ಬೆಂಗಳೂರು: ನಾನು ಹೋದ ಕಡೆಗಳೆಲ್ಲ ಜನ ಸೇರುತ್ತಾರೆ. ಪ್ರೀತಿ ತೋರಿಸುತ್ತಾರೆ. ಆದರೆ, ಅದೇ ಪ್ರೀತಿಯನ್ನು ಪಕ್ಷದ ಮೇಲೆ ತೋರಿಸುತ್ತಿಲ್ಲ. ಏಕೆ ಎಂಬುದು ಅರ್ಥವಾಗುತ್ತಿಲ್ಲ ಎಂದು ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಭಾವೋದ್ವೇಗದಿಂದ ಹೇಳಿದರು.

ಪಕ್ಷದ ರಾಜ್ಯಮಟ್ಟದ ಬೂತ್‌ ಘಟಕಗಳ ಕಾರ್ಯಕರ್ತರು ಶನಿವಾರ ಹಮ್ಮಿಕೊಂಡಿದ್ದ ಸನ್ಮಾನ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ‘ನೀವೆಲ್ಲರೂ ನಾನು ಮುಖ್ಯಮಂತ್ರಿ ಆಗಿದ್ದಕ್ಕೆ ಸಂತೋಷಪಟ್ಟಿದ್ದೀರಿ. ನನ್ನ ತಂದೆ, ತಾಯಿ ಮಾಡಿದ ಪೂಜೆಯ ಫಲವಾಗಿ ನನಗೆ ಮತ್ತೆ ಅಧಿಕಾರ ಸಿಕ್ಕಿದೆ’ ಎಂದು ಕೆಲಹೊತ್ತು ಮೌನವಾದರು.

‘ಪ್ರಧಾನಿ ಹುದ್ದೆಯನ್ನೇ ಒದ್ದು ಬಂದ ದೇವೇಗೌಡರ ಮಗ ನಾನು. ಮನಸ್ಸು ಮಾಡಿದರೆ ಎರಡೇ ಗಂಟೆಯಲ್ಲಿ ಅಧಿಕಾರದಿಂದ ಕೆಳಗೆ ಇಳಿಯುತ್ತೇನೆ. ದೇವರು ಕೊಟ್ಟ ಈ ಜಾಗದಲ್ಲಿ ದೇವರು ಇಚ್ಛಿಸುವವರೆಗೆ ಇರುತ್ತೇನೆ’ ಎಂದರು.

‘ಕರಾವಳಿಯಲ್ಲಿ ಮೀನುಗಾರ ಮಹಿಳೆಯರಿಂದ ಇಂಗ್ಲಿಷ್‌ನಲ್ಲಿ ‘ಕುಮಾರಸ್ವಾಮಿ ನಮ್ಮ ಮುಖ್ಯಮಂತ್ರಿ‌ ಅಲ್ಲ’ ಎಂದು ಫಲಕ ಕೊಟ್ಟು ಪ್ರತಿಭಟನೆ ಮಾಡಿಸಲಾಗಿದೆ. ಕೊಡಗಿನ ಹುಡುಗನೊಬ್ಬನ ಹೇಳಿಕೆಯನ್ನು ಸಾಮಾಜಿಕ ಜಾಲ ತಾಣದಲ್ಲಿ ವೈರಲ್ ಮಾಡಲಾಗಿದೆ. ಇದರ ಹಿಂದೆ ಬಿಜೆಪಿಯವರ ಹುನ್ನಾರವಿದೆ. ಇದಕ್ಕೆ ನಾನು ಹೆದರುವುದಿಲ್ಲ. ಆ ಭಾಗಗಳಿಗೆ ಹೋಗಿ ಜನರ ಸಮಸ್ಯೆಗಳನ್ನು ಆಲಿಸುತ್ತೇನೆ’ ಎಂದೂ ಮಾತು ಕೊಟ್ಟರು.

‘ಮೊಬೈಲ್ ಬ್ಯಾಂಕ್ ಯೋಜನೆ ಜಾರಿಗೆ ತರುವ ಉದ್ದೇಶವಿದೆ. ನಿತ್ಯ ವ್ಯಾಪಾರ ಮಾಡುವ ಸಣ್ಣ ವ್ಯಾಪಾರಿಗಳಿಗೆ ಬಡ್ಡಿರಹಿತ ಸಾಲ ಕೊಡುವ ಯೋಜನೆ ಜಾರಿಗೆ ತರುವ ಚಿಂತನೆಯೂ ಇದೆ’ ಎಂದ ಕುಮಾರಸ್ವಾಮಿ, ‘ಅನ್ನಭಾಗ್ಯ ಯೋಜನೆಯಲ್ಲಿ ಏಳು ಕಿಲೋ ಅಕ್ಕಿ ಕೊಡಲು ಮತ್ತೆ ₹ 2000 ಕೋಟಿ ಹಣ ಬೇಕು. ಎಲ್ಲಿಂದ ಹಣ ಹೊಂದಿಸಲಿ’ ಎಂದೂ ಪ್ರಶ್ನಿಸಿದರು.

‘ನಿಗಮ ಮಂಡಳಿಗಳಿಗಾಗಿ ಅಂಗಲಾಚಬೇಡಿ. ಪಕ್ಷದ ಪಾಲಿಗೆ ಬರುವ 20-30 ನಿಗಮ ಮಂಡಳಿಗಳಲ್ಲಿ ಎಷ್ಟು ಜನರಿಗೆ ಅಂತ ಕೊಡಲಿ. ನಮ್ಮ ಪಕ್ಷಕ್ಕೆ ಪೂರ್ಣ ಬಹುಮತ ಬಂದಾಗ ನಾನೇ ನಿಮ್ಮನ್ನು ಗುರುತಿಸುತ್ತೇನೆ. 15 ದಿನಗಳಿಗೊಮ್ಮೆ ಪಕ್ಷದ ಕಚೇರಿಗೆ ಬರುತ್ತೇನೆ’ ಎಂದು ಪಕ್ಷದ ಕಾರ್ಯಕರ್ತರಿಗೆ ಭರವಸೆ ನೀಡಿದರು.