ಚನ್ನಪಟ್ಟಣ: ನಗರವೂ ಸೇರಿದಂತೆ ತಾಲ್ಲೂಕಿನ ಗ್ರಾಮೀಣ ಪ್ರದೇಶಗಳ ಬೀದಿ ಬೀದಿಯಲ್ಲೂ ಗೌರಿ ಗಣೇಶ ಮೂರ್ತಿಗಳನ್ನು ಕೂರಿಸಿ ಪೂಜಿಸುವ ಮೂಲಕ ಗೌರಿ ಗಣೇಶ ಹಬ್ಬವನ್ನು ಅತಿ ವಿಜೃಂಭಣೆಯಿಂದ ಆಚರಿಸಿದರು.

ತಾಲ್ಲೂಕಿನ ಪ್ರತಿ ಹಳ್ಳಿಗೂ ಅಗತ್ಯತೆಯ ಮೇರೆಗೆ ತಾಲ್ಲೂಕಿನ ಮುಖಂಡರೊಬ್ಬರು ಗೌರಿ ಗಣೇಶ ಮೂರ್ತಿಗಳನ್ನು ಉಚಿತವಾಗಿ ನೀಡಿದ್ದರಿಂದ ಬಹುತೇಕ ಎಲ್ಲಾ ಕಡೆಯೂ ಮೂರ್ತಿಗಳನ್ನು ಪ್ರತಿಷ್ಠಾಪಿಸಿದ್ದರು, ಪೂಜೆಗೆ ಬೇಕಾದ ಪೂಜಾ ಸಾಮಾಗ್ರಿಗಳಾದ ಹೂ, ಹಣ್ಣು ಮತ್ತಿತರ ವಸ್ತುಗಳು ದುಬಾರಿಯಾಗಿದ್ದರೂ ಉತ್ಸಾಹಿ ಯುವಕರು ಮತ್ತು ಗೃಹಿಣಿಯರು ಖರೀದಿಸಿದ್ದು ಅವರ ಭಕ್ತಿಭಾವವನ್ನು  ತೋರುತ್ತಿತ್ತು.

ಬಾಲಗಂಗಾಧರ ತಿಲಕರು ಸ್ವಾತಂತ್ರ್ಯ ಪೂರ್ವದಲ್ಲಿ ಎಲ್ಲಾ ಸ್ವಾತಂತ್ರ್ಯ ಹೋರಾಟಗಾರರನ್ನು ಒಗ್ಗೂಡಿಸಿ ಸ್ವಾತಂತ್ರ್ಯ ಹೋರಾಟದ ಕಿಚ್ಚನ್ನು ಹಚ್ಚಲು ಬಳಸಿದ ಗೌರಿ ಗಣೇಶ ಹಬ್ಬವನ್ನು ಇಂದು ಕೆಲವರು ತಮ್ಮ ಪ್ರತಿಷ್ಠೆಗೋಷ್ಕರ ಮಾಡುತ್ತಿರುವುದು ದುರದೃಷ್ಟಕರ, ಕೆಲವರು ಇದನ್ನು ತಮ್ಮ ಭಕ್ತಿ ಭಾವ ತೋರಿಸಿ ಕೊಳ್ಳಲು ಆಚರಿಸುತ್ತಿರುವುದು ಸಮಾಧಾನದ ಸಂಗತಿ.

ತಮ್ಮ ಕೆಲಸದ ಒತ್ತಡದ ಮೇರೆಗೆ ಕೆಲವರು ಬೆಳಿಗ್ಗೆ ಕೂರಿಸಿ ಸಂಜೆಯ ವೇಳೆಗೆ ವಿಸರ್ಜಿಸಿದರೆ ಕೆಲವರು ಇಪ್ಪತ್ತೊಂದು ದಿನಗಳ ವರೆಗೂ ಪೂಜಿಸಿ ವಿಸರ್ಜಿಸುತ್ತಾರೆ, ವಿಸರ್ಜನೆಯ ವೇಳೆ ತರಹೇವಾರಿ ಕಮಾನುಗಳಲ್ಲಿ ಗಣೇಶನನ್ನು ಕೂರಿಸಿ ಭಾಜಭಜಂತ್ರಿ ಹಾಗೂ ಗಟ್ಟಿ ಹಿಮ್ಮೇಳದೊಂದಿಗೆ ಪಲ್ಲಕ್ಕಿಯಲ್ಲಿ ಮೆರವಣಿಗೆ ಮಾಡುವುದು ಇಂದಿನ ಯುವಕರ ಟ್ರೆಂಡ್ ಆಗುತ್ತಿದೆ.

ತಾಲ್ಲೂಕಿನಾದ್ಯಂತ ಗಣೇಶ ಚತುರ್ಥಿ ದಿನದಂದು ಮೂರ್ತಿಗಳನ್ನು ಪ್ರತಿಷ್ಠಾಪಿಸುವ ಪರಿಪಾಠವನ್ನು ಸ್ವಾತಂತ್ರ್ಯ ಪೂರ್ವದಿಂದಲೂ ಆಚರಿಸಿಕೊಂಡು ಬಂದಿದ್ದು ನಗರದ ಕೆಲವು ಬಡಾಣೆಗಳಲ್ಲಿ ಅರ್ಧ ಶತಕ ವರ್ಷಗಳನ್ನೂ ಪೂರೈಸಿವೆ.

ನಗರದ ಕೋಟೆ ಪ್ರದೇಶ, ಮಂಗಳವಾರಪೇಟೆ ಹಾಗೂ ಕೆಲವು ದೇವಾಲಯಗಳು ಈ ಸಾಲಿನಲ್ಲಿ ಗುರುತಿಸಿಕೊಂಡಿವೆ.

ತಾಲ್ಲೂಕಿನ ಹೆಚ್ ಮೊಗೇನಹಳ್ಳಿಯ ಜೈ ಕರ್ನಾಟಕ ಯುವಕರ ಸಂಘವು ಕಳೆದ ನಲವತ್ತಾರು ವರ್ಷಗಳಿಂದ ಗಣೇಶೋತ್ಸವ ವನ್ನು ಅಚರಿಸಿಕೊಂಡು ಬಂದಿರುವುದು ಸಹ ಗ್ರಾಮೀಣ ಭಾಗದ ವಿಶೇಷ.

ಅತಿಯಾದ ಶಬ್ದ, ರಸ್ತೆ ತಡೆ ಮಾಡಿ ಗಣೇಶ ಕೂರಿಸುವುದು, ಮೆರವಣಿಗೆ ಯ ಸಮಯದಲ್ಲಿ ಹೆಚ್ಚು ಶಬ್ದವನ್ನುಂಟು ಮಾಡುವ ಸೌಂಡ್ ಸಿಸ್ಟಮ್ (ಡಿಜೆ) ಬಳಸುವುದು ಸೇರಿದಂತೆ ಅನೇಕ ರೀತಿಯ ಷರತ್ತುಗಳನ್ನು ಪೋಲೀಸರು ವಿಧಿಸಿರುವುದರಿಂದ ಯುವ ಉತ್ಸಾಹಿಗಳು ನಿರಾಸೆಗೊಂಡಿದ್ದಾರೆ.

*ಗೋ ರಾ ಶ್ರೀನಿವಾಸ...*

*ಮೊ:9845856139.*