ಕೊರೊನಾ (ಕೋವಿಡ್-೧೯ ) ತಡೆಗಟ್ಟಲು ಹಾಗೂ ಸಾರ್ವಜನಿಕರಿಗೆ ಅರಿವು ಮೂಡಿಸಿದ ಮಾಧ್ಯಮದವರ ಸಹಕಾರ ಶ್ಲಾಘನೀಯ, ಮಾಧ್ಯಮದ ಮೂಲಕ ಹಳ್ಳಿಹಳ್ಳಿಯ ಮೂಲೆಯ ಸಾರ್ವಜನಿಕರಿಗೆ ‌ಅರಿವು ಮೂಡಿಸಿದ್ದೀರಿ.

ಮುಂದೆಯೂ ಸಹಕಾರ ಇರಲಿ ಎಂದು ತಾಲ್ಲೂಕು ಪಂಚಾಯತಿ ಅಧ್ಯಕ್ಷ ಹರೂರು ರಾಜಣ್ಣ ತಿಳಿಸಿದರು.

ಅವರು ಇಂದು ತಾಲ್ಲೂಕು ಪಂಚಾಯತಿ ಸಭಾಂಗಣದಲ್ಲಿ ಮಾಧ್ಯಮದವರು, ಪೋಲೀಸ್ ಇಲಾಖೆ, ವೈದ್ಯಕೀಯ ಸಿಬ್ಬಂದಿ, ಪೌರಕಾರ್ಮಿಕರು, ಆಶಾ ಕಾರ್ಯಕರ್ತೆಯರು, ಹಸಿದವರಿಗೆ ಅನ್ನ ನೀಡುತ್ತಿರುವ ಸಂಘಸಂಸ್ಥೆಗಳಿಗೆ ಅಭಿನಂದನೆ ಸಲ್ಲಿಸಿ ಮಾತನಾಡಿದರು.

ಎಪಿಎಂಸಿ ಮಾರುಕಟ್ಟೆ ಗೆ ಬರುತ್ತಿರುವ ಹೊರ ರಾಜ್ಯದ ಲಾರಿಗಳು ಮತ್ತು ಕಾರ್ಮಿಕರು, ವೀಳ್ಯದೆಲೆ ಮಾರಾಟ ಮತ್ತು ಕೊಂಡುಕೊಳ್ಳುತ್ತಿರುವವರ ಬಗ್ಗೆ  ಸಂಬಂಧಿಸಿದ ಇಲಾಖೆಯವರು ಮೊದಲ ಆದ್ಯತೆ ನೀಡಲಿ. ರೈತರ ಟಿಸಿ ಸುಟ್ಟು ಹೋದಂತಹ ಸಂದರ್ಭದಲ್ಲಿ ಅವರಿಗೆ ರಿಪೇರಿ ಮಾಡಲು ಪೋಲೀಸರ ಸಹಕಾರ ನೀಡಲಿ ಎಂದು ಅವರು ತಿಳಿಸಿದರು.

ಸರ್ಕಾರವು ಈ ಹಿಂದೆ ರಾಮನಗರ, ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಒಟ್ಟಿಗೆ ಸೇರಿಸಿ ಮುಕ್ತ ಓಡಾಟ ಕಲ್ಪಿಸಲು ಹೊರಟಿದ್ದು ದುರಾದೃಷ್ಟ, ಸದ್ಯ ಅದನ್ನು ಹಿಂಪಡೆದಿದ್ದಾರೆ. ಮುಂದೆ ಆ ರೀತಿ ಮಾಡಿದರೆ ಎಲ್ಲರೂ ಒಗ್ಗೂಡಿ ಪ್ರತಿಭಟಿಸಿ ರಾಮನಗರ ಜಿಲ್ಲೆಯನ್ನು ಹಸಿರು ವಲಯವಾಗಿರುವಂತೆಯೇ ನೋಡಿಕೊಳ್ಳಬೇಕು ಎಂದು ಅಭಿಪ್ರಾಯಪಟ್ಟರು.

ರೈತರಿಗೆ ಸಂಬಂಧಿಸಿದ ಇಲಾಖೆಗಳ ಅಧಿಕಾರಿಗಳು ಐದು ಮಂದಿ ಕೆಲಸ ನಿರ್ವಹಿಸುವಂತೆ ನಿರ್ದೇಶಿಸಿ ಕೆಲಸ ಪ್ರಾರಂಭಿಸಬೇಕೆಂದು ಇದೇ ವೇಳೆ ಅಧ್ಯಕ್ಷ ರಾಜಣ್ಣ ತಿಳಿಸಿದರು.

ತಾಲ್ಲೂಕು ಪಂಚಾಯತಿ ಕಾರ್ಯನಿರ್ವಹಣಾಧಿಕಾರಿ ಚಂದ್ರು ಮಾತನಾಡಿ ಪ್ರತಿ ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ ಗ್ರಾಮ ಪಡೆಗಳನ್ನು ರಚಿಸಲಾಗಿದೆ. ಕೋಡಂಬಳ್ಳಿ ಗ್ರಾಮದಲ್ಲಿ ಕ್ಷುಲ್ಲಕ ಕಾರಣಗಳಿಗೆ ಗಲಾಟೆ ಮಾಡುತ್ತಿದ್ದರಿಂದ ಕ್ರಮ ಜರುಗಿಸಿದ್ದೇವೆ.

ವಲಸೆ ಕಾರ್ಮಿಕರಿಗೂ ಸಹ ಅನೇಕ ಕಾರ್ಖಾನೆಯ ಮುಖ್ಯಸ್ಥರು ನೀಡಿದ ಕಿಟ್ ಗಳನ್ನು ಪ್ರಾಮಾಣಿಕವಾಗಿ ವಿತರಿಸುತ್ತಿದ್ದೇವೆ ಇದಕ್ಕೆಲ್ಲಾ ಮಾಧ್ಯಮದವರ ಸಹಕಾರ ಅತ್ಯಗತ್ಯ ಎಂದರು.

ತಹಶಿಲ್ದಾರ್ ಸುದರ್ಶನ್ ರವರು ಮಾತನಾಡಿ ಪೋಲೀಸರು, ಪೌರಕಾರ್ಮಿಕರು ಸೇರಿದಂತೆ ಅನೇಕ ಇಲಾಖೆಯ ವರ್ಗದವರು ಕೊರೊನಾ ತಡೆಗಟ್ಟಲು ಸಹಕಾರ ನೀಡಿದ್ದಾರೆ. ಆರೋಗ್ಯ ಇಲಾಖೆಯಂತು‌ ಕೊರೊನಾ ಸೋಂಕಿತರನ್ನು ಗುರುತಿಸಿ, ಅವರನ್ನು ಒಪ್ಪಿಸಿ, ಕ್ವಾರಂಟೈನ್ ಮಾಡಿಸುತ್ತಿರುವುದು ಸವಾಲಿನ ಕೆಲಸವಾಗಿದ್ದು ಅವರು ನಿಭಾಯಿಸುತ್ತಿರುವುದು ಶ್ಲಾಘನೀಯ ಎಂದರು.

ಎಪಿಎಂಸಿ ಗೆ ಸಂಬಂಧಿಸಿದಂತೆ ಹಲವಾರು ದೂರುಗಳಿದ್ದು ಇಂದು ಅಧಿಕಾರಿಗಳ‌ ಸಭೆ ನಡೆಸಿ ಕ್ರಮ ಕೈಗೊಳ್ಳಲಾಗುವುದು ಎಂದರು.

ಪೋಲೀಸ್ ಉಪ ಅಧೀಕ್ಷಕ ಓಂಪ್ರಕಾಶ್ ಮಾತನಾಡಿ ರಾಮನಗರ ಜಿಲ್ಲೆಯು ಕೊರೊನಾ ಗೆ ಸಂಬಂಧಿಸಿದಂತೆ ಝೀರೋ ಹಂತದಲ್ಲಿ ಇದೆ. ಮುಂದೆಯೂ ಅದನ್ನೇ ಉಳಿಸಿಕೊಳ್ಳಲು ಸೂಕ್ತ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿವೆ.

ಪಾಸ್ ವಿತರಣೆಗೆ ಜಿಲ್ಲಾ ಪೋಲೀಸ್ ಇಲಾಖೆಯ ವತಿಯಿಂದ ಆನ್ಲೈನ್ ಮೂಲಕ ವಿತರಿಸುತ್ತಿದ್ದು, ಮೆಡಿಕಲ್ ಮತ್ತು ಸಾವಿಗೆ ಸಂಬಂಧಿಸಿದಂತೆ ವಿತರಣೆ ಮಾಡಲಾಗುತ್ತಿದೆ. ನಮ್ಮ ಸುತ್ತಲಿನ ಎಲ್ಲಾ ಜಿಲ್ಲೆಗಳಲ್ಲೂ ಕರೋನಾ ಪಾಸಿಟಿವ್ ಇದ್ದು, ನಮ್ಮ ಜಿಲ್ಲೆಯನ್ನು ಕೊರೊನಾ ಮುಕ್ತ ಜಿಲ್ಲೆಯನ್ನಾಗಿ ಉಳಿಸಿಕೊಳ್ಳಲು ಪ್ರಯತ್ನಿಸುತ್ತೇವೆ ಎಂದು ಅಭಿಪ್ರಾಯ ಪಟ್ಟರು.

ಇತ್ತೀಚೆಗೆ ಕೊರೊನಾ ಗೆ ಸಂಬಂಧಿಸಿದ ಯಾವುದೇ ಲಕ್ಷ ಇಲ್ಲದಿರುವವರೆಗೂ ರೋಗ ಹರಡುತ್ತಿರುವುದು ದುರದೃಷ್ಟಕರ. ರಾಮನಗರ ಸುತ್ತಲಿನ ಎಲ್ಲಾ ಜಿಲ್ಲೆಗಳಲ್ಲೂ ಪಾಸಿಟಿವ್ ಇರುವುದರಿಂದ ನಾವು ಬಹಳ ಎಚ್ಚರಿಕೆಯಿಂದಿರಬೇಕು, ಆರೋಗ್ಯ ಇಲಾಖೆಯ ಕೆಲಸ ಶ್ಲಾಘನೀಯವಾಗಿದ್ದು, ಮಾಧ್ಯಮದವರು ಅರಿವು ಮೂಡಿಸುತ್ತಿರುವುದು ಅಭಿನಂದನೀಯ ಎಂದು ತಿಳಿಸಿದರು.

ತಾಲ್ಲೂಕು ಆರೋಗ್ಯ ಅಧಿಕಾರಿ ಡಾ ರಾಜು ಮಾತನಾಡಿ ಕೊರೊನಾ ಗೆ ಸಂಬಂಧಿಸಿದ ಹಾಗೆ ಮೊದಲು ಸಾರ್ವಜನಿಕರು ಕೈಗೊಳ್ಳಬೇಕಾದ ಕೆಲಸ ಎಂದರೆ ಅಂತರ ಕಾಯ್ದುಕೊಳ್ಳುವುದು. ಎಲ್ಲಾ ಕಾಯಿಲೆಗಳಂತೆ ಇದು ಒಂದು ಕಾಯಿಲೆ. ಎಲ್ಲಾ ಕಾಯಿಲೆಗಳಲ್ಲೂ ಸಾವು ನೋವು ಇರುತ್ತವೆ.

ಅನಿವಾರ್ಯವಾಗಿ ಕ್ವಾರಂಟೈನ್ ಮಾಡಲು ಅವಕಾಶ ನೀಡದೆ ತಾವುಗಳೇ ಮನೆಯಲ್ಲಿ ಕ್ವಾರಂಟೈನ್ ಇರುವುದು ಸೂಕ್ತ.

ಸೋಂಕಿತರನ್ನು ಐಸೋಲೇಷನ್ ನಲ್ಲಿ ಇಡುತ್ತೇವೆ, ಶಂಕಿತರನ್ನು ಕ್ವಾರಂಟೈನ್ ನಲ್ಲಿ ಇಡುತ್ತೇವೆ.

ನಮ್ಮ ಜಿಲ್ಲೆ ಮತ್ತು ತಾಲ್ಲೂಕಿನಲ್ಲಿ ಸದ್ಯ ಯಾವುದೇ ಸೋಂಕಿತರು ಇಲ್ಲ.

ಮುನ್ನೆಚ್ಚರಿಕೆಯ ಕ್ರಮವಾಗಿ ಹೊನ್ನನಾಯಕನಹಳ್ಳಿ ಹಾಸ್ಟೆಲ್ ನಲ್ಲಿ ೧೦೦ ಹಾಸಿಗೆಯ ಆಸ್ಪತ್ರೆ ನಿರ್ಮಾಣ ಮಾಡಿದ್ದೇವೆ. ಅವಶ್ಯಕತೆ ಬಿದ್ದರೆ  ಹತ್ತಿರದಲ್ಲಿರುವ ಕಿತ್ತೂರು ಚೆನ್ನಮ್ಮ ವಸತಿ ಶಾಲೆಯನ್ನು ವಶಪಡಿಸಿಕೊಂಡು ಆಸ್ಪತ್ರೆ ನಿರ್ಮಾಣ ಮಾಡಲು ಆದೇಶವಿದೆ.

೧೪೭ ಮಂದಿಯನ್ನು ಹಲವಾರು ಕಾರಣಗಳಿಂದಾಗಿ ಐಸೋಲೇಷನ್ ಮಾಡಿದ್ದೀವಿ. ೧೪೭ ಮಂದಿಯಲ್ಲಿ ೬೦ ಮಂದಿ ವಿದೇಶದಿಂದ ಬಂದವರು. ೨೪ ಮಂದಿ ಸ್ಥಳೀಯರನ್ನು ಐಸೋಲೇಷನ್ ನಲ್ಲಿ ಇರಿಸಲಾಗಿದೆ.

ಅದೇಶ ಉಲ್ಲಂಘಿಸಿದವರೂ ಸಹ‌ ನಮ್ಮಲ್ಲಿದ್ದು ಆರಕ್ಷಕರ ಮೂಲಕ ಕ್ವಾರಂಟೈನ್ ಒಳಪಡಿಸಿದ್ದೆವೆ. ೧೨ ಮಂದಿ ಹೊರ ರಾಜ್ಯದವರಿದ್ದು, ಮಿಕ್ಕವರು ರಾಜ್ಯದೊಳಗಿನ ರೋಗಿಗಳನ್ನು ಕ್ವಾರಂಟೈನ್ ಮಾಡಿದ್ದೇವೆ.

ಇದುವರೆಗೂ ಎಂಭತ್ತು ಮಂದಿಯ ಸ್ವಾಬ್ ತೆಗೆದಿದ್ದು ಎಲ್ಲವೂ ನೆಗೆಟಿವ್ ಬಂದಿದೆ. ಈ ಎಲ್ಲಾ ಕೆಲಸಗಳನ್ನು ತಾಲ್ಲೂಕು ಮಟ್ಟದ ಎಲ್ಲಾ ಇಲಾಖೆಯ ಸಹಕಾರದಿಂದ ಮಾಡಿದ್ದೇವೆ. ಎಲ್ಲಾ ಇಲಾಖೆಯ ಅಧಿಕಾರಿಗಳು, ಸಿಬ್ಬಂದಿಗಳು ಮತ್ತು ಮಾಧ್ಯಮದವರ ಸಹಕಾರ ಲಭಿಸಿದೆ. ಎಲ್ಲರಿಗೂ ಅಭಾರಿಯಾಗಿದ್ದೇವೆ ಎಂದರು.

ಶಂಕಿತರು ಮತ್ತು ಸೋಂಕಿತರಿಗೂ ವ್ಯತ್ಯಾಸವಿದ್ದು ಸಾಮಾಜಿಕ ಜಾಲತಾಣದಲ್ಲಿ ತಪ್ಪು ಸಂದೇಶ ಹರಡುವವರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಾಗುವುದು. ಯಾರ ಬಗ್ಗೆಯಾದರೂ ಶಂಕೆ ಮೂಡಿದರೆ ನಿಖರವಾಗಿ ತಿಳಿದುಕೊಂಡು ತಿಳಿಸಿದರೆ ಅವರ ಮನವೊಲಿಸಿ ಕ್ವಾರಂಟೈನ್ ಮಾಡಲು ಶ್ರಮಿಸುತ್ತೇವೆ ಎಂದು ತಿಳಿಸಿದರು.

ಎಪಿಎಂಸಿ ಗೆ ಬರುವ ಎಲ್ಲಾ ಲಾರಿಗಳು ಮತ್ತು ಸಿಬ್ಬಂದಿಗಳು ಕನಿಷ್ಠ ನಾಲ್ಕು ಚೆಕ್ ಪೋಸ್ಟ್ ಗಳನ್ನು ದಾಟಿ ಬರುತ್ತಾರೆ. ಎಲ್ಲಾ ಚೆಕ್ ಪೋಸ್ಟ್ ಗಳಲ್ಲೂ ಅವರಿಗೆ ಕೆಮ್ಮು, ಜ್ವರ, ನೆಗಡಿ, ತಲೆನೋವು ಎಲ್ಲವನ್ನೂ ಪರೀಕ್ಷಿಸಿಯೇ ಕಳುಹಿಸುತ್ತಾರೆ. ಇಲ್ಲಿಗೆ ಬಂದ ನಂತರವೂ ಅವರಿಗೆ ಯಾವುದೇ ಸಣ್ಣ ರೋಗ ಕಂಡು ಬಂದರು ಅವರನ್ನು ಪರೀಕ್ಷಿಸಿ ಕ್ರಮ ಕೈಗೊಳ್ಳುತ್ತೇವೆ. ಸಾರ್ವಜನಿಕರಿಗೆ ಆತಂಕ ಬೇಡ ಎಂದು ತಿಳಿಸಿದರು.

ಇದೇ ವೇಳೆ ಮಾಧ್ಯಮ ಮಿತ್ರರಿಗೆ ಪ್ರಥಮ ದರ್ಜೆ ಗುತ್ತಿಗೆದಾರ ಆಣಿಗೆರೆ ಸಿದ್ದರಾಜು ರವರ ಸಹಯೋಗದೊಂದಿಗೆ ಸ್ಯಾನಿಟೈಸರ್ ಮತ್ತು ಮಾಸ್ಕ್ ಗಳನ್ನು ತಾಲ್ಲೂಕು ಪಂಚಾಯತಿ ವತಿಯಿಂದ ವಿತರಿಸಲಾಯಿತು.

ಸಭೆಯಲ್ಲಿ ಎಇಓ ಲೋಕೇಶ್, ಪೌರಾಯುಕ್ತ ಶಿವನಂಕಾರಿಗೌಡ, ಕ್ಷೇತ್ರ ಶಿಕ್ಷಣಾಧಿಕಾರಿ ನಾಗರಾಜು, ಪಶು ಸಹಾಯಕ ನಿರ್ದೇಶಕ ಡಾ ಜಯರಾಮು, ರೇಷ್ಮೆ ಸಹಾಯಕ ನಿರ್ದೇಶಕ ಮಂಜುನಾಥ, ತೋಟಗಾರಿಕೆ ಸಹಾಯಕ ನಿರ್ದೇಶಕ ವಿವೇಕ್, ಸಿಡಿಪಿಓ ಕಾಂತರಾಜು, ಸ್ಥಳೀಯ ಮಾಧ್ಯಮ ಮಿತ್ರರು ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.