ದಸರಾ ಎಂಬುದು ಮೈಸೂರಿಗಷ್ಟೇ ಸೀಮಿತವಾಗಬಾರದು, ಮನ-ಮನೆಯಲ್ಲೂ ದಸರಾ ಆಗಬೇಕು. ಡಾ ರೂಪಾ ಶ್ರೀಧರ್
ಚನ್ನಪಟ್ಟಣ: ದಸರಾ ಎಂದರೆ ಕೇವಲ ಮೈಸೂರು ಎಂಬಂತಾಗಿದೆ, ಇದು ನಾಡ ಹಬ್ಬ ಎಂಬುದು ಕೇವಲ ಉಲ್ಲೇಖಕ್ಕಷ್ಟೇ ಸೀಮಿತವಾಗಿದೆ. ಇದು ನಾಡಹಬ್ಬ ಎಂಬುದು ಸರ್ವರಿಗೂ ಗೊತ್ತಾಗಬೇಕಾದರೆ ನಾಡಿನ ಪ್ರತಿ ಮನ-ಮನೆಯಲ್ಲೂ ದಸರಾ ಆಚರಣೆ ಮಾಡಬೇಕು ಎಂದು ರಾಮನಗರದ ಬಾಲಾಜಿ ಆಸ್ಪತ್ರೆಯ ಖ್ಯಾತ ವೈದ್ಯೆ ರೂಪಾ ಶ್ರೀಧರ್ ತಿಳಿಸಿದರು. ಅವರು ತಮ್ಮ ಮನೆಯಲ್ಲಿ ತಮ್ಮ ತಂದೆಯ ಮನೆಯಿಂದ ಕೊಡುಗೆಯಾಗಿ ನೀಡಿದ ಪಟ್ಟದ ಗೊಂಬೆಗಳ ಸಮೇತ, ಮೈಸೂರು ದಸರಾ, ಕನ್ನಂಬಾಡಿ ಹಾಗೂ ರೈತರ ಬದುಕನ್ನು ಬಿಂಬಿಸುವ ಸಾಂಪ್ರದಾಯಿಕ ದಸರಾ ಗೊಂಬೆಗಳನ್ನು ಚನ್ನಪಟ್ಟಣ ನಗರದ ತಮ್ಮ ಮನೆಯಲ್ಲಿ ಕೂರಿಸಿ ಸಂಭ್ರಮವನ್ನಾಚರಿಸಿ ಮಾತನಾಡಿದರು.
ನವರಾತ್ರಿ ಆಚರಣೆಯೂ ಸಹ ಕೇವಲ ಪೂಜೆಗಷ್ಟೇ ಸೀಮಿತವಾಗದೆ ದಸರಾ ಹಬ್ಬದ ವೈಭವವನ್ನು ತೋರಿಸಲು ಪ್ರತಿ ಮನೆಯಲ್ಲೂ ಪಟ್ಟದ ಗೊಂಬೆಗಳ ಸಮೇತ ಗೊಂಬೆಗಳನ್ನು ಸಾಂಪ್ರದಾಯಿಕವಾಗಿ ಕೂರಿಸಿ ಪೂಜಿಸುವ ಮೂಲಕ ನವರಾತ್ರಿ ಆಚರಣೆ ಸೂಕ್ತ ಎಂಬುದು ನನ್ನ ಅಭಿಪ್ರಾಯ. ಬೊಂಬೆಗಳ ನಾಡು ಎಂದೇ ಸುಪ್ರಸಿದ್ಧವಾಗಿರುವ ಚನ್ನಪಟ್ಟಣ ದಲ್ಲಿ ದಸರಾ ಮಹೋತ್ಸವಕ್ಕೆ ಸಂಬಂಧಿಸಿದ, ಪೂರ್ವದಿಂದ ಇಲ್ಲಿವರೆಗೂ ನಡೆದು ಬಂದ ದಸರಾ ಹಬ್ಬ ಹಾಗೂ ಸಾಂಪ್ರದಾಯಿಕ ಗೊಂಬೆಗಳು ದೊರೆಯುವುದರಿಂದ, ಅವುಗಳನ್ನು ಖರೀದಿಸಿ, ತಮ್ಮ ಮನೆಗಳಲ್ಲಿ ಗೊಂಬೆಗಳನ್ನು ಕೂರಿಸಿದರೆ ಅವರಿಗೂ ಆರ್ಥಿಕವಾಗಿ ಬೆಂಬಲ ನೀಡಿದಂತಾಗುತ್ತದೆ ಎಂದು ಅಭಿಪ್ರಾಯ ಪಟ್ಟರು.
ಹಿಂದಿನ ಹಾಗೂ ಇಂದಿನ ಆಚರಣೆಗಳು ನಮಗೆ ಸ್ವಲ್ಪ ಮಟ್ಟಿಗೆ ತಿಳಿದಿವೆ. ಈ ಸಂಪ್ರದಾಯಗಳು ಮುಂದಿನ ಪೀಳಿಗೆಗೂ ತಲುಪಬೇಕಾದರೆ ನಮ್ಮ ಹಿಂದಿನವರ ಬದುಕು ನಮಗೆ ಪ್ರೇರಣೆಯಾದಂತೆ, ಮುಂದಿನ ಪೀಳಿಗೆಗೂ ಸಹ ಅವುಗಳ ಬಗ್ಗೆ ಅರಿವು ಮೂಡಿಸಬೇಕಾಗಿದೆ. ನಾಡದೇವತೆ ಹೆಸರಿನಲ್ಲಿ ಆಚರಣೆ ಮಾಡುವ ದಸರಾ ಹಬ್ಬವನ್ನು ಆಚರಿಸುವ ಮೂಲಕ ಅವರಿಗೆ ತಿಳುವಳಿಕೆ ನೀಡಿ ಸಂಪ್ರದಾಯವನ್ನು ಇಮ್ಮಡಿಗೊಳಿಸಬೇಕು ಎಂದರು.
ನಾವು ನಮ್ಮ ಮನೆಯಲ್ಲಿ ದಶಕಗಳಿಂದಲೂ ದಸರಾ ಗೊಂಬೆಗಳನ್ನು ಪ್ರತಿಷ್ಟಾಪಿಸುತ್ತಿದ್ದು, ಈ ವರ್ಷ ವಿಶೇಷವಾಗಿ ನಮ್ಮ ಮನೆಯಲ್ಲಿ ದಸರಾ ಗೊಂಬೆಗಳನ್ನು ಮೈಸೂರು ಮಾದರಿಯಲ್ಲಿ ಕೂರಿಸಿದ್ದೇವೆ. ಇದರಲ್ಲಿ ಮೈಸೂರು ಅರಮನೆ, ಚಿಕ್ಕ ಗಡಿಯಾರ, ಚಾಮುಂಡೇಶ್ವರಿ ಮತ್ತು ದೇವಾಲಯ, ಪಟ್ಟದ ಗೊಂಬೆಗಳು, ಅರಮನೆಯ ವಾದ್ಯಗಳು, ಆನೆ ಅಂಬಾರಿ, ಮಹಿಷಾಸುರ, ಪಟ್ಟದ ಗೊಂಬೆಗಳಾದ ಲಕ್ಷ್ಮಿ ವೆಂಕಟೇಶ್ವರ, ಕೃಷ್ಣ ಲೀಲಾ ಕಾಳಿಂಗ ಮರ್ಧನ, ಮದುವೆ ದಿಬ್ಬಣ, ಕನ್ನಂಬಾಡಿ ಕಟ್ಟೆ ಹಾಗೂ ರೈತನ ಬದುಕಿಗೆ ಸಂಬಂಧಿಸಿದ ವಿವಿಧ ಆಚರಣೆಗಳ ಗೊಂಬೆಗಳನ್ನು ಕೂರಿಸಿ ನವರಾತ್ರಿ ಸಡಗರವನ್ನು ಇಮ್ಮಡಿಗೊಳಿಸಿದ್ದೇವೆ ಎಂದು ಮಾಹಿತಿ ನೀಡಿದರು.
ಈಗಾಗಲೇ ರಾಮನಗರ ಜಿಲ್ಲೆಯ ಬಹುತೇಕ ಎಲ್ಲಾ ಮಹಿಳಾ ವೈದ್ಯರು, ಇನ್ನಿತರ ನಮ್ಮ ವೈದ್ಯಕೀಯ ಸಹೋದ್ಯೋಗಿ ಮಿತ್ರರಷ್ಟೇ ಅಲ್ಲದೆ ಸಾರ್ವಜನಿಕರು ಸಹ ನಮ್ಮ ಮನೆಗೆ ಬಂದು ದಸರಾ ಹಬ್ಬದಲ್ಲಿ ಪಾಲ್ಗೊಂಡಿರುವುದು ವಿಶೇಷವಾಗಿದೆ. ಇದು ನಮ್ಮ ಕುಟುಂಬಕ್ಕೆ ಸಾರ್ಥಕ ಭಾವವನ್ನು ಮೂಡಿಸಿದೆ ಎಂದರು.
ಗೋ ರಾ ಶ್ರೀನಿವಾಸ...
ಮೊ:9845856139.
ಪ್ರತಿಕ್ರಿಯೆಗಳು