ಮದ್ದೂರು: ನಿಡಘಟ್ಟ; ತಿರುಮಲ ದೇವಾಲಯ ಎಂದರೆ ಅದು ದೂರದ ತಿರುಪತಿ, ಶ್ರೀ ಶ್ರೀನಿವಾಸ ದೇವರು ನೆಲೆಸಿರುವ ತಿರುಪತಿ ಎಂದಷ್ಟೇ ಭಕ್ತರು ತಿಳಿದುಕೊಂಡಿದ್ದಂತೂ ಸತ್ಯ. ತಿರುಪತಿ ದೂರ ಎನ್ನುವ ಕಾರಣಕ್ಕೋ ಏನೋ ರಾಜ್ಯದ ಕೆಲವು ಕಡೆ ಚಿಕ್ಕ ತಿರುಪತಿ ಹೆಸರಲ್ಲಿ ಅನೇಕಾನೇಕ ಶ್ರೀ ವೆಂಕಟೇಶ್ವರ ದೇವಾಲಯಗಳು, ಶ್ರೀದೇವಿ, ಭೂದೇವಿ ಸಮೇತ ವೆಂಕಟೇಶ್ವರ, ಲಕ್ಷ್ಮಿ, ಪದ್ಮಾವತಿ ಸಮೇತ ಶ್ರೀನಿವಾಸ ಸೇರಿದಂತೆ ವಿವಿಧ ಹೆಸರುಗಳ ದೇವಾಲಯಗಳು ತಲೆ ಎತ್ತಿ ಭಕ್ತರನ್ನು ಆರಂಭದಲ್ಲಿ ಸೆಳೆದವಾದರೂ ತಿರುಪತಿಯ ತಿರುಮಲನಂತೆ ಪ್ರಸಿದ್ಧಿಯಾಗುವುದಕ್ಕೆ ಸಾಧ್ಯವಾಗಲಿಲ್ಲ.

ಆದರೆ ಮಂಡ್ಯ ಜಿಲ್ಲೆಯ ಮದ್ದೂರು ತಾಲ್ಲೂಕಿನ ನಿಡಘಟ್ಟ ಗ್ರಾಮದಲ್ಲಿರು ಅಣ್ಣೇಗೌಡ ನೆಸ್ಟ್ ಎಂಬ ಬೃಹತ್ ಲೇಔಟ್ ನಲ್ಲಿ ವಿಸ್ತಾರ ಹೊರತುಪಡಿಸಿ ಸಂಪೂರ್ಣ ತಿರುಪತಿ ತಿಮ್ಮಪ್ಪನ ದೇವಾಲಯದ ಪ್ರತಿರೂಪವನ್ನು ನಿರ್ಮಿಸಲು ಅಣ್ಣೇಗೌಡರ ಕುಟುಂಬ, ಬೆಂಗಳೂರಿನ ಉದ್ಯಮಿ ಬಾಲಕೃಷ್ಣ ಹಾಗೂ ಹಲವಾರು ಭಕ್ತಾದಿಗಳ ಸಹಕಾರದೊಂದಿಗೆ ಮೇಲುಕೋಟೆ ಯ ಯದುಗಿರಿ ಯತಿರಾಜ ಮಠದ ಪೀಠಾಧಿಪತಿಗಳಾದ ಶ್ರೀ ಯತಿರಾಜ ಜೀಯರ್ ಸ್ವಾಮೀಜಿ ಯವರ ನೇತೃತ್ವದಲ್ಲಿ ತಲೆ ಎತ್ತಲು ಸಜ್ಜಾಗಿದ್ದು, ಇದೇ ಏಪ್ರಿಲ್ ತಿಂಗಳ ಮೂರನೇ ತಾರೀಖಿನಿ ಸೋಮವಾರದಿಂದ ಒಂಭತ್ತನೇ ತಾರೀಖಿನ ಭಾನುವಾರದವರೆಗೆ, ಋಗ್ವೇದ ಸಂಹಿತಾಯಾಗ, ಚತುರ್ವೇದ ಪಾರಾಯಣ ಹಾಗೂ ಲಕ್ಷ ಕುಂಕುಮಾರ್ಚನೆ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ. ವಿಶೇಷವಾಗಿ ಎಂಟನೇ ತಾರೀಖಿನ ಶನಿವಾರ ಬೆಳಿಗ್ಗೆ ಹತ್ತು ಗಂಟೆಗೆ ಶ್ರೀ ಶ್ರೀನಿವಾಸ ಕಲ್ಯಾಣೋತ್ಸವ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದು ಭಕ್ತಾದಿಗಳು ಆಗಮಿಸಿ ದೇವರ ಕೃಪೆಗೆ ಪಾತ್ರರಾಗಲು ಮಾಧ್ಯಮದ ಮೂಲಕ ಮನವಿ ಮಾಡಿದ್ದಾರೆ.

ಅಣ್ಣೇಗೌಡರು ಎಂದರೆ ಹಳೇ ಮೈಸೂರು ಭಾಗದಲ್ಲಿ ಬಹುದೊಡ್ಡ ಹೆಸರು, ಸ್ವಾತಂತ್ರ್ಯ ಪೂರ್ವದಿಂದ ಸ್ವಾತಂತ್ರ್ಯಾನಂತರವೂ ಜಮೀನ್ದಾರರಾಗಿ, ದಾನದರ್ಮಿಷ್ಠರಾಗಿ, ಮೈಸೂರು ದೊರೆಗಳಿಂದ, ಸ್ಥಳೀಯ ಪಾಳೇಗಾರರಿಂದ, ಪ್ರಜಾಪ್ರಭುತ್ವದ ನಂತರ ಅಂದಿನ ಮಂತ್ರಿಮಹೋದಯರಿಂದ ಬೆನ್ನು ತಟ್ಟಿಸಿಕೊಂಡವರು. ಬೆಂಗಳೂರು ಮೈಸೂರು ಹೆದ್ದಾರಿಯಲ್ಲಿ ಬರುವ ಬಹುತೇಕ ನಗರಗಳಲ್ಲಿರುವ ಅನೇಕ ಸರ್ಕಾರಿ ಜಾಗ ಅಣ್ಣೇಗೌಡರ ಕೊಡುಗೆಯಾಗಿದೆ. ಇದಕ್ಕೆ ಸಾಕ್ಷೀಭೂತವಾಗಿ ಚನ್ನಪಟ್ಟಣ ನಗರದಲ್ಲಿ ಅವರ ಹೆಸರಿನ ವೃತ್ತ ಇರುವುದನ್ನು ಇಂದಿಗೂ ಕಾಣಬಹುದು. ಇವರ ಹೆಸರಿನಲ್ಲಿ ಅವರ ಕುಟುಂಬದವರು ಬೃಹತ್ ಬಡಾವಣೆ ನಿರ್ಮಿಸಿದ್ದು, ಅವರ ಮಾತಾ ಪಿತೃಗಳ ಶಾಶ್ವತ ನೆನಪಿಗಾಗಿ ಸಂಪೂರ್ಣ ತಿರುಪತಿ ಮಾದರಿಯಲ್ಲಿ, ಕಬ್ಬಿಣ, ಸಿಮೆಂಟ್ ಉಪಯೋಗಿಸದೇ ಬೃಹತ್ ಗಾತ್ರದ ಉತ್ತಮ ಕಲ್ಲುಗಳಿಂದ ಶ್ರೀವಾರಿ ಯ ದೇವಾಲಯ ನಿರ್ಮಿಸುತ್ತಿದ್ದು, ಈಗಾಗಲೇ ತಳಪಾಯ ಮುಕ್ತಾಯಗೊಂಡಿದೆ. ಈ ಹಿನ್ನೆಲೆಯಲ್ಲಿ ಏಳು ದಿನಗಳ ಕಾಲ ಪೂಜಾ ಕೈಂಕರ್ಯಗಳನ್ನು ಹಮ್ಮಿಕೊಳ್ಳಲಾಗಿದ್ದು ಭಕ್ತಾದಿಗಳು ಸಕಾಲಕ್ಕೆ ಆಗಮಿಸಿ, ಬಾಲಾಜಿಯ ಕೃಪೆಗೆ ಪಾತ್ರರಾಗಲು ಶ್ರೀ ಭಕ್ತರಿಗೆ ಕರೆ ನೀಡಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ9845856139.