ಕನಕಪುರ: ಕಾಂಗ್ರೆಸ್ ನೇತೃತ್ವದ ಸಿದ್ದರಾಮಯ್ಯನವರ ಸರಕಾರದಿಂದ ರಾಜ್ಯದ ಜನರ ಹಿತಕಾಯಲು ಸಾಧ್ಯವಿಲ್ಲದ ಕಾರಣ ಮುಂದೆ ರಾಜ್ಯದ ರೈತರ ಹಾಗು ಜನಪರ ಅಭಿವೃದ್ಧಿಗಾಗಿ ಜಾತ್ಯಾತೀತ ಜನತಾದಳವನ್ನು ಬೆಂಬಲಿಸಬೇಕೆಂದು ಅನಿತಾ ಕುಮಾರಸ್ವಾಮಿ ತಿಳಿಸಿದರು.

ರಾಮನಗರ ವಿಧಾನಸಭಾ ಕ್ಷೇತ್ರದ ಹಾರೋಹಳ್ಳಿ-ಮರಳವಾಡಿ ಹೋಬಳಿಯಲ್ಲಿ ಜೆಡಿಎಸ್ ಪಕ್ಷದ ಕಾರ್ಯಕರ್ತ ಮುಖಂಡರ ಸಭೆಯ ಉದ್ಘಾಟನೆ ನೆರವೇರಿಸಿ ಮಾತನಾಡಿದ ಅವರು ಕಾಂಗ್ರೆಸ್ ಸರಕಾರವು ರಾಜ್ಯಕ್ಕೆ ಹಿಂದಿನಿಂದಲೂ ಅನ್ಯಾಯ ಮಾಡಿಕೊಂಡು ಬಂದಿದೆ. ಇದೀಗ ಮತ್ತೆ ಅದನ್ನೇ ಮುಂದುವರೆಸಿಕೊಂಡು ಬರುತ್ತಿರುವುದು ನಾಚಿಕೆಗೇಡಿನ ಸಂಗತಿಯಾಗಿದೆ. ಸಿದ್ದರಾಮಯ್ಯನವರು ಸರ್ವಾಧಿಕಾರಿ, ದ್ಷೇಷ ಹಾಗು ಉಡಾಫೆ ರೀತಿಯಿಂದ ಸರಕಾರವನ್ನು ನಡೆಸುವ ಮೂಲಕ ಜನರ ವಿರೋಧವನ್ನು ಕಟ್ಟಿಕೊಂಡಿದ್ದಾರೆ. ರಾಜ್ಯದ ಉದ್ದಗಲಕ್ಕೂ ಜನರು ಕುಮಾರಸ್ವಾಮಿಯವರೇ ಮುಖ್ಯಮಂತ್ರಿಯಾಗಬೇಕು ಎಂಬ ಅಭಿಲಾಷೆ ವ್ಯಕ್ತಪಡಿಸುತ್ತಿರುವುದು ಕಂಡುಬರುತ್ತಿದೆ. ಆದ್ದರಿಂದ ಈ ಭಾಗದ ಜನ ಹಿಂದಿನಂತೆ ಮತ್ತೆ ಅತಿಹೆಚ್ಚು ಮತಗಳ ಅಂತರದಿಂದ ಗೆಲ್ಲಿಸಿ ಆಶೀರ್ವಾದ ಮಾಡಬೇಕಾಗಿದೆ. 

ಕಾಂಗ್ರೆಸ್ ಸರಕಾರ ಸಾಲಮನ್ನಾ, ಅನ್ನಭಾಗ್ಯ, ಕ್ಷೀರಭಾಗ್ಯಗಳ ಹೆಸರಿನಲ್ಲಿ ಸರಕಾರದ ಖಜಾನೆಯನ್ನು ಖಾಲಿಮಾಡಿದ್ದಾರೆ. ಮುಂದೆ ಸರಕಾರವನ್ನು ಆಳುವವರಿಗೆ ಸಾಲದ ಹೊರೆಯನ್ನು ಹೊರಿಸಲು ಹೊರಟಿದ್ದಾರೆ. ಅಂತಹವರನ್ನು ಸೋಲಿಸಿ ಮನೆಗೆ ಕಳುಹಿಸಬೇಕಾಗಿದೆ. ದೊಡ್ಡಮಟ್ಟದಲ್ಲಿ ಬಿ.ಎಸ್.ಪಿ.ಯ ಅಗ್ರಗಣ್ಯ ನಾಯಕಿ ಮಾಯಾವತಿಯವರೊಂದಿಗೆ ಮೈತ್ರಿ ಮಾಡಿಕೊಂಡಿರುವುದರಿಂದ ನಮ್ಮ ಪಕ್ಷಕ್ಕೆ ಮತ್ತಷ್ಟು ಬಲ ಬಂದಂತಾಗಿದೆ. ದೀನ, ದಲಿತ, ದುರ್ಬಲರು ಎಲ್ಲರೂ ಒಮ್ಮತವಾಗಿ ಪಕ್ಷದ ಗೆಲುವಿಗೆ ಮತಚಲಾಯಿಸಬೇಕೆಂದು ಮನವಿ ಮಾಡಿದರು. 

ಹಾರೋಹಳ್ಳಿ-ಮರಳವಾಡಿ ಅವಳಿ ಹೋಬಳಿಗಳು ಕುಮಾರಸ್ವಾಮಿಯವರಿಗೆ ತಾಯಿ-ಮಗುವಿನ ಸಂಬಂಧವಿದ್ದಂತೆ ಜೊತೆಗೆ ರಾಮನಗರ ಅವರ ಕರ್ಮಭೂಮಿಯಾಗಿರುವುದರಿಂದ ಎರಡೂ ಕಡೆ ಸ್ಪರ್ಧಿಸುತ್ತಾರೆಂಬ ಆತಂಕ ಯಾರಿಗೂ ಬೇಡ. ಈ ಕ್ಷೇತ್ರವನ್ನು ಬಿಟ್ಟುಹೋಗುವ ಪ್ರಶ್ನೆಯೇ ಇಲ್ಲ. ಭೂಮಿಯ ಮೇಲೆ ಸೂರ್ಯ ಚಂದ್ರರು ಇರುವಷ್ಟೇ ಸತ್ಯವಾಗಿ ಮುಂದೆ ಕುಮಾರಸ್ವಾಮಿಯವರು ಮುಖ್ಯಮಂತ್ರಿಯಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ ಎಂದರು. 

ಕುಮಾರಸ್ವಾಮಿಯವರು ಇಲ್ಲಿ ಸ್ಪರ್ಧೆ ಮಾಡಿದ್ದರೂ ರಾಜ್ಯದ ಉದ್ದಗಲಕ್ಕೂ ಚುನಾವಣಾ ಪ್ರಚಾರದಲ್ಲಿ ತೊಡಗಿಸಿಕೊಳ್ಳುವುದರಿಂದ ಅವರು ಕ್ಷೇತ್ರಕ್ಕೆ ಬಾರಲು ಆಗದ ಕಾರಣ ಪ್ರತಿಯೊಬ್ಬ ಕಾರ್ಯಕರ್ತ ಮುಖಂಡರೂ ತಾನೇ ಕುಮಾರಸ್ವಾಮಿ ಎಂದು ಮನೆಮನೆಗೆ ತೆರಳಿ ಹೆಚ್.ಡಿ.ಕೆ.ಯವರ 20 ತಿಂಗಳ ಅಧಿಕಾರಾವಧಿಯ ಜನಪರ ಕೆಲಸಗಳನ್ನು ಹೇಳುವ ಮೂಲಕ ಪಕ್ಷದ ಗೆಲುವಿಗೆ ನೆರವಾಗಬೇಕು. ಈ ಬಾರಿಯ ಚುನಾವಣೆಯನ್ನು ಕಾರ್ಯಕರ್ತರು, ಮುಖಂಡರು ಯಾವುದೇ ರೀತಿಯಲ್ಲೂ ನಿರ್ಲಕ್ಷ ಮಾಡಬೇಡಿ. ಕುಮಾರಸ್ವಾಮಿಯರಿಗೆ ಹೆಚ್ಚಿನ ಶಕ್ತಿ ತುಂಬಲು ಅಧಿಕ ಮತಗಳಿಂದ ಗೆಲ್ಲಿಸಲು ಕಾರ್ಯತಂತ್ರ ರೂಪಿಸಬೇಕು ಎಂದರು.

ಜಿಲ್ಲಾಧ್ಯಕ್ಷ ಅಶೋಕ್, ಉಪಾಧ್ಯಕ್ಷ ಕೋಣಾಳುದೊಡ್ಡಿ ರಾಮಕೃಷ್ಣ, ತಾಲ್ಲೂಕು ಅಧ್ಯಕ್ಷ ರಾಜಶೇಖರ್, ಜಿ.ಪಂ. ಮಾಜಿ ಸದಸ್ಯ ಡಿ.ಎಸ್.ಭುಜಂಗಯ್ಯ, ತುಮಗಣಿ ಪುಟ್ಟಸ್ವಾಮಿ, ಭೈರೇಗೌಡರವರು ಮಾತನಾಡಿ ಕ್ಷೇತ್ರದಲ್ಲಿ ಕುಮಾರಸ್ವಾಮಿಯವರು ಮಾಡಿರುವ ಅಭಿವೃದ್ಧಿ ಕಾರ್ಯಗಳನ್ನು ಕಾಂಗ್ರೆಸ್‍ನವರು ತಮ್ಮ ಕಿರುಹೊತ್ತಿಗೆಯಲ್ಲಿ ತಮ್ಮದೇ ಅಭಿವೃದ್ಧಿಗಳೆಂದು ಸುಳ್ಳು ಕರಪತ್ರಗಳನ್ನು ಮುದ್ರಿಸಿ ಹಂಚುವ ಮೂಲಕ ಜನರನ್ನು ದಿಕ್ಕು ತಪ್ಪಿಸುತ್ತಿದ್ದಾರೆ. ನಮ್ಮ ಅಭ್ಯರ್ಥಿ ಹಿಮಾಲಯ ಪರ್ವತವಿದ್ದಂತೆ ಕಾಂಗ್ರೆಸ್‍ನ ಅಭ್ಯರ್ಥಿ ಮರಳಿನ ಗುಡ್ಡೆಯಿದ್ದಂತೆ ಇವರ ಅಜಗಜಾಂತರ ವ್ಯತ್ಯಾಸದ ನಡುವೆ ಜೆಡಿಎಸ್‍ನ ಜನಪರ ಆಡಳಿತಕ್ಕೆ ಕುಮಾರಸ್ವಾಮಿಯವರನ್ನು ಬೆಂಬಲಿಸಬೇಕೆಂದು ಕರೆ ನೀಡಿದರು. 

ವಿಧಾನಪರಿಷತ್ ಸದಸ್ಯ ಎಂ. ಮರಿಲಿಂಗೇಗೌಡ, ರಾಜ್ಯ ಉಪಾಧ್ಯಕ್ಷ ಉಮೇಶ್, ವೀರಶೈವ ಮುಖಂಡ ಶಿವಶಂಕರ್, ಮಾಜಿ ಸಚಿವ ಪಿಜಿಆರ್ ಸಿಂಧ್ಯ ಸಹೋದರ ಬಾಬುರಾವ್‍ಸಿಂಧ್ಯ, ಸೋಮಶೇಕರ್, ರಾಮ-ಲಕ್ಷ್ಮಣ, ಗ್ರಾ.ಪಂ. ಅಧ್ಯಕ್ಷ ತಹಸೀನ್‍ತಾಜ್‍ರೆಹಮತ್‍ವುಲ್ಲಾ, ತಮ್ಮಯ್ಯಣ್ಣ, ಕೃಷ್ಣಮೂರ್ತಿ, ಕಿರಣ್, ಮಂಜು ಹಲವರು ಸೇರಿದಂತೆ ಉಪಸ್ಥಿತರಿದ್ದರು.

ಈ ವೇಳೆ ಕಗ್ಗಲಹಳ್ಳಿ ಪಂಚಾಯತಿ ಮುಖಂಡ ಆನಂದ್, ವೀರಶೈವ ಮುಖಂಡ ಬಾಬು, ಜಗನ್ನಾಥ್‍ಸಿಂಧ್ಯ ಸೇರಿದಂತೆ ಹಲವರು ಕಾಂಗ್ರೆಸ್ ತೊರೆದು ಜೆಡಿಎಸ್ ಸೇರ್ಪಡೆಗೊಂಡರು.