ಈ ಬಾರಿಯ ಚುನಾವಣೆಯಲ್ಲಿ ಹೆಚ್ ಡಿ ಕುಮಾರಸ್ವಾಮಿ ಎದುರು ಸೋಲುಂಡ ಸಿ ಪಿ ಯೋಗೇಶ್ವರ್ ರವರು ತೆರವಾದ ರಾಮನಗರ ಕ್ಷೇತ್ರದಲ್ಲಿ ಬಿಜೆಪಿ ಪಕ್ಷದಿಂದ ಸ್ಪರ್ಧಿಸಿದರೇ ಅವರ ಗೆಲುವು ಖಚಿತ ಎಂಬುದಾಗಿ ರಾಮನಗರ ಕಾಂಗ್ರೆಸ್ ನ ನಂಬಲರ್ಹ ವ್ಯಕ್ತಿಗಳ ಅನಿಸಿಕೆಯಾಗಿದೆ.

ಯಾವುದೇ ಪಕ್ಷದ ನಾಯಕರು ಗೆಲ್ಲುವುದು ಸ್ಥಳೀಯ ನಿಷ್ಠಾವಂತ ಕಾರ್ಯಕರ್ತರ ಶ್ರಮದಿಂದ, ಪ್ರತಿಬಾರಿ ಚುನಾವಣೆಯಲ್ಲಿಯೂ ಈ ವ್ಯಕ್ತಿಗಳು ತಮ್ಮ ಸ್ವಾಭಿಮಾನವನ್ನು ಕೆಲವು ಬಾರಿ ತಮ್ಮ ಪ್ರಾಣವನ್ನು ಪಣಕ್ಕಿಟ್ಟು ತಮ್ಮ ಎದುರಾಳಿ ಪಕ್ಷದವರ ಜೊತೆ ಪೈಪೋಟಿಗಿಳಿದು ತಮ್ಮ ನಾಯಕನನ್ನು ಗೆಲ್ಲಿಸಿಕೊಳ್ಳುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.

ಎಂದೋ ಒಂದು ದಿನ ಬಂದು ಕಾರ್ಯಕರ್ತರನ್ನು ಹುರಿದುಂಬಿಸಿ ಎದುರಾಳಿಯನ್ನು ಬಯ್ದು ಹೋಗುವ ನಾಯಕ ಗೆದ್ದ ನಂತರ ತನ್ನ ಅವಶ್ಯಕತೆಗನುಗುಣವಾಗಿ ಎದುರಾಳಿಯ ಜೊತೆ ಒಂದೇಬಾರಿಗೆ ಕುಚುಕು ಗೆಳೆಯನಾಗಿ ಬಿಡುತ್ತಾನೆ.

ಇತ್ತ ಹೊಡೆದಾಡಿ, ಬಡಿದಾಡಿ ತನ್ನ ಕುಟುಂಬದ ಸಮೇತ ಅನೇಕರನ್ನು ಎದುರು ಹಾಕಿಕೊಂಡ ನಿಷ್ಠಾವಂತ ಕಾರ್ಯಕರ್ತರ ಗತಿ ! ಅಬ್ಬಾ ತಾವೆಲ್ಲರೂ ಅವನ ಸ್ಥಾನದಲ್ಲಿ ನಿಮ್ಮನ್ನು ಒಮ್ಮೆ ಕಲ್ಪಿಸಿಕೊಳ್ಳಿ ! ?

ಇಂತಹ ವಾತಾವರಣವೀಗ ರಾಮನಗರ ಕಾಂಗ್ರೆಸ್ ಪಾಳೆಯದಲ್ಲಿನ ನಿಷ್ಠಾವಂತ ಕಾರ್ಯಕರ್ತರಲ್ಲಿ ಉಲ್ಬಣಗೊಳ್ಳುತ್ತಿದೆ, ಕೇವಲ ಮೂವ್ವತ್ತೆಂಟು ವಿಧಾನಸಭಾ ಕ್ಷೇತ್ರಗಳನ್ನು ಗೆದ್ದ ಜೆಡಿ(ಎಸ್) ಜೊತೆ ಅವರೂ ಕರೆಯದೇ ಇದ್ದರೂ ಇವರೇ ನಾವು ಬೆಂಬಲ ನೀಡುತ್ತೇವೆ ನೀವು ಸರ್ಕಾರ ರಚಿಸಿ ಎಂದು ದುಂಬಾಲು ಬಿದ್ದಿದ್ದು ಅವರ ಶೋಚನೀಯ ಸ್ಥಿತಿಯನ್ನು ತೋರಿಸುತ್ತದೆ.

ಅಷ್ಟೇ ಅಲ್ಲಾ ಏನೂ ಶರತ್ತುಗಳಿಲ್ಲದೆ (unconditional support) ಬೆಂಬಲ ಸೂಚಿಸಿದ್ದು ಕಾಂಗ್ರೆಸ್ ಅಧೋಗತಿಗಿಳಿದಿದೆ ಎಂಬುದನ್ನು ತೋರಿಸುತ್ತದೆ.

ಈ ವಿಷಯವಾಗಿ ರಾಮನಗರದಲ್ಲಾಗಲೇ ಕಾಂಗ್ರೆಸ್ಸಿಗರು ಒಂದು ಪತ್ರಿಕಾಗೋಷ್ಠಿ ಕರೆದು ಜೆಡಿ(ಎಸ್) ನವರು ಬರುವ ತನಕ ಕಾಯಬೇಕಾಗಿತ್ತು, ಇಷ್ಟೊಂದು ಅವಸರದ ಅವಶ್ಯಕತೆ ಇರಲಿಲ್ಲ ಎಂಬ ಹೇಳಿಕೆಯನ್ನು ಕೊಡುವುದರ ಮೂಲಕ ತಮ್ಮ ಅಸಮಾಧಾನವನ್ನು ಹೊರಗೆಡವಿದ್ದಾರೆ.

ಅಂದರೆ ಹೆಚ್ ಡಿ ಕುಮಾರಸ್ವಾಮಿ ಯವರು ರಾಜಿನಾಮೆ ನೀಡಿರುವ ರಾಮನಗರ ಕ್ಷೇತ್ರಕ್ಕೆ ಜೆಡಿ(ಎಸ್) ನಿಂದ ಅಭ್ಯರ್ಥಿಯನ್ನು ಹಾಕುತ್ತಾರೆ, ಸರ್ಕಾರದಲ್ಲಿ ಮೈತ್ರಿ ಇರುವುದರಿಂದ ಕಾಂಗ್ರೆಸ್ ಪಕ್ಷದಿಂದ ಅಭ್ಯರ್ಥಿಯನ್ನು ಹಾಕುವುದಿಲ್ಲ, ಇನ್ನೂ ಬಿಜೆಪಿಗೆ ಅಲ್ಲಿ ನೆಲೆಯಿಲ್ಲ.

ಕಾಂಗ್ರೆಸ್ ನಿಂದ ಬಲಿಷ್ಠ ಅಭ್ಯರ್ಥಿಯನ್ನು ಹಾಕದಿದ್ದರೆ ನಿಷ್ಠಾವಂತ ಕಾಂಗ್ರೆಸ್ ಕಾರ್ಯಕರ್ತರು ಮತ್ತು ಮತದಾರರು ಕಾಂಗ್ರೆಸ್ ಪಕ್ಷಕ್ಕೆ ಬೆನ್ನು ತೋರಿಸುವ ಕೆಲಸ ಮಾಡಲು ಸಜ್ಜಾಗಿರುವುದು ಕಂಡುಬರುತ್ತಿದೆ.

ಸಿ ಪಿ ಯೋಗೇಶ್ವರ್ ರಾಮನಗರ ಕ್ಷೇತ್ರಕ್ಕೆ ಚಿರಪರಿಚಿತರಾಗಿರುವುದರಿಂದ ಬಿಜೆಪಿ ಪಕ್ಷವು ಅವರ ಬೆನ್ನಿಗಿರುವುದರಿಂದ ಕಾಂಗ್ರೆಸ್ ನ ಮುಖಂಡರನ್ನು ಭೇಟಿ ಮಾಡಿದರೆ, ಅವರಿಗಾಗಿರುವ ಅನ್ಯಾಯ, ಮೋಸದ ಜೊತೆಗೆ ಅವಮಾನಗೊಂಡಿರುವ ಹಲವಾರು ನಾಯಕರು ಇವರ ಜೊತೆ ಕೈಜೋಡಿಸಿ ಸಿ ಪಿ ಯೋಗೇಶ್ವರ್ ಗೆಲುವಿಗೆ ಸಹಕರಿಸಬಹುದು.

ಯಾಕೆಂದರೆ ಈ ಮೈತ್ರಿ ಸರ್ಕಾರಗಳು ಅವಧಿಪೂರ್ವ ಪ್ರಸವಕ್ಕೊಳಗಾಗುವುದೇ ಹೆಚ್ಚು, ಐದು ವರ್ಷ ಪೂರೈಸೋದು ಬಹಳ ಕಷ್ಟ, ಏನೂ ಆಗದೆ ಈ ಮೈತ್ರಿ ಸರ್ಕಾರ ಐದು ವರ್ಷ ಪೂರೈಸಿದರೆ ಅದು ದಾಖಲೆಯಾಗಿ ಉಳಿಯುತ್ತದೆ.

ಇದರ ಜೊತೆಗೆ ಕಾಂಗ್ರೆಸ್ ಮತ್ತು ಜೆಡಿ(ಎಸ್) ಪಕ್ಷಗಳೆರಡು ಬಹುಸಂಖ್ಯಾತರಾದ ಲಿಂಗಾಯತರನ್ನು ಎರಡು ರೀತಿಯಲ್ಲಿ ಎದುರು ಹಾಕಿಕೊಂಡಂತಾಗಿದೆ, ಅದರ ಲಾಭವನ್ನು ಸಿ ಪಿ ಯೋಗೇಶ್ವರ್ ಮತ್ತು ಬಿಜೆಪಿ ಪಕ್ಷ ಪಡೆದುಕೊಳ್ಳಬಹುದಾಗಿದೆ.

ಹಾಗಾಗಿ ಸಿ ಪಿ ಯೋಗೇಶ್ವರ್ ಇಂದಿನಿಂದಲೇ ರಾಮನಗರ ಅಕಾಡಕ್ಕಿಳಿದರೆ ಚನ್ನಪಟ್ಟಣದ ಸೋಲು ರಾಮನಗರದಲ್ಲಿ ಗೆಲುವಿನ ಮೆಟ್ಟಿಲಾಗುವುದರಲ್ಲಿ ಸಂದೇಹವಿಲ್ಲ.

 

ಗೋ ರಾ ಶ್ರೀನಿವಾಸ...

ಮೊ: 9845856139.