ಚನ್ನಪಟ್ಟಣ: ಸಾರ್ವಜನಿಕರಿಗೆ ಕರೋನಾ ಬಗ್ಗೆ ಇರುವ ಭೀತಿಯನ್ನೇ ಬಂಡವಾಳ ಮಾಡಿಕೊಂಡ ಕೆಲ ಮೆಡಿಕಲ್ ನ ಮಾಲೀಕರು ಮುಖಗವಸುಗಳಿಗೆ (ಮಾಸ್ಕ್) ಮೂಲ ಬಂಡವಾಳಕ್ಕಿಂತ ಕನಿಷ್ಠ ಹತ್ತು ಪಟ್ಟು ಹೆಚ್ಚು ಹಣಕ್ಕೆ ಮಾರಾಟ ಮಾಡುತ್ತಿರುವುದರ ಬಗ್ಗೆ ಮಾಹಿತಿ ಪಡೆದ ಸಂಬಂಧಿಸಿದ ಅಧಿಕಾರಿಗಳು ಇಂದು ದಾಳಿ ನಡೆಸಿ ದಂಡ ವಿಧಿಸಿದ್ದಾರೆ.

ದುಬಾರಿ ಬೆಲೆಗೆ ಮಾಸ್ಕ್ ಮಾರಾಟ ಮಾಡುತ್ತಿದ್ದ ಮೆಡಿಕಲ್ ಮತ್ತು ಕೆಲ ಅಂಗಡಿಗಳ ಮೇಲೆ ಜಿಲ್ಲಾ ಸಹಾಯಕ ಔಷಧ ನಿಯಂತ್ರಕರು ಮತ್ತು ಕಾನೂನು ಮಾಪನ ಶಾಸ್ತ್ರ ವಿಭಾಗದ ಅಧಿಕಾರಿಗಳು ಜಂಟಿ ದಾಳಿ ನಡೆಸಿ ಒಂದು ಮೆಡಿಕಲ್ ಮತ್ತು ಒಂದು ಅಂಗಡಿಗೆ ದಂಡ ವಿಧಿಸಿದ್ದು ಮತ್ತೊಂದು ಮೆಡಿಕಲ್ ನವರು ಗುರುವಾರ ಕಛೇರಿಗೆ ಬಂದು ದಂಡ ಪಾವತಿಸುವುದಾಗಿ ಮನವಿ ಮಾಡಿದ್ದಾರೆಂದು ತಿಳಿದುಬಂದಿದೆ.

ಮುಖಗವಸುಗಳಿಗೆ ದುಬಾರಿ ಬೆಲೆ ಪಡೆಯಲಾಗುತ್ತಿದೆ ಎಂದು ಸಾರ್ವಜನಿಕರಿಂದ ವ್ಯಾಪಕ ದೂರು ಕೇಳಿ ಬಂದಿತ್ತು. ಈ ಸಂಬಂಧ ಜಿಲ್ಲಾಧಿಕಾರಿ ಮತ್ತು ಕಾರ್ಯನಿರ್ವಹಣಾಧಿಕಾರಿಗಳು ಸಹ ಎಚ್ಚರಿಕೆ ನೀಡಿದ್ದರು. ಈ ಹಿನ್ನೆಲೆಯಲ್ಲಿ ದಾಳಿನಡೆಸಿದ ಅಧಿಕಾರಿಗಳು ಮೂರು ಅಂಗಡಿಗಳಿಗೆ 5 ಸಾವಿರ ರೂ. ದಂಡವನ್ನು ಸ್ಥಳದಲ್ಲೇ ವಿಧಿಸಿ ಹೆಚ್ಚಿನ ಬೆಲೆಗೆ ಮಾರಾಟ ಮಾಡದಂತೆ ತಾಕೀತು ಮಾಡಿದ್ದಾರೆ.

ನಗರದ ಲೈಫ್‍ಕೇರ್, ಪೇಟೆ ಬೀದಿಯ ರತ್ನ ಮೆಡಿಕಲ್ಸ್ ದಂಡ ವಿಧಿಸಿರುವ ಮೆಡಿಕಲ್ ಗಳು, ಇನ್ನು ಖಾಸಗಿಯಾಗಿ ಮಾಸ್ಕ್ ಗಳನ್ನು ಮಾರುತ್ತಿದ್ದ ಶ್ರೀನಿವಾಸ ಸ್ಟೋರ್ ಗೂ ದಂಡ ವಿಧಿಸಲಾಗಿದೆ.

ಎಚ್ಚರಿಕೆ ನೀಡಿದ ಅಧಿಕಾರಿಗಳು:

ಮೂರರಿಂದ ನಾಲ್ಕು ರೂಪಾಯಿಗೆ ಮಾರಾಟ ಮಾಡಬೇಕಿದ್ದ ಮಾಸ್ಕ್ ಗಳನ್ನು ದಾಸ್ತಾನು ಇಲ್ಲ ಎಂಬ ನೆಪ ಹೇಳಿ ೨೦ ರಿಂದ ೩೦ ರೂಪಾಯಿಗಳಿಗೆ ಮಾರಾಟ ಮಾಡಲಾಗುತ್ತಿರುವ ಬಗ್ಗೆ ಮಾಹಿತಿ ಲಭ್ಯವಾಗಿದೆ. ಸಾರ್ವಜನಿಕರಿಗೆ ಕೊರೋನಾ ಹಿನ್ನೆಲೆಯಲ್ಲಿ ಎದುರಾಗಿರುವ ಆತಂಕವನ್ನು ಲಾಭಮಾಡಿಕೊಂಡು ದುಬಾರಿ ಬೆಲೆ ಪಡೆಯುವುದು ಕಾನೂನು ಬಾಹೀರವಾಗಿದ್ದು, ಅಂತಹ ಅಂಗಡಿ ಮತ್ತು ಮೆಡಿಕಲ್ಸ್ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗುವುದು. ಹಾಗೂ ಸೋಂಕು ಇರುವವರು ಮತ್ತು ಆಸ್ಪತ್ರೆಯ ಸಿಬ್ಬಂದಿಗಳು ಮಾತ್ರ ಮಾಸ್ಕ್ ಗಳನ್ನು ಧರಿಸಿದರೇ ಸಾಕು. ಸಾರ್ವಜನಿಕರೆಲ್ಲರಿಗು ಅವಶ್ಯಕತೆ ಇಲ್ಲ ಎಂದು ಅಧಿಕಾರಿಗಳು ಈ ಸಂದರ್ಭದಲ್ಲಿ ಪುನರುಚ್ಚರಿಸಿದರು.

ದಾಳಿಯಲ್ಲಿ ಜಿಲ್ಲಾ ಸಹಾಯಕ ಔಷಧ ನಿಯಂತ್ರಕರಾದ ಸುರೇಶ್, ಕೆಂಪಯ್ಯ, ಕಾನೂನು ಮಾಪನ ಶಾಸ್ತ್ರ ಇಲಾಖೆಯ ಕನಕಪುರ ವಿಭಾಗದ ನಿರೀಕ್ಷಕ  ಎನ್.ಟಿ.ರಾಮಚಂದ್ರು ದಾಳಿಯಲ್ಲಿ ಪಾಲ್ಗೊಂಡಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.