ತಾಲ್ಲೂಕಿನ ದಶವಾರ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಹಾಗೂ ಮಾಹಿತಿ ಹಕ್ಕು ಅಧಿಕಾರಿಯಾದ ಶ್ರೀಕಂಠ ರವರಿಗೆ 'ಸಾಮಾಜಿಕ, ಲೆಕ್ಕಪರಿಶೋಧನೆಯ ಸಭೆಯ ಕರಪತ್ರ ಮತ್ತು ವಿಧಿಯನ್ನು' ನೀಡುವಂತೆ ಕೋರಿ ಹೊಸೂರುದೊಡ್ಡಿ ಗ್ರಾಮದ ಹೆಚ್ ಎಂ ಶಿವಮಾದೇಗೌಡ ಎಂಬುವವರು ಮಾಹಿತಿ ಹಕ್ಕಿನಡಿ ಮಾಹಿತಿ ಕೋರಿ ಅರ್ಜಿ ಸಲ್ಲಿಸಿದ್ದರು. ಸಕಾಲಕ್ಕೆ ಮಾಹಿತಿ ನೀಡದ್ದರಿಂದ ಕರ್ನಾಟಕ ಮಾಹಿತಿ ಆಯೋಗವು ಐದು ಸಾವಿರ ರೂಪಾಯಿಗಳ ದಂಡವನ್ನು ವಿಧಿಸಿ ಆದೇಶಿಸಿದೆ.

ಹೆಚ್ ಎಂ ಶಿವಮಾದೇಗೌಡ ರವರು ಕಾರ್ಯದರ್ಶಿ ಹಾಗೂ ಮಾಹಿತಿ ಅಧಿಕಾರಿಯವರಿಗೆ 31/08/2020 ರಂದು ಚನ್ನಪಟ್ಟಣ ತಾಲ್ಲೂಕಿನ ಮಳೂರು ಹೋಬಳಿಯ ದಶವಾರ ಗ್ರಾಮ ಪಂಚಾಯಿತಿಗೆ ಸಂಬಂಧಿಸಿದ ಸಾಮಾಜಿಕ, ಲೆಕ್ಕಪರಿಶೋಧನೆಯ ಸಭೆಯ ಕರಪತ್ರ ಮತ್ತು ವಿಧಿಯನ್ನು ಕೋರಿ ಅರ್ಜಿ ಸಲ್ಲಿಸಿದರು. ಮಾಹಿತಿ ನೀಡದ್ದರಿಂದ ಅವರು 03/10/2020 ರಂದು ಗ್ರಾಮ ಪಂಚಾಯತಿ ಅಭಿವೃದ್ಧಿ ಅಧಿಕಾರಿಯಾದ ಮಹೇಶ್ ರವರಿಗೆ ಮಾಹಿತಿ ಕಾಯ್ದೆ 19(1)ರನ್ವಯ ಪ್ರಥಮ ಮೇಲ್ಮನವಿ ಸಲ್ಲಿಸಿದರು. ತದನಂತರ ಏರಡನೇ ಮೇಲ್ಮನವಿಯನ್ನು ಮಾಹಿತಿ ಹಕ್ಕು ಕಾಯ್ದೆ ನಿಯಮ 19(3) ರನ್ವಯ 21/01/2021 ರಂದು ಆಯೋಗಕ್ಕೆ ಮನವಿ ಸಲ್ಲಿಸಿದ್ದರು. ಆಯೋಗವು 12/02/2021 ರಂದು ಉಭಯತ್ರರಿಗೂ ನೋಟೀಸ್ ಜಾರಿಮಾಡಿತ್ತು.

ವಿಚಾರಣೆ ವೇಳೆ ಅಧಿಕಾರಿಯು 22/10/2021 ರಂದು ನೋಂದಾಯಿತ ಅಂಚೆಯ ಮೂಲಕ ಹೊದಿಕೆ ಪತ್ರದೊಂದಿಗೆ ಮಾಹಿತಿ ನೀಡಿರುವುದಾಗಿ ಹೇಳಿಕೆ ನೀಡಿದ್ದು, ಮೇಲ್ಮನವಿದಾರರು ನಾನು ಕೋರಿರುವ ಮಾಹಿತಿಯಲ್ಲಿ ಕರಪತ್ರ ಮಾತ್ರ ಒದಗಿಸಲಾಗಿದ್ದು, ನಡಾವಳಿಯನ್ನು ಒದಗಿಸಿಲ್ಲಾ ಎಂದು ವಿಚಾರಣಾಧಿಕಾರಿಗಳಿಗೆ ತಿಳಿಸಿದರು. ಮೇಲ್ಮನವಿದಾರರ ಆಕ್ಷೇಪಣೆಗೆ ಮೇರೆಗೆ ಅಧಿಕಾರಿಯು ನಡಾವಳಿಯನ್ನು ಒದಗಿಸಲು ಕಾಲಾವಕಾಶ ಕೋರಿದ್ದರ ಹಿನ್ನೆಲೆಯಲ್ಲಿ ವಿಚಾರಾಣಾಧಿಕಾರಿಗಳು ಕಾಲಾವಕಾಶವನ್ನು ನೀಡಿದ್ದರು.

ಮೇಲ್ಮನವಿದಾರರ ಆಕ್ಷೇಪಣೆಯನ್ನು ಪುರಸ್ಕರಿಸಿದ ವಿಚಾರಣಾಧಿಕಾರಿಗಳು ಹದಿನೈದು ದಿನಗಳೊಳಾಗಿ ಉಚಿತವಾಗಿ 2019/20 ಅವಧಿಯ ನಡಾವಳಿಯನ್ನು ಮುಂದಿನ ವಿಚಾರಣೆ ವೇಳೆ ಖುದ್ದು ನೀಡಬೇಕೆಂದು 2005 ರ ಕಲಂ 18(3) (ಎ) ಮತ್ತು (ಡಿ) ಅನ್ವಯ ಆದೇಶಿಸಿತ್ತು. ಕಾಯ್ದೆಯ ಕಲಂ 7ನೇ ಪ್ರಕರಣದ (1) ನೇ ಉಪ ಪ್ರಕರಣದಲ್ಲಿ ನಿರ್ದಿಷ್ಟ ಪಡಿಸಿದ ಸಮಯದೊಳಗೆ ಮಾಹಿತಿಯನ್ನು ಒದಗಿಸದೆ ಅಪೂರ್ಣ ಮಾಹಿತಿ ಇರುವುದರಿಂದ ಆಯೋಗವು ಗಂಭಿರವಾಗಿ ಪರಿಗಣಿಸಿ ಮಾಹಿತಿ ಹಕ್ಕು ಅಧಿನಿಯಮ 2005ರ ಕಲಂ 20(1) ರನ್ವಯ ಪ್ರದತ್ತವಾದ ಅಧಿಕಾರವನ್ನು ಚಲಾಯಿಸಿ, ದಶವಾರ ಗ್ರಾಮ ಪಂಚಾಯತಿ ಸಾರ್ವಜನಿಕ ಮಾಹಿತಿ ಅಧಿಕಾರಿ ಹಾಗೂ ಕಾರ್ಯದರ್ಶಿ ಶ್ರೀಕಂಠ ರವರಿಗೆ  5,000 ರೂಪಾಯಿಗಳ ದಂಡ ವಿಧಿಸಿ, ದಂಡದ ಮೊತ್ತವನ್ನು 2021 ರ ಡಿಸೆಂಬರ್ ಮತ್ತು 2022 ರ ಜನವರಿ ತಿಂಗಳುಗಳಲ್ಲಿನ ಸಂಬಳದಲ್ಲಿ ತಲಾ 2,500 ರೂ ಕಡಿತಗೊಳಿಸಿ ಸರ್ಕಾರದ ಲೆಕ್ಕ ಶೀರ್ಷಿಕೆ RTI Act ಖಾತೆಗೆ ಜಮಾ ಮಾಡಿ ಮೇಲ್ಮನವಿದಾರ ಹೆಚ್ ಎಂ ಶಿವಮಾದೇಗೌಡ ರಿಗೆ ಮತ್ತು ಜಮಾ ಮಾಡಿದ ರಶೀತಿಯೊಂದಿಗೆ ಅನುಪಾಲನಾ ವರದಿಯನ್ನು ಆಯೋಗಕ್ಕೆ ಸಲ್ಲಿಸಬೇಕೆಂದು ಅಭಿವೃದ್ಧಿ ಅಧಿಕಾರಿಯಾದ ಮಹೇಶ್ ರವರಿಗೆ 2005 ರ ಕಲಂ 19(8)(ಎ) ಅನ್ವಯ ಆದೇಶಿಸಿರುವ ಜೊತೆಗೆ ದಂಡ ಪ್ರಕ್ರಿಯೆ ಬಾಕಿ ಇರುವುದರಿಂದ ಮುಂದಿನ ಕ್ರಮಕ್ಕಾಗಿ ಪ್ರಕರಣದ ಕಡತವನ್ನು ಬೆಂಗಳೂರಿನ ಕಛೇರಿಗೆ ವರ್ಗಾಯಿಸಲಾಗಿದೆ ಎಂದು ಮಾಹಿತಿಯ ಆದೇಶದಲ್ಲಿ ತಿಳಿಸಿದೆ.

ಗೋ ರಾ ಶ್ರೀನಿವಾಸ...

ಮೊ9845856139.