ಚನ್ನಪಟ್ಟಣ: ಅ/11/21. ಗರಕಹಳ್ಳಿ ಹಾಲು ಉತ್ಪಾದಕರ ಸಹಕಾರ ಸಂಘದ 2020/21 ನೇ ಸಾಲಿನ ಸರ್ವಸದಸ್ಯರ ವಾರ್ಷಿಕ ಮಹಾಸಭೆಯು ಸಂಘದ ಅಧ್ಯಕ್ಷ ಶಿವಲಿಂಗಯ್ಯ ನವರ ನೇತೃತ್ವದಲ್ಲಿ ಆರಂಭಗೊಂಡಿತ್ತಾದರೂ ತದ ನಂತರ ಎರಡು ಗುಂಪುಗಳ ನಡುವೆ ಮಾರಾಮಾರಿ ಆಗಿ ಮೂರು ಮಂದಿಗೆ ತಲೆ ಮತ್ತು ಹಣೆಯ ಮೇಲೆ ರಕ್ತಗಾಯಗಳಾಗಿ ಆಸ್ಪತ್ರೆ ಮತ್ತು ಪೋಲಿಸ್ ಠಾಣೆಯ ಮೆಟ್ಟಿಲೇರಿದ್ದಾರೆ.

ಹಾಲಿನ ಡೈರಿಯಲ್ಲಿ ಅಕ್ರಮಗಳು ನಡೆದಿವೆ. ನಿವೇಶನ ಖರೀದಿ ಮಾಡಿರುವುದು, ಹೆಚ್ಚಿನ ಬಾಡಿಗೆ ನೀಡುತ್ತಿರುವುದು, ಷೇರುದಾರರಿಗೆ ಮಾಹಿತಿ ನೀಡದಿರುವುದು, ಮುಂಜಾನೆ 08:30 ಕ್ಕೆ ಸಭೆ ನಡೆಸುತ್ತಿರುವುದು, ಷೇರು ಬದಲಾವಣೆಗೆ ಅರ್ಜಿ ಸಲ್ಲಿಸಿದರೂ ಬದಲಾಯಿಸಿ ಕೊಡದೆ ಇರುವುದು. ಸಂಘದ ಸಭೆ ಕರೆಯದೇ, ಸಂಘದ ಲೆಕ್ಕಪರಿಶೋಧನೆ ಮಾಡದಿರುವುದು. ಅವರಿಗಿಷ್ಟ ಬಂದಂತಹ ಅಧ್ಯಕ್ಷ, ಸದಸ್ಯರು ಮತ್ತು ಸಹಾಯಕರನ್ನು ನೇಮಿಸಿಕೊಂಡಿರುವುದು ಸೇರಿದಂತೆ ಅನೇಕ ಅಕ್ರಮಗಳ ಬಗ್ಗೆ ಕೆಲ ಸದಸ್ಯರು ಪಟ್ಟು ಹಿಡಿದು ಕೇಳಿದರು. ಡೈರಿ ಸೆಕ್ರೆಟರಿ ಶಿವಕುಮಾರ್ ಇದ್ಯಾವುದಕ್ಕೂ ಸರಿಯಾದ ಮಾಹಿತಿ ನೀಡದೆ, ದರ್ಪದ ಉತ್ತರ ನೀಡುವುದರ ಜೊತೆಗೆ ಪ್ರತಿಯೊಂದು ಮಾಹಿತಿಗೂ ಅರ್ಜಿ ಹಾಕಿಕೊಳ್ಳುವಂತೆ ತಾಕೀತು ಮಾಡುತ್ತಿದ್ದರಿಂದ ಸದಸ್ಯರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದರು.

ಆಹ್ವಾನ ಪತ್ರಿಕೆಯಲ್ಲೂ ಅವರಿಗಷ್ಟ ಬಂದವರ ಹೆಸರು ಹಾಕಿಕೊಂಡಿದ್ದಾರೆ. ಸದಸ್ಯರುಗಳಿಗೆ 08:30 ಕ್ಕೆ ಸಭೆ ಇದೆ ಎಂದು ನೋಟೀಸ್ ನೀಡಿದ್ದು, ಅಧಿಕಾರಿಗಳಿಗೆ 09:30 ಕ್ಕೆ ಬರಲು ಹೇಳಿ ದಿಕ್ಕುತಪ್ಪಿಸಿದ್ದಾರೆ. ಎಲ್ಲಾ ಷೇರುದಾರರಿಗೂ ಸಭೆಗೆ ಬರಲು ನೋಟೀಸ್ ನೀಡದೆ, ಅವರಿಗಿಷ್ಟ ಬಂದ ಷೇರುದಾರರಿಗೆ ಮಾತ್ರ ನೋಟೀಸ್ ನೀಡಿದ್ದಾರೆ. ಬಮೂಲ್ ಅಧಿಕಾರಿಗಳು ಹತ್ತು ಗಂಟೆಯ ನಂತರ ಬಂದರಾದರೂ ಸೆಕ್ರೆಟರಿ ಶಿವಕುಮಾರ್ ಸಭೆ ಮುಗಿಯಿತು ಎಂದು ಹೇಳಿ ಡೈರಿಯ ಒಳಗೆ ಹೋಗಿ ಕುಳಿತುಕೊಂಡರು. ಅಧಿಕಾರಿ ಬಮೂಲ್ ಕೃಷಿ ಅಧಿಕಾರಿ ಜಿತೇಂದ್ರಕುಮಾರ್ ರವರು ಸಭೆ ಮುಂದುವರೆಸಲೂ ಹೇಳಿದರೂ ಸಹ ಬಾರದೆ ಇದ್ದಾಗ ಅವರು ಸದಸ್ಯರನ್ನು ಕುರಿತು ಕೆಲ ಮಾಹಿತಿ ನೀಡಿ ಪಲಾಯನಗೈದರು.

ಗ್ರಾಮಸ್ಥರ ಮನವಿಯ ಮೇರೆಗೆ ಖಾಸಗಿಯವರ ಬಾಡಿಗೆ ಕಟ್ಟಡದಲ್ಲಿ ನಡೆಯುತ್ತಿರುವ ಹಾಲಿನ ಡೈರಿಯನ್ನು ಸಮುದಾಯ ಭವನಕ್ಕೆ ವರ್ಗಾಯಿಸಿಕೊಂಡು ಅಲ್ಲಿಯೇ ನಿರ್ವಹಿಸುವಂತೆ ಗ್ರಾಮ ಪಂಚಾಯತಿ ಸದಸ್ಯರು ಸಭೆ ನಡೆಸಿ ಒಮ್ಮತದ ತೀರ್ಮಾನ ತೆಗೆದುಕೊಂಡು ಸೆಕ್ರೆಟರಿಗೆ ತಿಳಿಸಿದ್ದರೂ ಸಹ ಅವರು ದುಬಾರಿ ಬಾಡಿಗೆ ಕಟ್ಟಡದಲ್ಲೇ ಮುಂದುವರಸಿದ್ದು, ಗ್ರಾಮಸ್ಥರು ಹೊಡೆದಾಡಲು ಕಾರಣವಾಗಿದೆ.

ಗ್ರಾಮದಲ್ಲಿನ ಡೈರಿ ವಿಷಯವಾಗಿ ಪರವಿರೋಧ ಬಣಗಳ ನಡುವೆ ಮಾತಿನ ಚಕಮಕಿ ನಡೆದು ಜಗಳಕ್ಕೆ ತಿರುಗಿತು. ತದನಂತರ ಒಬ್ಬರಿಗೊಬ್ಬರು ಹೊಡೆದಾಡಿಕೊಂಡು ಬಟ್ಟೆಗಳನ್ನು ಹರಿದು, ಕಲ್ಲಿನ ಮೂಲಕ ಹಣೆಯಭಾಗ ಮತ್ತು ತಲೆಗೆ ಮೂರು ಮಂದಿಗಳಾದ ಶಿವಲಿಂಗಯ್ಯ, ಚಂದ್ರು ಮತ್ತು ಕುಮಾರ್ ಎಂಬುವರು ರಕ್ತಗಾಯಗಳನ್ನು ಮಾಡಿಕೊಳ್ಳುವ ಮೂಲಕ ಗ್ರಾಮದಲ್ಲಿ ಪ್ರಕ್ಷುಬ್ದ ವಾತಾವರಣ ನಿರ್ಮಾಣಕ್ಕೆ ಕಾರಣರಾದರು. ಶಿವಕುಮಾರ್ ಕಡೆಯವರನ್ನು ಅವರ ಕಾರಿನಲ್ಲಿ ಹಾಗೂ ವಿರೋಧ ಬಣಗಳು ಬೈಕ್ ನಲ್ಲಿ ಆಸ್ಪತ್ರೆಗೆ ತೆರಳಿ ಚಿಕಿತ್ಸೆ ಪಡೆದು, ಅಕ್ಕೂರು ಪೋಲಿಸ್ ಠಾಣೆಯಲ್ಲಿ ಎರಡೂ ಕಡೆಯವರು ದೂರು ನೀಡಿರುವುದಾಗಿ ತಿಳಿದುಬಂದಿದೆ.

ಕಳೆದ ವರ್ಷದ ವಾರ್ಷಿಕ ಮಹಾ ಸಭೆಯಲ್ಲೂ ಸಹ ಜಗಳವಾಗಿದ್ದರೂ ಸಹ ಅದು ಪೋಲಿಸ್ ಮೆಟ್ಟಿಲೇರಿರಲಿಲ್ಲ. ಇಂದು ನಡೆಯುವ ಸಭೆಯಲ್ಲಿ ಗಲಾಟೆ ಆಗುವುದು ಎಂಬ ಸುಳಿವಿದ್ದರೂ ಸಹ ಶಿವಕುಮಾರ್ ಪೋಲಿಸ್ ಠಾಣೆಗೆ ಮಾಹಿತಿ ನೀಡಿರಲಿಲ್ಲ. ಮಾಹಿತಿ ನೀಡಿದರೆ ಪೋಲಿಸರು ಬಂದೋಬಸ್ತ್ ಮಾಡುತ್ತಿದ್ದರು. ಆಗ ಯಾವುದೇ ವ್ಯಕ್ತಿಗಳು ಹೊಡೆದಾಡಿಕೊಳ್ಳುವ ಪ್ರಮೇಯ ಸೃಷ್ಟಿ ಆಗುತ್ತಿರಲಿಲ್ಲ ಎಂದು ಗ್ರಾಮಸ್ಥರು ವಿಷಯ ತಿಳಿದ ನಂತರ ಬಂದ ಅಕ್ಕೂರು ಪೋಲಿಸ್ ಠಾಣೆಯ ಉಪನಿರೀಕ್ಷಕಿ ಸರಸ್ವತಿ ಯವರಿಗೆ ಮಾಹಿತಿ ನೀಡಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.