡನ್ನು ನೋಡಿದಾಗ ಇಲ್ಲಿ ಸೌಲಭ್ಯಗಳಿಲ್ಲ. ನೀವು ದೊಡ್ಡಾಸ್ಪತ್ರೆಗೆ ಹೋಗಿ ಎಂದು ಹೇಳಿ ಕೈತೊಳೆದುಕೊಳ್ಳುತ್ತಾರೆ.

ಎಂತಹ ಕಷ್ಟದ ಪರಿಸ್ಥಿತಿಯಲ್ಲೂ ಹಗಲಿರುಳೆನ್ನದೆ, ರೋಗರುಜಿನಗಳು ನಮಗೆ ಅಂಟುತ್ತವೆ ಎಂಬುದರ ಪರಿವೆಯಿಲ್ಲದೆ, ಕೋವಿಡ್ ಸಮಯದಲ್ಲಿ ಕೊರೊನಾ ಸೋಂಕಿತರಿಗೆ ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟು ಚಿಕಿತ್ಸೆ ನೀಡುತ್ತಿರುವ ನಮ್ಮ ದಾದಿಯರಿಗೆ ಸರ್ವ ರೋಗಿಗಳ  ಧನ್ಯವಾದಗಳನ್ನು ನಮ್ಮ ಪತ್ರಿಕಾ ಬಳಗದಿಂದ ಅರ್ಪಿಸುತ್ತೇವೆ.

ಇದೇ ಸಮಯದಲ್ಲಿ ಚನ್ನಪಟ್ಟಣ ಸಾರ್ವಜನಿಕ ಆಸ್ಪತ್ರೆಯಲ್ಲಿ ದಾದಿಯವರ ಮೇಲ್ವಿಚಾರಕಿ ಸರಸ್ವತಿ ರವರ ನೇತೃತ್ವದಲ್ಲಿ ವಿಶ್ವ ದಾದಿಯರ ದಿನಾಚರಣೆಯನ್ನು ಕೇಕ್ ಕಟ್ ಮಾಡುವ ಮೂಲಕ ಆಚರಿಸಿದರು.

*ನಾವು ಸೇವೆಗಾಗಿಯೇ ಬಂದವರು. ಇಲ್ಲಿ ಯಾವುದೇ ರೀತಿಯ ರೋಗಿಗಳಿರಲಿ, ಮೈಯ್ಯೆಲ್ಲಾ ಹುಣ್ಣಾಗಿರುವವರಿರಲಿ, ಬಲಿ ಪಡೆಯುವ ಕೊರೋನಾ ಇರಲಿ ಅವರಿಗೆಲ್ಲಾ ಬದುಕುವ ಭರವಸೆ ನೀಡಿ, ವೈದ್ಯರ ಆದೇಶದ ಮೇರೆಗೆ ಸೂಕ್ತ ಚಿಕಿತ್ಸೆ ನೀಡುವುದು ನಮ್ಮ ಕರ್ತವ್ಯ. ರೋಗಿಗಳು ಮತ್ತು ಪೋಷಕರು ನಮಗೆ ಮೆಚ್ಚುಗೆ ನೀಡದಿದ್ದರೂ ಪರವಾಗಿಲ್ಲ, ಸಹಕರಿಸಿದರೆ ನಾವು ಧನ್ಯ ಎನ್ನುತ್ತಾರೆ. ಸದಾ ಲಸಿಕಾ ಕೇಂದ್ರದಲ್ಲೇ ಕೆಲಸ ನಿರ್ವಹಿಸುತ್ತಿರುವ ಸಾರ್ವಜನಿಕ ಆಸ್ಪತ್ರೆಯ ದಾದಿ ಶಾಂತಾ ಕೆ ರವರು*

ಗೋ ರಾ ಶ್ರೀನಿವಾಸ...

ಮೊ:9845856139.