ರಾಮನಗರ : ಜನಸಾಮಾನ್ಯರು ಸರಕಾರಿ ನೌಕರರಿಂದ ಉತ್ತಮ ಸೇವೆಯನ್ನು ಬಯಸುತ್ತಾರೆ, ಹೀಗಾಗಿ ನಮ್ಮಿಂದ ತೃಪ್ತಿದಾಯಕ ಕೆಲಸ ಆಗುತ್ತಿದೆಯೇ ಎಂಬುದನ್ನು ನೌಕರರು ಆತ್ಮಾವಲೋಖನ ಮಾಡಿಕೊಳ್ಳಬೇಕು ಎಂದು ಬಿಡದಿ ಅಂಚೆ ಕಚೇರಿಯ ಅಂಚೆ ಪಾಲಕಿ(ಪೋಸ್ಟ್ ಮಾಸ್ಟರ್) ಎಚ್.ಟಿ.ಲಕ್ಷ್ಮಿದೇವಿ ತಿಳಿಸಿದರು.
ಅಂಚೆ ಇಲಾಖೆಯ ವಿವಿಧ ಹುದ್ದೆಗಳಲ್ಲಿ 39 ವರ್ಷಗಳ ಸೇವೆ ಸಲ್ಲಿಸಿ ನಿವೃತ್ತಿಯಾದ ಹಿನ್ನೆಲೆಯಲ್ಲಿ ಬಿಡದಿ ಅಂಚೆ ಕಚೇರಿಯಲ್ಲಿ ಅಧಿಕಾರಿಗಳು ಹಾಗೂ ಸಿಬ್ಬಂದಿ ವರ್ಗ ಏರ್ಪಡಿಸಿದ್ದ ಬೀಳ್ಕೊಡುಗೆ ಕಾರ್ಯಕ್ರಮದಲ್ಲಿ ಅಭಿನಂದನೆಯನ್ನು ಸ್ವೀಕರಿಸಿ ಅವರು ಮಾತನಾಡಿದರು. 
ಸರಕಾರಿ ನೌಕರರು ಸರಿಯಾಗಿ ಕೆಲಸ ಮಾಡುವುದಿಲ್ಲ ಎಂಬ ಆರೋಪಗಳು ಜನರಲ್ಲಿ ಸರ್ವೆ ಸಾಮಾನ್ಯವಾಗಿವೆ, ಇಂತಹ ಆಪಾದನೆಗಳಿಂದ ನೌಕರರು ಮುಕ್ತರಾಗಲು ಸರಕಾರದಿಂದ ಜಾರಿಗೊಳ್ಳುವ ಯೋಜನೆಗಳನ್ನು ಜನಸಾಮಾನ್ಯರಿಗೆ ತಲುಪಿಸುವ ಕೊಂಡಿಗಳಾಗಿ ಕೆಲಸ ಮಾಡಬೇಕು, ತಮ್ಮ ಸುದೀರ್ಘ ಸರಕಾರಿ ಸೇವೆಯಲ್ಲಿ ಜನಸಾಮಾನ್ಯರ ಜೊತೆಯಲ್ಲಿ ಬಾಂಧವ್ಯವನ್ನು ಹಂಚಿಕೊಂಡಿದ್ದಾಗಿ ಅವರು ತಿಳಿಸಿದರು.
ಬಹುತೇಕ ಇಲಾಖೆಯ ಸರಕಾರಿ ನೌಕರರ ವೃತ್ತಿ ಜೀವನ ಸದಾ ಒತ್ತಡದಲ್ಲಿ ಕೆಲಸ ಮಾಡುವ ಸನ್ನಿವೇಶವಿರುತ್ತದೆ, ಬರುವ ಸಮಸ್ಯೆಗಳನ್ನು ಎದುರಿಸುವ ಪ್ರಯತ್ನಶೀಲತೆಯನ್ನು ರೂಢಿಸಿಕೊಳ್ಳಬೇಕು, ಶಿಸ್ತು, ಶ್ರದ್ಧೆ, ಸಮಯಪಾಲನೆಗೆ ಹೆಚ್ಚು ಒತ್ತು ನೀಡಬೇಕು, ಸೇವೆ ಮಾಡುವ ದೃಢನಿರ್ಧಾರ ಇದ್ದಾಗ ಅಧಿಕಾರವೇ ಮನುಷ್ಯನನ್ನು ಉನ್ನತ ಮಟ್ಟಕ್ಕೆ ತೆಗೆದುಕೊಂಡು ಹೋಗುತ್ತದೆ, ಏನೇ ಪದವಿ, ಅಧಿಕಾರಗಳು ದೊರೆತರೂ, ಎಷ್ಟೇ ವಿದ್ಯಾವಂತರಾದರೂ ಸಹ ವಿಶ್ವ ಮಾನವತೆಯ ತತ್ವಗಳನ್ನು ರೂಢಿಸಿಕೊಳ್ಳದೇ ಹೋದರೆ ಅವೆಲ್ಲಾ ಪರಿಪೂರ್ಣವಾಗುವುದಿಲ್ಲ ಎಂದು ಲಕ್ಷ್ಮಮ್ಮ ಅಭಿಪ್ರಾಯಪಟ್ಟರು. 
ಸರಕಾರಿ ನೌಕರರು ದೈಹಿಕವಾಗಿ ಆರೋಗ್ಯವಂತರು ಆದಾಗ ಮಾತ್ರ ದೇಶದ ಅಭಿವೃದ್ಧಿಯೂ ಶರವೇಗದಲ್ಲಿ ಸಾಗಲು ಸಹಕಾರಿಯಾಗುತ್ತದೆ ಎಂದು ತಿಳಿಸಿ ಬದುಕಿನ ಬಗೆಗಿನ ಬದ್ಧತೆಯನ್ನು ಕುರಿತು ಸಿಬ್ಬಂದಿಗಳಿಗೆ ಮನಮುಟ್ಟವಂತೆ ಹೇಳಿದರು. ಸಾರ್ಥಕ ಸವೇಗೆ ಸಹಕರಿಸಿದ ಎಲ್ಲಾ ಅಧಿಕಾರಿಗಳು ಹಾಗೂ ಸಿಬ್ಬಂದಿ ವರ್ಗಕ್ಕೆ ಕೃತಜ್ಞಳಾಗಿರುವುದಾಗಿ ಅವರು ತಿಳಿಸಿದರು.
ಚನ್ನಪಟ್ಟಣ ಉಪ ವಿಭಾಗದ ಸಹಾಯಕ ಅಧೀಕ್ಷಕ ಹರ್ಷ ಮಾತನಾಡಿ ಪ್ರತಿಯೊಬ್ಬ ಸರಕಾರಿ ನೌಕರನಿಗೂ ನಿವೃತ್ತಿ ಎಂಬುದು ಕಡ್ಡಾಯವಾಗಿದೆ, ಆದರೆ ಸೇವಾ ಅವಧಿಯಲ್ಲಿ ಮಾಡಿದ ಒಳ್ಳೆಯ ಕೆಲಸಗಳು ನಮ್ಮ ನಿವೃತ್ತಿ ಜೀವನದಲ್ಲಿ ಅತ್ಮ ತೃಪ್ತಿಯನ್ನು ಕೊಡುವ ಜತೆಗೆ ಸದಾ ನೆನಪಿನಲ್ಲಿ ಉಳಿಯುತ್ತವೆ, ಹೀಗಾಗಿ ಸರಕಾರಿ ನೌಕರರು ಲಕ್ಷ್ಮಮ್ಮನವರಂತೆ ಮಾದರಿಯಾಗಲು ಪ್ರಯತ್ನಿಸಬೇಕು ಎಂದು ಸಲಹೆ ನೀಡಿದರು.
ಅಂಚೆ ಸಹಾಯಕ ಬಿ.ಎಂ.ಕುಮಾರ್ ಮಾತನಾಡಿ ಬಿಡದಿಯಲ್ಲಿ ಹಲವಾರು ಆರ್‍ಡಿ ಡ್ರೈವ್‍ಗಳನ್ನು ಮಾಡುವ ಮೂಲಕ ಸುಮಾರು 2.500 ಖಾತೆಗಳನ್ನು ತೆರೆದು ದಾಖಲೆ ನಿರ್ಮಿಸಿದ ಕೀರ್ತಿ ಲಕ್ಷ್ಮಮ್ಮನವರಿಗೆ ಸಲ್ಲುತ್ತದೆ, ವೃತ್ತ ಜೀವನದಲ್ಲಿ ಯಾವುದೇ ಒಂದು ಕಪ್ಪುಚುಕ್ಕಿ ಇಲ್ಲದೆ ಸೇವೆ ಮಾಡಿ ನಿವೃತ್ತಿಯಾದ ಅಧಿಕಾರಿ ಅಥವಾ ನೌಕರಿನಿಗೆ ಸಿಗುವ ತೃಪ್ತಿ ಎಲ್ಲಾ ಗೌರವಗಳಿಗೂ ಮಿಗಿಲಾಗಿರುತ್ತದೆ, ಇದಕ್ಕೆ ಲಕ್ಷ್ಮಮ್ಮನವರು 39 ವರ್ಷಗಳ ಸೇವೆ ಅಧೀನ ಸಿಬ್ಬಂದಿಗೆ ಮಾರ್ಗದರ್ಶನವಾಗಿದೆ ಎಂದು ಬಣ್ಣಿಸಿದರು.
ಇದೇ ಸಂದರ್ಭದಲ್ಲಿ ಸೇವೆಯಿಂದ ನಿವೃತ್ತಿಯಾದ ಲಕ್ಷ್ಮಮ್ಮನವರನ್ನು ಅಧಿಕಾರಿಗಳು ಮತ್ತು ಕಚೇರಿ ಸಿಬ್ಬಂದಿ ವರ್ಗ ಹಾಗೂ ಬಿಡದಿಯ ಕೆಲವು ನಾಗರೀಕರು ಅಭಿನಂದಿಸಿ ಬೀಳ್ಕೊಟ್ಟರು.
ಕಾರ್ಯಕ್ರಮದಲ್ಲಿ ಚನ್ನಪಟ್ಟಣ ಅಂಚೆ ಸಹಾಯಕ ಅಧಿಕಾರಿ ಚಿಕ್ಕಸಿದ್ಧೇಗೌಡ, ರಾಮನಗರ ಅಂಚೆ ಸಹಾಯಕ ಅಧಿಕಾರಿ ಎನ್.ಎಲ್.ಶಿವಲಿಂಗಯ್ಯ, ಬಿಡದಿ ಅಂಚೆ ಸಹಾಯಕ ಅಧಿಕಾರಿ ಗಿರೀಶ್, ಸಿಬ್ಬಂದಿಗಳಾದ ರಮೇಶ್‍ಕುಮಾರ್, ವೆಂಕಟೇಶ್, ನಾಗರಾಜು, ಕೃಷ್ಣಯ್ಯ, ಲಕ್ಷ್ಮಣಕುಮಾರ್(ಬಾಬು), ನಿವೃತ್ತ ಪೋಸ್ಟ್ ಮಾಸ್ಟರ್ ಗಂಗಯ್ಯ ಮುಂತಾದವರು ಉಪಸ್ಥಿತರಿದ್ದರು.