ಚನ್ನಪಟ್ಟಣ: ತಾಲ್ಲೂಕಿನಲ್ಲಿ ಮೂರನೆ ಅಲೆಯ ಕೊರೋನಾ ಇದೆ ಎಂಬುದನ್ನು ಮರೆತಿದ್ದ ಮಂದಿಗೆ ನಾನಿದ್ದೇನೆ ಎಂದು ಕೊರೊನಾ ತೋರಿಸಿಕೊಟ್ಟಿದೆ. ನಿನ್ನೆ ಅಂದರೆ 12ನೇ ತಾರೀಖು ಶುಕ್ರವಾರ ಒಂದೇ ದಿನ ನಗರದ ಸಾರ್ವಜನಿಕ ಆಸ್ಪತ್ರೆ ಸೇರಿದಂತೆ ತಾಲ್ಲೂಕಿನಾದ್ಯಂತ ಇರುವ ಕಿರಿಯ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಕೊರೋನಾ ಪರೀಕ್ಷೆ ಮಾಡಿಸಿಕೊಂಡವರ ಪೈಕಿ ಇಪ್ಪತ್ತು ಮಂದಿಗೆ ಸೋಂಕು ದೃಢಪಟ್ಟಿದೆ.

ಈಗಾಗಲೇ ಶಾಲಾ ಮಕ್ಕಳಿಂದ ಹಿಡಿದು ವೃದ್ದರವರೆಗೆ ಎರಡು ಡೋಸ್ ಲಸಿಕೆ ಪಡೆದಿದ್ದಾರೆ. ಕೆಲವರು ರೂಸ್ಟರ್ ಡೋಸ್ ಸಹ ಪಡೆದುಕೊಂಡಿದ್ದಾರೆ. ಕೆಲವೇ ಮಂದಿ ಮಾತ್ರ ಮಾಸ್ಕ್ ಧರಿಸುತ್ತಾರೆಯೇ ವಿನಹ ಬಹುತೇಕ ಮಂದಿಗೆ ಅದರ ಅವಶ್ಯಕತೆ ಇಲ್ಲಾ ಎಂಬಂತೆ ನಡೆದುಕೊಂಡಿದ್ದಾರೆ. ಸ್ಯಾನಿಟೈಸರ್ ಮತ್ತು ಅಂತರ ಎಂಬುದು ಬಹುದೂರ ಸಾಗಿದೆ. ದೆಹಲಿ, ಬೆಂಗಳೂರು ಸೇರಿದಂತೆ ಶುಕ್ರವಾರ ಅತಿ ಹೆಚ್ಚು ಸೋಂಕಿತರು ಪತ್ತೆಯಾಗಿರುವುದರ ಜೊತೆಗೆ ರಾಮನಗರ ಜಿಲ್ಲಾದ್ಯಂತ ಒಂದೇ ದಿನ 55 ಮಂದಿಗೆ ಸೋಂಕು ದೃಢಪಟ್ಟಿರುವುದು ಜನರ ಆತಂಕಕ್ಕೆ ಕಾರಣವಾಗಿದೆ.

ಚನ್ನಪಟ್ಟಣ 20, ಕನಕಪುರ 19, ಮಾಗಡಿ 06 ಮತ್ತು ರಾಮನಗರ ತಾಲ್ಲೂಕಿನಲ್ಲಿ 10 ಮಂದಿಗೆ ಕೊರೋನಾ ಸೋಂಕು ದೃಢಪಟ್ಟಿದ್ದು ಜಿಲ್ಲಾದ್ಯಂತ ಒಟ್ಟು 55 ಮಂದಿಗೆ ಸೋಂಕು ದೃಢಪಟ್ಟಿದೆ. ಚನ್ನಪಟ್ಟಣ ತಾಲ್ಲೂಕಿನ ತಿಮ್ಮಸಂದ್ರ ಗ್ರಾಮದ ಕಿರಿಯ ಪ್ರಾಥಮಿಕ ಆರೋಗ್ಯ ಕೇಂದ್ರಲ್ಲಿ 06, ಮೈಲನಾಯಕನಹೊಸಹಳ್ಳಿ ಗ್ರಾಮದ ಆರೋಗ್ಯ ಕೇಂದ್ರದಲ್ಲಿ 04, ಬೇವೂರು ಆರೋಗ್ಯ ಕೇಂದ್ರದಲ್ಲಿ 03, ಹೊಂಗನೂರು ಆರೋಗ್ಯ ಕೇಂದ್ರದಲ್ಲಿ 03, ಕೂರಣಗೆರೆ ಆರೋಗ್ಯ ಕೇಂದ್ರದಲ್ಲಿ 03, ಬಿವಿ ಹಳ್ಳಿ ಆರೋಗ್ಯ ಕೇಂದ್ರದಲ್ಲಿ 01 ಮತ್ತು ನಗರದ ಸಾರ್ವಜನಿಕ ಆಸ್ಪತ್ರೆಯಲ್ಲಿನ ಶನಿವಾರ 02 ಮಂದಿಗೆ ಸೋಂಕು ದೃಢಪಟ್ಟಿದೆ.

*ನಾವು ತಾಲ್ಲೂಕಿನಲ್ಲಿ ಪ್ರತಿದಿನವೂ ನೂರಾ ಐವತ್ತಕ್ಕೂ ಹೆಚ್ಚು ಮಂದಿಗೆ ಪರೀಕ್ಷೆ ಮಾಡುತ್ತಿದ್ದೇವೆ. ಶುಕ್ರವಾರ ಅತಿ ಹೆಚ್ಚು ಮಂದಿಗೆ ಸೋಂಕು ದೃಢಪಟ್ಟಿರುವುದು ನಿಜ. ಅವರೆಲ್ಲರನ್ನೂ ಅವರವರ ಮನೆಯಲ್ಲೇ ಐಸೋಲೇಷನ್ ನಲ್ಲಿ ಇರುವಂತೆ ಸೂಚಿಸಲಾಗಿದೆ. ಜನರು ಅವರ ಎಚ್ಚರಿಕೆಯಲ್ಲಿರುವುದು ಒಳ್ಳೆಯದು.*

*ರಾಜು, ತಾಲ್ಲೂಕು ಆರೋಗ್ಯಾಧಿಕಾರಿ ಚನ್ನಪಟ್ಟಣ*

*ಕೊರೋನಾ ಸೋಂಕು, ವೈರಲ್ ಫಿವರ್ ಹೆಚ್ಚಾಗುತ್ತಿದೆ. ವಾತಾವರಣವೂ ಇದಕ್ಕೆ ಕಾರಣವಿರಬಹುದು. ಸಾರ್ವಜನಿಕರು ಈ ಮೊದಲಿನಂತೆಯೇ ಮಾಸ್ಕ್ ಧರಿಸಿ, ಅಂತರ ಕಾಯ್ದುಕೊಳ್ಳಬೇಕು. ಬಿಸಿನೀರು ಉಪಯೋಗಿಸಬೇಕು. ಆರೋಗ್ಯದಲ್ಲಿ ಯಾವುದೇ ರೀತಿಯ ಮುನ್ಸೂಚನೆ ಕಂಡ ತಕ್ಷಣ ವೈದ್ಯರಲ್ಲಿ ಪರೀಕ್ಷಿಸಿಕೊಂಡು ಮನೆಯಲ್ಲೇ ಐಸೋಲೇಷನ್ ನಲ್ಲಿ ಇರಬೇಕು*

*ಬಿ ಕೆ ಸುದರ್ಶನ್ ತಾಲ್ಲೂಕು ದಂಡಾಧಿಕಾರಿಗಳು*

ಗೋ ರಾ ಶ್ರೀನಿವಾಸ...

ಮೊ:9845856139.