ಚನ್ನಪಟ್ಟಣ : ತಾಲ್ಲೂಕು ಕಛೇರಿಯ ಆಡಳಿತ ವೈಫಲ್ಯದಿಂದಾಗಿ ತಾಲ್ಲೂಕು ಕಛೇರಿಯಲ್ಲಿ ರೈತರು ಪಹಣಿಗಾಗಿ ಸಾಲುಗಟ್ಟಿ ನಿಂತರೂ ಪಹಣಿ  ಸಿಗದೆ  ಪರದಾಡುವಂತಾಗಿದೆ. 
ಮಿನಿ ವಿಧಾನ ಸೌಧದ ಕಟ್ಟಡದಲ್ಲಿರುವ ತಾಲ್ಲೂಕು ಕಛೇರಿಯಲ್ಲಿ ರೈತರಿಗೆ ಪಹಣಿ ವಿತರಿಸಲೆಂದೇ ಎರಡು ಕೌಂಟರ್‍ಗಳನ್ನು ತೆರೆದಿರುವುದು ಸರಿಯಷ್ಟೆ. ಒಂದು ಕೌಂಟರ್‍ನಲ್ಲಿ ಕೊಠಡಿ ತೆರೆದಿದ್ದರೂ ಬೆಳಿಗ್ಗೆ 11-30 ಸಮಯವಾದರೂ ಸಿಬ್ಬಂದಿ ಇಲ್ಲದೆ ಖಾಲಿ ಕುರ್ಚಿ ಇರುವುದು, ಬರುವ ರೈತರನ್ನು ಖಾಲಿ ಕುರ್ಚಿ ಸ್ವಾಗತಿಸುತ್ತಿರುತ್ತದೆ. ಮತ್ತೊಂದು ಕೌಂಟರ್ ತೆರೆದಿದ್ದರೂ ಸಿಬ್ಬಂದಿ ಇದ್ದು ಪಹಣಿಗಾಗಿ ರೈತರು ಸಾಲುಗಟ್ಟಿ ನಿಂತು ,  ಪಹಣಿ ಕೇಳಿದರೆ ಸರ್ವರ್ ಡೌನ್, ನೆಟ್‍ವರ್ಕ ಪ್ರಾಬ್ಲಂ ಎನ್ನುವ ಉತ್ತರ ಸಿದ್ದವಾಗಿರುತ್ತದೆ. ದಿನ ನಿತ್ಯ ಕೆಲಸ ಕಾರ್ಯಗಳನ್ನು ಬಿಟ್ಟು ತಾಲ್ಲೂಕು ಕಛೇರಿಗೆ ಅಲೆದರೂ ಪಹಣಿ ಸಿಗದೆ  ತೊಂದರೆ ಅನುಭವಿಸುತ್ತಾ ಸರ್ಕಾರಿ ಸವಲತ್ತುಗಳನ್ನು ಪಡೆಯಲು ಪರದಾಡುವಂತಾಗಿದೆ  ಎಂದು ರೈತರು ತಮ್ಮ ಅಸಹಾಯಕತೆಯನ್ನು ವ್ಯಕ್ತಪಡಿಸಿದ್ದಾರೆ. 
 ಸರ್ಕಾರದಿಂದ ದೊರೆಯುವ ಸಾಲ ಸೌಲಭ್ಯಗಳನ್ನು ಪಡೆಯಲು ಮತ್ತು ತಮ್ಮ ವ್ಯವಹಾರಕ್ಕಾಗಿ ಪಹಣಿ ಪಡೆಯಲು ತಾಲ್ಲೂಕು ಕಛೇರಿ, ಗ್ರಾಮ ಪಂಚಾಯಿತಿ ಕಾರ್ಯಾಲಯಗಳಿಗೆ ರೈತಾಪಿ ವರ್ಗ ಹೋದರೆ, ಗ್ರಾಮ ಪಂಚಾಯಿತಿಯಲ್ಲಿ ಪಹಣಿ ಕೊಡುವುದನ್ನು ನಿಲ್ಲಿಸಲಾಗಿದೆ. ನೀವು ತಾಲ್ಲೂಕು ಕಛೇರಿಗೆ ಹೋಗಿ ಎನ್ನುತ್ತಾರೆ. ತಾಲ್ಲೂಕು ಕಛೇರಿಯಲ್ಲಿ ಕೇಳಿದರೆ ಸರ್ವರ್ ಡೌನ್ ಎನ್ನುವ ಹಾರಿಕೆ ಉತ್ತರ ಸಿಗುತ್ತದೆ. ರೈತರನ್ನು ಅಲ್ಲಿಂದ ಇಲ್ಲಿಗೆ ಇಲ್ಲಿಂದ ಅಲ್ಲಿಗೆ ಅಲೆಸುವುದಾದರು ಏಕೆ? ತಾಲ್ಲೂಕು ಆಡಳಿತ ಬಿಗಿಯಾಗಿ ಆಡಳಿತ ನಡೆಸದೆ ಇರುವುದೇ ಈ ಎಲ್ಲಾ ಅವ್ಯವಸ್ಥೆಗೆ ಕಾರಣವಾಗಿದೆ ಎಂದು ಮೈಲ್ನಾಯ್ಕನಹೊಸಹಳ್ಳಿ ರವಿಕುಮಾರ್ ಕಿಡಿಕಾಡಿದ್ದಾರೆ.
ಸಂಬಂಧಪಟ್ಟ ಚುನಾಯಿತ ಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ರೈತರ ಹಿತದೃಷ್ಠಿಯಿಂದ ಇತ್ತ ಗಮನಹರಿಸಿ, ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಕ್ತ ಎಚ್ಚರಿಕೆ ನೀಡಿ ರೈತರಿಗೆ ಕ್ರಮಬದ್ಧವಾಗಿ ಅಗತ್ಯ ಪಹಣಿ ಇತರೆ ಭೂ ದಾಖಲೆಗಳನ್ನು  ದೊರಕಿಸಿ ಕೊಟ್ಟು ಸರ್ಕಾರದಿಂದ ದೊರೆಯುವ ಸೌಲಭ್ಯಗಳನ್ನು ಪಡೆದು ಕೊಳ್ಳಲು  ಅನುಕೂಲ ಮಾಡಿ ಕೊಡುವ ಮೂಲಕ ಆಗುವ ತೊಂದರೆಯನ್ನು ತಪ್ಪಿಸುವಂತೆ  ರೈತರು ಮನವಿ ಮಾಡಿದ್ದಾರೆ.