ರಾಮನಗರ : ವಚನಗಳ ಮೂಲಕ ಜನರ ಮನಸ್ಸಿನ ಕೊಳೆ ತೆಗೆಯುವ ಕೆಲಸವನ್ನು ಮಡಿವಾಳ ಮಾಚಿದೇವರು ಮಾಡಿದ್ದಾರೆ ಎಂದು ರಾಮನಗರ ತಹಶೀಲ್ದಾರ್ ಮಾರುತಿ ಪ್ರಸನ್ನ ಅವರು ಬಣ್ಣಿಸಿದರು. 
ಅವರು ನಗರದ ಗುರುಭವನದಲ್ಲಿ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಹಾಗೂ ಕನ್ನಡ ಮತ್ತು ಸಂಸ್ಕøತಿ ಇಲಾಖೆಯ ಸಂಯುಕ್ತಾಶ್ರಯದಲ್ಲಿ ಶ್ರೀ ಮಡಿವಾಳ ಮಾಚಿದೇವರ ಜಯಂತಿಯನ್ನು ಉದ್ಘಾಟಿಸಿ ಮಾತನಾಡಿದರು.
ಮಾಚಿದೇವರು 354 ವಚನಗಳನ್ನು ರಚಿಸಿದ್ದು, ಅವುಗಳಲ್ಲಿ ಭಕ್ತಿಯ ಸಾರವನ್ನು ಉಣಬಡಿಸಿದ್ದಾರೆ, ಅಲ್ಲದೆ ಅವರ ವಚನಗಳು ನಿಷ್ಠೂರವಾಗಿದ್ದು, ಲೋಕದ ಅಂಕು ಡೊಂಕುಗಳನ್ನು ಆ ಮೂಲಕ ತಿದ್ದುವ ಕೆಲಸ ಮಾಡಿದ್ದಾರೆ.  ಅದಕ್ಕಿಂತ ಪ್ರಮುಖವಾಗಿ ಕಲ್ಯಾಣದ ಬಿಜ್ಜಳ ಮಹಾರಾಜ ವಚನಗಳನ್ನೇ ನಾಶ ಪಡಿಸುವ ಸಂದರ್ಭದಲ್ಲಿ ಅವುಗಳನ್ನು ಉಳಿಸಿಕೊಟ್ಟಿದ್ದಾರೆ. ಇಂದಿಗೂ ಲಭ್ಯವಿರುವ ವಚನಗಳು ನಮಗೆ ಲಭಿಸಲು ಮಾಚೀದೇವರೇ ಕಾರಣ ಎಂದು ಅವರು ಹೇಳಿದರು. 
ದೇವರಲ್ಲಿ ಶರಣಾಗಿ, ಕಾಯಕದ ಮೂಲಕ ಗುರುಗಳಿಗೆ ಹತ್ತಿರವಾಗಿ, ಆ ಮೂಲಕ ಮುಕ್ತಿ ಪಡೆಯಿರಿ ಎಂಬ ಸಂದೇಶ ನೀಡಿದ್ದಾರೆ. ಹಣೆ ಮೇಲೆ ವಿಭೂತಿ ಧರಿಸಿದರೆ ಭಕ್ತಿ ಇದೆ ಎಂದಲ್ಲ, ಅದು ಮನಸ್ಸಿನಲ್ಲಿರಬೇಕು ಎಂಬುದನ್ನು ತಿಳಿಸಿಕೊಟ್ಟಿರುವ ಮಡಿವಾಳ ಮಾಚಿದೇವರು ಹಾಕಿಕೊಟ್ಟ ಮಾರ್ಗದಲ್ಲಿ ನಡೆದರೆ ನಮ್ಮ ಜೀವನ ಉನ್ನತೆಗೆ ಏರಬಹುದು ಎಂದು ಹೇಳಿದರು.
ಡಿ.ಎಂ ಮಹದೇವಪ್ಪ ಅವರು ಪ್ರಧಾನ ಉಪನ್ಯಾಸ ನೀಡಿದರು. ಮುಖಂಡರಾದ ನಾಗರಾಜು ಅವರು ಮಾತನಾಡಿದರು.  
ಜಿಲ್ಲಾ ಪಂಚಾಯತ್ ಉಪ ಕಾರ್ಯದರ್ಶಿ ಪುಟ್ಟಸ್ವಾಮಿ, ಮುಖಂಡರಾದ ರಂಗಸ್ವಾಮಿ, ವೀರಭದ್ರಯ್ಯ, ನಾರಾಯಣಪ್ಪ, ರಂಗಪ್ಪ, ಶಿವಲಿಂಗಯ್ಯ, ಕೆ. ಲಿಂಗರಾಜು ಹಾಗೂ ಇತರೆ ಗಣ್ಯರು ವೇದಿಕೆಯಲ್ಲಿದ್ದರು.
ಕನ್ನಡ ಮತ್ತು ಸಂಸ್ಕøತಿ ಇಲಾಖೆಯ ಸಹಾಯ ನಿರ್ದೇಶಕರು ಸ್ವಾಗತಿಸಿದರು. 
ಸಮುದಾಯದ ಮುಖಂಡರು, ಸಂಘ ಸಂಸ್ಥೆಯ ಪದಾಧಿಕಾರಿಗಳು, ಮಡಿವಾಳ ಮಾಚೀದೇವರ ಭಕ್ತರು, ಅಭಿಮಾನಿಗಳು, ಸಾರ್ವಜನಿಕರು ಹಾಗೂ ಮತ್ತಿತರರು ಉಪಸ್ಥಿತರಿದ್ದರು. 
ಮೆರವಣಿಗೆ: ಇದ್ದಕ್ಕೂ ಮುನ್ನ ನಗರದ ಮಿನಿವಿಧಾನ ಸೌಧದಿಂದ ಗುರುಭವನದ ವರೆಗೆ ಮಡಿವಾಳ ಮಾಚಿದೇವರ ಮೆರವಣಿಗೆಯನ್ನು ಹಮ್ಮಿಕೊಳ್ಳಲಾಗಿತ್ತು. ಮಡಿವಾಳ ಮಾಚೀದೇವರ ಭಕ್ತರು, ಅಭಿಮಾನಿಗಳು, ಅನುಯಾಯಿಗಳು, ಮುಖಂಡರು, ಸಮುದಾಯದ ಮುಖಂಡರು ಮೆರವಣಿಗೆಗೆ ಚಾಲನೆ ನೀಡಿದರು.