ವ್ಯಾಕ್ಸಿನೇಷನ್‌ ಬಗ್ಗೆ ಅಪಪ್ರಚಾರ ಮಾಡಿದ ವಿರೋಧ ಪಕ್ಷಗಳಿಗೆ ನಾನು ಛೀಮಾರಿ ಹಾಕುತ್ತೇನೆ. ಅವರೇ ಜನರನ್ನು ದಿಕ್ಕು ತಪ್ಪಿಸಿದ್ದು ಎಂದು ಸಿ ಪಿ ಯೋಗೇಶ್ವರ್ ವಿರೋಧ ಪಕ್ಷದವರ ವಿರುದ್ಧ ಹರಿಹಾಯ್ದರು. ಅವರು ಇಂದು ಚನ್ನಪಟ್ಟಣ ನಗರದ ಎಲ್ ಎನ್ ಕಲ್ಯಾಣ ಮಂಟಪದಲ್ಲಿ *ಸಂಕಷ್ಟ ಸಮಯ, ಬಿಜೆಪಿ ಸಹಾಯ* ಎಂಬ ಧ್ಯೇಯೋದ್ದೇಶದೊಂದಿಗೆ ನಗರದ ನಿರಾಶ್ರಿತರಿಗೆ, ಭಿಕ್ಷುಕರಿಗೆ ಆಹಾರ ವಿತರಣಾ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿದರು.

ವ್ಯಾಕ್ಸಿನೇಷನ್‌ ಬಗ್ಗೆ ವಿರೋಧ ಪಕ್ಷದವರು ತಪ್ಪು ಮಾಹಿತಿ ನೀಡಿದ್ದರಿಂದ‌ ಮೊದಲಿಗೆ ಸಾರ್ವಜನಿಕರು ವ್ಯಾಕ್ಸಿನೇಷನ್‌ ಹಾಕಿಸಿಕೊಳ್ಳಲು ಮುಂದಾಗಲಿಲ್ಲ. ಆದರೆ ಈಗ ಜನತೆಗೆ ಅರಿವಾಗಿದೆ. ಈಗ ಮುಗಿಬಿದ್ದು ವ್ಯಾಕ್ಸಿನೇಷನ್‌ ಪಡೆದುಕೊಳ್ಳುತ್ತಿದ್ದಾರೆ. ವ್ಯಾಕ್ಸಿನೇಷನ್‌ ಲಸಿಕೆಯನ್ನು ಬಿಜೆಪಿ ಲಸಿಕೆ ಎಂದು ಜರಿದರು. ಪ್ರಧಾನ ಮಂತ್ರಿಯವರನ್ನು ಹೀಯಾಳಿಸಿದರು. ಈಗ ಅದೇ ಮಂದಿ ಲಸಿಕೆಗಾಗಿ ಹಾತೊರೆಯುತ್ತಿದ್ದಾರೆ ಎಂದು ಟೀಕಿಸಿದರು.

ವಿಶ್ವದಾದ್ಯಂತ ಕೊರೊನಾ ಹರಡಿದೆ. ನಮ್ಮ ದೇಶದಲ್ಲಿಯೂ ಕೊರೊನಾ ಹೆಚ್ಚಾಗಿದೆ. ಈ ಸಾಂಕ್ರಾಮಿಕ ರೋಗವನ್ನು ತಡೆಗಟ್ಟಲು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಹತ್ತು ಹಲವು ಕಾರ್ಯಕ್ರಮಗಳನ್ನು ರೂಪಿಸಿ ಶತಾಯಗತಾಯ ಹೋರಾಡುತ್ತಿವೆ.

ಮೊದಲ ಅಲೆಯಲ್ಲಿ ಕೊರೊನಾ ರೋಗವನ್ನು ಸಾರ್ವಜನಿಕರು ಕಡೆಗಣಿಸಿದರು. ಎರಡನೇ ಅಲೆ ರೂಪಾಂತರ ಗೊಂಡು ಆಕ್ಸಿಜನ್ ಕೊರತೆ ಎದುರಿಸುವುದಲ್ಲದೆ ಸಾವಿನ ಸಂಖ್ಯೆ ಹೆಚ್ಚಾಗುತ್ತಿದೆ. ಸಾವನ್ನು ತಡೆಗಟ್ಟಲು ಸರ್ಕಾರ ಸಮರೋಪಾದಿಯಲ್ಲಿ ಕೆಲಸ ನಿರ್ವಹಿಸುತ್ತಿದೆ. ಚನ್ನಪಟ್ಟಣ ತಾಲ್ಲೂಕಿನಲ್ಲೂ ಸಹ ಕೊರೊನಾ ತಾಂಡವಾಡುತ್ತಿದೆ. ಇದನ್ನು ತಡೆಗಟ್ಟಲು ಸರ್ಕಾರದ ಜೊತೆಗೆ ಸಾರ್ವಜನಿಕರು ಸಹಕರಿಸಬೇಕೆಂದರು.

ಚನ್ನಪಟ್ಟಣದಲ್ಲಿ ವಿಶೇಷವಾಗಿ ನಿರಾಶ್ರಿತರು ಮತ್ತು ವಲಸಿಗರು ಇದ್ದಾರೆ. ಅನ್ನ ನೀರು ಇಲ್ಲದೆ ಯಾರೂ ಸಾವನ್ನಪ್ಪಬಾರದು. ಅವರಿಗೆಲ್ಲಾ ಮೊದಲಿಗೆ ಅನ್ನಾಹಾರ ನೀಡಬೇಕು ಎಂಬ ಅಭಿಲಾಷೆಯಿಂದ ನಮ್ಮ ಬಿಜೆಪಿ ಪಕ್ಷದ ವತಿಯಿಂದ ಇಂದು ಆಹಾರವನ್ನು ವಿತರಿಸಲು ಚಾಲನೆ ನೀಡಿದ್ದೇವೆ. ಇದು ಲಾಕ್ಡೌನ್ ಮುಗಿಯುವವರೆಗೂ ಮುಂದುವರೆಯುತ್ತದೆ.

ಅನ್ನಾಹಾರದ ಜೊತೆಗೆ ತಾಲ್ಲೂಕಿನಾದ್ಯಂತ ಮಾಸ್ಕ್, ಸ್ಯಾನಿಟೈಸರ್ ಹಾಗೂ ರೋಗ ನಿವಾರಕ ಔಷಧಗಳನ್ನು ನೀಡುತ್ತೇವೆ. ಲಾಕ್ಡೌನ್ ಮುಂದುವರೆದರೆ ತಾಲ್ಲೂಕಿನ ಜನತೆಗೆ ಆಹಾರ ಕಿಟ್ ನೀಡಲು ಉದ್ದೇಶಿಸಿದ್ದೇವೆ ಎಂದರು. ತಾಲ್ಲೂಕಿನ ಎಲ್ಲರಿಗೂ ಭೇದಭಾವ ಮಾಡದೆ ವಿವರಿಸುವಂತೆ ಬಿಜೆಪಿ ಪಕ್ಷದ ಮುಖಂಡರು ಮತ್ತು ಕಾರ್ಯಕರ್ತರಿಗೆ ಸೂಚಿಸಿದ್ದೇನೆ  ತಿಳಿಸಿದರು.

ಮೊದಲು ಕಾಲರಾ, ಪ್ಲೇಗ್, ಸಿಡುಬಿನಂತಹ ಕಾಯಿಲೆಗಳು ಬರುತ್ತಿದ್ದವು. ಆಗೆಲ್ಲಾ ಜನರೇ ಹೊಲಗದ್ದೆಗಳ ಬಳಿ ಬಿಡಾರ ಹೂಡಿ ಬೇರೆಯವರಿಗೆ ರೋಗ ಹರಡದಂತೆ ಎಚ್ಚರವಹಿಸುತ್ತಿದ್ದರು. ಪೋಲೀಸರು ಅವರ ಕೆಲಸ ಮಾಡುತ್ತಾರೆ. ಗೃಹ ಮಂತ್ರಿಗಳು ಸಹ ಲಾಠಿ ಬೀಸದಂತೆ ಸೂಚಿಸಿದ್ದಾರೆ. ಜನರೇ ಸ್ವಯಂ ಲಾಕ್ಡೌನ್ ಗೆ ಒಳಗಾಗುವುದು ಉತ್ತಮ ಎಂದು ಸಲಹೆ ನೀಡಿದರು.

ಪತ್ರಕರ್ತರು ಬೆಡ್ ದಂಧೆ ಬಗ್ಗೆ ಪ್ರಶ್ನಿಸಿದಾಗ ಉತ್ತರಿಸಿದ ಅವರು ಯಾವುದೇ ಕಾಂಟ್ರವರ್ಷಿ ಪ್ರಶ್ನೆಗಳಿಗೆ ಉತ್ತರ ನೀಡುವುದಿಲ್ಲ. ಕೋವಿಡ್ ಒಂದು ಹಂತಕ್ಕೆ ಬಂದ ನಂತರ ಅದಕ್ಕೆ ಸಂಬಂಧಿಸಿದಂತೆ ಉತ್ತರಿಸುತ್ತೇನೆ ಎಂದರು. ಕುಮಾರಸ್ವಾಮಿ ಯವರು ಅಂಬೇಡ್ಕರ್ ಭವನದಲ್ಲಿ ಬೆಡ್ ಹಾಕಿಸಲು ಹೇಳಿದ್ದಾರೆ ಎಂಬ ಪ್ರಶ್ನೆಗೆ ಯಾರೋ ಹೇಳಿದರು ಎಂದಾಕ್ಷಣ ಆ ಕೆಲಸ ಮಾಡಲಾಗುವುದಿಲ್ಲ. ಹಾಸಿಗೆ ಆಕ್ಸಿಜನ್ ಕೊಟ್ಟರಷ್ಟೇ ಕೊರೊನಾ ಹೋಗುವುದಿಲ್ಲ. ತಕ್ಕಂತೆ ಸಿಬ್ಬಂದಿಗಳು ಬೇಕು. ಅದನ್ನು ಸರ್ಕಾರ ತೀರ್ಮಾನಿಸುತ್ತದೆ. ನಾ ಹೇಳಿದ ರೀತಿ ಲಾಕ್ಡೌನ್ ಮಾಡಿಲ್ಲಾ ಅಂತ ಹೇಳ್ತಾರೆ ಯಾರೋ ಹೇಳಿದರು ಎಂದು ಸರ್ಕಾರ ನಡೆಸಲು ಆಗದು ಉತ್ತರಿಸುವ ಮೂಲಕ ಕುಮಾರಸ್ವಾಮಿಗೆ ಟಾಂಗ್ ನೀಡಿದರು.

ತಾಲ್ಲೂಕಿನಲ್ಲಿ 800 ಕ್ಕೂ ಹೆಚ್ಚು ಮಂದಿ ಕೊರೊನಾ ಸೋಂಕಿತರಿದ್ದಾರೆ ಎಂಬ ಪ್ರಶ್ನೆಗೆ ಎಲ್ಲರನ್ನೂ ಆಸ್ಪತ್ರೆಯಲ್ಲೇ ಇರಿಸಿಕೊಳ್ಳುತ್ತಿಲ್ಲ. ರೋಗನಿರೋಧಕ ಶಕ್ತಿ ಇರುವವರಿಗೆ ಹಾಗೂ ಐಸೋಲೇಷನ್ ವ್ಯವಸ್ಥೆ ಇರುವವರಿಗೆ ಮನೆಯಲ್ಲೇ ಇರಲು ಸೂಚಿಸಲಾಗಿದೆ ಎಂದರು. ಸಾರ್ವಜನಿಕರು ಯಾವುದೇ ಕಾರಣಕ್ಕೂ ಅನಗತ್ಯವಾಗಿ ಹೊರಗಡೆ ಬರಬಾರದು. ಪೋಲೀಸರು ಸಹ ಮಾನವೀಯತೆ ಉಳ್ಳವರೇ ಆಗಿದ್ದಾರೆ. ರೋಗ ತಡೆಗಟ್ಟಲು ನಿಮ್ಮೆಲ್ಲರ ಸಹಾಯ ಅತ್ಯಗತ್ಯವಾಗಿದೆ ಎಂದು ತಾಲ್ಲೂಕಿನ ಜನರಿಗೆ ಕಿವಿಮಾತು ಹೇಳಿದರು.

ಪತ್ರಿಕಾಗೋಷ್ಠಿಯಲ್ಲಿ ಬಿಜೆಪಿ ಜಿಲ್ಲಾಧ್ಯಕ್ಷ ಹುಲುವಾಡಿ ದೇವರಾಜು, ಉಪಾಧ್ಯಕ್ಷ ರವೀಶ್ ಎಲೆಕೇರಿ, ಚನ್ನಪಟ್ಟಣ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಆರ್ ಎನ್ ಮಲವೇಗೌಡ, ತಾಲ್ಲೂಕು ಅಧ್ಯಕ್ಷ ಕೆ ಟಿ ಜಯರಾಮು, ನಗರ ಘಟಕದ ಅಧ್ಯಕ್ಷ ಶಿವಕುಮಾರ್ ಮತ್ತು ಅನ್ನದಾಸೋಹದ ಕಾರ್ಯಕರ್ತರು ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.