ಮಹಾತ್ಮರ ಪ್ರತಿಮೆಗಳನ್ನು ಸ್ಥಾಪಿಸಿ, ಆಡಂಬರದ ಪೂಜೆ ಮತ್ತು ಮೆರವಣಿಗೆ ಮಾಡಿ, ರಜೆ ಪಡೆದು ಮಜಾ ಮಾಡುವ ಬದಲು ಅಂತಹ ಮಹಾತ್ಮರ ನಡೆ ನುಡಿಗಳನ್ನು ಅನುಸರಿಸುವ ಜೊತೆಗೆ ಎಲ್ಲರೂ ಪಾಲಿಸುವಂತೆ ಜಾರಿಗೆ ಬಂದರೆ ಅಂತಹ ಮಹಾತ್ಮರ ಆಶಯಗಳು ಈಡೇರುತ್ತವೆ ಎಂದು ಉಪ ಪೊಲೀಸ್ ಅಧೀಕ್ಷಕ ಕೆ.ಎನ್ ರಮೇಶ್ ಅಭಿಪ್ರಾಯ ಪಟ್ಟರು.

ಅವರು ಇಂದು ಇಲ್ಲಿನ ತಾಲ್ಲೂಕು ಕಛೇರಿ ಸಭಾಂಗಣದಲ್ಲಿ ತಾಲ್ಲೂಕು ಆಡಳಿತ ಹಾಗೂ ರಾಷ್ಟ್ರೀಯ ಹಬ್ಬಗಳ ಆಚರಣಾ ಸಮಿತಿ ವತಿಯಿಂದ ಸರಳವಾಗಿ ಹಮ್ಮಿಕೊಂಡಿದ್ದ ಜಗಜೀವನ್ ರಾಮ್ ಅವರ 114 ನೇ ಜಯಂತಿಯಲ್ಲಿ, ಭಾವಚಿತ್ರಕ್ಕೆ ಪುಷ್ಪನಮನ ಸಲ್ಲಿಸಿ ಮಾತನಾಡಿದರು.

ನಾಡು ನುಡಿಗೆ ನಾವು ಹೇಗೆ ಸ್ಪಂದಿಸುತ್ತೇವೆಯೋ ಅದೇ ರೀತಿಯಾಗಿ ರಾಷ್ಟ್ರ ಕಟ್ಟಿದ  ನಾಯಕರುಗಳನ್ನೂ ಸಹ ನಾವು ಸದಾ ಸ್ಮರಿಸಿಕೊಳ್ಳಬೇಕು. ಸ್ವಾತಂತ್ರ ಪೂರ್ವದಲ್ಲಿ ಸ್ವಾತಂತ್ರ ಪಡೆಯುವುದಕ್ಕಾಗಿ ಪಟ್ಟಂತಹ ಕಷ್ಟಗಳು, ಸ್ವಾತಂತ್ರ ನಂತರ ರಾಷ್ಟ್ರ ಕಟ್ಟಲು ಎದುರಿಸಿದ ಸಂಕಷ್ಟಗಳನ್ನು ನಾವು ಓದಿ ತಿಳಿದುಕೊಳ್ಳಬೇಕಾಗಿದೆ. ಇಂದು ಯಾವುದೇ ಜಯಂತಿ ಎಂದರೆ, ಕಾಟಾಚಾರಕ್ಕೆ ಎಂಬಂತೆ ಆಗಿದ್ದು, ಅದನ್ನು ತಡೆಗಟ್ಟಿ ಅವರ ಆಶೋತ್ತರಗಳನ್ನು ಈಡೇರಿಸುವ ಮೂಲಕ  ಜಯಂತಿಯನ್ನು ಆಚರಿಸಬೇಕು ಎಂದು ತಿಳಿಸಿದರು.

ನಗರಸಭೆಯ ಪೌರಾಯುಕ್ತರಾದ ಶಿವನಾಂಕಾರಿಗೌಡ ಮಾತನಾಡಿ, ಜಗಜೀವನ್ ರಾಂ ಅವರು ಹಸಿರು ಕ್ರಾಂತಿಯ ಹರಿಕಾರರಾಗಿದ್ದು. ಸ್ವಾತಂತ್ರ್ಯ ನಂತರ ದೇಶವು ಆರ್ಥಿಕ ಮತ್ತು ಆಹಾರ ಸಂಕಷ್ಟವನ್ನು ಎದುರಿಸುತ್ತಿತ್ತು. ಆ ಸಂದರ್ಭದಲ್ಲಿ ಜಗಜೀವನ್ ರಾಂ ಅವರು ಆಹಾರ ಉತ್ಪಾದನೆಯಲ್ಲಿ ಒಂದು ಹೊಸ ಕ್ರಾಂತಿಯನ್ನು ಹುಟ್ಟು ಹಾಕಿ ಜನರ ಹಸಿವನ್ನು ನೀಗಿಸಿದ್ದರು, ಅಂದು ಅವರು ಹಾಕಿ ಕೊಟ್ಟ ಹಸಿರುಕ್ರಾಂತಿ ಬುನಾದಿಯು ಇನ್ನೂ ಹಸಿರಾಗಿರುವುದೇ ಸಾಕ್ಷಿಯಾಗಿದೆ, ಆದ್ದರಿಂದ ಇವರನ್ನು ಸದಾಕಾಲ ಸ್ಮರಿಸಬೇಕಾಗಿರುವುದು ನಮ್ಮೆಲ್ಲರ ಆದ್ಯ ಕರ್ತವ್ಯ ಎಂದರು.

ಸಂದರ್ಭದಲ್ಲಿ ಉಪ ತಹಶೀಲ್ದಾರ್ ಕೃಷ್ಣಪ್ಪ,  ಶಿರಸ್ತೇದಾರ್ ಹರೀಶ್, ಸಮಾಜ ಕಲ್ಯಾಣ ಇಲಾಖೆಯ ಸರೋಜಮ್ಮ, ಆಚರಣಾ ಸಮಿತಿಯ ಸದಸ್ಯರು, ಸೇರಿದಂತೆ ವಿವಿಧ ಇಲಾಖೆಯ ಅಧಿಕಾರಿಗಳು ಭಾಗವಹಿಸಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.