ಚನ್ನಪಟ್ಟಣ: ಕರೋನಾ ವೈರಸ್ ಎಂಬ ಮಹಾಮಾರಿಯನ್ನು ತಡೆಗಟ್ಟುವ ಸದುದ್ದೇಶದಿಂದ ದೇಶಾದ್ಯಂತ ಧರ್ಮಾತೀತ, ಜಾತ್ಯಾತೀತ, ಪಕ್ಷಾತೀತವಾಗಿ ಒಂದು ದಿನ ಜನರೇ ನಿಷೇಧಾಜ್ಞೆ (ಜನತಾ ಕರ್ಫ್ಯೂ) ಆಚರಿಸುವ ಮೂಲಕ ಮನೆಯಲ್ಲೇ ಇರುವಂತೆ ಮನವಿ ಮಾಡಿದ ಪ್ರಧಾನಿ ನರೇಂದ್ರ ಮೋದಿಯವರ ಮನವಿಗೆ ತಾಲ್ಲೂಕಿನ ಮಂದಿ ಸಂಪೂರ್ಣ ಬೆಂಬಲ ನೀಡುವ ಮೂಲಕ ಯಶಸ್ವಿಗೊಳಿಸಿದರು.

ರಾಜಕೀಯ ಪಕ್ಷಗಳು, ಸಂಘಸಂಸ್ಥೆಗಳು ಮತ್ತು ದೊಂಬಿಗಳಾದ ಸಂದರ್ಭಗಳಲ್ಲಿಯೂ ಸಂಪೂರ್ಣ ಯಶಸ್ವಿಯಾಗದ ಬಂದ್ ಇಂದು ಯಶಸ್ವಿಯಾಗುವ ಮೂಲಕ ಇತಿಹಾಸ ಸೃಷ್ಟಿಸಿತು. ಯಾರೇ ಬಂದ್ ಗೆ ಕರೆ ನೀಡಿದರೂ ಪರ ವಿರೋಧಗಳು ಇದ್ದು ವಿರೋಧಿಗಳು ಅಂಗಡಿ ಮುಂಗಟ್ಟುಗಳನ್ನು ತೆರೆದು ಅಥವಾ ವಿರೋಧಿಸುವ ಮೂಲಕ ಸಡ್ಡು ಹೊಡೆದು ಬಂದ್ ವಿಫಲವಾಗಿರುವ ಅನೇಕ ಉದಾಹರಣೆಗಳಿವೆಯಾದರು ಇಂದು ಶೇಕಡಾ ೧೦೦ ಕ್ಕೆ ೧೦೦ ರಷ್ಟು ಬಂದ್ ಯಶಸ್ವಿಯಾಯಿತು.

ರಾಜ್ಯ ಸರ್ಕಾರವೂ ಸಾರಿಗೆ ವ್ಯವಸ್ಥೆ, ಭಾನುವಾರವಾದ್ದರಿಂದ ಸರ್ಕಾರಿ ಕಛೇರಿಗಳಿಗೆ ಇದ್ದ ರಜೆ, ರೇಷ್ಮೆ ಗೂಡಿನ ಮಾರುಕಟ್ಟೆ, ಮಾವಿನ ಹಣ್ಣು ಮಾರುಕಟ್ಟೆ, ವೀಳ್ಯದೆಲೆ ಮಾರುಕಟ್ಟೆ, ತರಕಾರಿ ಮಾರುಕಟ್ಟೆ, ದಿನಬಳಕೆಯ ವಸ್ತುಗಳ ಹಾಗೂ ದಿನಸಿ ಅಂಗಡಿಗಳು, ಗ್ಯಾರೇಜ್ ಗಳು, ಮಾಂಸದಂಗಡಿಗಳು, ಹೆಂಡದಗಂಗಡಿಗಳು, ಚಹಾದಂಗಡಿಗಳು ಸೇರಿದಂತೆ ಇನ್ನಿತರ ಎಲ್ಲಾ ರೀತಿಯ ಮತ್ತು ವರ್ಗದ ಅಂಗಡಿಯ ಮಾಲೀಕರು ಸ್ವಯಂ ಕರ್ಫ್ಯೂ ವಿಧಿಸಿಕೊಳ್ಳುವ ಮೂಲಕ ಇಡೀ ನಗರವೇ ಸ್ತಬ್ದಗೊಂಡಿತ್ತು.

ಸಾರ್ವಜನಿಕ ಆಸ್ಪತ್ರೆ ಮತ್ತು ಖಾಸಗಿ ಆಸ್ಪತ್ರೆ ಗಳಲ್ಲಿ ಕೆಲವೇ ಕೆಲವು ಒಳರೋಗಿಗಳನ್ನು ಹೊರತುಪಡಿಸಿದರೆ ಹೊರ ರೋಗಿಗಳ ಸಂಖ್ಯೆ ಕ್ಷೀಣವಾಗಿತ್ತು. ಬೆರಳೆಣಿಕೆಯ ಔಷಧ ಅಂಗಡಿಗಳು (ಮೆಡಿಕಲ್) ತೆರೆದಿದ್ದವಾದರೂ ಬಣಗುಡುತ್ತಿದ್ದವು. ಬೀದಿಬದಿಯ ವ್ಯಾಪಾರಿಗಳು ಸಹ ಸಂಪೂರ್ಣ ಬೆಂಬಲ ನೀಡಿದ್ದು, ಎಲ್ಲಾ ಸಾರ್ವಜನಿಕರು ಮನೆಯೊಳಗೆ ಸೇರಿಕೊಂಡಿದ್ದರ ಫಲವಾಗಿ ನಗರದ ಪ್ರತಿ ಬೀದಿಗಳು ಬಣಗುಡುತ್ತಿದ್ದವು.

ಕ್ಷಣಕ್ಕೆ ನೂರಾರು ವಾಹನಗಳು ಜುಂಯ್ಯನೇ ಮುನ್ನುಗ್ಗುತಿದ್ದ ಬೆಂಗಳೂರು ಮೈಸೂರು ಹೆದ್ದಾರಿಯಲ್ಲಿ ಗಂಟೆಗೆ ಹತ್ತಾರು ವಾಹನಗಳು ಹೋಗುತ್ತಿದ್ದವು.

ಸದಾ ಗಿಜಿಗುಡುತ್ತಿದ್ದ ಬಸ್ ನಿಲ್ದಾಣ, ರೈಲ್ವೆ ನಿಲ್ದಾಣ, ಅಂಚೆ ಕಚೇರಿ ರಸ್ತೆ, ಷೇರು ಹೋಟೆಲ್, ಸಾತನೂರು ವೃತ್ತ ಗಳು ವಾಹನಗಳು ಮತ್ತು ಸಾರ್ವಜನಿಕರಿಲ್ಲದೇ ಭಣಗುಡುತ್ತಿದ್ದರೆ ವಾಹನಗಳ ಅಬ್ಬರದ ಓಡಾಟವಿಲ್ಲದ ರಸ್ತೆಗಳು ಬೃಹತ್ ಗಾತ್ರದ ಕರಿ ಹೆಬ್ಬಾವು ಮಲಗಿದಂತೆ ಭಾಸವಾಗುತ್ತಿತ್ತು.

ಸಂಜೆ ಐದು ಗಂಟೆಗೆ ಬಹುತೇಕ ಎಲ್ಲರೂ ಅವರವರ ಮನೆಯಲ್ಲೇ ಚಪ್ಪಾಳೆ ತಟ್ಟುವ ಮೂಲಕ ಕರೋನಾ ವೈರಸ್ ಹರಡುತ್ತಿದೆ ಎಂಬ ಅರಿವಿದ್ದರು, ಸಮಾಜದ ಆರೋಗ್ಯಕ್ಕಾಗಿ ಅದರ ವಿರುದ್ಧ ಸೆಣಸುತ್ತಿರುವ ವೈದ್ಯರು, ದಾದಿಯರು, ಔಷಧ ಮಾರಾಟಗಾರರು, ಸೈನಿಕರು, ದಿನನಿತ್ಯ ಅಗತ್ಯ ವಸ್ತುಗಳ ವಿತರಕರು ಹಾಗೂ ಮಾಧ್ಯಮದವರಿಗೆ ಕೃತಘ್ನತೆ ಅರ್ಪಿಸಲೋಸುಗ ಚಪ್ಪಾಳೆ ತಟ್ಟಿ ಅಭಿನಂದನೆ ಸಲ್ಲಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.