ಚನ್ನಪಟ್ಟಣ: ತಾಲ್ಲೂಕಿನ ಕೆರೆಮೇಗಳದೊಡ್ಡಿ ಗ್ರಾಮದ ಕಲ್ಯಾಣ ಮಂಟಪದಲ್ಲಿ, ಶನಿವಾರ ನಡೆದ ವಿರಕ್ತಮಠದ ಗುರುವಂದನಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ, ಚನ್ನಪಟ್ಟಣ ಮತ್ತು ಕನಕಪುರ ಉಪವಿಭಾಗದ ಪೋಲಿಸ್ ಅಧಿಕಾರಿ ಕೆ ಎನ್ ರಮೇಶ್ ರವರು ಸಮವಸ್ತ್ರದಲ್ಲೇ ಸ್ವಾಮೀಜಿಗಳ ಕಾಲಿಗೆರಗಿ,  ಮಾಜಿ ಮುಖ್ಯಮಂತ್ರಿ ಬಿ ಎಸ್ ಯಡಿಯೂರಪ್ಪ ರವರನ್ನು *ಯಡಿಯೂರಪ್ಪಾಜಿ* ಎಂದು ಕರೆಯುವ ಮೂಲಕ ಕಾನೂನನ್ನು ಗಾಳಿಗೆ ತೂರಿ, ಬಿಜೆಪಿ ಪಕ್ಷದ ವಕ್ತಾರನಂತೆ ವರ್ತಿಸಿದ್ದು, ಸಾರ್ವಜನಿಕರು ಮತ್ತು ಇನ್ನಿತರ ರಾಜಕಾರಣಿಗಳ ಪಿತ್ತ ನೆತ್ತಿಗೇರುವಂತೆ ಮಾಡಿರುವುದಲ್ಲದೆ, ಇವರು ರಾಜಕಾರಣಿಯೋ ಅಥವಾ ಪೋಲಿಸ್ ಅಧಿಕಾರಿಯೋ ಎಂಬ ಗೊಂದಲ ಉಂಟು ಮಾಡಿದ್ದಾರೆ.

ಕಳೆದ ಇಪ್ಪತ್ತೈದು ವರ್ಷಗಳ ಹಿಂದೆ ಸನ್ಯಾಸ ಸ್ವೀಕರಿಸಿ, ವಿರಕ್ತ ಮಠದ ಮಠಾಧಿಪತಿಗಳಾಗಿ, ಅಧಿಕಾರ ವಹಿಸಿಕೊಂಡ ಶ್ರೀ ಶಿವರುದ್ರ ಸ್ವಾಮೀಜಿಗಳು ತಮ್ಮ ಮಠದ ಕಲ್ಯಾಣ ಮಂಟಪದಲ್ಲಿ ರಜತಮಮೋತ್ಸವ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದರು. ಈ ಕಾರ್ಯಕ್ರಮದಲ್ಲಿ ಡಿವೈಎಸ್ಪಿ ಕೆ ಎನ್ ರಮೇಶ್ ರವರು ಸಮವಸ್ತ್ರದಲ್ಲೇ ಭಾಗವಹಿಸಿದ್ದರು. ಇವರ ಜೊತೆಯಲ್ಲಿ ಪುರ ಠಾಣೆಯ ಆರಕ್ಷಕ ಉಪನಿರೀಕ್ಷಕಿ ಮಮತಾ ರವರು ಸಹ ಕಾರ್ಯನಿಮಿತ್ತ ಪಾಲ್ಗೊಂಡಿದ್ದರು.

ಈ ವೇದಿಕೆಯಲ್ಲಿ ಬೇವೂರು ಮಠದ ಮೃತ್ಯುಂಜಯ ಸ್ವಾಮೀಜಿ, ಸಿದ್ಧಲಿಂಗ ಸ್ವಾಮೀಜಿ ಸೇರಿದಂತೆ ಅನೇಕ ಸ್ವಾಮೀಜಿಗಳು ವೇದಿಕೆಯಲ್ಲಿ ಆಸೀನರಾಗಿದ್ದು, ಸಿದ್ದಲಿಂಗ ಸ್ವಾಮೀಜಿಗಳ ಪಾದಕ್ಕೆ ಪೋಲಿಸ್ ಕ್ಯಾಪ್ ಹೊರತು ಪಡಿಸಿ ಸಂಪೂರ್ಣ ಸಮವಸ್ತ್ರದಲ್ಲೇ ಕಾಲಿಗೆ ಎರಗಿದ್ದಾರೆ. ಖಾಕಿಗೆ ಅದರದೇ ಆದಂತಹ ಜವಾಬ್ದಾರಿ ಮತ್ತು ಕಾನೂನುಗಳಿದ್ದು, ಸಮಾಜದ ಎಲ್ಲರೂ ಕಾನೂನಿನ ಕೆಳಗೆ ಬರುವುದರಿಂದ, ಇವರ ನಡೆ ಖಂಡನೀಯವಾಗಿದೆ. ಈ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಪ್ರಜ್ಞಾವಂತ ನಾಗರೀಕರು, ಅಧಿಕಾರಿಗಳು ಡಿವೈಎಸ್ಪಿ ರಮೇಶ್ ರವರ ಈ ನಡೆಯನ್ನು ಖಂಡಿಸಿದ್ದಾರೆ.

ಡಿಜಿ ಮತ್ತು ಐಜಿಪಿ ಪ್ರವೀಣ್ ಸೂದ್ ರವರು ಜುಲೈ 31 ನೇ ತಾರೀಖಿನಂದು ಆದೇಶವೊಂದನ್ನು ಹೊರಡಿಸಿ, ಪೋಲೀಸರು ಯಾವುದೇ ಖಾಸಗಿ ಕಾರ್ಯಕ್ರಮಗಳಲ್ಲಿ ಭಾಗವಹಿಸಬಾರದು. ಸಮವಸ್ತ್ರದಲ್ಲಿ ಇರಬಾರದು. ಸಮಾಜಘಾತುಕ ವ್ಯಕ್ತಿಗಳೊಂದಿಗೆ ಪೋಟೋ ತೆಗೆಸಿಕೊಳ್ಳಬಾರದು, ಠಾಣೆಗಳಲ್ಲಿ ಹುಟ್ಟು ಹಬ್ಬ ಆಚರಿಸಿಕೊಳ್ಳಬಾರದು. ಇವುಗಳು ಸಮಾಜಕ್ಕೆ ತಪ್ಪು ಸಂದೇಶ ತರುತ್ತವೆ. ಸಾರ್ವಜನಿಕರಿಗೆ ಪೋಲೀಸರ ಮೇಲೆ ಅಪನಂಬಿಕೆ ಉಂಟಾಗುತ್ತದೆ ಎಂಬ ಹಲವಾರು ನಿಬಂಧನೆಗಳನ್ನು ಹೇರಿ ಎಲ್ಲಾ ಠಾಣೆಗಳಿಗೆ ಸುತ್ತೋಲೆ ಹೊರಡಿಸಿದ್ದರು. ಇವರ ಆದೇಶವನ್ನು ಧಿಕ್ಕರಿಸಿದ ಡಿವೈಎಸ್ಪಿ ಕೆ ಎನ್ ರಮೇಶ್ ರವರು ಸಮವಸ್ತ್ರದಲ್ಲೇ ಸ್ವಾಮೀಜಿಗಳ ಕಾಲಿಗೆ ಬಿದ್ದು, ಸನ್ಮಾನ ಮಾಡಿಸಿಕೊಂಡು, ವೇದಿಕೆಯಲ್ಲಿ ಬಿಜೆಪಿ ಕಾರ್ಯಕರ್ತನಂತೆ ಮಾಜಿ ಮುಖ್ಯಮಂತ್ರಿ ಬಿ ಎಸ್ ಯಡಿಯೂರಪ್ಪ ರವರನ್ನು *ಯಡಿಯೂರಪ್ಪಾಜಿ* ಎಂದು ಹೊಗಳಿ ಹಾಸ್ಯಾಸ್ಪದಕ್ಕೊಳಗಾಗಿದ್ದು ಅಲ್ಲದೆ ಇಡೀ ಇಲಾಖೆಯ ಘನತೆಗೆ ಕುಂದು ತಂದಿದ್ದಾರೆ. ಮೇಲಾಧಿಕಾರಿಗಳು ಇತ್ತೀಚಿನ ಇವರ ನಡವಳಿಕೆಗಳನ್ನು ಗಮನಿಸಿ, ಸೂಕ್ತ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ:9845856139.