Dr E C Ramachandre Gowda appointed as new president of Karnataka Janapada Parishad and Janapada Loka

ರಾಮನಗರ:  ಹಲವಾರು ದಿನಗಳಿಂದ ವಿವಾದಕ್ಕೀಡಾಗಿ, ನೆನೆಗುದಿಗೆ ಬಿದ್ದಿದ್ದ ಕರ್ನಾಟಕ ಜಾನಪದ ಪರಿಷತ್ತು ಮತ್ತು ಜಾನಪದ ಲೋಕದ ಅಧ್ಯಕ್ಷ ಸ್ಥಾನಕ್ಕೆ ಬೆಂಗಳೂರಿನ ಸಿರಿಭವನದಲ್ಲಿ ನಡೆದ ಸಭೆಯಲ್ಲಿ ನೂತನ ಅಧ್ಯಕ್ಷರಾಗಿ ಹಿರಿಯ ಜಾನಪದ ವಿದ್ವಾಂಸ ಡಾ ಹಿ ಶಿ ರಾಮಚಂದ್ರೇಗೌಡ ರನ್ನು ಆಯ್ಕೆಮಾಡಲಾಗಿದೆ ಎಂದು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.

ನಾಡೋಜ ಹೆಚ್ ಎಲ್ ನಾಗೇಗೌಡರು ಕಟ್ಟಿ ಬೆಳೆಸಿದ ಜಾನಪದ ಪರಿಷತ್ತು ಮತ್ತು ಲೋಕವು ಕೆಲ ದಿನಗಳಿಂದ ಅಧ್ಯಕ್ಷರ ವಿಚಾರದಲ್ಲಿ ವಿವಾದಕ್ಕೆಡೆಮಾಡಿಕೊಂಡಿತ್ತು. ಮೊದಲು ಹೆಚ್ ಎಲ್ ನಾಗೇಗೌಡರು ನಂತರ ನಾಡೋಜ ಜಿ ನಾರಾಯಣ ರವರು ಅಧ್ಯಕ್ಷರಾಗಿದ್ದರು. ತದನಂತರ ಐಎಎಸ್ ಅಧಿಕಾರಿ ಟಿ ತಿಮ್ಮೇಗೌಡರು ಹೆಚ್ಚು ಅವಧಿಗೆ ಅಧಿಕಾರ ಅನುಭವಿಸಿದ್ದರು. ಹಲವಾರು ವಿರೋಧಗಳ ನಡುವೆಯೂ ಅವರು ಮುಂದುವರೆಯಲು ಹರಸಾಹಸ ಪಟ್ಟಿದ್ದರು. ರಾಜೀನಾಮೆ ನೀಡಿದ ನಂತರವೂ ಸಹ ಜಾನಪದ ವಿದ್ವಾಂಸರನ್ನು ಕಡೆಗಣಿಸಿ ಐಎಎಸ್ ಅಧಿಕಾರಿಗಳನ್ನೇ ಕೂರಿಸಲು ಸಹ ಶತಪ್ರಯತ್ನ ಮಾಡಿದ್ದರು ಎನ್ನಲಾಗಿತ್ತು.

ಸಾರ್ವಜನಿಕವಾಗಿಯೂ ಒತ್ತಡ ಬಂದ ಹಿನ್ನೆಲೆಯಲ್ಲಿ ಅನ್ನದಾನೇಶ್ವರನಾಥ ಸ್ವಾಮೀಜಿಗಳ ಮೂಲಕ ಮಹಾಪೋಷಕರಾದ ಡಾ ಶ್ರೀ ನಿರ್ಮಾಲನಂದನಾಥ ಸ್ವಾಮೀಜಿಗಳಿಗೆ ವಿಷಯ ಮುಟ್ಟಿದ ನಂತರ ಬುಧವಾರ ಬೆಂಗಳೂರಿನ ಸಿರಿಭವನದಲ್ಲಿ ಹಿ ಶಿ ರಾಮಚಂದ್ರೇಗೌಡ ರನ್ನು ಒಮ್ಮತದಿಂದ ಆಯ್ಕೆ ಮಾಡಲಾಗಿದೆ. ಇದೇ ಸಂದರ್ಭದಲ್ಲಿ ತೆರವಾಗಿದ್ದ ಎರಡು ಸ್ಥಾನವನ್ನು ಸಹ ಭರ್ತಿ ಮಾಡಲಾಗಿದೆ ಎಂದು ನಂಬಲರ್ಹ ಮೂಲಗಳು ತಿಳಿಸಿವೆ. ಮ್ಯಾನೇಜಿಂಗ್ ಟ್ರಸ್ಟಿಯಾಗಿ ಆದಿತ್ಯ ನಂಜರಾಜ್ ರವರೇ ಮುಂದುವರೆಯಲಿದ್ದಾರೆ.

ಡಾ ಹಿ ಶಿ ರಾಮಚಂದ್ರೇಗೌಡರು ಮೈಸೂರು ವಿಶ್ವವಿದ್ಯಾನಿಲಯದ ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯಲ್ಲಿ ಜಾನಪದ ವಿದ್ವಾಂಸರಾಗಿ, 2001-2004 ರ ಅವಧಿಯಲ್ಲಿ ಕರ್ನಾಟಕ ಜಾನಪದ ಮತ್ತು ಯಕ್ಷಗಾನ ಅಕಾಡಮಿ ಅಧ್ಯಕ್ಷರಾಗಿ, ಕರ್ನಾಟಕ ಸರ್ಕಾರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಕನ್ನಡ ಸಮಗ್ರ ಜನಪದ ಸಾಹಿತ್ಯ ಪ್ರಕಟಣಾ ಸಮಿತಿಯ ಅಧ್ಯಕ್ಷರಾಗಿ ದುಡಿದಿದ್ದಾರೆ.

ಶ್ರೀಯುತರಿಗೆ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ, ಗೋಪಾಲಗೌಡ ಪ್ರಶಸ್ತಿ ಸೇರಿದಂತೆ ಅನೇಕ ಪ್ರಶಸ್ತಿ ಪುರಸ್ಕಾರಗಳು ಸಂದಿವೆ. ಎಂಭತ್ತು-ತೊಂಭತ್ತರ ದಶಕದಲ್ಲಿ ರೈತ ಹೋರಾಟದ ಗೀತೆ ಸೇರಿದಂತೆ, ಜಾನಪದ ಕ್ಷೇತ್ರದಲ್ಲಿ ಇಪ್ಪತೈದು ಕೃತಿಗಳನ್ನು ರಚಿಸಿದ್ದಾರೆ. ಕರ್ನಾಟಕ ಜಾನಪದದಲ್ಲಿ ದೇಶಿ ಚಿಂತನೆ ಬೆಳೆಸುವಲ್ಲಿ, ಪರಂಪರೆ ಮತ್ತು ವಿಜ್ಞಾನವನ್ನು ಮೇಳೈಸಿ ಚಿಂತಿಸುವ ಲೇಖನಗಳನ್ನು ರಚಿಸುವ ಮೂಲಕ ಓದುಗರ ಮತ್ತು ಕಲಾವಿದರ ಮನಸ್ಸಿನ್ನು ಗೆದ್ದಿದ್ದಾರೆ.

ಇದೇ ತಿಂಗಳ 22ನೇ ತಾರೀಖಿನಂದು ಜಾನಪದ ಲೋಕದಲ್ಲಿ ವಿಶ್ವ ಜಾನಪದ ದಿನಾಚರಣೆ ಇದ್ದು ಅಂದೇ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.