ವಾಷಿಂ‌ಗ್‌ಟನ್‌: ಭಾರತ ಸೇರಿದಂತೆ ಅನೇಕ ದೇಶಗಳಲ್ಲಿ ನಡೆಯಲಿರುವ ಚುನಾವಣೆಗಳನ್ನು ನಿಷ್ಪಕ್ಷಪಾತವಾಗಿ ನಡೆಸುವ ನಿಟ್ಟಿನಲ್ಲಿ ಸಾಮಾಜಿಕ ಜಾಲತಾಣ, ಫೇಸ್‌ಬುಕ್ ನಿಂದ ಯಾವುದೇ ಧಕ್ಕೆಯಾಗದಿರಲು ಕೃತಕ ಬುದ್ಧಿಮತ್ತೆ ಹಾಗು ಸಹಸ್ರಾರು ಜನರನ್ನು ಇದೇ ವಿಚಾವಾಗಿ ನೇಮಿಸಿರುವುದಾಗಿ ಫೇಸ್‌ಬುಕ್‌ ಸ್ಥಾಪಕ ಹಾಗು ಸಿಇಓ, ಮಾರ್ಕ್‌ ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

ಸುಳ್ಳು ಸುದ್ದಿ ಹಬ್ಬಿಸುವ ಟ್ರೋಲ್‌ಗಳನ್ನು ನಿಯಂತ್ರಿಸಲು ಪೇಸ್‌ಬುಕ್‌ ತನ್ನ ಭದ್ರತಾ ಕ್ರಮಗಳನ್ನು ಇನ್ನಷ್ಟು ಕಠಿಣಗೊಳಿಸುತ್ತಿದೆ ಎಂದು ಹೇಳಿರುವ ಝುಕ್‌ರ್‌ಬರ್ಗ್, ಚುನಾವಣಾ ದೃಷ್ಟಿಯಿಂದ 2018 ದೊಡ್ಡ ವರ್ಷವಾಗಿದೆ ಎಂದಿದ್ದಾರೆ.

ಡೊನಾಲ್ಡ್‌ ಟ್ರಂಪ್‌ರ ಅಧ್ಯಕ್ಷೀಯ ಚುನಾವಣಾ ಪ್ರಚಾರದೊಂದಿಗೆ ನಂಟು ಹೊಂದಿರುವ ಬ್ರಿಟನ್ ಮೂಲದ, ಕೇಂಬ್ರಿಡ್ಜ್‌ ಅನಲಿಟಿಕಾ ಸಂಸ್ಥೆಯಿಂದ ಆದ ಭಾರೀ ಪ್ರಮಾಣದ ವೈಯಕ್ತಿಕ ಮಾಹಿತಿ ಸೊರಿಕೆ ಕುರಿತಾಗಿ, ಸಾಮಾಜಿಕ ಜಾಲತಾಣ ದೈತ್ಯನ ವಿರುದ್ಧ ಸಾಕಷ್ಟು ಟೀಕೆ ಟಿಪ್ಪಣಿಗಳು ಕೇಳಿ ಬಂದಿದ್ದವು.

“ಕಳೆದ ವರ್ಷ, ಅಮೆರಿಕದ ಅಲಬಾಮಾದಲ್ಲಿ ನಡೆದಿದ್ದ ವಿಶೇಷ ಸೆನೆಟ್‌ ಚುನಾವಣೆಯಲ್ಲಿ ತಪ್ಪು ಮಾಹಿತಿ ಹಬ್ಬಿಸಲು ಯತ್ನಿಸುತ್ತಿದ್ದ ಮ್ಯಾಸಿಡೋನಿಯನ್‌ ಮೂಲದ ಟ್ರೋಲ್‌ಗಳನ್ನು ಕೃತಕ ಬುದ್ಧಿಮತ್ತೆ ಬಳಸಿ ತೆಗೆದುಹಾಕಲಾಗಿತ್ತು. ಸದ್ಯ, 15,000ಕ್ಕೂ ಹೆಚ್ಚು ಮಂದಿ ಭದ್ರತೆ ಹಾಗು ವಿಷಯ ಪರಿಶೀಲನೆ ಕುರಿತಂತೆ ಕೆಲಸ ಮಾಡುತ್ತಿದ್ದಾರೆ, ವರ್ಷಾಂತ್ಯಕ್ಕೆ 20,000ಕ್ಕೂ ಹೆಚ್ಚು ಮಂದಿಯನ್ನು ಇದೇ ವಿಚಾರವಾಗಿ ಕೆಲಸಕ್ಕೆ ತೆಗೆದುಕೊಳ್ಳಲಾಗುವುದು” ಎಂದು ನೆನ್ನೆ ನಡೆದ ದೂರವಾಣಿ ಸಭೆ ಉದ್ದೇಶಿಸಿ, ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

 ಭಾರತ, ಬ್ರೆಝಿಲ್, ಮೆಕ್ಸಿಕೋ ,ಪಾಕಿಸ್ತಾನ, ಹಂಗೇರಿ ಹಾಗು ಇನ್ನಿತರ ದೇಶಗಳಲ್ಲಿ ಈ ವರ್ಷ ಚುನಾವಣೆ ನಡೆಯಲಿದ್ದು ಬಹಳ ಮಹತ್ವ ಪಡೆದುಕೊಂಡಿದೆ.

ಕರ್ನಾಟಕ, ರಾಜಸ್ಥಾನ, ಛತ್ತೀಸ್‌ಗಡ, ಮಧ್ಯ ಪ್ರದೇಶಗಳಲ್ಲಿ ಈ ವರ್ಷ ವಿಧಾನ ಸಭಾ ಚುನಾವಣೆಗಳು ಜರುಗಲಿದ್ದು ಇನ್ನೊಂದು ವರ್ಷದಲ್ಲಿ ಲೋಕಸಭಾ ಚುನಾವಣೆಯೂ ಆಯೋಜನೆಯಾಗಲಿದೆ.

ಇದಕ್ಕೂ ಮುನ್ನ, ಅಮೆರಿಕವನ್ನು ಗುರಿಯಾಗಿಸಿದ್ದ ರಷ್ಯಾದ ಅಂತರ್ಜಾಲ ಸಂಶೋಧನಾ ಏಜೆನ್ಸಿಯ ಪತ್ರಗಳನ್ನು ಫೇಸ್‌ಬುಕ್‌ ಪಡೆದುಕೊಂಡಿದ್ದು, ಈ ನಿಟ್ಟಿನಲ್ಲಿ ದೊಡ್ಡ ಹೆಜ್ಜೆ ಇಟ್ಟಿದೆ ಎಂದು  ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

“2016ರ ಚುನಾವಣೆ ಬಳಿಕ ಅವರ ಚಟುವಟಿಕೆಗಳ ಕುರಿತು ಜಾಗೃತರಾದ ನಾವು ಜಗತ್ತಿನಾದ್ಯಂದ ಚುನಾವಣೆಗಳ ಪಾವಿತ್ರ‍್ಯತೆ ಕಾಪಾಡಲು ಕೆಲಸ ಮಾಡುತ್ತಿದ್ದೇವೆ” ಎಂದು ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

ಫ್ರಾನ್ಸ್‌ ಅಧ್ಯಕ್ಷೀಯ ಚುನಾವಣೆಯಲ್ಲಿ ಈ ಕುರಿತಂತೆ ಕಣ್ಗವಾಲಿಟ್ಟ ಕಾರಣ, ಸುಮಾರು 30,000 ನಕಲಿ ಖಾತೆಗಳನ್ನು ಕೃತಕ ಬುದ್ಧಿಮತ್ತೆ ಮೂಲಕ ಪತ್ತೆ ಮಾಡಲಾಗಿತ್ತು ಎಂದು ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

ಕೆಲವೊಮ್ಮೆ ಸ್ಪಾ‌ಮ್‌ಗಳನ್ನು ಹಬ್ಬಿಸುವವರಿಂದ, ಚುನಾವಣೆಗಳಲ್ಲಿ ಮಧ್ಯ ಪ್ರವೇಶಿದಲು ಸರಕಾರ ಯತ್ನಿಸುವ ಕಾರಣ ಹಾಗು ಮಾಧ್ಯಮಗಳು ಬಿತ್ತರಿಸುವ ಸುದ್ದಿಗಳಲ್ಲಿ ಸತ್ಯಾಂಶದ ಕೊರತೆ ಕೂಡಾ ಕಾರಣವಾಗಲಿದೆ ಎಂದು ಝುಕರ್‌ಬರ್ಗ್ ತಿಳಿಸಿದ್ದಾರೆ.

ಅಮೆರಿಕ ಚುನಾವಣೆಯಲ್ಲಿ ರಷ್ಯಾ ಭಾಗಿಯಾದಂಥ ವಿಚಾರಗಳು ರಾಷ್ಟ್ರೀಯ ಭದ್ರತೆ ಕುರಿತಂತೆ ಪ್ರಭಾವ ಬೀರಲಿವೆ ಎಂದು ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

“ಈ ವಿಚಾರವಾಗಿ ಪರಿಹಾರ ಕಂಡುಕೊಳ್ಳಲು ನಾವು ಮೊದಲು ದುಷ್ಟ ಶಕ್ತಿಗಳನ್ನು ಪತ್ತೆ ಮಾಡಬೇಕಿದೆ. ಇಮಥ ಶಕ್ತಿಗಳನ್ನು ಫೇಸ್‌ಬುಕ್‌ನಿಂದ ಸಂಪೂರ್ಣ ಕಿತ್ತೊಗೆಯಲು ಯತ್ನಿಸಲಿದ್ದೇವೆ” ಎಂದು ಝುಕರ್‌ಬರ್ಗ್‌ ತಿಳಿಸಿದ್ದಾರೆ.

(ಸಂಗ್ರಹಿಸಿದ ವರದಿ)