ಕನಕಪುರ ಉಪನೋಂದಣಾಧಿಕಾರಿ ಕಛೇರಿ ಮುಂದೆ ಜನಸಾಗರ. ನಗರಸಭೆಯಿಂದ ಎಚ್ಚರಿಕೆ

Posted date: 17 Jun, 2021

ಕನಕಪುರ ಉಪನೋಂದಣಾಧಿಕಾರಿ ಕಛೇರಿ ಮುಂದೆ ಜನಸಾಗರ. ನಗರಸಭೆಯಿಂದ ಎಚ್ಚರಿಕೆ

ಕನಕಪುರ :ನಗರದ ಉಪನೋಂದಣಾಧಿಕಾರಿ ಕಚೇರಿಯ ಕರ್ತವ್ಯ ಸಮಯದಲ್ಲಿ ಕೊರೋನಾ ಮಾರ್ಗಸೂಚಿಗಳನ್ನು ಸಾರಾಸಗಟಾಗಿ ಉಲ್ಲಂಘಿಸಿ ಕಚೇರಿಯೊಳಗೆ ಜನರ ಗುಂಪನ್ನು ಸೇರಿಸಿಕೊಂಡು ಕೆಲಸ ನಿರ್ವಹಿಸುತ್ತಿದ್ದ ವೇಳೆ ನಗರಸಭಾ ಅಧಿಕಾರಿಗಳು ದಾಳಿ ನಡೆಸಿ ಗುಂಪನ್ನು ಚದುರಿಸಿ ಅಧಿಕಾರಿಗಳಿಗೆ ಕೊರೋನ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಎಚ್ಚರಿಸಿದ ಘಟನೆ ಕನಕಪುರದ ಉಪ ನೋಂದಣಾಧಿಕಾರಿ ಕಚೇರಿಯಲ್ಲಿ ನಡೆಯಿತು.

ಕರೋನಾ ಎರಡನೆ ಅಲೆಯಲ್ಲಿ ಇದೇ ಕಚೇರಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಸಬ್ ರಿಜಿಸ್ಟರ್ ಅಧಿಕಾರಿಗೆ ಸೋಂಕು ತಗಲಿ ಸಾವನ್ನಪ್ಪಿರುವ ಘಟನೆ ಇನ್ನೂ ಮಾಸಿಲ್ಲ. ಆದರೂ ಎಚ್ಚೆತ್ತುಕೊಳ್ಳದ ಇಲ್ಲಿನ ಕಚೇರಿ ಅಧಿಕಾರಿಗಳು ಕೊರೊನಾ ಲಾಕ್ ಡೌನ್ ಸಡಿಲಗೊಂಡ ಬೆರಳೆಣಿಕೆಯಷ್ಟು ದಿನದಲ್ಲೆ ಕಚೇರಿಯ ಒಳಗೆ ಮತ್ತು ಹೊರಗೆ ಜನಸಾಂದ್ರತೆಯನ್ನು ಕಟ್ಟಿಕೊಂಡು ಕೊರೋನಾ ಸೋಂಕು ಹರಡಲು ಅವಕಾಶ ನೀಡಿದ್ದರು.

ಈ ಸುದ್ದಿ ತಿಳಿಯುತ್ತಿದ್ದಂತೆ ಕಚೇರಿಗೆ ಧಾವಿಸಿದ ನಗರ ಸಭಾ ಪ್ರಭಾರ ಪೌರಾಯುಕ್ತ ಎನ್ .ಶಿವಣ್ಣ ಸಹಾಯಕ ಕಾರ್ಯಪಾಲಕ ಪರಿಸರ ಎಂಜನಿಯರ್ ಪಾರ್ವತಿ ನೇತೃತ್ವದಲ್ಲಿ ದಿಢೀರ್ ದಾಳಿ ನಡೆಸಿ ಕಚೇರಿ ಮುಂದೆ ಹಾಗೂ ಒಳಭಾಗದಲ್ಲಿ ಸೇರಿದ್ದ ಜನಜಾತ್ರೆಯನ್ನು ಚದುರಿಸಿ ಕರ್ತವ್ಯದಲ್ಲಿದ್ದ ಅಧಿಕಾರಿ ಸೇರಿದಂತೆ ಸಿಬ್ಬಂದಿಗಳಿಗೆ ಮಾರ್ಗಸೂಚಿ ಪಾಲನೆ ಮಾಡದಿದ್ದಲ್ಲಿ ಕಾನೂನು ಕ್ರಮ ಜರುಗಿಸುವುದಾಗಿ ಖಡಕ್ ಎಚ್ಚರಿಕೆ ನೀಡಿದರು.

ಕಚೇರಿಗೆ ಬರುವವರಿಗೆ ಕಡ್ಡಾಯವಾಗಿ ಸ್ಯಾನಿಟೈಸರ್ ನೀಡಿ ಮಾಸ್ಕ್ ಧರಿಸಿ ಕಚೇರಿ ಪ್ರವೇಶಿಸಲು ಅವಕಾಶ ಕೊಡಬೇಕೆಂದು ಸೂಚಿಸಿ ಮುಂದೆ ಈ ರೀತಿ ಅನಾಹುತಕ್ಕೆ ದಾರಿ ಮಾಡಿಕೊಡಬಾರದು ಎಂದು ಎಚ್ಚರಿಸಿದರು.

ಸುದ್ದಿ ತಿಳಿದು ಸ್ಥಳಕ್ಕಾಗಮಿಸಿದ ಟೌನ್ ಸಬ್ ಇನ್ಸ್ ಪೆಕ್ಟರ್ ಎಸ್. ಉಷಾನಂದಿನಿ ನೋಂದಣಾಧಿಕಾರಿ ಕಚೇರಿ ಮುಂದೆ ಗುಂಪಾಗಿ ಸೇರಿದ್ದ ಜನರನ್ನು ಚದುರಿಸಿ ಗುಂಪು ಸೇರದಂತೆ ಎಚ್ಚರಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.