ಕಥೆಯ ಹೆಸರಿನಂತೆಯೇ ಪಾತ್ರಗಳಿದ್ದು, ಇಂದಿನ ಪೀಳಿಗೆಗೆ ಅತ್ಯಗತ್ಯವಾಗಿ ಬೇಕಾದ ಕಥೆ ಇದಾಗಿದ್ದು, ಯುವ ಪೀಳಿಗೆ ನೋಡಲೇಬೇಕಾದ ಕಿರು ಚಿತ್ರವಾಗಿದೆ. ಸಂಗ್ರಾಮ ವಾಹಿನಿ ಅಡಿಯಲ್ಲಿ ಹಲವಾರು ಸಂದೇಶಗಳನ್ನೊತ್ತ ಕಿರು ಚಿತ್ರಗಳು ಬರಲೆಂದು ತಾಯಿ ಚಾಮುಂಡೇಶ್ವರಿ ದೇವಿಯಲ್ಲಿ ಬೇಡಿಕೊಳ್ಳುತ್ತೇನೆ ಎಂದು ಗೌಡಗೆರೆ ಗ್ರಾಮದ ಶ್ರೀ ಬಸವಪ್ಪ ಚಾಮುಂಡೇಶ್ವರಿ ಕ್ಷೇತ್ರದ ಧರ್ಮದರ್ಶಿ ಡಾ ಮಲ್ಲೇಶ್ ತಿಳಿಸಿದರು.

ಅವರು ಭಾನುವಾರ ಕ್ಷೇತ್ರದಲ್ಲಿ ತಾನೊಂದು ಬಗೆದರೆ ದೈವವೊಂದು ಬಗೆಯಿತು ಎಂಬ ಕಿರುಚಿತ್ರ ಬಿಡುಗಡೆ ಕಾರ್ಯಕ್ರಮದಲ್ಲಿ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ರಾಮನಗರ ಜಿಲ್ಲೆಯಲ್ಲಿ ಇತಿಹಾಸ, ಪುರಾಣ ಪ್ರಸಿದ್ಧ ಅನೇಕ ಸ್ಥಳಗಳು ಹಾಗೂ ಪ್ರಸಿದ್ಧ ವ್ಯಕ್ತಿಗಳು ಇದ್ದು ಅವುಗಳನ್ನೆಲ್ಲಾ ಇಂದಿನ ಮತ್ತು ಮುಂದಿನ ಪೀಳಿಗೆಗೆ ತೋರಿಸಲು ಜಿಲ್ಲೆಗೆ ಒಂದು ವೇದಿಕೆ ಬೇಕಿತ್ತು. ಅದನ್ನು ತೋರಿಸಲು 'ಸಂಗ್ರಾಮ ಟಿವಿ' ಎಂಬ ವೇದಿಕೆಯನ್ನು ಹುಟ್ಟು ಹಾಕಿರುವ ಮಾಲೀಕರು ಮತ್ತು ಸಹೋದ್ಯೋಗಿಗಳಿಗೆ ನಾನು ಅಭಿನಂದಿಸುತ್ತೇನೆ. ಇಂತಹ ಹಲವಾರು ಕಿರುಚಿತ್ರಗಳ ಜೊತೆಗೆ ಜಿಲ್ಲೆಯ ಕೀರ್ತಿಕಳಸಗಳನ್ನು ತೋರಿಸುವಂತಹ ಕೆಲಸ ಮಾಡಲಿ ಎಂದು ಆಶೀರ್ವದಿಸಿದರು.

ಕಿರುಚಿತ್ರ ಬಿಡುಗಡೆ ಮಾಡಿ ಮಾತನಾಡಿದ ಸಂಗ್ರಾಮ ಟಿವಿ ಪ್ರಧಾನ ಸಂಪಾದಕರಾದ ಗೋ ರಾ ಶ್ರೀನಿವಾಸ, ತಾನೊಂದು ಬಗೆದರೆ, ದೈವವೊಂದು ಬಗೆಯಿತು ಎಂಬ ಶೀರ್ಷಿಕೆಯೇ ಬಹಳ ಅದ್ಭುತವಾಗಿದೆ. ಇದು ಪ್ರತಿಯೊಬ್ಬರ ಜೀವನದಲ್ಲೂ ಒಂದಲ್ಲಾ ಒಂದು ರೀತಿಯಲ್ಲಿ ನಡೆದೇ ಇರುತ್ತದೆ. ಅದರ ಒಂದು ಎಳೆಯನ್ನೇ ಹಿಡಿದುಕೊಂಡು ಹರೀಶ್ ಮತ್ತು ಸ್ನೇಹಿತರು ಒಗ್ಗೂಡಿ ವಿಶೇಷವಾಗಿ ಕಿರುಚಿತ್ರ ನಿರ್ಮಿಸಿದ್ದಾರೆ. ಎಲ್ಲಾ ಸ್ನೇಹಿತರು ಒಗ್ಗೂಡಿ ಮತ್ತಷ್ಟು ಕಿರುಚಿತ್ರಗಳನ್ನು ನಿರ್ಮಿಸುವ ಮೂಲಕ ಇಂದಿನ ಮತ್ತು ಮುಂದಿನ ಪೀಳಿಗೆಗೆ ಮಾದರಿಯಾಗಲಿ ಎಂದು ಆಶಿಸಿದರು.

ಸಂಗ್ರಾಮ ಟಿವಿ ಯ ವ್ಯವಸ್ಥಾಪಕ ನಿರ್ದೇಶಕ ಮಧುಸೂದನ್ ಮಾತನಾಡಿ ಉತ್ತಮ ಸಮಾಜ ನಿರ್ಮಾಣ ಮಾಡುವ ನಿಟ್ಟಿನಲ್ಲಿರುವ, ವಿಶೇಷವಾಗಿ ಯುವಕ-ಯುವತಿಯರಿಗೆ ನಮ್ಮ ವಾಹಿನಿ ಬೆಂಬಲವಾಗಿ ನಿಲ್ಲುತ್ತದೆ, ಪ್ರತಿಭೆಗಳನ್ನು ಪ್ರೋತ್ಸಾಹಿಸಲೆಂದೇ ವಾಹಿನಿಯಲ್ಲಿ ಹಲವಾರು ಕಾರ್ಯಕ್ರಮಗಳನ್ನು ರೂಪಿಸಲಾಗುತ್ತಿದೆ. ಯುವ ಪ್ರತಿಭೆಗಳು ಸದುಪಯೋಗ ಪಡಿಸಿಕೊಂಡು ಸಮಾಜ ನಿರ್ಮಾಣದಲ್ಲಿ ತೊಡಗಿಸಿಕೊಳ್ಳಬೇಕೆಂದು ಕರೆ ನೀಡಿದರು.

ಕಿರುಚಿತ್ರ ಬಿಡುಗಡೆ ಕಾರ್ಯಕ್ರಮದಲ್ಲಿ ಮುಖ್ಯಸ್ಥರಾದ ಹರೀಶ್, ಧೂಮ್ ಎಗೈನ್ ಚಿತ್ರದ ನಾಯಕ ವಾಸು, ನಿರ್ದೇಶಕ ಅನುಶ್ ಆದಿತ್ಯ, ನಿರ್ಮಾಪಕ ಸಂತೋಷ್ ರೆಡ್ಡಿ, ಕಿರುಚಿತ್ರ ದ ಪಾತ್ರಧಾರಿಗಳು ಸೇರಿದಂತೆ ಹಲವಾರು ಮಂದಿ ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.