ಭಾರತೀಯ ಆಚಾರ ವ್ಯವಹಾರಗಳಲ್ಲಿ ಅಡಗಿರುವ ಶಾಸ್ತ್ರೀಯತೆ ಶಾಸ್ತ್ರೀಯ ದೃಷ್ಟಿಯಿಂದ ವಿಶ್ಲೇಷಿಸಿರುವ ಗ್ರಂಥ

*ಇಂಗ್ಲಿಷ್ ಮೂಲ ಲೇಖಕ: ಡಾ ವೆಂಗನೂರು ಬಾಲಕೃಷ್ಣನ್.

ಕನಡಕ್ಕೆ: ಊರುಕುಂಟೆ ನರಸಿಂಹ ಮೂರ್ತಿ*

ಇತರ ಶಾಸ್ತ್ರಗಳಿಗಿಂತ ಜ್ಯೋತಿಷ್ಯವು ಹೇಗೆ ಬೇರೆಯಾಗಿದೆ ?

ಆಕಾಶದಲ್ಲಿ ಸಂಚರಿಸುವ ಗ್ರಹ ನಕ್ಷತ್ರಾದಿಗಳು ಭೂಮಿಯ ಮೇಲಿರುವ ಜೀವರಾಶಿಗಳ ಮೇಲೆ ಹೇಗೆ ಪ್ರಭಾವವನ್ನು ಬೀರುವುದೆಂಬುದನ್ನು ತಿಳಿಸುವ ಶಾಸ್ತ್ರವನ್ನು ಜ್ಯೋತಿಷ್ಯ ಎಂದು ಕರೆಯುವರು. ಜ್ಯೋತಿಷ್ಯವು ಮುಖ್ಯವಾಗಿ ಮಾನವರ ಜೀವನವನ್ನು ಕುರಿತು ತಿಳಿಸುತ್ತದೆ. ನಮ್ಮ ಶರೀರದಲ್ಲಿನ ಹಾಗೂ ಮನಸ್ಸಿನಲ್ಲಿನ ಚಲನಗಳಿಗೆ ಗ್ರಹ ನಕ್ಷತ್ರಾದಿಗಳಿಗೆ ಸಂಬಂಧವಿದೆಯೆಂದು, ಅವುಗಳ ಪ್ರಭಾವ ನಮ್ಮ ಮನೋ ಶರೀರದ ಮೇಲೆ ಬಿದ್ದು, ನಮ್ಮ ಜೀವನವನ್ನು ಕ್ರಮಬದ್ದವಾಗಿ ಮಾಡುವುದೆಂದು ನಂಬಿಕೆ. ವಿಶ್ವದಲ್ಲಿನ ಗೋಳಗಳು ನಿರಂತರವಾಗಿ ಪರಿಭ್ರಮಿಸುವುದರಿಂದ ಕಾಲವು ಉಂಟಾಗುವುದು. ಈ ಕಾಲವು ನಮ್ಮ ಜೀವನ ಕಾಲದ ಮೇಲೆ ಹೇಗೆ ತನ್ನ ಪ್ರಭಾವವನ್ನು ಹೊಂದಿರುವುದೆಂದು ಜ್ಯೋತಿಷ್ಯ ತಿಳಿಸುತ್ತದೆ. ವಿಶ್ವದಲ್ಲಿನ ಸಮಸ್ತ ಕ್ರಿಯೆಗಳು ಒಂದಾನೊಂದು ವಿಧಾನವನ್ನು ಅನುಸರಿಸಿ ನಡೆಯುತ್ತವೆ.

ಇತರ ಶಾಸ್ತ್ರಗಳು ಮಾನವನ ಜೀವನ ನಡೆಯನ್ನು ತಿಳಿಸಲಾರವು. ಒಬ್ಬ ವ್ಯಕ್ತಿಯ ಜೀವನ ಹೇಗೆ ಸಾಗುವುದೋ, ಯಾವಾಗ ವಿವಾಹವಾಗುವುದೋ, ಯಾವ ರೀತಿಯ ಉದ್ಯೋಗ ಸಿಗುವುದೋ, ಭವಿಷ್ಯತ್ತು ಹೇಗೆ ಇರುವುದೋ‌ ಎಂಬುದನ್ನು ಜ್ಯೋತಿಷ್ಯ ಶಾಸ್ತ್ರ ಮಾತ್ರವೇ ತಿಳಿಸಬಲ್ಲದು. ಇದೇ ಈ ಶಾಸ್ತ್ರದ ಮಹತ್ವ. ಶಾಸ್ತ್ರದ ಅವಗಾಹನೆ ಸರಿಯಾಗಿದ್ದರೆ ಮಾತ್ರ ನಮ್ಮ ಜೀವನದಲ್ಲಿಯ ಘಟನೆಗಳು ಹಾಗೂ ಫಲಗಳ ಕುರಿತು ಶೇಕಡಾ ೮೦ ರಷ್ಟು ಖಚಿತವಾದ ಸಮಾಚಾರವನ್ನು ನಾವು ಹೊಂದುತ್ತೇವೆ.

ಋಷಿಗಳು ಅತೀಂದ್ರಿಯ ಶಕ್ತಿಯನ್ನು ಹೊಂದಿದ್ದರು. ಅವರು ತಮ್ಮ ದರ್ಶನ ಪ್ರಭಾವದಿಂದ ವಿಶ್ವ ರಹಸ್ಯಗಳನ್ನು ತಿಳಿದುಕೊಂಡು ಗ್ರಹ ನಕ್ಷತ್ರ ಸಂಬಂಧವಾದ ಜ್ಯೋತಿಷ್ಯ ಶಾಸ್ತ್ರವನ್ನು ರಚಿಸಿರುವರು. ಗ್ರಹ ಚಲನೆ, ಕಾಲ, ಪ್ರದೇಶ ಮುಂತಾದ ಅಂಶಗಳನ್ನು ಈ ಶಾಸ್ತ್ರವು ಪರಿಗಣನೆಗೆ ತೆಗೆದುಕೊಳ್ಳುತ್ತದೆ. ಶಕುನಗಳು ಹಾಗೂ ಅವಗಾಹನೆಯೂ ಸಹ ಇದರಲ್ಲಿ ಒಂದು ಭಾಗವಾಗಿ ಇರುವುದು. ಇತರೆ ಶಾಸ್ತ್ರಗಳಿಗೆ ಪ್ರಯೋಗಗಳಿಗಾಗಿ ಪ್ರಯೋಗ ಶಾಲೆ ಅಗತ್ಯ. ಆದರೆ ಜ್ಯೋತಿಷ್ಯ ಶಾಸ್ತ್ರಕ್ಕೆ ಅಂತಹ ಅಗತ್ಯತೆ ಇಲ್ಲ. ಕೇವಲ ಪರಿಸರ ತಿಳುವಳಿಕೆಯಿಂದ ಫಲಗಳನ್ನು ತಿಳಿಸಲಾಗುವುದು.

*ಸಂಗ್ರಹ ಮತ್ತು ಪ್ರಚಾರ;*

*ಗೋ ರಾ ಶ್ರೀನಿವಾಸ...*

*ಮೊ:9845856139.*