ರಾಮನಗರ : ತಾಲ್ಲೂಕಿನ ಕೂಟಗಲ್ ಹೋಬಳಿ ದೊಡ್ಡಗಂಗವಾಡಿ ಹಾಲು ಉತ್ಪಾದಕರ ಸಹಕಾರ ಸಂಘದಲ್ಲಿ ಐದು ಸಾವಿರ ಸಾಮಥ್ರ್ಯದ ಬಿಎಂಸಿ ಕೇಂದ್ರಕ್ಕೆ ಚಾಲನೆ ಕಾರ್ಯಕ್ರಮ ನಡೆಯಿತು.
    ತಾಲ್ಲೂಕು ಪಂಚಾಯಿತ್ ಸದಸ್ಯ ಎಚ್. ಶಿವಪ್ರಸಾದ್ ಮಾತನಾಡಿ ಗ್ರಾಮಾಂತರ ಪ್ರದೇಶದ ಒಬ್ಬ ಸಾಮಾನ್ಯ ರೈತನ ಮಗನಾಗಿ ಪಿ.ನಾಗರಾಜು ಹುಟ್ಟಿ ಸಹಕಾರಿ ಕ್ಷೇತ್ರದಲ್ಲಿ ಹಲವು ಸುಧಾರಣೆಗಳನ್ನು ಮಾಡುವ ಮೂಲಕ ಹೊಸಹೊಸ ಯೋಜನೆಗಳ ರುವಾರಿಯಾಗಿರುವುದು ಶ್ಲಾಘನೀಯ ಎಂದರು.
ರೈತ ಕುಟುಂಬದಲ್ಲಿ ಜನಿಸಿದ ವ್ಯಕ್ತಿಗಳಿಗೆ ಮಾತ್ರ ರೈತ ಕಲ್ಯಾಣ ಕಾರ್ಯಕ್ರಮಗಳನ್ನು ಅನುಷ್ಟಾನ ಮಾಡಲು ಸಾಧ್ಯ. ಈ ಸಾಲಿನಲ್ಲಿ ಪಿ.ನಾಗರಾಜು ಬೆಂಗಳೂರು ಹಾಲು ಒಕ್ಕೂಟದ ಅಧ್ಯಕ್ಷರಾಗಿ ನಂತರ ಕೆಎಂಎಫ್ ಅಧ್ಯಕ್ಷರಾಗಿ ಹೈನುಗಾರರ ಬಗೆಗೆ ರೈತ ನೆರವು ಕಾರ್ಯಕ್ರಮಗಳನ್ನು ತಂದಿದ್ದಾರೆ.
ರಾಜಕೀಯ ಹೊರತುಪಡಿಸಿ ರೈತ ಆರ್ಥಿಕವಾಗಿ ಸಬಲನಾಗಲು ನೆರವು ನೀಡಲು ವಿಮಾ ಯೋಜನೆ, ಹಾಲು ಉತ್ಪಾದಕ ರೈತ ಮೃತಪಟ್ಟರೆ ಮರಣ ವಿಮೆ, ರಾಸು ವಿಮೆಯಂತಹ ಪಶು ಆಹಾರದ ಬದಲಾವಣೆ ಸೇರಿದಂತೆ ಹತ್ತು ಹಲವು ಕಾರ್ಯಕ್ರಮಗಳು ಸಹಕಾರಿಗಳಲ್ಲಿ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ ಎಂದು ಹರ್ಷ ವ್ಯಕ್ತಪಡಿಸಿದರು.
ಸಂಘವು ಕೇವಲ 18 ಲೀಟರ್‍ನಿಂದ ಪ್ರಾರಂಭವಾಗಿ ಇಂದು 2200 ಲೀಟರ್ ಪ್ರತಿದಿನ ಉತ್ಪಾದನೆಯಾಗುತ್ತಿದೆ. ಇಂದು ನಮ್ಮ ಸಂಘದಲ್ಲಿ ಬಿಎಂಸಿ ಪ್ರಾರಂಬಿಸಿದ್ದು, ಉತ್ಪಾದಕರು ಅದರ ಸದುಪಯೋಗವನ್ನು ಪಡಿಸಿಕೊಂಡು ಸಂಘವನ್ನು ಸದೃಡಗೊಳಿಸಿ ಎಂದು ಕಿವಿಮಾತು ಹೇಳಿದರು.
ಕೆಎಂಎಫ್ ಅದ್ಯಕ್ಷ ಪಿ.ನಾಗರಾಜು ಬಿಎಂಸಿ ಕೇಂದ್ರಕ್ಕೆ ಚಾಲನೆ ನೀಡಿ ಮಾತನಾಡಿ, ಜಿಲ್ಲೆಯಲ್ಲಿ ಬೆಂಗಳೂರು ಹಾಲು ಒಕ್ಕೂಟದ ವತಿಯಿಂದ ನಿರ್ಮಾಣವಾಗುತ್ತಿರುವ ಉತ್ಪನ್ನ ಘಟಕ ಮತ್ತು ಪೌಡರ್ ಪ್ಲಾಂಟ್‍ಗಳು ರೈತರ ಬೆವರಿನ ಹನಿಯಾಗಿದ್ದು, ಅದು ನಿಮ್ಮಗಳ ಕೊಡುಗೆಯೆ ಹೊರತು ಇದಕ್ಕೆ ಯಾವುದೆ ಸರ್ಕಾರಗಳು ಅನುದಾನ ನೀಡಿಲ್ಲ. ಸಹಕಾರಿಗಳ ಪರಿಶ್ರಮದಿಂದ ಬಂದ ಲಾಭದಲ್ಲಿ ಒಕ್ಕೂಟದಿಂದ ನಿರ್ಮಾಣ ಮಾಡುತ್ತಿದೆ ಎಂದರು.
ಹಾಲು ಉತ್ಪಾದಕರ ಪರವಾಗಿ ಕೈಗೊಂಡ ಯೋಜನೆಗಳಲ್ಲಿ ಶೇ.90ರಷ್ಟು ಯಶಸ್ಸು ಕಂಡಿದ್ದು, ಸಹಕಾರಿಗಳು ನನ್ನ ಬೆಂಬಲಕ್ಕೆ ನಿಂತಲ್ಲಿ ಸಹಕಾರಿ ಕ್ಷೇತ್ರದ ಮುಖಾಂತರ ದೇಶದ ಜನರು ಕರ್ನಾಟಕದತ್ತ ನೋಡುವ ಮಾದರಿ ಕಾರ್ಯಕ್ರಮಗಳನ್ನು ಅನುಷ್ಟಾನಕ್ಕೆ ತರುತ್ತೇನೆ. ಜೊತೆಗೆ ರೈತನ ಆರ್ಥಿಕ ಮಟ್ಟ ವೃದ್ದಿಸುವಲ್ಲಿ ಪ್ರಾಮಾಣಿಕ ಪ್ರಯತ್ನ ಮಾಡುವುದಾಗಿ ಹೇಳಿದರು.
ಈ ಸಂಧರ್ಭದಲ್ಲಿ ಬೆಂಗಳೂರು ಹಾಲು ಒಕ್ಕೂಟದ ರಾಮನಗರ ಶಿಬಿರ ವ್ಯವಸ್ಥಾಪಕ ಡಾ.ಶಿವಶಂಕರ್, ಎಂಪಿಸಿಎಸ್ ಅಧ್ಯಕ್ಷ ಕಂಡಾದಯ್ಯ, ಕಾರ್ಯದರ್ಶಿ ವಿಜಯ್‍ಕುಮಾರ್,  ವಿಎಸ್‍ಎಸ್‍ಎಸ್‍ಎನ್ ಕಾರ್ಯದರ್ಶಿ ರಾಮಚಂದ್ರಯ್ಯ ಉಪಸ್ಥಿತರಿದ್ದರು.