ರಾಮನಗರ : ತಾಲ್ಲೂಕು ಕಚೇರಿ ಸಭಾಂಗಣದಲ್ಲಿ ಬಿಡದಿ ಹೋಬಳಿ ಬೈರಮಂಗಲ ಗ್ರಾಮದ ಸಾಗುವಳಿದಾರರಿಗೆ ಶಾಸಕ ಎಚ್.ಸಿ. ಬಾಲಕೃಷ್ಣ ಹಕ್ಕು ಪತ್ರ ವಿತರಣೆ ಮಾಡಿದರು.
    ಶಾಸಕ ಎಚ್.ಸಿ. ಬಾಲಕೃಷ್ಣ ಮಾತನಾಡಿ ಕಾನೂನು ಬದ್ದವಾಗಿ ಫಾರಂ.50 ಮತ್ತು 53 ಅಡಿಯಲ್ಲಿ ಅರ್ಜಿ ಹಾಕಿರುವ ಬಗರ್ ಹುಕುಂ ಸಾಗುವಳಿ ನಡೆಸುತ್ತಿರುವ ರೈತರಿಗೆ ಅಧಿಕಾರಿಗಳು ಪರಿಶೀಲನೆ ಮಾಡಿ ಕ್ರಮಬದ್ದವಾಗಿರುವ ರೈತರಿಗೆ ಹಕ್ಕು ಪತ್ರ ವಿತರಿಸಲಾಗುತ್ತಿದೆ ಎಂದು ತಿಳಿಸಿದರು.
    ಬೈರಮಂಗಲ ಗ್ರಾಮದ 10 ಜನರಿಗೆ ಸಾಂಕೇತಿಕವಾಗಿ ಹಕ್ಕು ಪತ್ರ ವಿತರಣೆ ಮಾಡಲಾಗುತ್ತಿದ್ದು, ಬಿಡದಿ ಮತ್ತು ಕೂಟಗಲ್ ಹೋಬಳಿಯ ಭಾಗದಲ್ಲಿ ಈ ಹಿಂದೆ ಸಲ್ಲಿಸಿರುವ ಅರ್ಜಿಯನ್ನು ಪರಿಶೀಲಿಸಿ, ಸ್ಥಳ ಪರಿಶೀಲನೆಯನ್ನು ಅಧಿಕರಿಗಳು ಮಾಡಿದ್ದು, ಅವುಗಳಲ್ಲಿ ಕಾನೂನಾತ್ಮಕವಾಗಿರುವ ರೈತರಿಗೆ ಜಮೀನು ಮಂಜೂರು ಹಕ್ಕು ಪತ್ರವನ್ನು ನೀಡಲಾಗುತ್ತಿದ್ದು ಕೆಲವರು ಅಪಪ್ರಚಾರ ಮಾಡಲು ಹೊರಟಿದ್ದಾರೆ ಅವರಿಗೆ ಹಕ್ಕುಪತ್ರ ನೀಡುವ ಮೂಲಕ ಉತ್ತರ ನೀಡುತ್ತಿದ್ದೇನೆ ಎಂದರು.
ಬಗರ್‍ಹುಕುಂ ಸಾಗುವಳಿದಾರರಿಗೆ ಹಕ್ಕುಪತ್ರ ನೀಡುವ ವಿಚಾರದಲ್ಲಿ ಸರ್ಕಾರದ ನಿರ್ಧಾರ ಪ್ರಕಟವಾಗುತ್ತಲೇ ತಾವು ತಮ್ಮ ಕ್ಷೇತ್ರ ವ್ಯಾಪ್ತಿಯಲ್ಲಿ ತಾವೇ ಖುದ್ದು ಪರಿಶೀಲನೆ ನಡೆಸಿರುವುದಾಗಿ, ಅಧಿಕಾರಿಗಳು ಸಹ ಪರಿಶೀಲನೆ ನಡೆಸಿದ್ದಾರೆ. ಸತ್ಯಾಸತ್ಯೆಯನ್ನು ಅರಿತು ದಾಖಲೆಗಳು ಸಿದ್ದವಾಗಿವೆ, ಈ ನಡುವೆ ತಮ್ಮ ರಾಜಕೀಯ ವಿರೋಧಿಗಳು ಇದೆಲ್ಲಾ ಗಿಮ್ಮಿಕ್, ಬೋಗಸ್ ಎಂದು ಟೀಕಿಸಿದ್ದರು. ತಮ್ಮ ವಿರೋಧಿಗಳ ಟೀಕೆಗೆ ಉತ್ತರವಾಗಿ ಹಕ್ಕುಪತ್ರಗಳ ವಿತರಣೆ ಆರಂಭವಾಗಿದೆ ಎಂದರು.
ಹಿಂದೆ ಹಣವನ್ನು ಪಾವತಿಸಿರುವ ರೈತರಿಗೂ ಹಕ್ಕುಪತ್ರ ವಿತರಣೆ ಮಾಡಲಾಗುವುದು. ಈಗ ಮಂಜೂರಾಗಿರುವ ರೈತರಿಗೆ ಹಣ ಕಟ್ಟಿಸಿಕೊಳ್ಳಲು ನೋಟೀಸ್ ನೀಡಿ ವಿಸ್ತೀರ್ಣಕ್ಕೆ ತಕ್ಕಂತೆ ಕಿಮ್ಮತ್ತು ಕಟ್ಟಿಸಿಕೊಳ್ಳಲಾಗುವುದು. ಸ್ವಾಧೀನದಲ್ಲಿರುವವರು ಕಡಿಮೆ ಮಂಜೂರಾತಿ ಹಾಗಿದ್ದರೆ, ಆ ಬಗ್ಗೆ ಆಕ್ಷೇಪಣೆಗಳು ಬಂದರೆ ಮರು ಪರಿಶೀಲನೆಗೆ ಸರ್ವೆ ಅಧಿಕಾರಿಗಳಿಗೆ ಆದೇಶಿಸಲಾಗುವುದು ಎಂದರು.
ರಾಜ್ಯದಲ್ಲಿ ಕಾಗೋಡು ತಿಮ್ಮಪ್ಪ ಐದು ವರ್ಷದ ಹಿಂದೆಯೆ ಕಂದಾಯ ಸಚಿವರಾಗಿದ್ದರೆ ರೈತರ ಸಮಸ್ಯೆಗಳೆಲ್ಲ ಬಗೆಹರಿಯುತ್ತಿದ್ದವು. 20 ವರ್ಷಗಳಿಂದ ಬಗೆಹರಿಯದ ಸಮಸ್ಯೆಯನ್ನು ಬಗೆಹರಿಸಲು ಅವರಲ್ಲಿರುವ ಇಚ್ಚಾಸಕ್ತಿಯೆ ಕಾರಣ. ಅದರ ಜೊತೆಗೆ ಈ ಕೆಲಸಕ್ಕೆ ಸರ್ಕಾರಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ ಎಂದು ಹೇಳಿದರು. ನೈಸ್ ಸಮಸ್ಯೆ ಇರುವ ಅರ್ಜಿಗಳ ಸಂಬಂಧ ಸರ್ಕಾರಕ್ಕೆ ಪತ್ರ ಬರೆಯಲಾಗುವುದು. ಆ ವಿಚಾರವಾಗಿ ಅಧಿಕಾರಿಗಳು ಸರ್ಕಾರದ ನಿರ್ದೇಶನದಂತೆ ಕ್ರಮ ಕೈಗೊಳ್ಳಲಿದ್ದಾರೆ ಎಂದರು.
ಈ ಸಂಧರ್ಭದಲ್ಲಿ ತಾಲ್ಲೂಕು ದಂಡಾಧಿಕಾರಿ ಮಾರುತಿ ಪ್ರಸನ್ನ, ತಾಲ್ಲೂಕು ಪಂಚಾಯಿತಿ ಸದಸ್ಯ ಗಾಣಕಲ್ ನಟರಾಜು ಉಪಸ್ಥಿತಿರಿದ್ದರು.