ಚನ್ನಪಟ್ಟಣ: ತಾಲ್ಲೂಕಿನ ವಂದಾರಗುಪ್ಪೆ ಗ್ರಾಮ ಪಂಚಾಯತಿ ವ್ಯಾಪ್ತಿಯ ಕರಿಕಲ್ ದೊಡ್ಡಿ ಗ್ರಾಮದ ಪರಿಶಿಷ್ಟ ವರ್ಗದ ಜನರು ಮತ್ತು ಪೋಲಿಸ್ ತರಬೇತಿ ಶಾಲೆಗೂ ಸ್ಮಶಾನ ಭೂಮಿಗಾಗಿ ನಡೆಯುತ್ತಿದ್ದ ವಿವಾದವನ್ನು ತಹಶಿಲ್ದಾರ್ ಸುದರ್ಶನ್ ರವರು ಇಂದು ತಡೆಗೋಡೆ ಒಡೆದು ಸ್ಮಶಾನಕ್ಕೆ ದಾರಿ ಮಾಡಿಕೊಡುವ ಮೂಲಕ ಬಗೆಹರಿಸಿದರು.

ಪರಿಶಿಷ್ಟ ಪಂಗಡದವರಿಗೆ ಗ್ರಾಮದ ಬಳಿ ಒಂದು ಎಕರೆ ಭೂಮಿಯನ್ನು ಸ್ಮಶಾನಕ್ಕೆ ನೀಡಬೇಕೆಂದು ಕಾನೂನು ಇದ್ದು, ಕಂದಾಯ ಇಲಾಖೆಯ ವತಿಯಿಂದ ಹೊನ್ನಗಾನಹಳ್ಳಿ ಸರ್ವೇ ನಂ ೪೬ ರ ಗೋಮಾಳದ ಒಂದು ಎಕರೆ ಭೂಮಿಯನ್ನು ಮಂಜೂರು ಮಾಡಲಾಗಿತ್ತು. ಸದ್ಯ ಈ ಭೂಮಿಯು ಪೋಲಿಸ್ ತರಬೇತಿ ಶಾಲೆಯ ಒಳಗೆ ಇದ್ದುದರಿಂದ ಪಿಟಿಎಸ್ ನವರು ತಡೆಗೋಡೆ ನಿರ್ಮಿಸಿಕೊಂಡಿದ್ದು ಈ ಭೂಮಿ ಪಿಟಿಎಸ್ ಗೆ ಸೇರಿದ್ದರಿಂದ ಸ್ಮಶಾನಕ್ಕೆ ಬೇರೆ ಜಾಗ ನೀಡುವಂತೆ ನಾವು ಈ‌ ಜಾಗ ನೀಡುವುದಿಲ್ಲ ಎಂದು ಪಟ್ಟುಹಿಡಿದಿದ್ದರು. ಗ್ರಾಮದ ಯಾರೇ ನಿಧನರಾದಗಲೂ ಸಹ ತಾಲ್ಲೂಕು ಕಛೇರಿ, ಪಿಟಿಎಸ್ ಮತ್ತು ಗ್ರಾಮಸ್ಥರ ನಡುವೆ ವಾಗ್ವಾದ ಏರ್ಪಟ್ಟು ಸಂಧಾನದ ನಂತರ ತಣ್ಣಗಾಗುತ್ತಿತ್ತು. ಕೆಲವು ಬಾರಿ ಗ್ರಾಮಸ್ಥರು ಶವವನ್ನು ತಂದು ತಾಲ್ಲೂಕು ಕಛೇರಿಯ ಮುಂದೆ ಇಟ್ಟು ಪ್ರತಿಭಟಿಸಿದ್ದರು.

ಇದನ್ನು ಮನಗಂಡ ತಹಶಿಲ್ದಾರ್ ಸುದರ್ಶನ್ ರವರು ಪೋಲಿಸ್ ತರಬೇತಿ ಶಾಲೆಯ ಪ್ರಾಂಶುಪಾಲರು, ಸಮಾಜ ಕಲ್ಯಾಣ ಇಲಾಖೆ, ಕಂದಾಯ ಇಲಾಖೆ ಯ ಜೊತೆ ಸಮಾಲೋಚಿಸಿ ಈ ಹಿಂದೆ ಗುರುತಿಸಿದ್ದ ಭೂಮಿಗೆ ತೆರಳಲು ಅಡ್ಡವಾಗಿದ್ದ ತಡೆಗೋಡೆಯನ್ನು ತೆರವುಗೊಳಿಸಿ ಗೇಟನ್ನು ಅಳವಡಿಸಿ ಶೀಘ್ರವಾಗಿ ಸ್ಮಶಾನದ ಜಾಗಕ್ಕೆ ತಡೆಗೋಡೆ ನಿರ್ಮಿಸುವಂತೆ ಸಮಾಜ ಕಲ್ಯಾಣ ಇಲಾಖೆಯ ಅಧಿಕಾರಿಗಳಿಗೆ ಸೂಚಿಸಿದರು.

ಈ ಸಂದರ್ಭದಲ್ಲಿ ಪೋಲಿಸ್ ವೃತ್ತ ನಿರೀಕ್ಷಕ ವಸಂತ್, ಇನ್ಸ್‌ಪೆಕ್ಟರ್ ಶಿವಕುಮಾರ್, ಕಂದಾಯ ನಿರೀಕ್ಷಕ ಕಾಂತರಾಜು, ವಿಎ ಮಂಜುನಾಥ, ಸಮಾಜ ಕಲ್ಯಾಣ ಇಲಾಖೆ ಯ ವೇದಮೂರ್ತಿ, ಮುಖಂಡ ವಿ ಬಿ ಚಂದ್ರು, ವಿಶ್ವೇಶ್ವರಯ್ಯ ದಲಿತ ಮುಖಂಡರಾದ ಶ್ರೀನಿವಾಸಮೂರ್ತಿ, ವೆಂಕಟಗಿರಿ ಮತ್ತು ಗ್ರಾಮಸ್ಥರು ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.