ರಾಮನಗರ: ಬಿಡದಿ ರೈತರ ಸೇವಾ ಸಹಕಾರ ಸಂಘದಲ್ಲಿ ಭಾರಿ ಅವ್ಯವಹಾರ ನಡೆದಿದ್ದು, ಕೂಡಲೇ ಆಡಳಿತ ಮಂಡಳಿಯನ್ನು ಸೂಪರ್ ಸೀಡ್ ಮಾಡಬೇಕು ಎಂದು ಸಂಘದ ಷೇರುದಾರರು ಆದ ಕರ್ನಾಟಕ ರಾಜ್ಯ ಕಾರ್ಮಿಕ ಪಡೆ ಜಿಲ್ಲಾ ಘಟಕದ ಅಧ್ಯಕ್ಷ ಬಾನಂದೂರು ಬಸವರಾಜು ಜಿಲ್ಲಾಡಳಿತವನ್ನು ಆಗ್ರಹಿಸಿದರು.
ನಗರದಲ್ಲಿ ನಡೆದ ಸುದ್ಧಿಗೋಷ್ಟಿಯಲ್ಲಿ ಮಾತನಾಡಿದ ಅವರು, ಇತ್ತೀಚಿನ ವರ್ಷಗಳಲ್ಲಿ ರೈತರ ಸೇವಾ ಸಹಕಾರ ಸಂಘದ ಆಡಳಿತ ಮಂಡಳಿಯ ನಿರ್ಲಕ್ಷತನದಿಂದ ಸಂಘದಲ್ಲಿ ಷೇರು ಹೂಡಿಕೆದಾರರ ಹಣ ಮತ್ತು ಸರಕಾರದಿಂದ ಬಂದ ಅನುದಾನದಲ್ಲಿ ಭಾರಿ ವ್ಯತ್ಯಾಸಗಳು ಕಂಡುಬಂದಿರುವುದು ಆಡಿಟ್ ವರದಿಯಿಂದ ದೃಢಪಟ್ಟಿರುತ್ತದೆ, 2016-17ನೇ ಸಾಲಿನ ಆಡಿಟ್ ವರದಿಯಲ್ಲಿ ಎಲ್ಲಾ ವಿಭಾಗಳಿಂದ ಸುಮಾರು 40 ಲಕ್ಷ ರೂಗಳವರೆಗೆ ಹಣ ವ್ಯತ್ಯಾಸವಾಗಿರುವುದು ಕಂಡುಬಂದಿದೆ, ಇದರಿಂದ ರೈತರು ಮತ್ತು ಷೇರುದಾರರಿಗೆ ತೀರಾ ಅನ್ಯಾಯವಾಗಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.
ರಾಷ್ಟ್ರೀಕೃತ ಬ್ಯಾಂಕುಗಳಲ್ಲಿ ಹೂಡಿಕೆ ಮಾಡಿರುವ ರೈತರ ಸೇವಾ ಸಹಕಾರ ಸಂಘದ ಗ್ರಾಚ್ಯುಟಿ ನಿಧಿ ನಾಪತ್ತೆಯಾಗಿದೆ, ಸಂಘದ ನೌಕರರ ಭವಿಷ್ಯ ನಿಧಿ(ಪಿಎಫ್) ಹಣ ದುರ್ಬಳಕೆ ಆಗಿದೆ, ಸಿಬ್ಬಂದಿ ಅಕ್ರಮ ನೇಮಕ, ಸಂಘದ ಅಧೀನದಲ್ಲಿರುವ ಅಂಗಡಿಯ ಬಾಡಿಗೆ ಹಣವನ್ನು ಕಬಳಿಕೆ ಮಾಡಲಾಗಿದೆ, ಅಲ್ಲದೆ 2012ರಲ್ಲಿ ಸೇವೆಯಿಂದ ನಿವೃತ್ತಿ ಆಗಿರುವ ಸಂಘದ ಕಾರ್ಯನಿರ್ವಹಣಾಧಿಕಾರಿ(ಸಿಇಒ) ಶ್ರೀ ಸಂಜೀವಯ್ಯ ಎಂಬುವರನ್ನು ಐದಾರು ವರ್ಷಗಳಿಂದ ಬಿಡುಗಡೆಗೊಳಿಸದೆ ಸೇವೆಯಲ್ಲಿ ಮುಂದುವರೆಸಲಾಗಿದೆ, ಶ್ರೀ ಸಂಜೀವಯ್ಯನವರು ಪ್ರಬಾರಿ ಆಗಿದ್ದರೂ ಸಹ ಸಂಘದ ಸೀಲು(ಮುದ್ರೆ) ಸಹಿಗಳನ್ನು ಯಥಾವತ್ತಾಗಿ ಬಳಕೆ ಮಾಡುತ್ತಿದ್ದಾರೆ, ಇದರಿಂದ ಸಂಘದ ಅವ್ಯವಹಾರಗಳನ್ನು ಬಯಲಾಗದಂತೆ ತಡೆಹಿಡಿಯಲಾಗುತ್ತಿದೆ ಎಂದು ಆರೋಪಿಸಿದರು.
ಸಹಕಾರ ಸಂಘಗಳ ರಿಜಿಸ್ಟ್ರಾರ್ ರವರಿಂದ ಅನುಮೋದನೆ ಪಡೆಯದೆ ಕೆಲವು ಹುದ್ದೆಗಳನ್ನು ಏಕಾಏಕಿ ನೇಮಕ ಮಾಡಿಕೊಂಡಿರುವುದು ಅಕ್ರಮ, ಪ್ರಬಾರ ಸಿಇಒ ರವರನ್ನು ಸೇವೆಯಿಂದ ತಕ್ಷಣ ಬಿಡುಗಡೆಗೊಳಿಸುವಂತೆ, ತಪ್ಪಿತಸ್ಥರ ವಿರುದ್ಧ ಸಹಕಾರ ಸಂಘದ ಕಾಯ್ದೆಯನ್ವಯ ಸೂಕ್ತ ಕ್ರಮ ಜರುಗಿಸುವಂತೆ ಈಗಾಗಲೇ ಕರ್ನಾಟಕ ರಾಜ್ಯ ಕಾರ್ಮಿಕ ಪಡೆ ಸಂಘಟನೆ ರಾಮನಗರ ಉಪ ವಿಭಾಗದ ಸಹಕಾರ ಸಂಘಗಳ ಸಹಾಯಕ ನಿಬಂಧಕರಿಗೆ ದೂರು ನೀಡಿದೆ, ಇದರ ಮೇರೆಗೆ ನಿಬಂಧಕರು ರೈತರ ಸೇವಾ ಸಹಕಾರ ಸಂಘಕ್ಕೆ ಅನುಮತಿ ಪಡೆಯದೆ ಮಾಡಿಕೊಂಡಿರುವ ನೇಮಕ ರದ್ದುಪಡಿಸುವಂತೆ ಮತ್ತು ಪ್ರಬಾರ ಸಿಇಒ ರವರನ್ನು ತುರ್ತಾಗಿ ಸೇವೆಯಿಂದ ಬಿಡುಗಡೆಗೊಳಿಸುವಂತೆ ನೋಟೀಸ್ ಜಾರಿ ಮಾಡಿರುತ್ತಾರೆ ಎಂದರು.
ಸಹಕಾರ ಸಂಘದಲ್ಲಿ ಆದಾಯಕ್ಕಿಂತ ನಷ್ಟದ ಬಾಬ್ತು ಹೆಚ್ಚಾಗುತ್ತಿರುವುದು ಆಡಿಟ್ ವರದಿಯಲ್ಲಿ ಉಲ್ಲೇಖವಾಗಿದೆ, 2016-17ನೇ ಸಾಲಿನ ಆಡಳಿತ ಮಂಡಳಿಯ ಬೇಜವಾಬ್ದಾರಿತನದಿಂದ ವ್ಯಾಪಕವಾಗಿ ಭ್ರಷ್ಟಾಚಾರ ನಡೆದಿರುವುದು ಕಂಡುಬಂದಿದೆ, ರೈತರು ಹಾಗೂ ನಾಗರೀಕರ ಹಿತದೃಷ್ಠಿಯಿಂದ ಸ್ಥಾಪನೆಯಾಗಿರುವ ಸಂಘವನ್ನು ದಿವಾಳಿ ಮಾಡಲು ಕೆಲವು ನಿರ್ದೇಶಕರು ಮುಂದಾಗಿದ್ದಾರೆ, ಸಂಘದಲ್ಲಿ ನಡೆದಿರುವ ಭಾರಿ ಮೊತ್ತದ ವ್ಯತ್ಯಾಸಗಳಿಗೆ ಉಪ ವಿಭಾಗದ ಸಹಕಾರ ಸಂಘಗಳ ನಿಬಂಧಕರು ಅಧಿಕಾರಿಗಳ ಹೊಣೆಗೇಡಿತನವೂ ಕಾರಣವಾಗಿದೆ. ಹೀಗಾಗಿ ಜಿಲ್ಲಾಧಿಕಾರಿಗಳು ಮದ್ಯೆ ಪ್ರವೇಶಿಸಿ ಸೂಕ್ತವಾದ ತನಿಖೆ ನಡೆಸಲು ಸಂಬಂಧಪಟ್ಟ ಇಲಾಖಾಧಿಕಾರಿಗೆ ಸೂಚನೆ ನೀಡಬೇಕು, ತಪ್ಪಿತಸ್ಥರಿಂದ ವ್ಯತ್ಯಾಸವಾಗಿರುವ ಹಣವನ್ನು ವಸೂಲು ಮಾಡಿ ಅವರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕು ಎಂದು ಆಗ್ರಹಿಸಿದರು. 

ಕನ್ನಡ ಜಾನಪದ ಪರಿಷತ್‍ನ ಜಿಲ್ಲಾ ಕಾರ್ಯದರ್ಶಿ ಬಾನಂದೂರು ನಂಜುಂಡಿ ಮಾತನಾಡಿ ರೈತರ ಸೇವಾ ಸಹಕಾರ ಸಂಘವು 1976 ರಲ್ಲಿ ಸ್ಥಾಪನೆಯಾಗಿ, ಈಗ ಸುಮಾರು 7 ಸಾವಿರಕ್ಕೂ ಹೆಚ್ಚಿನ ಸಂಖ್ಯೆಯ ಸದಸ್ಯ(ಷೇರುದಾರರು)ರನ್ನು ಹೊಂದಿರುತ್ತದೆ, ಸಹಕಾರ ಸಂಘದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ರೈತರು ಷೇರುದಾರರು ಇದ್ದಾರೆ, ಹಿಂದಿನಿಂದ ನಡೆದು ಬಂದ ಸಂಘದ ಆಡಳಿತ ಮಂಡಳಿಯ ಕಾರ್ಯವೈಖರಿಯ ಬಗ್ಗೆ ವಿಶ್ವಾಸವಿರಿಸಿ ಸಂಘದಲ್ಲಿ ರೈತರು ಸುಮಾರು 3 ಕೋಟಿ ರೂಗಳಷ್ಟು ಹಣವನ್ನು ನಿಶ್ಚಿತ ಠೇವಣಿ(ಎಫ್‍ಡಿ)ಖಾತೆಯಲ್ಲಿ ಜಮಾ ಮಾಡಿದ್ದಾರೆ, 3 ಕೋಟಿಗೂ ಹೆಚ್ಚಿನ ಮೌಲ್ಯದ ಚಿನ್ನಾಭರಣಗಳನ್ನು ಅಡವಿಟ್ಟು ಸಾಲ ಪಡೆದಿದ್ದಾರೆ, ಸುಮಾರು 2 ಕೋಟಿ ರೂಗಳಷ್ಟು ಉಳಿತಾಯ ಖಾತೆಯಲ್ಲಿ ವ್ಯವಹಾರ ನಡೆಯುತ್ತಿದೆ, ಆದರೆ ಹೂಡಿಕೆದಾರೆಲ್ಲರಿಗೂ ದಿವಾಳಿತನ ಕಾಡ ತೊಡಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು.
ಮತ್ತೋರ್ವ ಷೇರುದಾರ ಕಾರ್ಮಿಕ ಪಡೆ ಬಿಡದಿ ಹೋಬಳಿ ಅಧ್ಯಕ್ಷ ಸಿದ್ಧರಾಜು(ಸಿದ್ಧು) ಮಾತನಾಡಿ 2016-17ನೇ ಸಾಲಿನ ಜಮಾಖರ್ಚು ವಿಭಾಗದ ಉಳಿತಾಯ ಖಾತೆಯಲ್ಲಿ 71,383 ರೂಗಳ ವ್ಯತ್ಯಾಸ ಕಂಡು ಬಂದಿದೆ. ಚಿಲ್ಲರೆ ದಿನಸಿ ಮಾರಾಟ ವಿಭಾಗದಲ್ಲಿ ಆಡಿಟ್ ರಿಪೋರ್ಟ್‍ನಲ್ಲಿ 15,68,181 ರೂ ಎಂದು ತೋರಿಸುತ್ತಿದೆ, ಆದರೆ ಜಮಾ ಖರ್ಚಿನಲ್ಲಿ 15,10,352 ಎಂದು ನಮೂದಾಗಿದೆ, ಇದರಿಂದ 57,829 ರೂ ವ್ಯತ್ಯಾಸ ಕಂಡುಬಂದಿದೆ. ಸೀಮೆ ಎಣ್ಣೆ ವಿಭಾಗದಲ್ಲಿ ಆಡಿಟ್ ರಿಪೋರ್ಟ್ ನಲ್ಲಿ 10,49,723 ರೂ ಬರೆದಿದೆ  ಆದರೆ ಜಮಾ ಖರ್ಚಿನಲ್ಲಿ 9,09,746 ರೂ ಎಂದು ನಮೂದಾಗಿದೆ, ಇದರಿಂದ 1,39,977 ರೂಗಳ ವ್ಯತ್ಯಾಸ ಆಗಿದೆ. ಚಿನ್ನಾಭರಣ ವಿಭಾಗದಲ್ಲಿ ಆಡಿಟ್ ವರದಿಯಲ್ಲಿ 28,78,715 ರೂ ಮೊತ್ತ ತೋರಿಸುತ್ತಿದೆ, ಆದರೆ ಜಮಾ ಖರ್ಚಿನಲ್ಲಿ 27,82,089 ರೂ ನಮೂದಾಗಿದೆ, ಇದರಿಂದ 83,171 ರೂ ವ್ಯತ್ಯಾಸವಿದೆ, ಕೆನರಾ ಬ್ಯಾಂಕ್ ಖಾತೆಯಲ್ಲಿ 28,250 ರೂಗಳ ವ್ಯತ್ಯಾಸ ಕಂಡು ಬಂದಿದೆ ಎಂದು ಅಂಕಿ ಅಂಶ ನೀಡಿದರು.
ಸುದ್ಧಿಗೋಷ್ಠಿಯಲ್ಲಿ ಪದಾಧಿಕಾರಿಗಳಾದ ವಿಜಯೇಂದ್ರ ಕುಮಾರ್, ಶಿವಕುಮಾರ್ ಮತ್ತಿತರರು ಉಪಸ್ಥಿತರಿದ್ದರು.