ಚನ್ನಪಟ್ಟಣ: ಈಬಾರಿ ಏಪ್ರಿಲ್ ನಿಂದಲೇ ಮಳೆ ಆರಂಭವಾಗಿದ್ದು ಈಗಲೂ ಮುಂದುವರೆದಿದೆ. ಕೆಲವರು ಮಧ್ಯಮಧ್ಯ ಅಂದರೆ ಮಳೆ ಬಿಡುವು ಕೊಟ್ಟಾಗ ಬಿತ್ತನೆ ಮಾಡಿದ್ದಾರೆ. ಬಿತ್ತನೆ ಮಾಡಿದ ನಂತರ ಬಂದ ಪೈರುಗಳು ಮಳೆ ಹೆಚ್ಚಾಗಿರುವುದರಿಂದ ಸಂಪೂರ್ಣವಾಗಿ ಬಿಳಿಚಿಕೊಂಡಿವೆ. ಈಗ ಯೂರಿಯಾ ರಸಗೊಬ್ಬರ ಹಾಕಲಿಲ್ಲ ಎಂದರೆ ಅಲ್ಪಸ್ವಲ್ಪ ಉಳಿದಿರುವ ಬೆಳೆಯೂ ಕೈಸೇರುವುದಿಲ್ಲಾ ಎಂಬುದು ರೈತರ ಅಳಲಾಗಿದೆ. ಬಹುತೇಕ ಸೊಸೈಟಿ ಸೇರಿದಂತೆ ಖಾಸಗಿ ಅಂಗಡಿಗಳಲ್ಲಿ ರಸಗೊಬ್ಬರ ಸಿಗುತ್ತಿಲ್ಲಾ. ಇರುವ ಅಂಗಡಿಗಳಲ್ಲಿ ದುಬಾರಿ ಬೆಲೆಗೆ ಕೊಳ್ಳಬೇಕಾದ ಪರಿಸ್ಥಿತಿ ಇದೆ.

ತಾಲ್ಲೂಕಿನ ವಿವಿಧ ಗ್ರಾಮಗಳಲ್ಲಿ ಈಗಲೂ ಯೂರಿಯಾ ದೊರೆಯುತ್ತದೆ. ದರ ಮಾತ್ರ ಅವರು ಹೇಳುವಷ್ಟು ಕೊಟ್ಟು ಕೊಂಡುಕೊಳ್ಳಬೇಕು. 249₹ ರೂಪಾಯಿ ಬೆಲೆಯ ಯೂರಿಯಾ ಗೆ 300₹ 350₹ 400₹ ಗೂ ಮೀರಿ ಬೆಲೆ ತೆರಬೇಕಾಗಿದೆ. ದಬಾಯಿಸಿದರೆ, ನಾವೂ ಹೆಚ್ಚು ದುಡ್ಡು ನೀಡಿಯೇ ಕೊಂಡಿದ್ದೇವೆ. ಇಷ್ಟವಿದ್ದರೆ ಕೊಳ್ಳಿ ಇಲ್ಲವಾದರೆ ಬಿಡಿ ಎಂದು ನಿಷ್ಠುರವಾಗಿ ಹೇಳುವ ವ್ಯಾಪಾರಿಗಳೇ ಹೆಚ್ಚಿದ್ದಾರೆ. ಫೆರಿಕಿನ್ ಬೂಸ್ಟರ್ ಎಂಬ ರಸಗೊಬ್ಬರ ಕೊಳ್ಳಲು ಡಿಮ್ಯಾಂಡ್ ಮಾಡುತ್ತಾರೆ. ನಗರ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ತರಹೇವಾರಿ ದರ ಹೇಳುತ್ತಾರೆ. ಹಳದಿ ಬಣ್ಣದ ಒಂದು ಕಿಲೋ ರಸಗೊಬ್ಬರ ನೀಡುತ್ತಾರೆ. ನೂರು ರೂಪಾಯಿ ಕೇಳುತ್ತಾರೆ ಅಂದರೆ ಚೀಲವೊಂದಕ್ಕೆ ಐದು ಸಾವಿರ ರೂಪಾಯಿ ಯೇ ಎಂಬುದು ರೈತರ ಯಕ್ಷಪ್ರಶ್ನೆಯಾಗಿದೆ.

ಒಂದು ಅಥವಾ ಎರಡು ಚೀಲ ಯೂರಿಯಾ ಬೇಕು ಎಂದರೆ 1,500₹ ಬೆಲೆಯ ಕಾಂಪ್ಲೆಕ್ಸ್ ಖರೀದಿಸಲೇಬೇಕು ಎಂದು ಕಂಡೀಷನ್ ಹಾಕುತ್ತಾರೆ. ರಾಕ್ಷಸನ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆ ಎಂಬಂತೆ ಎರಡು ಸಾವಿರಕ್ಕೂ ಮಿಗಿಲ ಹಣಕ್ಕೆ ಐವತ್ತು ಕಿಲೋ ಯೂರಿಯಾ ಕೊಂಡಂತಾಗುತ್ತಿದೆ ಎಂಬುದು ರೈತರ ಅಳಲಾಗಿದೆ. ಚನ್ನಪಟ್ಟಣ ತಾಲ್ಲೂಕು ಮಳೆಗಾಲದಲ್ಲಷ್ಟೇ ಅಲ್ಲದೆ ವರ್ಷಪೂರ್ತಿ ನೀರಾವರಿಯಿರುವುದರಿಂದ, ಹೈನುಗಾರಿಕೆಯನ್ನೇ ಹಲವಾರು ಕುಟುಂಬಗಳು ನಂಬಿಕೊಂಡಿರುವುದರಿಂದ ಮೇವು, ರೇಷ್ಮೆ, ಬಾಳೆ, ಭತ್ತ, ರಾಗಿ ಸೇರಿದಂತೆ ವಿವಿಧ ಬೆಳೆಗಳಿಗೆ ಹಂತಹಂತವಾಗಿ 365 ದಿನಗಳೂ ಸಹ ಯೂರಿಯಾ ಬಳಕೆ ಮಾಡುತ್ತಾರೆ. ಈಗಲಾದರೂ ಸರಿಯಾದ ಸಮಯಕ್ಕೆ ರಸಗೊಬ್ಬರ ನೀಡಲಿ ಎಂದು ರೈತರು ಆಗ್ರಹಿಸಿದ್ದಾರೆ.

ಪ್ರತಿವಾರವೂ ನಾವೂ ಇಂಡೆಂಟ್ ಹಾಕುತ್ತಲೇ ಇದ್ದೇವೆ. ದಾಸ್ತಾನು ಮಾಡುವಷ್ಟು ಗೊಬ್ಬರ ಬರುತ್ತಿಲ್ಲ. ಬಂದದ್ದು ಖಾಲಿಯಾಗುತ್ತಿದೆ. ಯೂರಿಯಾ ಜೊತೆಗೆ ಕಾಂಪ್ಲೆಕ್ಸ್ ಹಾಕಿದಾಗ ಮಾತ್ರ ಉತ್ತಮ ಬೆಳೆ ಬರುತ್ತದೆ. ಒಂದು ಚೀಲ ಯೂರಿಯಾ ಕೊಳ್ಳುವವರಿಗೆ ಹತ್ತು ಕಿಲೋ ಕಾಂಪ್ಲೆಕ್ಸ್ ಕೊಳ್ಳಲು ಹೇಳಲಾಗುತ್ತದೆ. ನಾವು ಮಂಡ್ಯ ಮತ್ತು ಬೆಂಗಳೂರಿನ ಮೇಲೆ ಅವಲಂಬಿತರಾಗಿದ್ದೇವೆ. ರಾಮನಗರ ಜಿಲ್ಲೆಯಲ್ಲೇ ವ್ಯವಸ್ಥೆ ಮಾಡಲು ಶಾಸಕರಿಗೆ ಮನವಿ ಮಾಡಲಾಗಿದೆ.

*ರವಿ ಎಸ್ ಕೆ. ಪ್ರಭಾರ ಕೃಷಿ ಅಧಿಕಾರಿ ಚನ್ನಪಟ್ಟಣ.*

ಗೋ ರಾ ಶ್ರೀನಿವಾಸ...

ಮೊ:9845856139.