ಚನ್ನಪಟ್ಟಣ: ನಗರದ ಹೃದಯ ಭಾಗದಲ್ಲಿರುವ (Heart Of The City) ಕುವೆಂಪು ನಗರದ ಒಂದನೇ ತಿರುವಿನಲ್ಲಿ ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರದ ಜನಸಂಪರ್ಕ ಕಛೇರಿಗಳಲ್ಲದೆ ಬ್ಯಾಂಕುಗಳು ಮತ್ತು ಬೇರೆಬೇರೆ ಯ ಖಾಸಗಿ ಉದ್ದಿಮೆಗಳು ತಲೆ ಎತ್ತಿದ್ದು ಈ ಎಲ್ಲಾ ಕಛೇರಿಗೆ ದಿನನಿತ್ಯವೂ ಎಡತಾಕುವ ಸಹಸ್ರಾರು ಗ್ರಾಹಕರು ಹಾಗೂ ಅವರ ವಾಹನಗಳಿಂದ ಆ ಕಿರಿದಾದ ರಸ್ತೆ ತುಂಬಿ ತುಳುಕುತ್ತಿದ್ದು ಸಾರ್ವಜನಿಕರಿಗೆ ಕಿರಿಕಿರಿಯಾಗುತ್ತಿದೆ.

ನೋಂದಣಿ ಕಛೇರಿ, ಬಿಎಸ್ಎನ್ಎಲ್ ಕಛೇರಿ, ಕರ್ನಾಟಕ ಬ್ಯಾಂಕ್, ವಿಜಯ ಬ್ಯಾಂಕ್,ಉಜ್ಜೀವನ್ ಬ್ಯಾಂಕ್, ಖಾಸಗಿ ಆಸ್ಪತ್ರೆ, ಸ್ವದೇಶಿ ಮಾಲ್, ಪ್ರಿಂಟಿಂಗ್ ಪ್ರೆಸ್ ಸೇರಿದಂತೆ ಅನೇಕ ಉದ್ದಿಮೆಗಳು ಇಲ್ಲಿ ತಲೆ ಎತ್ತಿದ್ದು ದಿನಂಪ್ರತಿ ಕಾರುಗಳಲ್ಲದೆ ಕನಿಷ್ಠ ಸಾವಿರ ದ್ವಿಚಕ್ರ ವಾಹನಗಳು ಅಡ್ಡಾದಿಡ್ಡಿ ನಿಂತು ಹೋಗುತ್ತಿದ್ದು ಆ ಬಡಾವಣೆಯ ನಿವಾಸಿಗಳು ಸಂಚರಿಸಲು ಹರಸಾಹಸ ಪಡಬೇಕಾಗಿದೆ.

ಕೂಗಳತೆಯಲ್ಲಿ ಖಾಸಗಿ ಶಾಲೆಯೊಂದಿದ್ದು ಬೆಳಿಗ್ಗೆ ಮತ್ತು ಸಂಜೆ ಜನ ಮತ್ತು ವಾಹನ ದಟ್ಟಣೆ ಹೆಚ್ಚಾಗಿರುತ್ತದೆ.

ಬ್ಯಾಂಕುಗಳು, ಬಿಎಸ್ಎನ್ಎಲ್, ಮತ್ತು ಖಾಸಗಿ ಉದ್ದಿಮೆಗಳಿಗೆ ಅಗತ್ಯಗಳಿಗನುಗುಣವಾಗಿ ಗ್ರಾಹಕರು ಬಂದು ಹೋದರೇ ಸಬ್ ರಿಜಿಸ್ಟ್ರಾರ್ ಕಛೇರಿಗೆ ಮಾರುವವರ ಇಡೀ ಕುಟುಂಬ, ಮಧ್ಯವರ್ತಿಗಳು, ಪತ್ರ ಬರಹಗಾರ, ಕೊಳ್ಳುವವರು ಸೇರಿ ಕನಿಷ್ಠ ಇಪ್ಪತ್ತಕ್ಕೂ ಹೆಚ್ಚು ಮಂದಿ ಸೇರುತ್ತಾರೆ. ಇಂತಹ ಹತ್ತು ಕುಟುಂಬಗಳ ವ್ಯವಹಾರ ಬಂದರೆ ಸಾಕು ಇಡೀ ರಸ್ತೆಯಲ್ಲಿ ನಡೆದುಕೊಂಡು ಹೋಗುವುದು ಸಹ ದುಸ್ತರವಾಗುತ್ತಿದೆ.

ಸಬ್ ರಿಜಿಸ್ಟ್ರಾರ್ ಕಛೇರಿಗೆ ಸದ್ಯ ತಾಲಕು ಕಛೇರಿ ಆವರಣದಲ್ಲಿ ಜಾಗವಿದ್ದು ಇದುವರೆಗೂ ಸಂಬಂಧಿಸಿದ ಅಧಿಕಾರಿಗಳು ಕಟ್ಟಡ ನಿರ್ಮಿಸಲು ನೀಲನಕ್ಷೆಯನ್ನು ತಯಾರಿಸಿಲ್ಲ. ಈಗಿರುವುದು ಬಾಡಿಗೆ ಕಟ್ಟಡವಾಗಿದ್ದು ಅತಿ ಹೆಚ್ಚು ಆದಾಯವಿರುವ ಇಲಾಖೆಯನ್ನು ವಿಶಾಲವಾದ ಕಟ್ಟಡಕ್ಕಾದರೂ ವರ್ಗಾಯಿಸುವ ಕೆಲಸ ಮಾಡದಿರುವುದು ಏಕೆ ಎಂಬ ಪ್ರಶ್ನೆ ಸಾರ್ವಜನಿಕರದ್ದಾಗಿದೆ.

ಗ್ರಾಹಕರು ಮತ್ತು ನಿವಾಸಿಗಳ ಕೂಗಿಗೆ ಸಬ್ ರಿಜಿಸ್ಟ್ರಾರ್ ಹಾಗೂ ಇನ್ನಿತರ ಸಾರ್ವಜನಿಕ ಸಂಸ್ಥೆಗಳು ಓಗೊಟ್ಟು ತಮ್ಮ ಕಛೇರಿಯನ್ನು ಬದಲಾಯಿಸಲಿ. ಪೋಲೀಸರು ಈ ಹಿಂದೆ ಮಾಡಿದಂತೆ ಏಕಮುಖ ದಾರಿ (ಒನ್ ವೇ) ಯನ್ನಾದರೂ ಮಾಡಲಿ ಎಂಬುದು ಸಾರ್ವಜನಿಕರ ಹಕ್ಕೊತ್ತಾಯವಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.