ಜಿಲ್ಲೆಯ ರಾಮನಗರ ಹಾಗೂ ಚನ್ನಪಟ್ಟಣ ನಗರ ಸಭೆಗಳ 62 ವಾರ್ಡ್ಗ ಳಿಗೆ ಇಂದು ಚುನಾವಣೆಯು ನಡೆಯಿತು, ಒಟ್ಟು 1.38 ಲಕ್ಷ ಮತದಾರರು ಮತ ಚಲಾವಣೆಯ ಹಕ್ಕು ಹೊಂದಿದ್ದು, 236 ಅಭ್ಯರ್ಥಿಗಳು ಕಣದಲ್ಲಿ ಇದ್ದರು. 132 ಮತಗಟ್ಟೆಗಳಲ್ಲಿ ಮತದಾನ ನಡೆಯುತ್ತಿದ್ದು, 336 ಸಿಬ್ಬಂದಿಯನ್ನು ನಿಯೋಜಿಸಲಾಗಿತ್ತು.

ರಾಮನಗರ ನಗರ ಸಭೆಯ 31 ವಾರ್ಡ್ಗಳಲ್ಲಿ, 124 ಜನ ಅಭ್ಯರ್ಥಿಗಳು ಕಣದಲ್ಲಿದ್ದರು. ಇಲ್ಲಿ ಕಾಂಗ್ರೆಸ್- 31, ಜೆಡಿಎಸ್-31, ಬಿಜೆಪಿ-21 ಬಿಎಸ್ಪಿ-2 ಎಸ್‌ಡಿಪಿಐ-8, ಕೆಆರ್ ಆರ್‌ಎಸ್-7 ಎಎಪಿ ಯಿಂದ 4 ಮತ್ತು 20 ಮಂದಿ ಪಕ್ಷೇತರರು ಕಣದಲ್ಲಿದ್ದರು

.

ಚನ್ನಪಟ್ಟಣದಲ್ಲಿ 31 ಸ್ಥಾನಗಳಿಗೆ, 112 ಜನ ಕಣದಲ್ಲಿದ್ದು, ಕಾಂಗ್ರೆಸ್-29, ಬಿಜೆಪಿ-21, ಜೆಡಿಎಸ್-31, ಎಎಪಿ-4, ಎಸ್‌ಡಿಪಿಐ-5 ಹಾಗೂ 22 ಜನ ಪಕ್ಷೇತರರು ಕಣದಲ್ಲಿಉಳಿದು ಕೊಂಡಿದ್ದರು.

ಜಿಲ್ಲಾ ಚುನಾವಣಾಧಿಕಾರಿಗಳು ಹಾಗು ಜಿಲ್ಲಾಧಿಕಾರಿಗಳಾದ ಡಾ ರಾಕೇಶ್ ಕುಮಾರ್ ಅವರ ಸೂಚನೆಯ ಮೇರೆಗೆ ಪ್ರತಿಯೊಂದು ಮತಗಟ್ಟೆಯಲ್ಲಿಯೂ ಕೋವಿಡ್ ನಿಯಮವನ್ನು ಪಾಲಿಸಲಾಗಿದೆ.

ರಾಮನಗರ-ಚನ್ನಪಟ್ಟಣ ನಗರಸಭೆಯ ಎಲ್ಲಾ ವಾರ್ಡ್ಗಳಲ್ಲಿಯೂ ಇಂದು ಏಳು ಗಂಟೆ ಯಿಂದಲೇ ಮತದಾನ ಆರಂಭವಾಗಿದ್ದು, ಕರೊನಾ ನಡುವೆಯೂ ಉತ್ಸಾಹದಿಂದ ಮತದಾನ ಮಾಡಲು ನಾಗರಿಕರು ಆಗಮಿಸುತ್ತಿದ್ದು, ಚುನಾವಣಾ ಸಿಬ್ಬಂದಿ ಎಲ್ಲರಿಗೂ ಥರ್ಮಲ್ ಸ್ಕ್ರೀನಿಂಗ್, ಸ್ಯಾನಿಟೈಸ್ ಮಾಡಿದರು. ಮತಗಟ್ಟೆಗೆ ಬಂದ ಮತದಾರರು ಗುರುತು ಮಾಡಿರುವ ಬಾಕ್ಸ್ನೊಳಗೆ ನಿಂತು ಸಾಮಾಜಿಕ ಅಂತರ ಕಾಯ್ದುಕೊಂಡು ಮತದಾನ ಮಾಡಲು ವ್ಯವಸ್ಥೆ ಮಾಡಿಸಿದರು.

ಚುನಾವಣೆ ಕೇಂದ್ರಗಳಲ್ಲಿ ಬಿಗಿ ಪೊಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿತ್ತು. ಕರೊನಾ ಸೋಂಕಿತರಿಗೂ ಮತದಾನ ಮಾಡಲು ಅವಕಾಶ ಮಾಡಿಕೊಟ್ಟಿದ್ದು, ಮತದಾನ ಮುಕ್ತಾಯಕ್ಕೆ ಒಂದು ಗಂಟೆ ಮುಂಚೆ ಮತದಾನ ಮಾಡಲು ಅವಕಾಶ ಮಾಡಲಾಗಿದ್ದು, ಪಿಪಿಇ ಕಿಟ್ ಧರಿಸಿ ಮತದಾನ ಮಾಡಲು ಅವಕಾಶ ಮಾಡಲಾಗಿತ್ತಾದರೂ ಬಹುತೇಕ ಯಾವುದೇ ಸೋಂಕಿತರು ಮತ ಚಲಾಯಿಸಿದ್ದು ಕಂಡು ಬರಲಿಲ್ಲ.

*ಜಿಲ್ಲಾಧಿಕಾರಿ ಭೇಟಿ*

ಚನ್ನಪಟ್ಟಣದಲ್ಲಿ ನಡೆಯುತ್ತಿರುವ ನಗರಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಜಿಲ್ಲೆಯ ಜಿಲ್ಲಾಧಿಕಾರಿಗಳಾದ ಡಾ.ರಾಕೇಶ್ ಕುಮಾರ್ ಕೆ ಅವರು  ಇಲ್ಲಿನ ೩೦,೩೧,೦೭ ಹಾಗೂ ಇನ್ನಿತರೆ ವಾರ್ಡ್ಗಳಿಗೆ ಭೇಟಿ ನೀಡಿ ಮಸ್ಟರಿಂಗ್ ಅಧಿಕಾರಿಗಳಿಗೆ ಕಟ್ಟುನಿಟ್ಟಾಗಿ ತಾವುಗಳೆಲ್ಲರೂ ಮಾಸ್ಕ್ ಧರಿಸಿಯೇ ಕೆಲಸ ನಿರ್ವಹಿಸಬೇಕು, ಬರುವ ಮತದಾರರಿಗೂ ಸಹ ಮಾಸ್ಕ್ ಧರಿಸಿ ಅಂತರ ಕಾಯ್ದುಕೊಂಡು ಬರುವಂತೆ ತಿಳಿಹೇಳಬೇಕು ಎಂದು ಸೂಚಿಸಿದರು.

*ಭಣಗುಟ್ಟಿದ 29 ಮತ್ತು 26 ನೇ ವಾರ್ಡ್*

ತಮಿಳರು ಮತ್ತು ಮುಸ್ಲಿಂ ಮತದಾರರು ಹೆಚ್ಚಿರುವ 29 ನೇ ವಾರ್ಡ್ ನಲ್ಲಿ ಆನಂದಪುರ ಶಾಲೆ ಹಾಗೂ ಕಾವೇರಿ ನೀರು ಸರಬರಾಜು ನಿಗಮ ಕಛೇರಿಯಲ್ಲಿ 2 ಮತಗಟ್ಟೆಗಳಿದ್ದು, ಆನಂದಪುರ ಶಾಲೆಯಲ್ಲಿ ವಾರ್ಡ್ ವಿಂಗಡಣೆಯ ಗೊಂದಲದಿಂದ ಮತದಾರರಿಲ್ಲದೆ ಭಣಗುಡುತಿತ್ತು.

ಮಾಜಿ ನಗರಸಭಾ ಸದಸ್ಯ ವಿಲ್ಸನ್ ಮಾತನಾಡಿ, ಈ ಹಿಂದೆ ವಾರ್ಡ್ ವಿಂಗಡಣೆ ಮಾಡುವಾಗ ಮತದಾರರಿಗೆ ಸಂಪೂರ್ಣ ಮಾಹಿತಿ ಕೊಟ್ಟಿಲ್ಲ, ಹಾಗಾಗಿ ಎಷ್ಟೋ ಮಂದಿ ಮತದಾನದಿಂದ ವಂಚಿತರಾಗಿದ್ದಾರೆ. ಹಲವು ಮಂದಿ ಹೊರಗಡೆ ನೆಲೆಸಿದ್ದು, ಕೋವಿಡ್ ಕಾರಣದಿಂದ ಮತಚಲಾಯಿಸಲು ಬರಲಾಗುತ್ತಿಲ್ಲ ಇದಕ್ಕೆಲ್ಲಾ ವಾರ್ಡ್ ವಿಂಗಡಣೆ ಮಾಡಿದ ಅಧಿಕಾರಿಗಳೇ ಕಾರಣ ಎಂದು ದೂರಿದರು. ಆದರೆ ಸಂಜೆ ಐದು ಗಂಟೆಯ ವೇಳೆಗೆ ಮತದಾರರು ಸಾಲುಗಟ್ಟಿ ಮತ ಚಲಾಯಿಸಿದರು.

ಕಲಾನಗರ ಮತ್ತು ತಟ್ಟೆಕೆರೆ ಪ್ರದೇಶದ ವಾರ್ಡ್ ನಂ.26 ರಲ್ಲಿ ಎರಡು ಮತ ಗಟ್ಟೆಗಳಿದ್ದು, ಒಂದು ಮತ ಗಟ್ಟೆಯಲ್ಲಿ ಮತದಾನ ಮಾಡುವವರ ಸಂಖ್ಯೆ ಕ್ಷೀಣವಾಗಿತ್ತು. ಮತ್ತೊಂದರಲ್ಲಿ ಸಾಧಾರಣವಾಗಿ ಮತದಾನ ನಡೆಯಿತು.

*ಗುಂಪು ಗೂಡಿ ಮತದಾನ*

ನಗರದ 23 ಹಾಗೂ 24 ನೇ ವಾರ್ಡ್ನ ಮತಗಟ್ಟೆಗಳಲ್ಲಿ ಮತದಾರರು ಅತಿ ಹೆಚ್ಚು ಗುಂಪು ಗೂಡಿ ಮತಚಲಾಯಿಸಿದರು. ಪೊಲೀಸರ ಮಾತಿಗೂ ಬೆಲೆ ನೀಡದೆ, ಗುಂಪು ಗುಂಪಾಗಿ ಬೆಂಬಲಿಗರು ನಿಂತಿದ್ದರು.

ಮತದಾರರೂ ಸಹ ಕನಿಷ್ಠ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ, ಒತ್ತೊ ತ್ತಾಗಿ ನಿಂತು ಮತ ಚಲಾಯಿಸಿದರು.

ಪೊಲೀಸ್ ಸಿಬ್ಬಂದಿಗಳ ಯಾವ ಮಾತಿಗೂ ಬೆಲೆ ನೀಡದ ಮತದಾರರಿಗೆ ಕಾಂಗ್ರೆಸ್ ಅಭ್ಯರ್ಥಿ ಮಥೀನ್ ಖಾನ್ ರವರು, ಕೊರೊನಾದ ಎರಡನೆಯ ಅಲೆಯು ಅತಿಯಾಗಿ ಕಾಣಿಸಿಕೊಂಡಿರುವುದರಿಂದ ಮತದಾರರು ಅಂತರ ಕಾಯ್ದುಕೊಂಡು ಮತದಾನ ಮಾಡಬೇಕು ಎಂದು ಮನವಿ ಮಾಡಿಕೊಂಡರು.

ಅಲ್ಲಲ್ಲಿ ಕೆಲವರ ಮಾತಿನ ಚಕಮಕಿ ಮತ್ತು ಡಿ ಟಿ ರಾಮು ವೃತ್ತದಲ್ಲಿ ಗುಂಪು ಚದುರಿಸಲು ಲಘು ಲಾಠಿ ಪ್ರಹಾರ ಹೊರತುಪಡಿಸಿದರೆ ಸಂಪೂರ್ಣ ಮತದಾನ ಶಾಂತಿಯುತವಾಗಿ ನಡೆಯಿತು.

ಪೆಟ್ಟಾ ಶಾಲೆ, ಕೇಂದ್ರೀಯ ಶಾಲೆ, ಕೋಟೆ, ಮಂಗಳವಾರಪೇಟೆ ಸೇರಿದಂತೆ ಬಹುತೇಕ ಎಲ್ಲಾ ವಾರ್ಡ್ ಗಳಲ್ಲಿಯೂ ಸಹ ಮತ ದಾನವು ನೀರಸವಾಗಿ ನಡೆಯಿತು. ಬಾಡೂಟ, ಬಹುಮಾನ ನೀಡಿ, ತಮ್ಮ ಗೆಲುವಿಗೆ ಹರಸಾಹಸ ಪಟ್ಟಿರುವ ಎಲ್ಲಾ ವಾರ್ಡ್ ನ, ಎಲ್ಲಾ ಪಕ್ಷದ ಅಭ್ಯರ್ಥಿಗಳು ಮುಂಬರುವ ಫಲಿತಾಂಶಕ್ಕಾಗಿ ಚಾತಕ ಪಕ್ಷಿಯಂತೆ ಕುತೂಹಲದಿಂದ ಕಾಯುತ್ತಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ:9845856139.