ಚನ್ನಪಟ್ಟಣ: ವಿಧಾನಸಭಾ ಚುನಾವಣೆಗೆ ಚುನಾವಣಾ ಆಯೋಗ ಸಕಲ ಸಿದ್ಧತೆ ಮಾಡಿಕೊಂಡಿದ್ದು, ಮತದಾರರು ಯಾವುದೇ ಆತಂಕ, ಆಮಿಷಕ್ಕೆ ಒಳಗಾಗದೆ ಸಕಾಲದಲ್ಲಿ ಮತದಾನ ಮಾಡುವಂತೆ ಚನ್ನಪಟ್ಟಣ 185 ವಿಧಾನಸಭಾ ಚುನಾವಣಾಧಿಕಾರಿ ಮುನೇಗೌಡ ಕರೆ ನೀಡಿದರು. ಅವರು ಮಂಗಳವಾರ ತಾಲೂಕಿನ ಸರ್ಕಾರಿ ಬಾಲಕರ  ಹಾಗೂ ಬಾಲಕಿಯರ ಪದವಿ ಪೂರ್ವ ಕಾಲೇಜಿನಲ್ಲಿ ಮಸ್ಟರಿಂಗ್ ಕಾರ್ಯವನ್ನು ಸುಗಮವಾಗಿ ನಡೆಸಿದ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದರು.

ಮಂಗಳವಾರ ಬೆಳಿಗ್ಗೆ ಆರಂಭಗೊಂಡ ಮಸ್ಟರಿಂಗ್ ಕಾರ್ಯ ಸಂಜೆಯವರೆಗೂ ನಡೆಯಿತು. ಈ ವೇಳೆ ಚುನಾವಣೆಗೆ ನೇಮಕಗೊಂಡಿರುವ ಸಿಬ್ಬಂದಿಗೆ ಮಸ್ಟರಿಂಗ್ ಸ್ಥಳದಲ್ಲಿ ತರಬೇತಿ ನೀಡಲಾಯಿತು. ಕೆಲ ಮತಗಟ್ಟೆ ಅಧಿಕಾರಿಗಳು ಹಲವಾರು ಕಾರಣ ನೀಡಿ ಗೈರು ಹಾಜರಾಗಿದ್ದು, ಕಾಯ್ದಿರಿಸಿದ ಅಧಿಕಾರಿಗಳನ್ನು ನಿಯೋಜನೆ ಮಾಡಲು ಸ್ವಲ್ಪ ಕಾಲವಕಾಶ ಹಿಡಿದಿದ್ದರಿಂದ ಮಧ್ಯಾಹ್ನ ಕ್ಕೆ ಮುಗಿಯಬೇಕಾದ ಮಸ್ಟರಿಂಗ್ ಕಾರ್ಯ ಸಂಜೆಯವರೆಗೂ ಜರುಗಿತು.

*ಕ್ಷೇತ್ರದಲ್ಲಿ ೨೬೬ಮತಗಟ್ಟೆ ಸ್ಥಾಪನೆ:*

ವಿಧಾನಸಭೆ ಚುನಾವಣೆಗೆ ೪೧ ಸಾರಿಗೆ ಬಸ್ಸುಗಳು, ೧೬ ಟೆಂಪೋ ಟ್ರಾವೆಲರ್ಸ್‌‌ ಹಾಗೂ ೧೩ ಕಾರುಗಳಲ್ಲಿ ಮತದಾರರನ್ನು ಕಳುಹಿಸಲಾಗಿದೆ. ತಾಲೂಕಿನಲ್ಲಿ ೨೬೬ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ಇದರಲ್ಲಿ ೫೬ ಮತಗಟ್ಟೆಗಳನ್ನು ಸೂಕ್ಷ್ಮ ಮತಗಟ್ಟೆಗಳೆಂತಲೂ, ೨ಮತಗಟ್ಟೆಗಳನ್ನು ದುರ್ಬಲ ಮತಗಟ್ಟೆಗಳು ಎಂದು ಗುರುತಿಸಲಾಗಿದೆ. ಪ್ರತಿಮತಟ್ಟೆಗೆ ೪ ಚುನಾವಣಾ ಸಿಬ್ಬಂದಿಯಂತೆ ಒಟ್ಟು೧೦೪೯ ಚುನಾವಣಾ ಸಿಬ್ಬಂದಿಯನ್ನು ಚುನಾವಣಾ ಕರ್ತವ್ಯಕ್ಕೆ ನಿಯೋಜನೆಗೊಳಿಸಲಾಗಿದೆ.

೫೬ ಸೂಕ್ಷ್ಮ ಮತಗಟ್ಟೆಗಳು ಸೇರಿದಂತೆ ಸುಮಾರು ೭೫ ಮತಗಟ್ಟೆಗಳಲ್ಲಿ ಲೈವ್ ವೆಬ್ ಕಾಸ್ಟಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದ್ದು, ಇದರೊಂದಿಗೆ ೫೩ ಸೂಕ್ಷ್ಮ ವೀಕ್ಷಕರನ್ನು ನೇಮಿಸಲಾಗಿದೆ. ಲೈವ್ ವೆಬ್ ಕಾಸ್ಟಿಂಗ್‌ನಲ್ಲಿ ಜಿಲ್ಲಾ ಹಾಗೂ ತಾಲೂಕು ಚುನಾವಣಾ ಅಧಿಕಾರಿಗಳು ಚುನಾವಣಾ ಪ್ರಕ್ರಿಯೆಯನ್ನು ವೀಕ್ಷಿಸಬಹುದಾಗಿದೆ. ಇವರೊಂದಿಗೆ ಸುಮಾರು ೬೭ಮತಟ್ಟೆಗಳಲ್ಲಿ ಅರೆಸೇನಾ ಪಡೆ ಸಿಬ್ಬಂದಿ ಕೂಡ ಕಾರ್ಯ ನಿರ್ವಹಿಸಲಿದ್ದಾರೆ. ಇದಲ್ಲದೇ ಒಟ್ಟಾರೆಯಾಗಿ ೨೧೩ಮತಗಟ್ಟೆಗಳಲ್ಲಿ ವೆಬ್ ಕಾಸ್ಟಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ.

ನಗರ ಪ್ರದೇಶದಲ್ಲಿ ೫ಸಖಿ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ಈ ಮತಗಟ್ಟೆಗಳಲ್ಲಿ ಎಲ್ಲ ಮಹಿಳಾ ಸಿಬ್ಬಂದಿಯೇ ಇರಲಿದ್ದು, ಎಲ್ಲರೂ ಪಿಂಕ್ ವಸ್ತ್ರಗಳನ್ನು ಧರಿಸಿ ಕಾರ್ಯನಿರ್ವಹಿಸಲಿದ್ದಾರೆ. ಇದಲ್ಲದೇ ಒಂದು ನೈತಿಕಮತಗಟ್ಟೆ, ಯುವ ಮತಗಟ್ಟೆ, ತಾಲೂಕಿನ ಪ್ರಸಿದ್ಧ ಬೊಂಬೆ ಉದ್ಯಮವನ್ನು ಬಿಂಬಿಸುವ ಒಂದು ಆಟಿಕೆ ಮತಗಟ್ಟೆ, ಒಂದು ವಿಶೇಷ ಚೇತನ ಮತಗಟ್ಟೆಯನ್ನು ಸ್ಥಾಪಿಸಲಾಗಿದೆ. ಇದರಲ್ಲಿ ವಿಶೇಷ ಚೇತನ ಮತಗಟ್ಟೆ ಸಿಬ್ಬಂದಿ ಕಾರ್ಯನಿರ್ವಹಿಸಲಿದ್ದಾರೆ. ಈ ಎಲ್ಲಾ ಐದು ಮತಗಟ್ಟೆಗಳನ್ನು ನಗರದಲ್ಲಿ ಸ್ಥಾಪಿಸಲಾಗಿದೆ.

*ಬಿಗಿಪೊಲೀಸ್ ಭದ್ರತೆ:*

ಚುನಾವಣೆ ಹಿನ್ನೆಲೆಯಲ್ಲಿ ಯಾವುದೇ ಅಹಿತರ ಘಟನೆ ಜರುಗದಂತೆ ಪೊಲೀಸ್ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ. ಪ್ರತಿ ಮತಗಟ್ಟೆ ಒಬ್ಬರಂತೆ ಪೊಲೀಸ್ ಸಿಬ್ಬಂದಿ, ೬ ಸಂಚಾರಿ ಪೊಲೀಸ್ ತಂಡ, ೧೩ ಸೆಕ್ಟರ್ ಮೊಬೈಲ್ ತಂಡ, ೨೨ ರೆವಿನ್ಯು ಸೆಕ್ಟರ್ ತಂಡ, ಒಂದು ಡಿವೈಎಸ್‌ಪಿ ನೇತೃತ್ವದ ಮೇಲ್ವಿಚಾರಣಾ ಮೊಬೈಲ್ ತಂಡ ಸೇರಿ ಸುಮಾರು ೩೫೦ ಪೊಲೀಸರು ಕಾರ್ಯನಿರ್ವಹಿಸಲಿದ್ದಾರೆ. ಇದರೊಂದಿಗೆ ೪ ಅರೆಸೇನಾ ಪಡೆ ತುಕುಡಿ ಹಾಗೂ ಒಂದು ಬಿಎಸ್‌ಎಫ್ ತುಕುಡಿಯನ್ನು ಚುನಾವಣಾ ಕಾರ್ಯಕ್ಕೆ ನಿಯೋಜಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

*ವಿಶೇಷ ಮಾಹಿತಿ:*

*ಮತದಾರರು ಹೆಚ್ಚಿದ್ದು ಅವರು ಸಂಜೆ ಆರು ಗಂಟೆಯೊಳಗೆ ಮತದಾನ ಕೇಂದ್ರದೊಳಗೆ ಬಂದರೆ ಮತದಾರರ ಸಂಖ್ಯೆಗನುಗುಣವಾಗಿ ರಾತ್ರಿ ಏಳು ಗಂಟೆಯವರೆಗೂ ಅವಕಾಶ ಕಲ್ಪಿಸಲಾಗುತ್ತದೆ ಎಂದು ತಿಳಿಸಿದ್ದಾರೆ.*

*ವಿಧಾನಸಭಾ ಚುನಾವಣೆಗೆ ಸಕಲ ಸಿದ್ಧತೆಯನ್ನು ಮಾಡಿಕೊಳ್ಳಲಾಗಿದೆ.* *ಈಗಾಗಲೇ ಚುನಾವಣೆಯಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿಗೆ ಎರಡು ಹಂತದ ತರಬೇತಿಯನ್ನು ನೀಡಲಾಗಿದೆ.* *ಮುಕ್ತ ಹಾಗೂ ನ್ಯಾಯಸಮ್ಮತ ಚುನಾವಣೆ ನಡೆಸಲು ಎಲ್ಲ ಕ್ರಮಗಳನ್ನು ಕೈಗೊಳ್ಳಲಾಗಿದೆ.*

*ಮುನೇಗೌಡ, ಕ್ಷೇತ್ರ ಚುನಾವಣಾಧಿಕಾರಿ*.

ಗೋ ರಾ ಶ್ರೀನಿವಾಸ...

ಮೊ:9845856139.