ಚನ್ನಪಟ್ಟಣ:ಫೆ/೨೪/೨೦/ಸೋಮವಾರ.

ನಗರದ ಸಾತನೂರು ರಸ್ತೆಯಲ್ಲಿರುವ ಎಸ್ ಬಿ ಸರ್ವೀಸ್ ಸ್ಟೇಷನ್ (ಪೆಟ್ರೋಲ್ ಬಂಕ್) ನಲ್ಲಿ ಗ್ರಾಹಕರಿಗೆ ಮೋಸ ಮಾಡಲಾಗುತ್ತಿದೆ ಎಂಬ ದೂರಿನ ಮೇರೆಗೆ ಆಹಾರ ನಿರೀಕ್ಷಕಿ ಅನುಷಾ, ಶಿರಸ್ತೇದಾರರಾದ ಶಾಂತಕುಮಾರಿ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ರಾಮನಗರ ತಾಲ್ಲೂಕು ಕೈಲಾಂಚ ಹೋಬಳಿಯ ಅವ್ವೇರಹಳ್ಳಿ ಗ್ರಾಮದ ನಾಗೇಂದ್ರ ಎಂಬುವವರು ತಮ್ಮ ಬೈಕ್ ಗೆ ೨೦೦ ರೂಪಾಯಿಗಳಿಗೆ ಪೆಟ್ರೋಲ್ ಹಾಕಿಸಿದ್ದು, ೦೨.೬೭ ಲೀ ಮೀಟರ್ ನಲ್ಲಿ ತೋರಿಸುತ್ತಿದ್ದರೂ, ಸಹ ಪೆಟ್ರೋಲ್ ಕಡಿಮೆ ಹಾಕಿದ್ದಾರೆ, ಎಂಬ ಸಂದೇಹದ ಮೇರೆಗೆ ಬೈಕ್ ನ ಟ್ಯಾಂಕ್ ನಿಂದ ಪೆಟ್ರೋಲ್ ಹೊರತೆಗೆಸಿದ್ದಾರೆ. ೦೨.೬೭ ರ ಬದಲಾಗಿ ೦೧.೭೫ ಲೀ ಹೊರಗೆ ಬಂದಿದ್ದರಿಂದ ನೇರವಾಗಿ ಆಹಾರ ನಿರೀಕ್ಷಕರಿಗೆ ಮಾಹಿತಿ ನೀಡಲಾಗಿ ಸ್ಪಂದಿಸಿದ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲಿಸಿ ದೂರು ದಾಖಲಿಸಿಕೊಂಡಿದ್ದಾರೆ.

ದೂರು ನೀಡಿ ಮಾತನಾಡಿದ ಗ್ರಾಹಕ ನಾಗೇಂದ್ರ ನನ್ನ ಕಣ್ಣ ಮುಂದೆಯೇ ಮೋಸ ಮಾಡಿದ್ದು ಅನುಮಾನಗೊಂಡ ನಾನು ಸ್ಥಳದಲ್ಲಿಯೇ ಪರಿಶೀಲಿಸಲಾಗಿ ಪೆಟ್ರೋಲ್ ಕಡಿಮೆ ಹಾಕಿರುವುದು ಖಾತ್ರಿಯಾದ್ದರಿಂದ ದೂರು ನೀಡಿದ್ದೇನೆ ಎಂದರು.

ಮೇಲ್ನೋಟಕ್ಕೆ ಮೀಟರ್ ಗೂ ಪೆಟ್ರೋಲ್ ಗೂ ವ್ಯತ್ಯಾಸ ತಿಳಿದಿದ್ದು ಸಂಬಂಧಿಸಿದ ಜಿಲ್ಲಾ ಅಧಿಕಾರಿಗಳಿಗೆ ದೂರವಾಣಿ ಕರೆ ಮಾಡಿ ಮಾಹಿತಿ ನೀಡಲಾಗಿದೆ. ಅವರು ಬಂದ ನಂತರ ಅವರ ಸಮ್ಮುಖದಲ್ಲಿ ಇಂದು ಬೆಳಿಗ್ಗೆ ದಾಸ್ತಾನು ಇದ್ದ ಪೆಟ್ರೋಲ್ ಮತ್ತು ಈಗ ಮಾರಾಟವಾಗಿರುವ ಪೆಟ್ರೋಲ್, ನಂತರ ಉಳಿದ ಪೆಟ್ರೋಲ್ ವ್ಯತ್ಯಾಸವನ್ನು ಅಳೆದ ನಂತರವೇ ಸತ್ಯಾಂಶ ಹೊರಬರಬೇಕಾಗಿದೆ ಎಂದು ಅನುಷಾ ತಿಳಿಸಿದರು.

ಪೆಟ್ರೋಲ್ ಬಂಕ್ ಮಾಲೀಕ ಶೃಂಕಲ್ ಗೌಡ ಮಾತನಾಡಿ ನಮ್ಮಲ್ಲಿ ಯಾವುದೇ ರೀತಿಯ ಮೋಸವಾಗಿಲ್ಲ, ಅಧಿಕಾರಿಗಳು ಬಂದು ಮೀಟರ್ ಪರಿಶೀಲಿಸಿ, ಸಿ ಸಿ ಟಿವಿಯನ್ನು ಪರೀಕ್ಷಿಸಿದ ನಂತರ ಸತ್ಯಾಂಶ ಗೊತ್ತಾಗಲಿದೆ ಎಂದು ಹೇಳಿದರು. 

ಶೃಂಕರ್ ಗೌಡ 

ಪೆಟ್ರೋಲ್ ಬಂಕ್ ಮಾಲೀಕ

ಸಂಜೆ ಆರು ಗಂಟೆಯ ನಂತರ ಇಂಡಿಯನ್ ಸೇಲ್ಸ್ ಮ್ಯಾನೇಜರ್ ಜೊತೆಯಲ್ಲಿ ಸ್ಥಳಕ್ಕೆ ಭೇಟಿ ನೀಡಿದ ದಂಡಾಧಿಕಾರಿ ಸುದರ್ಶನ್ ರವರು ಅಳತೆಯನ್ನು ಪರಿಶೀಲಿಸಲಾಗಿ ನಮಗೆ ಯಾವುದೇ ವ್ಯತ್ಯಾಸ ಕಂಡುಬಂದಿಲ್ಲ, ಪೆಟ್ರೋಲ್ ಹಾಕುವ ಹುಡುಗರು ಕೈಚಳಕ ಮಾಡಿರಬಹುದೇ ವಿನಹ ಪಂಪ್ ಗಳಲ್ಲಿ ವ್ಯತ್ಯಾಸ ಕಂಡುಬಂದಿಲ್ಲ ಎಂದು ಮಾಹಿತಿ ನೀಡಿದರು.

ಎಜಿಎಸ್ ಕೋಳಿ ಅಂಗಡಿಯ ಮಾಲೀಕ ಎ ಜಿ ಸ್ವಾಮಿ ಸೇರಿದಂತೆ ಅನೇಕ ಗ್ರಾಹಕರು ಈ ಪೆಟ್ರೋಲ್ ಬಂಕ್ ನಲ್ಲಿ ಕೆಲಸ ಮಾಡುವ ಸಿಬ್ಬಂದಿಗಳು ಗ್ರಾಹಕರ ಮನ ಬೇರೆಡೆ ಸೆಳೆದು ಮೋಸ ಮಾಡುವುದರಲ್ಲಿ ನಿಸ್ಸೀಮರಾಗಿದ್ದಾರೆ. ಅಧಿಕಾರಿಗಳು ಇಂದೇ ಪೆಟ್ರೋಲ್ ಬಂಕ್ ಸೀಜ್ ಮಾಡಿ ನಿಷ್ಪಕ್ಷಪಾತ ತನಿಖೆ ನಡೆಸಿ ಕಾನೂನು ಕ್ರಮ ಕೈಗೊಂಡು ಗ್ರಾಹಕರಿಗೆ ನ್ಯಾಯ ದೊರಕಿಸಿಕೊಡಬೇಕೆಂದು ಆಗ್ರಹಿಸಿದರು.

ಪೋಲಿಸ್ ಇನ್ಸ್‌ಪೆಕ್ಟರ್ ಜೋಸೆಫ್ ಮತ್ತು ಸಿಬ್ಬಂದಿಗಳು ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.