ಚನ್ನಪಟ್ಟಣ: ನಗರದ ವೆಬ್‌ ಸ್ಟರ್ ಶಾಲೆಯಲ್ಲಿ ಮಂಗಳವಾರ ಸಂಜೆ ನಡೆದ ಹನ್ನೊಂದನೇ ಶಾಲಾ ವಾರ್ಷಿಕೋತ್ಸವದಲ್ಲಿ ದೀಪ ಬೆಳಗಿಸಿದ ಆದಿಚುಂಚನಗಿರಿ ಮಹಾಸಂಸ್ಥಾನದ ರಾಮನಗರ ಶಾಖಾಮಠದ ಶ್ರೀ ಶ್ರೀ ಅನ್ನದಾನೇಶ್ವರನಾಥ ಸ್ವಾಮೀಜಿಗಳು ಆಶೀರ್ವಚನ ನೀಡಿದರು.

ಮನೆಯೇ ಮೊದಲ ಪಾಠಶಾಲೆ, ಜನನಿ ತಾನೇ ಮೊದಲ ಗುರುವು,ಜನನಿಯಿಂದ ಪಾಠಕಲಿತ ಜನರು ಧನ್ಯರು.

ಇಂದಿನ ಮಕ್ಕಳನ್ನು ಕೇವಲ ಶಾಲೆಗೆ ಕಳುಹಿಸಿ ಅಲ್ಲಿ ಓದಿಬಂದರೆ ಅಷ್ಟಕ್ಕೆ ಮುಗಿಯುವುದಿಲ್ಲ, ಮನೆಯಲ್ಲಿ ಹೆತ್ತವರು ಅದರಲ್ಲೂ ತಾಯಿಯಾದವರು ಮಕ್ಕಳಿಗೆ ಕಲಿಸಿದರೆ ಆ ಮಕ್ಕಳು ಸಮಾಜದಲ್ಲಿ ಉನ್ನತ ಸ್ಥಾನವನ್ನು ಅಲಂಕರಿಸುತ್ತಾರೆ, ನಿಮ್ಮ ಮಕ್ಕಳನ್ನು ಕೇವಲ ಪದವಿಗಾಗಿ ಓದಿಸದೆ ಸಮಾಜದ ಅಂಕುಡೊಂಕುಗಳನ್ನು ತಿದ್ದುವ ಒಳ್ಳೆಯ ವ್ಯಕ್ತಿತ್ವ ಉಳ್ಳವ ಅಬ್ದುಲ್ ಕಲಾಮ್, ವಿಶ್ವೇಶ್ವರಯ್ಯ ನವರಂತೆ ಬೆಳೆಸಲು ಪ್ರೇರೆಪಿಸಬೇಕು.

ವಿದ್ಯೆ ಕಲಿಸದ ತಂದೆಯು, ಬುದ್ದಿ ಹೇಳದ ಗುರುವು, ಬಿದ್ದಿರಲು ಬಂದು ನೋಡದ ತಾಯಿಯು ಶುದ್ಧ ವೈರಿಗಳು ಸರ್ವಜ್ಞ, ಎಂಬ ಸರ್ವಜ್ಞ ಮೂರ್ತಿಯ ನುಡಿಗಳಂತೆ ಹೆತ್ತ ಮಕ್ಕಳನ್ನು ಮೊದಲು ಪಾಠಶಾಲೆಯಲ್ಲಿ ಓದಿಸಿ ವಿದ್ಯಾವಂತನ್ನಾಗಿ ಮಾಡುವುದು ತಂದೆಯ ಕರ್ತವ್ಯ, ಶಾಲೆಗೆ ಬಂದ ಮಕ್ಕಳನ್ನು ತನ್ನ ಮಕ್ಕಳಂತೆಯೇ ಸಲುಹಿ ವಿದ್ಯೆಯ ಜೊತೆಗೆ ಬುದ್ದಿ ಕಲಿಸುವ ಹೊಣೆ ಗುರುವಿನದ್ದು ಹಾಗೆಯೇ ದಾರಿ ತಪ್ಪಿದ ಮಗನನ್ನು ಸರಿದಾರಿಗೆ ತರಲು ಪ್ರಯತ್ನ ಹೆತ್ತ ತಾಯಿಯದು, ಈ ಮೂವರು ತಮ್ಮ ಕೆಲಸವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದರೆ ಪ್ರತಿ ಮಗುವು ದೇಶೋದ್ದಾರಕನಾಗುವುದರಲ್ಲಿ ಸಂಸಯವೇ ಇಲ್ಲ ಎಂದರು.

ತಾಲ್ಲೂಕು ಪಂಚಾಯತ್ ಅಧ್ಯಕ್ಷ ಹರೂರು ರಾಜಣ್ಣ ಮಾತನಾಡಿ ತಮ್ಮ ಮಕ್ಕಳನ್ನು ಸರ್ಕಾರಿ ಕೆಲಸಕ್ಕೆಂದು ಒತ್ತಡ ಹಾಕಿ ಓದಿಸುವ ಬದಲು ಸಮಾಜಾಮುಖಿಯಾಗಿ ಚಿಂತಿಸುವ ಸತ್ಪ್ರಜೆಯಾಗಿ ರೂಪಿಸುವತ್ತ ಗಮನ ನೀಡಬೇಕೆಂದು ಪೋಷಕರಿಗೆ ಕರೆ ನೀಡಿದರು.

ಸಿ ಎಸ್ ಕೃಷ್ಣ ಮತ್ತು ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಮತ್ತಿಕೆರೆ ಚಲುವರಾಜು ಮಾತನಾಡಿದರು.

ಶಾಲೆಯ ಸಂಸ್ಥಾಪಕರಾದ ಪಟೇಲ್ ಸಿ ರಾಜು ರವರು ಅಧ್ಯಕ್ಷತೆ ವಹಿಸಿದ್ದರು.

ಇದೆ ವೇಳೆ ಹರೂರು ರಾಜಣ್ಣ ಮತ್ತು ಮತ್ತಿಕೆರೆ ಚಲುವರಾಜು ರವರನ್ನು ಶಾಲೆಯ ವತಿಯಿಂದ ಸನ್ಮಾನಿಸಲಾಯಿತು.

 

ಶಾಲೆಯ ಮಕ್ಕಳು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟು ನೆರೆದಿದ್ದವರ ಮನರಂಜಿಸಿದರು.

 

ವೇದಿಕೆಯ ಮೇಲೆ ನೃತ್ಯ ಪಟು ಸುಚೇಂದ್ರಬಾಬು, ಮೇಕೆದಾಟು ಹೋರಾಟ ಸಮಿತಿಯ ಜಿಲ್ಲಾ ಸಂಚಾಲಕ ಗೋ ರಾ ಶ್ರೀನಿವಾಸ, ಗೋಪಾಲಕೃಷ್ಣ, ಎಂ ಡಿ ಶಿವಕುಮಾರ್, ಬಿಜಿಎಸ್ ವಲ್ಡ್೯ ಸ್ಕೂಲ್‌ ಪ್ರಾಂಶುಪಾಲ ಬಿಜೋಶ್ ಇನ್ನು ಮುಂತಾದವರು ಉಪಸ್ಥಿತರಿದ್ದರು.