ಚನ್ನಪಟ್ಟಣ: ತಾಲ್ಲೂಕಿನ ಹೆಚ್ಚು ಭಾರ ಉಳ್ಳ (ನಗರದಿಂದ ಕವಲೊಡೆದು ಹೆಚ್ಚು ವಾಹನಗಳು ಓಡಾಡುವ) ರಾಜ್ಯ ಹೆದ್ದಾರಿಯಾದ ಸಾತನೂರು ರಸ್ತೆಯ ಭೈರಶೆಟ್ಟಿಹಳ್ಳಿ ಬಸ್ ನಿಲ್ದಾಣ ಮತ್ತು ಸಿಂಗರಾಜಪುರ ಗ್ರಾಮದ ನಡುವೆ ಇರುವ ಸೇತುವೆಯ ಒಂದು ಭಾಗ ಕುಸಿದಿದ್ದು ವಾಹನಗಳ ಸವಾರರು ಜೀವ ಕೈಲಿಡಿದು ಸೇತುವೆ ದಾಟಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಭೈರಶೆಟ್ಟಿಹಳ್ಳಿ ಬಸ್ ನಿಲ್ದಾಣದ ಕೂಗಳತೆ ದೂರದಲ್ಲಿರುವ ಶನಿದೇವರ ದೇವಾಲಯದ ಬಳಿ ಇರುವ ಕಿರು ಸೇತುವೆಯು ನಿನ್ನೆ ಸಂಜೆ ಕುಸಿದಿದ್ದು ಚನ್ನಪಟ್ಟಣದಿಂದ ಕಬ್ಬಾಳು ಮಾರ್ಗವಾಗಿ ತೆರಳುವ ಏಕೈಕ ಹೆದ್ದಾರಿಯಾಗಿರುವುದರಿಂದ ಹಾಗೂ ಪ್ರತಿ ನಿಮಿಷಕ್ಕೊಂದರಂತೆ ವಾಹನಗಳು ಓಡಾಡುವುದರಿಂದ ಪ್ರಯಾಣಿಕರು ಕಂಗಾಲಾಗಿದ್ದಾರೆ. ಈ ಮಾರ್ಗವನ್ನು ಬದಲಿಸಿ ಹೋಗುವ ದಾರಿಗಳಿದ್ದರೂ ಅವು ಕಿರಿದಾಗಿರುವ ಜೊತೆಗೆ ಸುತ್ತು ಮಾರ್ಗಗಳಾಗಿರುವುದರಿಂದ ಹೊಸದಾಗಿ ಬರುವ ವಾಹನಗಳ ಸವಾರರಿಗೆ ಕಿರಿಕಿರಿಯಾಗಿದ್ದು ಪರದಾಡುತ್ತಿದ್ದಾರೆ ಎಂದು ಸ್ಥಳೀಯ ಗ್ರಾಮಸ್ಥರು ದೂರಿದ್ದಾರೆ.

*ಇದು ರಾಜ್ಯ ಹೆದ್ದಾರಿಯಾಗಿದ್ದು ಪ್ರತಿಷ್ಠಿತ ಕಬ್ಬಾಳಮ್ಮನ ದೇವಸ್ಥಾನವೂ ಇರುವುದರಿಂದ ಸಹಸ್ರಾರು ಸಂಖ್ಯೆಯಲ್ಲಿ ವಾಹನಗಳು ಪ್ರತಿನಿತ್ಯ ಓಡಾಡುತ್ತವೆ. ಸಂಬಂಧಿಸಿದ ಅಧಿಕಾರಿಗಳು ಶೀಘ್ರವಾಗಿ ದುರಸ್ತಿ ಮಾಡಿ ಪ್ರಯಾಣಿಕರಿಗೆ ಅನುಕೂಲ ಕಲ್ಪಿಸಲಿ.*

*ಬಾಲಕೃಷ್ಣ ಉ ಮಹದೇವು ಕೋಡಿಹೊಸಹಳ್ಳಿ*

*ಚನ್ನಪಟ್ಟಣದಿಂದ ಸಾತನೂರು ಮಾರ್ಗವಾಗಿ ಆರು ಕಿರು ಸೇತುವೆಗಳಿದ್ದು ಅವುಗಳು ಪುರಾತನವಾಗಿ ಹಾಗೂ ತುಂಬಾ ಚಿಕ್ಕ ಸೇತುವೆಗಳಾಗಿವೆ, ಒಂದು ಸೇತುವೆ ಮಾತ್ರ ನಿರ್ಮಾಣವಾಗಿದ್ದು ಉಳಿದ ಸೇತುವೆಗಳು ಹಾಗೆಯೇ ಇವೆ. ಅವುಗಳನ್ನು ಕೆಡವಿ ಹೊಸದಾಗಿ ದೊಡ್ಡ ಸೇತುವೆಗಳನ್ನು ನಿರ್ಮಿಸಿ ಪ್ರಯಾಣಿಕರಿಗೆ ಸುಗಮ ಮಾರ್ಗ ಕಲ್ಪಿಸಲಿ.*

*ಸುರೇಶ್ ಭೂಹಳ್ಳಿ*

*ಸಂಜೆ ಸೇತುವೆಯ ಒಂದು ಚಪ್ಪಡಿ ಮುರಿದಿದೆ ಎಂಬ ಸುದ್ದಿ ಬಂದಿದ್ದು ಪ್ರಯಾಣಿಕರ ಎಚ್ಚರಿಕೆಗಾಗಿ ಎಚ್ಚರಿಕೆಯ ಸಂಕೇತಗಳನ್ನು ನಿನ್ನೆ ರಾತ್ರಿಯೇ ಅಳವಡಿಸಲಾಗಿದೆ. ಇಂದು ದುರಸ್ತಿ ಮಾಡಲಾಗುವುದು.*

*ನಾರಾಯಣಗೌಡ ಇಂಜಿನಿಯರ್ ಲೋಕೋಪಯೋಗಿ.*

ಗೋ ರಾ ಶ್ರೀನಿವಾಸ...

ಮೊ:9845856139.