ಸ್ಪಂದಿಸದ ಕಮೀಷನರ್, ಕೌನ್ಸಿಲರ್, ಡಿಸಿ, ಶಾಸಕರು ಹಾಗೂ ಜೆಡಿಎಸ್ ಮುಖಂಡರು. ಏಕಾಂಗಿಯಾದ ಅಧ್ಯಕ್ಷ, ನಗರದ ಪ್ರಥಮ ಪ್ರಜೆಗೆ ಫಜೀತಿ ತಂದಿಟ್ಟ ಇ-ಖಾತೆ ಮತ್ತು ಕಸದ ಸಮಸ್ಯೆ, ನಗರಸಭೆ ಅಧ್ಯಕ್ಷ, ಸದಸ್ಯ ಸ್ಥಾನದ ಜೊತೆಗೆ ಜೆಡಿಎಸ್ ಸದಸ್ಯತ್ವಕ್ಕೆ ರಾಜೀನಾಮೆ!?

ಚನ್ನಪಟ್ಟಣ:

ನಗರದ ಪ್ರಥಮ ಪ್ರಜೆ ಅರ್ಥಾತ್‌ ನಗರಸಭೆ ಅಧ್ಯಕ್ಷ ಪ್ರಶಾಂತ್ ಪಿ ರವರು ರಾಜೀನಾಮೆ ನೀಡುತ್ತಾರೆ ಎಂಬುದು ದೃಢಪಟ್ಟಿದೆ. ಪೌರಾಯುಕ್ತರು, ಸದಸ್ಯರು ನಗರಸಭೆ ಅಭಿವೃದ್ಧಿಗೆ ಸ್ಪಂದಿಸುತ್ತಿಲ್ಲಾ, ಜಿಲ್ಲಾಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಕ್ರಮ ಕೈಗೊಂಡಿಲ್ಲಾ, ಶಾಸಕರಾದ ಹೆಚ್ ಡಿ ಕುಮಾರಸ್ವಾಮಿ ಯವರ ಬಳಿ ಅಳಲು ತೋಡಿಕೊಂಡರೂ ಸಕಾರಾತ್ಮಕವಾಗಿ ಸ್ಪಂದಿಸದ ಕಾರಣ ನಗರಸಭೆ ಅಧ್ಯಕ್ಷ, ಸದಸ್ಯ ಹಾಗೂ ಜೆಡಿಎಸ್ ಪ್ರಾಥಮಿಕ ಸದಸ್ಯ ಸ್ಥಾನಕ್ಕೂ ರಾಜೀನಾಮೆ ನೀಡುವುದಾಗಿ ಆಪ್ತ ವಲಯದಲ್ಲಿ ಹೇಳಿಕೊಂಡಿದ್ದು ಸಾರ್ವಜನಿಕರ ಚರ್ಚೆಗೆ ಗ್ರಾಸವಾಗಿದೆ.

ಕಳೆದ ಎರಡು ವರ್ಷಗಳ ಹಿಂದೆ ಜಿದ್ದಾಜಿದ್ದಿಯಲ್ಲಿ ನಗರಸಭೆ ಚುನಾವಣೆ ನಡೆದು ಜೆಡಿಎಸ್ ಗದ್ದುಗೆ ಏರಿತು. ಮೂಲತಃ ಚನ್ನಪಟ್ಟಣ ನಗರದವರಾದರೂ ಬೆಂಗಳೂರು ವಾಸಿಯಾದ ಪ್ರಶಾಂತ್ ರವರಿಗೆ ಚುನಾವಣಾ ಮುನ್ನಾ ಹಾಗೂ ಚುನಾವಣಾ ನಂತರವೂ ಹಲವಾರು ಅಡೆತಡೆಗಳನ್ನು ಒಡ್ಡಲಾಯಿತು. ಅಂತಹ ಸಮಯದಲ್ಲೂ ಅಧ್ಯಕ್ಷ ಸ್ಥಾನ ಪಡೆಯುವಲ್ಲಿ ಪ್ರಶಾಂತ್ ಯಶಸ್ವಿಯಾಗಿದ್ದಲ್ಲದೆ ಎರಡು ವರ್ಷಗಳಿಗೂ ಹೆಚ್ಚು ಅವಧಿಯನ್ನು ಅಧ್ಯಕ್ಷರಾಗಿಯೇ ಕಳೆದಿದ್ದಾರೆ. ಮೀಸಲಾತಿ ಅಧ್ಯಕ್ಷ ಸ್ಥಾನಕ್ಕೆ ಇನ್ನೂ ಆರು ತಿಂಗಳು ಬಾಕಿ ಇದೆ.

ಈ ನಡುವೆ ನಗರದಲ್ಲಿರುವ ಒಂದು ಬಡಾವಣೆಯ ನಿವೇಶನಗಳಿಗೆ ಇ-ಖಾತೆ ವಿಷಯವಾಗಿ ಅಧ್ಯಕ್ಷ ಹಾಗೂ ಕೆಲ ಬೆರಳೆಣಿಕೆ ಸದಸ್ಯರು ಮತ್ತು ಪೌರಾಯುಕ್ತ ಸಿ ಪುಟ್ಟಸ್ವಾಮಿ ನಡುವೆ ಮುಸುಕಿನ ಗುದ್ದಾಟ ಆರಂಭವಾಗಿ, ಅರ್ಧ ಕೋಟಿಯಷ್ಟು ಹಣದ ವ್ಯವಹಾರ ನಡೆದಿರುವುದಾಗಿ ಊಹಾಪೋಹಗಳು ಎದ್ದು, ಅದು ಸತ್ಯ ಎಂಬುದಾಗಿ ಹೆಸರೇಳಲಿಚ್ಚಿಸದ ಕೆಲ ಸದಸ್ಯರು ಹಾಗೂ ಅಧಿಕಾರಿಗಳು ಒಪ್ಪಿಕೊಂಡಿದ್ದಾರೆ. ಇದರ ಜೊತೆಜೊತೆಗೆ ನಗರದ ಖಾಲಿ ನಿವೇಶನಗಳು ಹಾಗೂ ನಿವಾಸಗಳಿಗೆ ಇ-ಖಾತೆ ಬಗ್ಗೆಯೂ ಪೌರಾಯುಕ್ತ, ಕೆಲ ಅಧಿಕಾರಿಗಳು ಹಾಗೂ ಸದಸ್ಯರ ಜೊತೆ ಪ್ರತಿದಿನವೂ ಹಗ್ಗಜಗ್ಗಾಟ ನಡೆಯುತ್ತಿರುವುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ.

ಪ್ರತಿ ವಾರ್ಡುಗಳಲ್ಲಿಯೂ ಕಸ, ಯುಜಿಡಿ ಸೇರಿದಂತೆ ಹಲವಾರು ಸಮಸ್ಯೆಗಳು ಬಿಗಡಾಯಿಸಿದ್ದು, ಇದಕ್ಕೆ ಉತ್ತಮ ಮಾರ್ಗೋಪಾಯಗಳನ್ನು ಕಂಡುಹಿಡಿಯಲು ಸಾಧ್ಯವಾಗಿಲ್ಲ, ಯಾವುದೇ ಯೋಜನೆಗಳನ್ನು ತಂದರೂ ಅನುಷ್ಠಾನ ಮಾಡಲಾಗಿಲ್ಲ. ಎಲ್ಲಾ ಯೋಜನೆಗಳು ಪತ್ರಗಳಲ್ಲಿಯೇ ಉಳಿದುಕೊಂಡಿವೆ. ನಾನು ಅಧ್ಯಕ್ಷನಾಗಿದ್ದ ಸಂದರ್ಭದಲ್ಲಿ ಒಂದಷ್ಟು ಕೆಲಸ ಮಾತ್ರ ಮಾಡಲು ಸಾಧ್ಯವಾಗಿದ್ದು, ಹೆಚ್ಚಿನ ಕೆಲಸ ಮಾಡಲು ಸಾಧ್ಯವಾಗಿಲ್ಲಾ, ನಮ್ಮ ಪಕ್ಷದ ಮುಖಂಡರುಗಳು, ವರಿಷ್ಠರು ಸಹ ಸಮಸ್ಯೆಗಳಿಗೆ ಸ್ಪಂದಿಸದ ಕಾರಣ ರಾಜೀನಾಮೆ ನೀಡುತ್ತಿದ್ದೇನೆ ಎಂದು ತಮ್ಮ ಆಪ್ತ ವಲಯದಲ್ಲಿ ಹೇಳಿಕೊಂಡಿರುವುದರಿಂದ ರಾಜೀನಾಮೆ ನೀಡುವುದು ದೃಢವಾಗಿದೆ.

*ಬುಧವಾರ ರಾಜೀನಾಮೆ?:*

ಕಳೆದ ಒಂದು ವಾರದಿಂದ ಜೆಡಿಎಸ್ ಪಾಳೆಯದಲ್ಲಿ ನಗರಸಭೆ ಅಧ್ಯಕ್ಷ ಪ್ರಶಾಂತ್ ಪಿ ರವರ ರಾಜೀನಾಮೆ ಕುರಿತು ಚರ್ಚೆಗಳಾರಂಭವಾಗಿದ್ದು, ಏಕಾಂಗಿಯಾಗಿ ಅಥವಾ ಸಮಾನ ಮನಸ್ಕರೊಡಗೂಡಿ ರಾಮನಗರ ಜಿಲ್ಲಾಧಿಕಾರಿಗಳಿಗೆ ರಾಜೀನಾಮೆ ನೀಡುವುದಾಗಿ ಆಪ್ತ ಮೂಲಗಳು ತಿಳಿಸಿವೆ.

ಗೋ ರಾ ಶ್ರೀನಿವಾಸ...

ಮೊ:9845856139.