ನಗರದಲ್ಲಿ ಹೋಳಿ ಆಚರಣೆ
ಚನ್ನಪಟ್ಟಣ: ನಗರದಲ್ಲಿ ಇಂದು ಅನೇಕ ಯುವಕ ಯುವತಿಯರು ಬಹುತೇಕ ಭಾಗಗಳಲ್ಲಿ ತಮಟೆ ವಾದ್ಯ ಮೇಳದೊಂದಿಗೆ ಪರಸ್ಪರ ಬಣ್ಣ ಎರಚಿ ನೀರು ಹುಯ್ದುಕೊಂಡು, ನೃತ್ಯ ಮಾಡುವ ಮೂಲಕ ಬೀದಿಬೀದಿಗಳಲ್ಲಿ ಕುಣಿದು ಕುಪ್ಪಳಿಸಿ ಸಂಭ್ರಮಗೊಂಡರು.
ಕಳೆದ ಹದಿನೈದು ದಿನಗಳಿಂದ ನಗರದ ಮಂಡಿಪೇಟೆಯ ಗರುಡಗಂಭದ ರಸ್ತೆಯಲ್ಲಿ ಅತಿ ವಿಜೃಂಭಣೆಯಿಂದ ಜರುಗಿದ ಕಾಮನ ಹಬ್ಬ ದ ಕೊನೆಯ ದಿನವಾದ ಇಂದು ಸುತ್ತಮುತ್ತಲಿನ ಜನರೆಲ್ಲರೂ ಸೇರಿ ಬಣ್ಣದೋಕುಳಿ ಆಟವನ್ನು ಆಡಿದರು.
ನಿನ್ನೆ ದಿನ ರತಿ ಮನ್ಮಥರ ಪ್ರತಿಕೃತಿಗಳ ಜೊತೆಗೆ ವಿವಿಧ ಪುರಾಣ ಪ್ರಸಿದ್ಧ ಮೂರ್ತಿಗಳನ್ನು ಅಲಂಕೃತ ವಾಹನಗಳಲ್ಲಿ ಶೃಂಗರಿಸಿ ನಗರದ ಡೂಂಲೈಟ್ ಸರ್ಕಲ್, ಜೆಸಿ ರಸ್ತೆ, ಎಂಜಿ ರಸ್ತೆ ಸೇರಿದಂತೆ ಅನೇಕ ಬೀದಿಗಳಲ್ಲಿ ಮೆರವಣಿಗೆ ನಡೆಸಿ ನಂತರ ಕಾಮ ನ ಪ್ರತಿಕೃತಿಯನ್ನು ದಹನ ಮಾಡಲಾಯಿತು.
ಇಂದು ತಂಪು ಆಚರಿಸಿದ ನಂತರ ಸಮಿತಿಯ ಪದಾಧಿಕಾರಿಗಳು, ಸುತ್ತಲಿನ ಬೀದಿಯ ಯುವಕ ಯುವತಿಯರು ಲಕ್ಷ್ಮಿ ನಾರಾಯಣ ಸ್ವಾಮಿ ದೇವಾಲಯದ ಮುಂಭಾಗದಲ್ಲಿ ಹೋಳಿ ಆಚರಿಸುವ ಮೂಲಕ ಕಾಮನ ಹಬ್ಬಕ್ಕೆ ತೆರೆಯೆಳೆದರು.
ಸಿರವಿ ಸಮಾಜದ (ಮಾರ್ವಾಡಿಗಳು) ರಾಜಸ್ಥಾನ ಮೂಲದ ಅನೇಕರು ಇಂದು ಭಾಗವಾಧ್ವಜ ಹಿಡಿದು, ತಮಟೆ ಭಜನೆಗಳೊಂದಿಗೆ ಎಂಜಿ ರಸ್ತೆ ಮತ್ತು ಇನ್ನಿತರ ಬೀದಿಗಳಲ್ಲಿ ಮೆರವಣಿಗೆ ನಡೆಸುವ ಮೂಲಕ ಹೋಳಿ ಆಚರಿಸಿದರು.
ನಗರದ ನಿಂಬೆಹಣ್ಣು ಸರ್ಕಲ್ ನಲ್ಲಿ ವರ್ತಕರ ಸಂಘದಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳ ಜೊತೆಗೆ ಬಣ್ಣದೋಕುಳಿಯನ್ನು ವಿಶೇಷವಾಗಿ ಆಚರಿಸಿದರು. ಹಲವಾರು ಕಾಲೇಜು ಕನ್ಯೆಯರು, ಗೃಹಿಣಿಯರು, ಸಂಬಂಧಿಕರು ತಮ್ಮ ತಮ್ಮ ಮನೆಯಲ್ಲಿ ಹೋಳಿ ಆಚರಿಸುತ್ತಿದ್ದದ್ದು ಕಂಡು ಬಂತು.
ಮೇದರ ಬೀದಿ, ಆನಂದಪುರ, ಅಂಬೇಡ್ಕರ್ ನಗರ, ಚರ್ಚ್ ರಸ್ತೆ ಹಾಗೂ ನಗರದ ಇತರೆಡೆ ಬೆಳಿಗ್ಗೆಯಿಂದಲೇ ಯುವಕರು ಉತ್ಸಾಹದಿಂದ ಬಣ್ಣದೋಕುಳಿಯಾಟದಲ್ಲಿ ತೊಡಗಿಸಿಕೊಂಡಿದ್ದು ವಿಶೇಷವೆನಿಸಿತ್ತು.
ಗೋ ರಾ ಶ್ರೀನಿವಾಸ...
ಮೊ:9845856139.
ಪ್ರತಿಕ್ರಿಯೆಗಳು