ರಾಮನಗರ, ಜೂ. 16:    “Fortified Rice” ಅಥವಾ “ಸಾರವರ್ಧಿತ ಅಕ್ಕಿ” ಇದು ಪಡಿತರ ಚೀಟಿದಾರರ ಪೌಷ್ಠಿಕಾಂಶ ಮತ್ತು ಹಿತದೃಷ್ಠಿಯಿಂದ ನ್ಯಾಯಬೆಲೆ ಅಂಗಡಿಗಳಲ್ಲಿ ವಿತರಣೆಗೊಳ್ಳುತ್ತಿದೆ. ಅಲ್ಲದೆ ಇದು 01 ಕ್ವಿಂಟಾಲ್ ಅಕ್ಕಿಯಲ್ಲಿ 01 ಕೆ.ಜಿ. ಮಾತ್ರವೇ ಇದ್ದು ಈ ಸಾರವರ್ಧಿತ ಅಕ್ಕಿಯಲ್ಲಿ ವ್ಯಕ್ತಿಯ ಆರೋಗ್ಯಕ್ಕೆ ಅಗತ್ಯವಾದ ಜೀವಸತ್ವಗಳು, ಸೂಕ್ಷ್ಮ ಪೋಷಕಾಂಶಗಳಾದ ಕಬ್ಬಿಣಾಂಶ, ಫೋಲಿಕ್ ಆಮ್ಲ, ಮತ್ತು ವಿಟಮಿನ್ ಬಿ 12 ಅನ್ನು ಸೇರಿಸಲಾಗಿರುತ್ತದೆ. ಇದು ಸಾರ್ವಜನಿಕ ವಲಯದಲ್ಲಿ ಪ್ಲಾಸ್ಟಿಕ್ ಅಕ್ಕಿ ಎಂಬ ರೀತಿಯಲ್ಲಿ ಕೇಳಿ ಬರುತ್ತಿರುವುದು ತಪ್ಪು ಮಾಹಿತಿಯಾಗಿದೆ. ಇದನ್ನು ಸಾರ್ವಜನಿಕರು ಯಾವುದೇ ಕಾರಣಕ್ಕೂ ಪ್ರೋತ್ಸಾಹಿಸಬಾರದು ಹಾಗೂ ತಪ್ಪು ಪ್ರಚಾರಕ್ಕೆ ಆಸ್ಪದ ಕೊಡಬಾರದು.  

ಸಾರವರ್ಧಿತ ಅಕ್ಕಿಯು ಅಕ್ಕಿ ಗಿರಣಿಗಳಲ್ಲಿ ಗಿರಣಿಯಾಗುವ ಸಂದರ್ಭದಲ್ಲಿ ವಿಶೇಷವಾಗಿ ಅಳವಡಿಕೆಯಾಗುವ ಕರ್ನಲ್‌ಗಳ ಮುಖಾಂತರ ಸಂಸ್ಕರಣೆಯಾಗಿದ್ದು, ಭತ್ತವು ಕರ್ನಲ್‌ಗಳ ಮೂಲಕ ಉತ್ಕೃಷ್ಟವಾಗಿ ಗಿರಣಿಯಾದ ಕಾರಣದಿಂದ ಕಾಳುಗಳು ಸ್ವಲ್ಪ ಸಂಸ್ಕರಣಗೊಂಡಿರುತ್ತವೆಯೇ ವಿನಃ ಯಾವುದೇ ರೀತಿ ಕಲಬೆರಕೆ ಅಥವಾ ಪ್ಲಾಸ್ಟಿಕೀಕರಣವಲ್ಲ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಲಾಗಿದೆ.

ಈ ಸಾರವರ್ಧಿತ ಅಕ್ಕಿಯ ಬಳಕೆಯಿಂದ ವ್ಯಕ್ತಿಯ ಆರೋಗ್ಯವನ್ನು ಉತ್ತಮಗೊಳಿಸುತ್ತದೆ ಮತ್ತು ರಕ್ತಹೀನತೆ, ಅಪೌಷ್ಠಿಕತೆಯನ್ನು ಹೋಗಲಾಡಿಸುತ್ತದೆ. ಇದನ್ನು ಪ್ರಯೋಗಾಲಯದಲ್ಲಿ ಪರೀಕ್ಷೆಗೊಳಪಡಿಸಲಾಗಿದ್ದು, ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದಿಂದ ಬಳಕೆಗೆ ಯೋಗ್ಯವಾದ ಪೌಷ್ಠಿಕಾಂಶಭರಿತ ಅಕ್ಕಿ ಎಂದು ಪ್ರಮಾಣೀಕರಿಸಲಾಗಿರುತ್ತದೆ. ಆದ್ದರಿಂದ ಸರ್ಕಾರವು ಪಡಿತರ ಚೀಟಿದಾರರಿಗೆ ಬಿಡುಗಡೆ ಮಾಡಿರುವ ಸಾರವರ್ಧಿತ ಅಕ್ಕಿಯನ್ನು ನಿರ್ಭಯವಾಗಿ ಬಳಸಬಹುದಾಗಿರುತ್ತದೆಂದು ಹಾಗೂ ಇದನ್ನು ಸದುಪಯೋಗಪಡಿಸಿಕೊಳ್ಳಬೇಕೆಂದು ರಾಮನಗರ ಜಿಲ್ಲಾ ಆಹಾರ, ನಾಗರಿಕ ಸರಬರಾಜು ಮತ್ತು ಗ್ರಾಹಕರ ವ್ಯವಹಾರಗಳ ಇಲಾಖೆಯ ಉಪನಿರ್ದೇಶಕರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ:9845856139.