ರಾಮನಗರ : ತಾಲ್ಲೂಕಿನ ಕೂಟಗಲ್ ಹೋಬಳಿ ಎರೇಹಳ್ಳಿ ಎಂಪಿಸಿಎಸ್‍ನಲ್ಲಿ ಉಪವಿಭಾಗದ ಸಹಕಾರ ಸಂಘಗಳ ಸಹಾಯಕ ನಿಭಂಧಕರ ಆದೇಶದನ್ವಯ ಸಂಘದ ಅಧ್ಯಕ್ಷ ಎಂ.ಶಿವಯ್ಯ ಅಧ್ಯಕ್ಷತೆಯಲ್ಲಿ ವಿಶೇಷ ಸರ್ವ ಸದಸ್ಯರ ಮಹಾಸಭೆ ಜರುಗಿತು.
ಸಂಘದ ಆವರಣದಲ್ಲಿ ನಡೆದ ಸಭೆಯಲ್ಲಿ ಕೆಎಂಎಫ್ ಅಧ್ಯಕ್ಷ ಪಿ.ನಾಗರಾಜು ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಹಾಲು ಉತ್ಪಾದಕ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ನೀಡಿ ಮಾತನಾಡಿದ ಅವರು, ಕೂಟಗಲ್ ಹೋಬಳಿಯಲ್ಲಿ ಪ್ರತಿದಿನ 3 ಸಾವಿರ ಲೀಟರ್ ಹಾಲು ಉತ್ಪಾದನೆಯನ್ನು ಮಾಡುತ್ತಿರುವ ಸಂಘ ಎರೇಹಳ್ಳಿ ಎಂಪಿಸಿಎಸ್ ಪ್ರಥಮವಾಗಿದೆ. ಅಲ್ಲದೆ ವಾರ್ಷಿಕ 2.5 ಕೋಟಿ ವಹಿವಾಟು ನಡೆಸುತ್ತಿದ್ದು 60 ಪ್ರತಿಭಾನ್ವಿತ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ನೀಡಿ ಶಿಕ್ಷಣಕ್ಕೆ ಒತ್ತು ನೀಡುವಲ್ಲಿ ಆಡಳಿತ ಮಂಡಳಿ ಮತ್ತು ಕಾರ್ಯದರ್ಶಿ ಉತ್ತಮ ಕೆಲಸ ಮಾಡುತ್ತಿದೆ ಎಂದರು.
ಬೆಂಗಳೂರು ಹಾಲು ಒಕ್ಕೂಟ ಒಂದರಲ್ಲಿ 802 ಜನ ರೈತರು ಮರಣ ಹೊಂದಿದ್ದು, ರಾಮನಗರ ತಾಲ್ಲೂಕಿನಲ್ಲಿ 122 ಹಾಲು ಉತ್ಪಾದಕ ರೈತರು ಸಾವನ್ನಪ್ಪಿದ್ದಾರೆ. ಅವರಿಗೆ ಈ ವಿಮೆಯಿಂದ ಹಣ ಸಿಗಲಿದೆ.  ಸಾವು ಶಾಶ್ವತವಲ್ಲ, ಸಹಜವಾದ ಸಾವಿಗೆ ಬೆಲೆ ತೆತ್ತಲಾಗದಿದ್ದರೂ, ಹೈನುಗಾರಿಕೆಯನ್ನು ನಂಬಿರುವ ರೈತ ಕುಟುಂಬಕ್ಕೆ ಅಲ್ಪಮಟ್ಟಿಗೆ ಹಣ ಸಿಗಲಿದೆ ಎಂದು ಅಭಿಪ್ರಾಯಪಟ್ಟರು.
ವಿಸ್ತರಣಾಧಿಕಾರಿ ಉಮೇಶ್ ಸಭೆಯಲ್ಲಿ ಆಡಿಟ್ ವರದಿಯನ್ನು ಮಂಡಿಸಿ ಎರೇಹಳ್ಳಿ ಎಂಪಿಸಿಎಸ್ ಪ್ರಾರಂಭವಾದಾಗ ಕಾರ್ಯನಿರ್ವಹಿಸಿದ್ದ ಕಾರ್ಯದರ್ಶಿ ಶಿವನಂಜಯ್ಯ ಅವಧಿಯಲ್ಲಿ 47.782 ರೂಪಾಯಿ ದುರುಪಯೋಗವಾಗಿದ್ದು ನಂತರ 2001 ರಿಂದ 2006 ರವರಗೆ ಕಾರ್ಯದರ್ಶಿಯಾಗಿ ಕೆಲಸ ನಿರ್ವಹಿಸಿದ ವೈ.ಜೆ.ರಮೇಶ್ ಅವಧಿಯಲ್ಲಿ 8.81.358 ರೂಪಾಯಿ ಸಂಘದ ಹಣ ದುರುಪಯೋಗ ಹಾಗಿರುವ ಬಗ್ಗೆ ಲೆಕ್ಕಪರಿಶೋಧನೆ ವೇಳೆ ತಿಳಿದು ಬಂದಿದ್ದು ವರದಿಯಲ್ಲಿ ಉಲ್ಲೇಖವಾಗಿದೆ ಎಂದರು. 
ಸದಸ್ಯರು ನಂತರ ದುರುಪಯೋಗವಾಗಿರುವ ಹಣವನ್ನು ಸಂಬಂಧಿಸಿದವರಿಂದ ಹಣಮರು ಪಾವತಿಗೆ ಕಾನೂನಾತ್ಮಕವಾಗಿ ಪತ್ರ ವ್ಯವಹಾರ ಮಾಡಿ ನೋಟಿಸ್ ನೀಡಿ ದಾಖಲೆಯಿದ್ದರೆ ಅವರು ಆಡಿಟ್ ಅವರಿಗೆ ಸಲ್ಲಿಸಲಿ, ಇಲ್ಲವಾದಲ್ಲಿ ಸಂಘದ ದುರುಪಯೋಗವಾದ ಹಣ ವಸೂಲಿ ಮಾಡುವಂತೆ ಸಭೆಯಲ್ಲಿ ಸದಸ್ಯರು ಸುದೀರ್ಘ ಚರ್ಚೆ ಮಾಡಿ ತೀರ್ಮಾನಿಸಿತು. 
2006 ರಿಂದ ಇದುವರೆವಿಗೆ ಸಂಘದ ಅಧ್ಯಕ್ಷ ಎಂ.ಶಿವಯ್ಯ ಮತ್ತು ಕಾರ್ಯದರ್ಶಿ ಬಿ.ಸುರೇಶ್ ಅವಧಿಯಲ್ಲಿ ಸಂಘ 63 ಲಕ್ಷ ಆದಾಯ ಗಳಿಸಿದ್ದು, ಆದಾಯದಲ್ಲಿ ಹಾಲು ಸರಬರಾಜು ರೈತರಿಗೆ 28 ಲಕ್ಷ ನಿವ್ವಳ ಲಾಭ ವಿತರಣೆ ಮಾಡುವ ಬಗ್ಗೆ ಮತ್ತು ಸಮಗ್ರ ಬೈಲಾ ತಿದ್ದುಪಡಿ ಮಾಡುವ ಬಗ್ಗೆ ವಿಶೇಷ ಸರ್ವ ಸದಸ್ಯರ ಸಭೆಯಲ್ಲಿ ಚರ್ಚಿಸಿ ಅನುಮೋದನೆ ಪಡೆಯಲಾಯಿತು. 
ಎಂಪಿಸಿಎಸ್ ಅಧ್ಯಕ್ಷ ಎಂ.ಶಿವಯ್ಯ ಮಾತನಾಡಿ, 7 ಲೀಟರ್ ಹಾಲು ಸಂಗ್ರಹದೊಂದಿಗೆ 1997-98ರಲ್ಲಿ ಸಣ್ಣ ಪ್ರಮಾಣದಲ್ಲಿ ಪ್ರಾರಂಭವಾದ ಹಾಲು ಉತ್ಪಾದಕರ ಸಂಘದಲ್ಲಿ ಇಂದು ಪ್ರತಿನಿತ್ಯ 3 ಸಾವಿರ ಲೀಟರ್ ಹಾಲು ಸಂಗ್ರಹವಾಗುತ್ತಿದ್ದು ಗ್ರಾಮದ ರೈತಾಪಿ ಜನರಲ್ಲಿ ಇಂದು ಹೈನುಗಾರಿಕೆ ಮುಖ್ಯ ಉದ್ಯಮವಾಗಿ ರೂಪುಗೊಂಡಿದೆ ಎಂದರು.
ನನ್ನ ಅಧ್ಯಕ್ಷ ಅವಧಿಯಲ್ಲಿ ಸಂಘವನ್ನು ಪಾರದರ್ಶಕವಾಗಿ ನಡೆಸುವ ಮೂಲಕ 63 ಲಕ್ಷ ಲಾಭ ತಂದುಕೊಟ್ಟಿದ್ದೇನೆ. ಚಿರಾಸ್ತಿ ಠೇವಣಿ ಸೇರಿ ಒಂದು ಕೋಟಿಗು ಅಧಿಕ ಸಂಘದ ಆಸ್ತಿ ಇದ್ದು ಇದೀಗ ಬಂದಿರುವ ಲಾಭಾಂಶದಲ್ಲಿ ಸದ್ಯದಲ್ಲಿಯೇ 30 ಲಕ್ಷ ರೂ.ಗಳ ಹಣವನ್ನು ಬೋನಸ್ ರೂಪದಲ್ಲಿ ಹಾಲು ಉತ್ಪಾದಕ ರೈತಾಪಿ ನೀಡಲಾಗುತ್ತದೆ ಎಂದರು.
ಸಂಘದ ಕಾರ್ಯದರ್ಶಿ ಬಿ.ಸುರೇಶ್ ಮಾತನಾಡಿ, ಸಂಘದಲ್ಲಿ ಕಳೆದ 21 ವರ್ಷಗಳ ಆಡಿಟ್ ವರದಿಯನ್ನು ತಯಾರಿಸಲು ಮಾಜಿ ಸಿಎಂ ಎಚ್.ಡಿ.ಕುಮಾರಸ್ವಾಮಿ, ಶಾಸಕ ಬಾಲಕೃಷ್ಣ ಹಾಗು ವಿಧಾನ ಪರಿಷತ್ ಸದಸ್ಯ ಸಿ.ಎಂ.ಲಿಂಗಪ್ಪ ಅವರು ಸಹಕರಿಸಿದರು ಎಂದರು.
ಸಭೆಯಲ್ಲಿ ರಾಮನಗರ ಶಿಬಿರ ವ್ಯವಸ್ಥಾಪಕ ಡಾ.ಶಿವಶಂಕರ್, ನಿರ್ದೇಶಕರಾದ ಶಿವಣ್ಣ, ಅಪ್ಪಾಜಿ, ರವಿ, ಶೇಖರ್, ಜಯರಾಮಯ್ಯ, ನಿಂಗೇಗೌಡ, ಸಿದ್ಧಯ್ಯ, ಸರಸ್ವತಿ, ಜಯಮ್ಮ ಮತ್ತು ಸಂಘದ ಸದಸ್ಯರು ಉಪಸ್ಥಿತರಿದ್ದರು.