ಶಾನುಬೋಗನಹಳ್ಳಿಯಲ್ಲಿ ನಡೆದ ತಾಲ್ಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಪಾಲ್ಗೊಂಡಿದ್ದ ಬೆಂಗಳೂರು ವಿಶ್ವವಿದ್ಯಾಲಯದ ಸಂಶೋಧನಾ ವಿದ್ಯಾರ್ಥಿಗಳು

ರಾಮನಗರ: ಶ್ರೀಮಂತಿಕೆ ಮತ್ತು ವಿಶಿಷ್ಟತೆಗಳನ್ನು ಸಾಧಿಸಿಕೊಂಡಿರುವ ಕನ್ನಡ ಭಾಷೆಯಾಗಲೀ, ಸಾಹಿತ್ಯವಾಗಲೀ ಅವನತಿಯಾಗಲು ಎಂದಿಗೂ ಸಾಧ್ಯವೇ ಇಲ್ಲ ಎಂದು ಸಮ್ಮೇಳನಾಧ್ಯಕ್ಷ ಡಾ.ಎಲ್.ಸಿ.ರಾಜು ಅಭಿಪ್ರಾಯಪಟ್ಟರು.
ತಾಲ್ಲೂಕಿನ ಶ್ಯಾನುಭೋಗನಹಳ್ಳಿ ಸರ್ಕಾರಿ ಪ್ರೌಢಶಾಲಾ ಆವರಣದಲ್ಲಿ ಬುಧವಾರ ನಡೆದ ತಾಲ್ಲೂಕು ಆರನೇ ಸಾಹಿತ್ಯ ಸಮ್ಮೇಳನದಲ್ಲಿ ಸರ್ವಾಧ್ಯಕ್ಷರಾಗಿ ಮಾತನಾಡಿದ ಅವರು ಕನ್ನಡ ಭಾಷೆ ಮತ್ತು ಸಾಹಿತ್ಯ ತಮ್ಮ ಹುಟ್ಟಿನ ಜೊತೆಯಲ್ಲೇ ಅಮೃತತ್ವವನ್ನೂ ಪಡೆದುಕೊಂಡೇ ಬಂದಿವೆ. ಸಾವಿರ ಭಾಷೆಗಳು ಸವಾರಿ ಮಾಡಿದರೂ ಕನ್ನಡ ಭಾಷೆ ಮತ್ತು ಸಾಹಿತ್ಯ ಯಾವತ್ತಿಗೂ ನಲುಗಿ ಹೋಗುವುದಿಲ್ಲ ಎಂದು ಕನ್ನಡ ಭಾಷೆಗೆ ಎದುರಾಗಿರುವ ಸವಾಲುಗಳ ಬಗ್ಗೆ ಪ್ರತಿಪಾದಿಸಿದರು.
ಭಯವಿಲ್ಲದ ಕನ್ನಡ ಭಾಷೆಗೆ ಬದುಕಿನುದ್ದಕ್ಕೂ ನೋವು ಬಾಧಿಸುತ್ತಲೇ ಇರುವ ಆತಂಕವಂತೂ ಇದ್ದೇ ಇದೆ. ಈ ನೋವು ನೀಡುವವರಲ್ಲಿ ಪರಭಾಷಿಕರಿಗಿಂತ ಹೆಚ್ಚಾಗಿ ಸ್ವಭಾಷಿಕರ ಪ್ರಮಾಣವೇ ಹೆಚ್ಚಾಗಿರುವುದು ನಿಜಕ್ಕೂ ನೋವಿನ ಸಂಗತಿ ಹಾಗೆ ನೋಡಿದರೆ, ಕಿಟೆಲ್, ರೈಸ್‍ರಂತಹ ಪಾಶ್ಚಾತ್ಯ ವಿದ್ವಾಂಸರೇ ಕನ್ನಡ ಭಾಷೆ ಮತ್ತು ಸಾಹಿತ್ಯದ ಬೆಳವಣಿಗೆಗಾಗಿ ಮಹತ್ವದ ಕೆಲಸಗಳನ್ನು ಮಾಡಿದ್ದಾರೆ ಎಂದರು. 
ಮಕ್ಕಳಿಗೆ ಆಂಗ್ಲ ಮಾಧ್ಯಮದಲ್ಲಿ ಶಿಕ್ಷಣ ಕೊಡಿಸಿದರೆ ಮಾತ್ರ ಪ್ರಗತಿ ಸಾಧ್ಯವೆಂಬ ಭ್ರಮೆ ಇದ್ದು, ಕನ್ನಡ ಮಾಧ್ಯಮವೆಂಬುದು ಬಡವರು ಮತ್ತು ದಡ್ಡರು ಶಿಕ್ಷಣ ಪಡೆಯಲು ಇರುವ ಏಕೈಕ ಮಾರ್ಗ ಎಂಬ ಭಾವನೆ ಬಲಿತಾಗಿದೆ. ಈ ಬಗೆಯ ಅನಿಸಿಕೆಯಿಂದಾಗಿ ಆಂಗ್ಲವು ಅನ್ನದ ಭಾಷೆಯೆಂಬ, ಕನ್ನಡವು ಬೇಡದ ಭಾಷೆಯೆಂಬ ಭ್ರಾಂತಿ ಬೇರೂರಿದೆ. ಹಾಗಾಗಿಯೇ, ಕನ್ನಡವು ಕೊರಳಿನ ಭಾಷೆಯೂ ಆಗದ, ಕರುಳಿನ ಭಾಷೆಯೂ ಆಗದ ಸ್ಥಿತಿಯೊಂದು ನಿರ್ಮಾಣವಾದಂತಾಗಿದೆ ಎಂದು ಆತಂಕ ವ್ಯಕ್ತಪಡಿಸಿದರು.
ಎಷ್ಟೇ ಭಾಷೆಗಳನ್ನು ಕಲಿತರೂ ಅದು ಲಾಭವೇ ಹೊರತು ನಷ್ಟವೇನಲ್ಲ. ಆದರೆ, ಕಲಿಕೆಯ ಆಸಕ್ತಿಯು ಪರಭಾಷಾ ವ್ಯಾಮೋಹವಾಗಿ ಮಾರ್ಪಟ್ಟು ಅದು ಕನ್ನಡವನ್ನು ಕಡೆಗಣಿಸುವಷ್ಟು ಪ್ರಬಲವಾಗಬಾರದು. ಪರಭಾಷಾ ಕಲಿಕೆಯು ಸ್ವಭಾಷೆಯ ಪೋಷಣೆಗೆ ಪೂರಕವಾಗಬೇಕು. ಶಿಕ್ಷಣ ನೀಡುವ ಸಾಂಪ್ರದಾಯಿಕ ಪದ್ಧತಿಯಲ್ಲೇ ಇಂದು ಆಮೂಲಾಗ್ರ ಬದಲಾವಣೆ ಆಗಬೇಕಾಗಿದ್ದು, ಕನ್ನಡ ಶಾಲೆಗಳ ದೇಹ ಮತ್ತು ಆತ್ಮಗಳೆರಡೂ ಹೊಸ ವಿನ್ಯಾಸವನ್ನು ಪಡೆದುಕೊಳ್ಳಬೇಕಾದ ಅಗತ್ಯತೆಯಿದೆ ಎಂದರು.
ವಿಧಾನ ಪರಿಷತ್ತು ಸದಸ್ಯ ಸಿ.ಎಂ.ಲಿಂಗಪ್ಪ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ ಎಷ್ಟು ಭಾಷೆಗಳನ್ನಾದರೂ ಕಲಿಯಿರಿ. ಆದರೆ, ಕನ್ನಡ ಭಾಷೆಯಲ್ಲೇ ವ್ಯವಹರಿಸಿ. ಮಮ್ಮಿ, ಡ್ಯಾಡಿ, ಆಂಟಿ, ಅಂಕಲ್ ಬೇಡ. ಅಪ್ಪ, ಅಮ್ಮ, ಚಿಕ್ಕಮ್ಮ, ಚಿಕ್ಕಪ್ಪ ಎಂದೇ ಕರೆಯಿರಿ. ಕನ್ನಡ ಕೇವಲ ಭಾಷೆಯಲ್ಲ ಅದೊಂದು ಸಂಸ್ಕøತಿ, ಶಕ್ತಿ ಎಂದರು. ಕುದೂರು ಜಿಲ್ಲಾ ಪಂಚಾಯತ್ ಸದಸ್ಯ ಎ.ಮಂಜು, ನಿಕಟಪೂರ್ವ ಸಮ್ಮೇಳಾನಾಧ್ಯಕ್ಷರಾದ ಎಂ.ಬೈರೇಗೌಡ, ಕಸಾಪ ಜಿಲ್ಲಾಧ್ಯಕ್ಷ ಸಿಂ.ಲಿಂ.ನಾಗರಾಜು ಅವರು ಮಾತನಾಡಿದರು.
ವಿಜೃಂಭಣೆಯ ಮೆರವಣಿಗೆ: ಅರುಣೋದಯ ಶಾಲೆಯಿಂದ ಆರಂಭವಾದ ಮೆರವಣಿಗೆಗೆ ತಾಲೂಕು ಪಂಚಾಯಿತಿ ಸದಸ್ಯ ಜಗದೀಶ್ ಚಾಲನೆ ನೀಡಿದರು. ಪೂರ್ಣ ಕುಂಭದೊಂದಿಗೆ ಸಮ್ಮೇಳನಾಧ್ಯಕ್ಷರಾದ ಡಾ.ಎಲ್.ಸಿ ರಾಜು ಅವರನ್ನು ವೇದಿಕೆಗೆ ಕರೆತರಲಾಯಿತು. ಡೊಳ್ಳು ಕುಣಿತ, ಪಟದ ಕುಣಿತ,  ಪೂಜಾ ಕುಣಿತ, ಗಾರುಡಿ ಬೊಂಬೆಗಳು ಮೆರವಣಿಗೆ ಮೆರಗನ್ನು ಹೆಚ್ಚಿಸಿದವು. ನೂರಾರು ಸಂಖ್ಯೆಯಲ್ಲಿ ಕನ್ನಡಾಸಕ್ತರು ಹಾಗೂ ಶಾಲಾ ಮಕ್ಕಳು ಭಾಗವಹಿಸಿದ್ದರು. ಮೆರವಣಿಗೆ ನಡುವೆ ವೀರಯೋದ ತಿರುಮಲೇಶ್ ಅವರ ಪ್ರತಿಮೆಗೆ ಬಿಡದಿ ಕೈಗಾರಿಕಾ ಪ್ರದೇಶ ಹಿತರಕ್ಷಣಾ ಸಮಿತಿ ಅಧ್ಯಕ್ಷ ಎಲ್. ಚಂದ್ರಶೇಖರ್ ಮಾಲಾರ್ಪಣೆ ಮಾಡಿ ಗೌರವ ಸಲ್ಲಿಸಿದರು.
ಕಾವ್ಯ ವಾಹಿನಿ ಅಧ್ಯಕ್ಷತೆಯನ್ನು ಸಾಹಿತಿ ವಿ.ಎಚ್. ರಾಜಶೇಖರ್ ವಹಿಸಿದ್ದರು. ಸಾಹಿತಿ ಎಂ. ಶಿವನಂಜಯ್ಯ ವಿಶೇಷ ಅತಿಥಿಯಾಗಿ ಭಾಗವಹಿಸಿದ್ದರು. ಸಂಗೀತ ವಿದ್ಯಾಂಸರಾದ ಶಿವಾಜಿರಾವ್ ಆಶಯ ನುಡಿಗಳನ್ನಾಡಿದರು. ಹೊಸದೊಡ್ಡಿ ರಮೇಶ್, ಅಂಕನಹಳ್ಳಿ ಪಾರ್ಥ, ಸುಮಂಗಲ ಸಿದ್ದರಾಜು, ಸಪಿಲೆ ಸತೀಶ್, ಚನ್ನಮಾನಹಳ್ಳಿ ಮಲ್ಲೇಶ್, ಸತ್ಯಭಾಮ ಗೋಪಾಲ್, ಶಿವಹೊಂಬಯ್ಯ, ವಿ. ಆನಂದ್, ಕೃಷ್ಣಾನಾಯಕ್, ಹೆಚ್.ವಿ ಮೂರ್ತಿ, ಅರುಣ್ ಕವಣಾಪುರ, ಆನಂದ್ ಕಾವ್ಯ ವಾಚಿಸಿದರು.
ಡಾ.ಎಲ್.ಸಿ ರಾಜು ಸಾಹಿತ್ಯಾವಲೋಕನ ಕುರಿತು ಉಪನ್ಯಾಸಕರಾದ ಜಿ.ಶಿವಣ್ಣ, ಭವಿಷ್ಯದ ರಾಮನಗರ ಕುರಿತು ಆರಂಭ ಪತ್ರಿಕೆ ಸಂಪಾದಕರಾದ ಅಬ್ಬೂರು ರಾಜಶೇಖರ ಅವರು ಪ್ರಬಂಧ ಮಂಡಿಸಿದರು. ರೈತ-ವಿಜ್ಞಾನಿ ಸಂವಾದದಲ್ಲಿ ಚಂದೂರಾಯನಹಳ್ಳಿ ಕೃಷಿ ವಿಜ್ಞಾನ ಕೇಂದ್ರದ ತೋಟಗಾರಿಕೆ ವಿಭಾಗದ ವಿಜ್ಞಾನಿ ಡಾ.ಬಿ.ಜಿ ಹನುಮಂತರಾಯ ಅವರೊಂದಿಗೆ ರೈತರಾದ ಬಿ.ಸಿ.ವಾಸು, ರವಿ, ಗೌತಮ್‍ಗೌಡ, ರಾಮು, ಚಿಕ್ಕಪುಟ್ಟಯ್ಯ, ಪ್ರಕಾಶ್, ಸುಶೀಲಮ್ಮ, ಸದಾನಂದ ಅವರು ಭಾಗವಹಿಸಿದ್ದರು.
ವೇದಿಕೆ ಕಾರ್ಯಕ್ರಮಕ್ಕೂ ಮುನ್ನಾ ತಾಲೂಕು ದಂಡಾಧಿಕಾರಿಗಳಾದ ಮಾರುತಿ ಪ್ರಸನ್ನ ಅವರು ರಾಷ್ಟ್ರಧ್ವಜ ಆರೋಹಣ ಮಾಡಿದರು. ಸಿ.ಲಿಂ.ನಾಗರಾಜು ಅವರು ಕನ್ನಡ ಧ್ವಜಾರೋಹಣ ನೆರವೇರಿಸಿದರು. ತಾಲ್ಲೂಕು ಪಂಚಾಯಿತಿ ಮಾಜಿ ಅಧ್ಯಕ್ಷ ಎಸ್.ಟಿ.ಕಾಂತರಾಜ್ ಪಟೇಲ್, ಸÀರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಆರ್.ಕೆ. ಬೈರಲಿಂಗಯ್ಯ ಕಸಾಪ ನಿಕಟಪೂರ್ವ ಅಧ್ಯಕ್ಷಕರಾದ ಬಿ.ಟಿ. ನಾಗೇಶ್, ಕಸಾಪ ತಾಲೂಕು ಅಧ್ಯಕ್ಷ ಬಿ.ಟಿ.ದಿನೇಶ್, ಗೌರವಾಧ್ಯಕ್ಷ ಶಿವಸ್ವಾಮಿ, ಪಧಾದಿಕಾರಿಗಳಾದ ಶೈಲಜಾ ಶ್ರೀನಿವಾಸ್, ಮಹದೇವಯ್ಯ ಪದಾಧಿಕಾರಿಗಳಾದ ಚಿನ್ನಗಿರಿಗೌಡ, ಡೈರಿ ವೆಂಕಟೇಶ್ ಮತ್ತಿತರರು ಉಪಸ್ಥಿತರಿದ್ದರು.