ಚನ್ನಪಟ್ಟಣ:ಆ/೦೩/ಸೋಮವಾರ. ತಾಲ್ಲೂಕಿನ ಕೋಲೂರು ಗ್ರಾಮದ ಕೆಂಪಮ್ಮ ಚಿಕ್ಕೈದೇಗೌಡರ ಮಗ ಕೋಲೂರು ಪುಟ್ಟಸ್ವಾಮಿ ಯವರು ೮೮ ವರ್ಷ ಸಾರ್ಥಕ ಬದುಕು ನಡೆಸಿ ವಿಧಿವಶರಾಗಿದ್ದಾರೆ.

ಶ್ರೀಯುತರು ಪ್ರಾಥಮಿಕ ಹಾಗೂ ಪ್ರೌಢಶಾಲಾ ವ್ಯಾಸಂಗವನ್ನು ಚನ್ನಪಟ್ಟಣ ನಗರದಲ್ಲಿ ಮುಗಿಸಿ ಬೆಂಗಳೂರಿನಲ್ಲಿ ಬಿಎಸ್ಸಿ ಹಾಗೂ ಬಿಎಲ್ ವಿದ್ಯಾಭ್ಯಾಸವನ್ನು ಮುಗಿಸಿದ್ದರು.

ವಿದ್ಯಾರ್ಥಿಯಾಗಿದ್ದಾಗಲೇ ಸಂಘಟನೆ ಮತ್ತು ಕ್ರೀಡೆಗಳನ್ನು ಮೈಗೂಡಿಸಿಕೊಂಡು ಬೆಳೆದ ಇವರು ಮುಂದೆ ರಾಜ್ಯ ಮತ್ತು ರಾಷ್ಟ್ರಮಟ್ಟದಲ್ಲಿ ಕುಸ್ತಿ ಹಾಗೂ ವಾಲಿಬಾಲ್ ಪಂದ್ಯಾವಳಿ ಯಲ್ಲಿ ತನ್ನ ಕ್ರೀಡಾಶಕ್ತಿ ಮೆರೆದವರು.

ಬೆಂಗಳೂರು ವಿಶ್ವ ವಿದ್ಯಾಲಯದ ತೋಟಗಾರಿಕಾ ಅಧಿಕಾರಿಯಾಗಿ, ಇಡೀ ಜ್ಞಾನ ಭಾರತಿ ವಲಯವನ್ನು ಹಸಿರುಮಯ ಮಾಡಿದ ಕೀರ್ತಿ ಅವರಿಗೆ ಸಲ್ಲುತ್ತದೆ.

ಜನತಾ ಸಹಕಾರ ಬ್ಯಾಂಕಿನ ಅಧ್ಯಕ್ಷರಾಗಿ, ಕಾರ್ಯದರ್ಶಿಯಾಗಿ, ಉಪಾಧ್ಯಕ್ಷರಾಗಿ, ಜನತಾ ಶಿಕ್ಷಣ ಸಂಸ್ಥೆಯನ್ನು ಬೆಳೆಸುವಲ್ಲಿ ಅವರ ಪಾತ್ರ ಅಪೂರ್ವವಾದುದು. ಇವರ ಶ್ರಮದಿಂದ ಇಂದು ಈ ಸಂಸ್ಥೆ ವಿವಿಧ ಕವಲುಗಳಾಗಿ ಪಸರಿಸಿ ಸಾವಿರಾರು ಜನ ವಿದ್ಯಾರ್ಥಿಗಳಿಗೆ ವಿದ್ಯೆ ನೀಡಿ, ನೂರಾರು ಜನರಿಗೆ  ಕೆಲಸ ನೀಡಿದೆ.

ಜನತಾ ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿಯಾಗಿ ಅವರು ಇಟ್ಟ ಹೆಜ್ಜೆಯಿಂದ ಅದು ಬೃಹದಾಕಾರವಾಗಿ ಬೆಳೆದು ನಿಂತಿದೆ. ಒಕ್ಕಲಿಗರ ಸಮಾಜ ಸಂಪರ್ಕ ವೇದಿಕೆಯ ನಿರ್ದೇಶಕರಾಗಿ, ಭ್ರಷ್ಟಾಚಾರ ನಿರ್ಮೂಲನಾ ವೇದಿಕೆಯ ಸದಸ್ಯರಾಗಿ ತಮ್ಮ ಜೀವಿತ ಅವಧಿಯಲ್ಲಿ ಕ್ರಮಿಸಿದ ದಾರಿ ವಿಶೇಷ ವಾದುದು.

ಇವರು ಚನ್ನಪಟ್ಟಣ ಗಾಂಧಿಭವನದ ಮುಂಭಾಗ ಸ್ವಾತಂತ್ರ್ಯ ಹೋರಾಟಗಾರ ವಿ.ವೆಂಕಟಪ್ಪ, ವಿಶ್ವ ವಿಖ್ಯಾತ ಅರ್ಥಶಾಸ್ತ್ರಜ್ಞರಾದ ಪ್ರೊ.ಕೆ ವೆಂಕಟಗಿರೀಗೌಡರ ಪ್ರತಿಮೆ ಸ್ಥಾಪಿಸಿ ಅವರ ಜೊತೆಯಲ್ಲಿ ಬೆಳದ ನೆನಪಿಗೆ ಕಿರು ಕಾಣಿಕೆಯನ್ನು ಸಲ್ಲಿಸಿದ್ದಾರೆ.

ಅಷ್ಟೇ ಅಲ್ಲದೆ ಇಲ್ಲಿನ ಬಾಲಕರ ಕಿರಿಯ ಕಾಲೇಜಿನ ಆವರಣದಲ್ಲಿ ನಿರ್ಮಾಣವಾಗಿರುವ ಶತಮಾನೋತ್ಸವ ಭವನದ ನಿರ್ಮಾಣದಲ್ಲಿ ಅವರ ಕೊಡುಗೆ ಅಪಾರ.

ಪುಟ್ಟಸ್ವಾಮಿಯವರು ಕೋಲೂರಿನವರಾದರೂ ಅವರು ವಿದ್ಯಾರ್ಥಿಯಾಗಿದ್ದಾಗ ತಿಟ್ಟಮಾರನಹಳ್ಳಿಯಲ್ಲಿ ಇದ್ದರು. ಅವರು ನಮಗೆಲ್ಲರಿಗೂ ಅಚ್ಚು ಮೆಚ್ಚಾಗಿದ್ದರು.

ಶ್ರೀಯುತರು ಡಾ.ವರದಪ್ಪನವರ ಸಹಪಾಠಿ ಯಾಗಿದ್ದವರು. ಅವರು ಬಹಳ ಸಾರಿ ಅವರ ಜೊತೆಯಲ್ಲಿ ಸೇರುವಾಗ ನಮಗೆಲ್ಲರಿಗೂ ಚಿರಪರಿಚಿತರು ಎಂದು ಹಿರಿಯ ಪತ್ರಕರ್ತ ಸು ತ ರಾಮೇಗೌಡ ರು ನೆನಪಿನ ಬುತ್ತಿಗೆ ಜಾರಿದರು.

ಶ್ರೀಯುತರಿಗೆ ನಾಡ ಪ್ರಭು ಕೆಂಪೇಗೌಡ ಹಾಗೂ ರಾಷ್ಟ್ರ ಪ್ರಶಸ್ತಿ ಪುರಸ್ಕಾರ ದಕ್ಕಿದೆ. ಅಷ್ಟೇ ಅಲ್ಲದೆ, ಇಂದಿರಾ ಗಾಂಧಿ ರಾಷ್ಟ್ರೀಯ ಏಕತಾ ಪ್ರಶಸ್ತಿ ಪುರಸ್ಕೃತರು ಹೌದು.

ಶ್ರೀಯುತ ಪುಟ್ಟಸ್ವಾಮಿ ಯವರು, ಸಮಾಜಮುಖಿಯಾಗಿ ಆಲೋಚಿಸುವವರಾಗಿದ್ದಾರು. ಆದರ್ಶಣೀಯ ವ್ಯಕ್ತಿತ್ವ ಉಳ್ಳ ಇವರು ವಿಶೇಷವಾಗಿ ಈ ತಾಲ್ಲೂಕಿನ ಹಿರಿಯ ಸ್ವಾತಂತ್ರ್ಯ ಹೋರಾಟಗಾರ ವಿ.ವೆಂಕಟಪ್ಪ ಹಾಗೂ ವಿಶ್ವ ಮಟ್ಟದ ಅರ್ಥಶಾಸ್ತ್ರಜ್ಞರಾಸ ಪ್ರೊ.ವೆಂಕಟಗಿರಿಗೌಡರ ನೆರಳಿನಲ್ಲಿ ಬೆಳೆದವರು. ಅವರ ವಿಚಾರಗಳನ್ನು ಮೈಗೂಡಿಸಿಕೊಂಡಿದ್ದರು. ಶ್ರೀಯುತರ ನೆನಪು ಸದಾ ಕಾಲ ಉಳಿಯುವಂತಹದ್ದು.

ಇವರು ಪತ್ನಿ ಶ್ರೀಮತಿ ಪಂಕಜ, ೩ ಜನ ಗಂಡು ಮಕ್ಕಳು ಹಾಗೂ ಓರ್ವ ಹೆಣ್ಣು ಮಗಳನ್ನು ಅಗಲಿದ್ದು ಕೋಲೂರು ಗ್ರಾಮದ ಅವರ ತೋಟದಲ್ಲಿ ಅಂತ್ಯಕ್ರಿಯೆ ನೆರವೇರಿತು.

ಗೋ ರಾ ಶ್ರೀನಿವಾಸ...

ಮೊ:9845856139.