ಚನ್ನಪಟ್ಟಣ: ಪ್ರಪಂಚದ ಅನೇಕ ದೇಶಗಳಲ್ಲಿ ತಲ್ಲಣ ಮೂಡಿಸಿ ದೇಶಕ್ಕೂ ಕಾಲಿಟ್ಟಿರುವ *ಕೊರೊನಾ ವೈರಸ್* ಗೆ ಶುಚಿತ್ವವೇ ಮೊದಲ ಮದ್ದು. ನಾವು, ನಮ್ಮವರು, ನಮ್ಮನೆ ಹಾಗೂ ಸುತ್ತಲಿನ ಪರಿಸರವನ್ನು ನಮ್ಮದೆಂದು ತಿಳಿದು ಶುಚಿತ್ವಕ್ಕೆ‌ ಮಹತ್ವ ನೀಡಿದರೇ ಯಾವ ವೈರಸ್ ಸಹ ಮನುಷ್ಯನ ದೇಹವನ್ನು ಹೊಕ್ಕುವುದಿಲ್ಲ ಎಂದು ನಗರದ ಗುರುವಪ್ಪ ಆಸ್ಪತ್ರೆಯ ವೈದ್ಯ ಲೋಕಾನಂದ ತಿಳಿಸಿದರು.

ಅವರು ಇಂದು ಬೆಳಿಗ್ಗೆ ಗುರುವಪ್ಪ ವೃತ್ತದಲ್ಲಿ ತಮ್ಮ ತಂದೆ ದಿವಂಗತ ಡಾ ಗುರುವಪ್ಪ ನವರ ೮೫ ನೇ ಜನ್ಮ ದಿನಾಚರಣೆ ಪ್ರಯುಕ್ತ ಕೊರೊನಾ ವೈರಸ್ ನ ಬಗ್ಗೆ ಅರಿವು ಮೂಡಿಸುವ ಕಾರ್ಯದಲ್ಲಿ ಪಾಲ್ಗೊಂಡು ಈ ವಿಷಯ ತಿಳಿಸಿದರು.

ಕೊರೊನಾ ವೈರಸ್‌ ಅಷ್ಟೇ ಅಲ್ಲದೇ ಮನುಷ್ಯನಿಗೆ ಬರುವ ಬಹುತೇಕ ರೋಗಗಳು ಶುಚಿತ್ವದ ಕೊರತೆಯಿಂದಲೇ ಬರುತ್ತವೆ. ಹಿಂದಿನ ಕಾಲದ ಮಲೇರಿಯಾ, ಪ್ಲೇಗ್ ನಂತಹ ಕಾಯಿಲೆಗಳು ಎಲ್ಲೆಂದರಲ್ಲಿ ನಿಂತ ನೀರಿನಿಂದ ಉತ್ಪತ್ತಿಯಾದ ಸೊಳ್ಳೆಗಳಿಂದ, ಧವಸಧಾನ್ಯಗಳಿಗಾಗಿ ಮುತ್ತಿಕ್ಕಿ ಪಿಕ್ಕೆ ಉದುರಿಸಿ ಹೋಗುತ್ತಿದ್ದ ಇಲಿಗಳಿಂದ ಬಂದ ಕಾಯಿಲೆಗಳೇ ಆಗಿವೆ.

ಈಗ ಹರಡಲು ಪ್ರಯತ್ನಿಸುತ್ತಿರುವ ಕೊರೊನಾ ವೈರಸ್ ರೋಗದ ಬಗ್ಗೆ ಸರ್ಕಾರವು ಮುನ್ನೆಚ್ಚರಿಕೆಯ ಕ್ರಮ ಇಟ್ಟಿರುವುದು ಶ್ಲಾಘನೀಯವಾಗಿದ್ದು, ಎಲ್ಲಾ ಆರೋಗ್ಯವಂತರೂ ಸಹ ಕನಿಷ್ಠ ಎರಡು ಗಂಟೆಗಳಿಗೊಮ್ಮೆ ತಮ್ಮ ಕೈಗಳನ್ನು ಶುಚಿಮಾಡಿಕೊಳ್ಳುವುದರ ಜೊತೆಗೆ ತಮ್ಮ ಸುತ್ತಮುತ್ತಲಿನ ಪರಿಸರವನ್ನು ಶುಚಿಯಾಗಿಟ್ಟುಕೊಳ್ಳಿ ಎಂದು ಸಲಹೆ ನೀಡಿದರು.

ಸಾಹಿತಿ ವಿಜಯ್ ರಾಂಪುರ ಮಾತನಾಡಿ ಡಾ ಗುರುವಪ್ಪ ತಾಲ್ಲೂಕಿನಲ್ಲಿಯೇ ಒಂದು ದೊಡ್ಡ ಹೆಸರು, ಬಡತನದ ಬೇಗೆಯಲ್ಲಿ ಜನ್ಮತಾಳಿದ ಅವರು ತಂದೆಗಿಂತ ತಾಯಿಯನ್ನು ಹೆಚ್ಚು ಪ್ರೀತಿಸಿದವರು. ಉನ್ನತ ಮಟ್ಟದ ವೈದ್ಯಕೀಯ ಪದವಿಯನ್ನು ಪಡೆದ ಅವರು ಅನೇಕ ಕಡೆ ಉತ್ತಮ ಸೇವೆ ಸಲ್ಲಿಸಿ ನಿವೃತ್ತರಾದ ಬಳಿಕವೂ ತಮ್ಮ ಸೇವೆಯನ್ನು ಮುಂದುವರೆಸಿದ್ದಲ್ಲದೆ ಅನೇಕ ಬಡ ರೋಗಿಗಳಿಗೆ ಉಚಿತ ಔಷಧೋಪಚಾರ ನೀಡಿ, ಪ್ರಯಾಣಕ್ಕೂ ಹಣ ಕೊಟ್ಟು ಕಳುಹಿಸಿದಂತಹ ಅನೇಕ ಉದಾಹರಣೆಗಳು ಇವೆ ಎಂದು ಸ್ಮರಿಸಿದರು.

ಡಾ ಗುರುವಪ್ಪ ನವರ ಅಳಿಯ ಹಿರಿಯ ಫಾರ್ಮಾಸಿಸ್ಟ್ ವೇದಮೂರ್ತಿ ಮಾತನಾಡಿ ಸದ್ಯ ನಮ್ಮ ತಾಲ್ಲೂಕಿನಲ್ಲಿ ಎಲ್ಲಿಯೂ ಕೊರೊನಾ ಕಾಣಿಸಿಕೊಂಡಿಲ್ಲ. ಮುಂಜಾಗ್ರತಾ ಕ್ರಮವಾಗಿ ಸರ್ಕಾರಿ ಆಸ್ಪತ್ರೆಯಲ್ಲಿ ಎಲ್ಲಾ ವ್ಯವಸ್ಥೆಯನ್ನು ಮಾಡಿಕೊಳ್ಳಲಾಗಿದೆ. ಯಾರಿಗಾದರೂ‌ ಸತತ ಕೆಮ್ಮು ಹಾಗೂ ಜ್ವರ ಕಾಣಿಸಿಕೊಂಡರೆ ತಕ್ಷಣ ಆಸ್ಪತ್ರೆಗೆ ಧಾವಿಸಿ ಪರೀಕ್ಷಿಷಿಕೊಂಡು ದೃಢಪಡಿಸಿಕೊಳ್ಳಿ ಎಂದು ತಿಳಿಸಿದರು.

ಇದೇ ವೇಳೆ ಡಾ ಲೋಕಾನಂದರವರು ಗುರುವಪ್ಪ ವೃತ್ತ, ಚಚ್೯ ರಸ್ತೆ, ಸೆಂಟ್ ಆನ್ಸ್ ಶಾಲೆ ರಸ್ತೆ ಯ ಇಕ್ಕೆಲಗಳಿಗೆ ಬ್ಲೀಚಿಂಗ್ ಪೌಡರ್ ಸಿಂಪಡಿಸಿದರು. ನೆರೆದಿದ್ದವರೆಲ್ಲರಿಗೂ ಉಚಿತವಾಗಿ ಸೋಪು (ಸಾಬೂನು) ಮತ್ತು ಮಾಸ್ಕ್ ಗಳನ್ನು ವಿತರಿಸಿದರು.

ಜನ್ಮದಿನಾಚರಣೆಯಲ್ಲಿ ಗುರುವಪ್ಪನವರ ಕುಟುಂಬ ಸದಸ್ಯರು, ದಲಿತ ಮುಖಂಡರಾದ ಅಕ್ಕೂರು ಶೇಖರ್, ವೆಂಕಟೇಶ್ (ಶೇಟು) ಚಂದ್ರು, ನೀಲಸಂದ್ರ ಸಿದ್ದರಾಮು, ನೀಲಸಂದ್ರ ಬಸವರಾಜು, ಮತ್ತೀಕೆರೆ ಹನುಮಂತ, ಕೋಟೆ ಶ್ರೀನಿವಾಸ ಮತ್ತು ಮಹೇಂದ್ರ, ವಕೀಲ ಕುಮಾರ್, ಪೋಲಿಸ್ ವೆಂಕಟೇಶ್, ಚೌಪು ಸ್ವಾಮಿ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.