ಮಾಗಡಿ : ದೇಸಿಯ ಕ್ರೀಡೆಗಳಲ್ಲಿ ಭಾಗವಹಿಸುವುದರಿಂದ ದೇಹ ಸಧೃಡವಾಗುವುದರ ಜೊತೆಗೆ ಆರೋಗ್ಯವಂತರಾಗಿ ಜೀವಿಸಲು ಸಾಧ್ಯ ಎಂದು ಬಿಜೆಪಿ ಮುಖಂಡ ಎ.ಹೆಚ್.ಬಸವರಾಜು ಅಭಿಪ್ರಾಯಪಟ್ಟರು.
 ಪಟ್ಟಣದ ಸರ್ಕಾರಿ ಪದವಿ ಪೂರ್ವ ಕಾಲೇಜು ಮೈದಾನದಲ್ಲಿ ಬಿಸಿಲು ಮಾರಮ್ಮ ದೇವಿಯ  ಹಬ್ಬದ ಪ್ರಯುಕ್ತ ತಿರುಮಲೆ ಶ್ರೀರಂಗ ಬಾಯ್ಸ್‍ವತಿಯಿಂದ ಏರ್ಪಡಿಸಿದ್ದ ಚಿನ್ನಿದಾಂಡು ಆಟಕ್ಕೆ ಚಾಲನೆ ನೀಡಿ ಮಾತನಾಡಿ ಇಂದಿನ ದಿನಗಳಲ್ಲಿ ಮಕ್ಕಳು ದೈಹಿಕ ಶ್ರಮ ಬೇಡುವ ಆಟಗಳಿಗೆ ಹೆಚ್ಚಿನ ಗಮನ ನೀಡದೇ ಮನೆಯಲ್ಲಿ ಕಂಪ್ಯೂಟರ್, ಮೊಬೈಲ್ ಹಾಗೂ ಟಿವಿಗಳ ಮುಂದೆ ಕುಳಿತು ಆಟವಾಡವುದರ ಕಡೆಗೆ ಹೆಚ್ಚಿನ ಗಮನ ನೀಡುತ್ತಿರುವುದರಿಂದ ಇಂದಿನ ಮಕ್ಕಳಲ್ಲಿ ಬೋಜ್ಜಿನ ಸಮಸ್ಯೆ ಜೊತೆಗೆ ದೃಷ್ಠಿಹೀನತೆ ಆರೋಗ್ಯದ ಸಮಸ್ಯೆಗಳು ಹೆಚ್ಚಾಗಿ ಕಾಡುತ್ತಿವೆ. ಮಕ್ಕಳು ಮೈದಾನದಲ್ಲಿ ನಮ್ಮ ದೇಸಿಯ ಆಟಗಳಾದ ಲಗೋರಿ, ಚಿನ್ನಿದಾಂಡು, ಮರಕೋತಿಯಂತಹ ಕ್ರೀಡೆಗಳನ್ನು ಹೆಚ್ಚಾಗಿ ಆಡುವುದರಿಂದ ಆರೋಗ್ಯವನ್ನು ಉತ್ತಮವಾಗಿಟ್ಟು ಕೊಳ್ಳುವುದರ ಜೊತೆಗೆ ದೈಹಿಕವಾಗಿ ಸಧೃಡರಾಗಬಹುದು ಎಂದ ಅವರು ನಮ್ಮ ದೇಸಿಯ ಕ್ರೀಡೆಗಳು ಹೆಚ್ಚಾಗಿ ಕೌಶಲ್ಯತೆ, ಚತುರತೆಯನ್ನು ಒಳಗೊಂಡಿದ್ದು ಇವುಗಳನ್ನು ಆಡುವುದರಿಂದ ಮಕ್ಕಳಲ್ಲಿ ಬುದ್ಧಿ ಮತ್ತೇ ಚತುರತೆ ಹಾಗೂ ಕೌಶಲ್ಯ ಹೆಚ್ಚಾಗುತ್ತದೆ. ಆದ್ದರಿಂದ ಪ್ರತಿಯೊಬ್ಬ ಪೋಷಕರು ತಮ್ಮ ಮಕ್ಕಳು ಬಯಲಿನಲ್ಲಿ ಆಡುವುದರಿಂದ ಬಿದ್ದು ಗಾಯ ಮಾಡಿಕೊಳ್ಳುತ್ತಾರೆ ಎಂಬ ಹೆದರಿಕೆಯನ್ನು ತೊರೆದು ಹೊರಾಂಗಣ ಆಟಗಳನ್ನು ಆಡವಾಡುವುದಕ್ಕೆ ಹೆಚ್ಚಿನ ಪ್ರೋತ್ಸಾಹ ನೀಡಬೇಕು ಎಂದು ತಿಳಿಸಿದರು.
 ಚಿನ್ನಿದಾಂಡು ಸ್ಪರ್ಧೆಯ ಆಯೋಜಕ ಕಿರಣ್ ಮಾತನಾಡಿ ತಿರುಮಲೆ ಗ್ರಾಮದಲ್ಲಿ ಬಿಸಿಲು ಮಾರಮ್ಮ ದೇವಿಯ ಹಬ್ಬವನ್ನು ಆಚರಿಸುವುತ್ತಿರುವ ಹಿನ್ನಲೆಯಲ್ಲಿ ದೇಸಿಯ ಕ್ರೀಡೆಯಾದ ಚಿನ್ನಿದಾಂಡಿನ ಸ್ಪರ್ದೆಯನ್ನು ಆಯೋಜಿಸಿದ್ದು ಮಾಗಡಿ ಪಟ್ಟಣ ಹಾಗೂ ಸುತ್ತಮುತ್ತಲಿನ ಗ್ರಾಮದ 12 ತಂಡಗಳು ಸ್ವರ್ಧೆಯಲ್ಲಿ ಭಾಗವಹಿಸಿವೆ ಎಂದ ಅವರು ಇತ್ತೀಚಿನ ದಿನಗಳಲ್ಲಿ ಯಾವುದೇ ವಿಶೇಷ ಕಾರ್ಯಕ್ರಮಗಳಾದರೂ ಸಹ ವಿದೇಶಿ ಆಟ ಕ್ರಿಕೆಟ್ಟನ್ನು ಹೆಚ್ಚಾಗಿ ಆಡಿಸಲಾಗುತ್ತದೆ. ನಮ್ಮ ದೇಸಿಯ ಕ್ರೀಡೆಯಲ್ಲಿ ನಿಪುಣರಾಗಿರುವವರನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ಚಿನ್ನಿದಾಂಡು ಸ್ಪರ್ಧೆಯನ್ನು ಏರ್ಪಡಿಸಲಾಗಿದೆ ಎಂದು ತಿಳಿಸಿದರು.
 ಕಾರ್ಯಕ್ರಮದಲ್ಲಿ ಬಿಜೆಪಿ ಮುಖಂಡ ಪುಟ್ಟನರಸಪ್ಪ, ಹೊಸಪೇಟೆ ಆಶ್ವತ್ಥ್, ಬಿ.ಎಂ.ಧನಂಜಯ್ಯ, ದಯಾನಂದ, ಗಟ್ಟೀಪುರ ಸತೀಶ್, ಶಶಿ, ರಮೇಶ್, ಸುರೇಶ್, ನಾಗರಾಜ್, ಟಿ.ಎಂ.ರವಿ, ರಾಜೇಶ್, ಜಗದೀಶ್ ಉಪಸ್ಥಿತರಿದ್ದರು.